ܪ̈ܗܘܡܝܐ 5 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܛܥܘܢܝܬ̈‌ܐ ܕܙܕܝܩܘܬ‌ܐ

¹ ܒܵܣ ܟܲܕ ܦܝܼܫ ܠܲܢ ܡܘܼܟܫܸܛܹܐ ܒܗܲܝܡܵܢܘܼܬܵ‌ܐ ܐܝܼܬ ܠܲܢ ܫܠܵܡܵܐ ܥܲܡ ܐܲܠܵܗܵܐ ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ.

² ܒܝܼܹܗ ܐܝܼܬ ܠܲܢ ܩܲܪܒܲܢܬܵ‌ܐ ܒܗܲܝܡܵܢܘܼܬܵ‌ܐ ܠܐܵܗܵܐ ܫܵܦܵܩܲܬ ܕܟܸܠܝܹܐ ܝܘܲܚ ܩܸܘܝܹܐ ܓܵܘܘܼܗ̇، ܘܒܸܚܕܵܝܵܐ ܝܘܲܚ ܒܗܹܒ݂ܝܼ ܕܫܘܼܒ݂ܚܵܐ ܕܐܲܠܵܗܵܐ.

³ ܠܵܐ ܐܲܚܟ̰ܝܼ ܗܵܕܟ݂ܵܐ، ܐܸܠܵܐ ܒܸܚܕܵܝܵܐ ܝܘܲܚ ܒܐܘܼܠܨܵܢܲܢ̈ ܣܵܒܵܒ ܒܝܼܕܵܥܵܐ ܝܘܲܚ ܕܐܘܼܠܨܵܢܵܐ ܒܸܬ ܝܵܗܒܹܠ ܠܲܢ ܡܣܲܝܒܪܵܢܘܼܬܵ‌ܐ،

⁴ ܘܡܣܲܝܒܪܵܢܘܼܬܵ‌ܐ ܟܹܐ ܝܵܗܒ݂ܵܐ ܠܲܢ ܢܸܣܝܵܢܵܐ، ܘܢܸܣܝܵܢܵܐ ܟܹܐ ܝܵܗܒܹܠ ܠܲܢ ܗܹܒ݂ܝܼ،

⁵ ܘܗܹܒ݂ܝܼ ܠܹܐ ܡܲܢܟܸܦܵܐ ܠܲܢ، ܣܵܒܵܒ ܚܘܼܒܵܐ ܕܐܲܠܵܗܵܐ ܦܝܼܫ ܠܹܗ ܡܘܼܫܦܸܟ݂ܵܐ ܓܵܘ ܠܸܒܲܢ ܒܝܲܕ ܪܘܼܚܵܐ ܕܩܘܼܕܫܵܐ ܕܝܘܼܗܒܹܠ ܠܹܗ ܐܸܠܲܢ.

⁶ ܣܵܒܵܒ ܒܗ̇ܝ ܥܕܵܢܵܐ ܕܝܼܘܲܚ ܗܘܵܘ ܙܲܒܘܼܢܹ̈ܐ ܡܫܝܼܚܵܐ ܡܝܼܬ ܠܹܗ ܡ̣ܢ ܓܹܒܵܐ ܕܥܵܘܵܠܹ̈ܐ.

⁷ ܒܵܨܘܿܪܹ̈ܐ ܐܢܵܫܹ̈ܐ ܟܹܐ ܡܵܝܬ‌ܝܼ ܡ̣ܢ ܓܹܒܵܐ ܕܚܲܕ ܐܢܵܫܵܐ ܙܲܕܝܼܩܵܐ، ܐܝܼܢܵܐ ܩܵܘܡܵܐ ܕܚܲܕ ܩܲܫܕܸܪ ܕܡܵܐܹܬ ܡ̣ܢ ܓܹܒܵܐ ܕܚܲܕ ܐܢܵܫܵܐ ܛܵܒ݂ܵܐ.

⁸ ܐܝܼܢܵܐ ܐܲܠܵܗܵܐ ܡܘܼܚܙܹܐ ܠܹܗ ܚܘܼܒܹܗ ܐܸܠܲܢ، ܟܲܕ ܚܲܛܵܝܹ̈ܐ ܝܘܲܚ ܗܘܵܘ، ܗܵܕܟ݂ܵܐ ܡܫܝܼܚܵܐ ܡܝܼܬ ܠܹܗ ܡ̣ܢ ܓܹܒܲܢ.

⁹ ܟܲܕ ܦܝܼܫ ܠܲܢ ܡܘܼܟܫܸܛܹܐ ܒܕܸܡܹܗ، ܟܡܵܐ ܒܘܼܫ ܙܵܘܕܵܐ ܒܸܬ ܦܵܝܫܲܚ ܦܘܼܪܩܹܐ ܡ̣ܢ ܟܲܪܒܵܐ ܕܐܲܠܵܗܵܐ ܒܝܼܹܗ.

¹⁰ ܐܝܼܡܲܢ ܕܝܼܘܲܚ ܗܘܵܘ ܕܸܫ̃ܡܸܢܹ̈ܐ ܕܐܲܠܵܗܵܐ، ܦܝܼܫ ܠܲܢ ܣܘܼܙܓܸܪܹܐ ܥܲܡܹܗ ܒܝܲܕ ܡܵܘܬܵ‌ܐ ܕܒܪܘܿܢܹܗ، ܐܝܼܢܵܐ ܐܵܕܝܼܵܐ ܕܣܘܼܙܓܸܪܹܐ ܝܘܲܚ ܟܡܵܐ ܒܘܼܫ ܙܵܘܕܵܐ ܒܸܬ ܦܵܝܫܲܚ ܦܘܼܪܩܹܐ ܒܚܲܝܘܼ̈ܗ‌ܝ.

¹¹ ܘܠܵܐ ܐܲܚܟ̰ܝܼ ܗܵܕܟ݂ܵܐ، ܐܝܼܢܵܐ ܐܘܼܦ ܒܸܚܕܵܝܵܐ ܝܘܲܚ ܒܐܲܠܵܗܵܐ ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ، ܕܒܝܼܹܗ ܩܘܼܒܸܠ ܠܲܢ ܣܲܙܓܲܪܬܵ‌ܐ.

ܡܘܬ‌ܐ ܒܝܕ ܐܕܡ، ܚܝ̈ܐ ܒܝܕ ܡܫܝܚܐ

¹² ܕܵܐܟ݂ܝܼ ܕܚܛܝܼܬܵ‌ܐ ܥܒ݂ܝܼܪܵܗ̇ ܓܵܘ ܥܵܠܡܵܐ ܒܝܲܕ ܚܲܕ ܐܢܵܫܵܐ،ܘܡܵܘܬܵ‌ܐ ܐܬܹ‌ܐ ܠܹܗ ܒܝܲܕ ܚܛܝܼܬܵ‌ܐ، ܗܵܕܟ݂ܵܐ ܡܵܘܬܵ‌ܐ ܐܬܹ‌ܐ ܠܹܗ ܥܲܠ ܟܠܵܝܗ‌ܝ ܐܢܵܫܹ̈ܐ ܣܵܒܵܒ ܟܠܵܝܗ‌ܝ ܚܛܹܐ ܠܗܘܿܢ.

¹³ ܡ̣ܢ ܩܲܕܡ ܕܦܵܐܹܫ ܗܘܵܐ ܝܘܼܗܒ݂ܵܐ ܢܵܡܘܿܣܵܐ، ܐܝܼܬ ܗܘܵܐ ܚܛܝܼܬܵ‌ܐ ܓܵܘ ܥܵܠܡܵܐ. ܐܝܼܢܵܐ ܚܛܝܼܬܵ‌ܐ ܠܹܐ ܝܠܵܗ̇ ܚܘܼܫܒܸܢܬܵ‌ܐ ܚܛܝܼܬܵ‌ܐ ܐܝܼܡܲܢ ܕܠܲܝܬ ܢܵܡܘܿܣܵܐ.

¹⁴ ܐܝܼܢܵܐ ܗܘܼܟܸܡ ܠܹܗ ܡܵܘܬܵ‌ܐ ܡ̣ܢ ܥܕܵܢܵܐ ܕܐܵܕܵܡ ܗܲܠ ܥܕܵܢܵܐ ܕܡܘܼܫܹܐ، ܐܘܼܦ ܥܲܠ ܐܵܢܝܼ ܕܠܵܐ ܚܛܹܐ ܠܗܘܿܢ ܒܫܡܵܛܬܵ‌ܐ ܕܦܘܼܩܕܵܢܵܐ ܐܲܝܟ݂ ܐܵܕܵܡ، ܗ̇ܘ ܕܝܼܗܘܵܐ ܛܘܼܦ̮ܣܵܐ ܕܗ̇ܘ ܕܐܵܬܹ‌ܐ ܗܘܵܐ.

¹⁵ ܐܝܼܢܵܐ ܡܵܘܗܲܒ݂ܬܵ‌ܐ ܠܹܐ ܝܠܵܗ̇ ܐܲܝܟ݂ ܓܢܵܗܵܐ. ܣܵܒܵܒ ܐܸܢ ܒܓܢܵܗܵܐ ܕܚܲܕ ܐܢܵܫܵܐ ܪܵܒܵܐ ܡܝܼܬ ܠܗܘܿܢ، ܟܡܵܐ ܒܘܼܫ ܙܵܘܕܵܐ ܫܵܦܵܩܲܬ ܕܐܲܠܵܗܵܐ، ܘܡܵܘܗܲܒ݂ܬܹܗ ܒܫܵܦܵܩܲܬ ܕܚܲܕ ܐܢܵܫܵܐ، ܝܼܫܘܿܥ ܡܫܝܼܚܵܐ، ܙܝܼܕ ܠܵܗ̇ ܠܪܵܒܵܐ ܐܢܵܫܹ̈ܐ.

¹⁶ ܡܵܘܗܲܒ݂ܬܵ‌ܐ ܠܹܐ ܝܠܵܗ̇ ܐܲܝܟ݂ ܚܛܝܼܬܵ‌ܐ ܕܚܲܕ ܐܢܵܫܵܐ. ܕܝܵܢܬܵ‌ܐ ܐܬܹ‌ܐ ܠܵܗ̇ ܡ̣ܢ ܒܵܬܪ ܚܛܝܼܬܵ‌ܐ ܕܚܲܕ ܐܢܵܫܵܐ ܘܡܘܼܝܬܹ‌ܐ ܠܵܗ̇ ܚܲܝܵܒ݂ܘܼܬܵ‌ܐ، ܐܝܼܢܵܐ ܡܵܘܗܲܒ݂ܬܵ‌ܐ ܐܬܹ‌ܐ ܠܵܗ̇ ܡ̣ܢ ܒܵܬܪ ܪܵܒܵܐ ܓܢܵܗܹ̈ܐ ܘܡܘܼܝܬܹ‌ܐ ܠܵܗ̇ ܡܲܟܫܲܛܬܵ‌ܐ.

¹⁷ ܐܸܢ ܒܓܢܵܗܵܐ ܕܚܲܕ ܐܢܵܫܵܐ ܡܵܘܬܵ‌ܐ ܗܘܼܟܸܡ ܠܹܗ ܒܝܲܕ ܚܲܕ ܐܢܵܫܵܐ، ܒܘܼܫ ܙܵܘܕܵܐ ܐܵܢܝܼ ܕܩܲܒܠܝܼ ܦܸܪܝܘܼܬܵ‌ܐ ܕܫܵܦܵܩܲܬ ܘܡܵܘܗܲܒ݂ܬܵ‌ܐ ܕܙܲܕܝܼܩܘܼܬܵ‌ܐ ܒܸܬ ܗܲܟܡܝܼ ܒܚܲܝܹ̈ܐ ܒܝܲܕ ܚܲܕ ܐܢܵܫܵܐ، ܝܼܫܘܿܥ ܡܫܝܼܚܵܐ.

¹⁸ ܒܵܣ ܕܵܐܟ݂ܝܼ ܕܒܓܢܵܗܵܐ ܕܚܲܕ ܐܢܵܫܵܐ ܕܝܵܢܬܵ‌ܐ ܐܬܹ‌ܐ ܠܵܗ̇ ܥܲܠ ܟܠܵܝܗ‌ܝ ܒܢܲܝ̈ܢܵܫܵܐ، ܗܵܕܟ݂ܵܐ ܒܙܲܕܝܼܩܘܼܬܵ‌ܐ ܕܚܲܕ، ܡܲܟܫܲܛܬܵ‌ܐ ܗܘܹܐ ܠܵܗ̇ ܠܚܲܝܹ̈ܐ ܩܵܐ ܟܠܵܝܗ‌ܝ ܒܢܲܝ̈ܢܵܫܵܐ.

¹⁹ ܣܵܒܵܒ ܕܵܐܟ݂ܝܼ ܕܒܥܵܨܝܘܼܬܵ‌ܐ ܕܚܲܕ ܐܢܵܫܵܐ ܪܵܒܵܐ ܗܘܹܐ ܠܗܘܿܢ ܚܲܛܵܝܹ̈ܐ، ܒܡܲܨܝܲܬܬܵ‌ܐ ܕܚܲܕ ܐܢܵܫܵܐ ܪܵܒܵܐ ܒܸܬ ܦܵܝܫܝܼ ܥܒ݂ܝܼܕܹܐ ܙܲܕܝܼܩܹ̈ܐ.

²⁰ ܢܵܡܘܿܣܵܐ ܐܬܹ‌ܐ ܠܹܗ ܕܙܵܝܕܵܐ ܗܘܵܐ ܓܢܵܗܵܐ، ܐܝܼܢܵܐ ܐܲܝܟܵܐ ܕܚܛܝܼܬܵ‌ܐ ܙܝܼܕ ܠܵܗ̇، ܐܘܼܦ ܫܵܦܵܩܲܬ ܒܘܼܫ ܙܝܼܕ ܠܵܗ̇،

²¹ ܕܐܲܝܟ݂ ܕܗܘܼܟܸܡ ܠܵܗ̇ ܚܛܝܼܬܵ‌ܐ ܒܡܵܘܬܵ‌ܐ، ܗܵܕܟ݂ܵܐ ܐܘܼܦ ܫܵܦܵܩܲܬ ܒܸܬ ܗܲܟܡܵܐ ܒܙܲܕܝܼܩܘܼܬܵ‌ܐ ܕܡܲܝܬܝܵܐ ܚܲܝܹ̈ܐ ܕܠܥܵܠܲܡ ܒܝܼܫܘܿܥ ܡܫܝܼܚܵܐ ܡܵܪܲܢ.