ܪ̈ܗܘܡܝܐ 15 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܫܦܪܚ ܠܐܚܪ̈ܢܐ ܠܐ ܠܓܢܢ

¹ ܐܲܚܢܲܢ ܕܝܼܘܲܚ ܚܲܝܠܵܢܹ̈ܐ ܘܵܠܹܐ ܝܠܵܗ̇ ܕܛܵܥܢܲܚ ܝܘܼܩܪܵܐ ܕܙܲܒܘܼܢܹ̈ܐ ܘܠܵܐ ܫܵܦܪܲܚ ܠܓܵܢܲܢ.

² ܫܒ݂ܘܿܩ ܟܠ ܚܲܕ ܡܸܢܲܢ ܫܵܦܹܪ ܠܫܒ݂ܵܒܹܗ ܠܛܵܒ݂ܬܹܗ ܩܵܐ ܒܢܵܝܬܹܗ.

³ ܐܘܼܦ ܡܫܝܼܚܵܐ ܠܵܐ ܫܦܝܼܪܹܗ ܠܓܵܢܹܗ، ܐܲܝܟ݂ ܕܝܼܠܹܗ ܟܬܝܼܒ݂ܵܐ: ܠܵܘܡܵܐ ܕܠܵܝܡܵܢܘܼ̈ܟ݂ ܢܦܝܼܠ ܠܹܗ ܥܲܠܝܼ.

⁴ ܡܸܢܕܝܼܵܢܹ̈ܐ ܕܦܝܼܫܹܐ ܝܗܘܵܘ ܟܬܝܼܒܹܐ ܡ̣ܢ ܩܲܕܡܵܝܬܵ‌ܐ ܦܝܼܫܹܐ ܝܗܘܵܘ ܟܬܝܼܒܹܐ ܠܡܲܠܲܦܬܲܢ، ܕܗܵܘܹܐ ܠܲܢ ܗܹܒ݂ܝܼ ܒܝܲܕ ܚܡܵܠܬܵ‌ܐ ܘܝܵܗܒ݂ܵܠܬܵ‌ܐ ܕܠܸܒܵܐ ܡ̣ܢ ܟܬܵܒܹ̈ܐ ܩܲܕܝܼܫܹ̈ܐ.

⁵ ܘܐܲܠܵܗܵܐ ܕܝܼܠܹܗ ܡܲܒܘܼܥܵܐ ܕܚܡܵܠܬܵ‌ܐ ܘܕܝܵܗܒ݂ܵܠܬܵ‌ܐ ܕܠܸܒܵܐ ܥܵܒܹܕ ܠܵܘܟ݂ܘܿܢ ܕܚܵܫܒ݂ܝܼܬܘܿܢ ܚܲܕ ܡܸܢܕܝܼ ܚܲܕ ܠܗ̇ܘ ܐܚܹܪܢܵܐ ܐܲܝܟ݂ ܒܝܼܫܘܿܥ ܡܫܝܼܚܵܐ،

⁶ ܕܗܵܘܹܝܬܘܿܢ ܒܚܲܕ ܠܸܒܵܐ ܘܒܚܲܕ ܩܵܠܵܐ ܫܲܒܘܼܚܹܐ ܠܐܲܠܵܗܵܐ ܕܝܼܠܹܗ ܒܵܒܵܐ ܕܡܵܪܲܢ ܝܼܫܘܿܥ ܡܫܝܼܚܵܐ.

⁷ ܒܘܼܬ ܐܵܗܵܐ ܩܲܒܠܘܼܢ ܚܲܕ ܠܗ̇ܘ ܐܚܹܪܢܵܐ ܕܵܐܟ݂ܝܼ ܕܐܘܼܦ ܡܫܝܼܚܵܐ ܩܘܼܒܸܠ ܠܹܗ ܐܸܠܵܘܟ݂ܘܿܢ ܩܵܐ ܫܘܼܒ݂ܚܵܐ ܕܐܲܠܵܗܵܐ.

⁸ ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ ܕܡܫܝܼܚܵܐ ܗܘܹܐ ܠܹܗ ܥܵܒ݂ܕܵܢܵܐ ܕܚܸܠܡܲܬ ܠܝܗܘܼܕܵܝܹ̈ܐ ܒܘܼܬ ܫܪܵܪܵܐ ܕܐܲܠܵܗܵܐ، ܕܡܲܩܘܹܐ ܩܵܘܠܹ̈ܐ ܝܘܼܗܒܹܐ ܠܒܵܒܵܘܵܬܹ̈‌ܐ،

⁹ ܘܕܐܸܡܘܵܬܹ̈‌ܐ ܫܲܒܚܝܼ ܠܐܲܠܵܗܵܐ ܒܘܼܬ ܪ̈ܲܚܡܘܼܗ‌ܝ، ܐܲܝܟ݂ ܕܝܼܠܹܗ ܟܬܝܼܒ݂ܵܐ: ܒܘܼܬ ܐܵܗܵܐ ܒܸܬ ܡܵܘܕܹܝܢ ܐܸܠܘܼܟ݂ ܓܵܘ ܐܸܡܘܵܬܹ̈‌ܐ، ܘܒܸܬ ܙܵܡܪܹܢ ܠܫܸܡܘܼܟ݂.

¹⁰ ܘܡܸܢܕܪܸܫ ܐܡܝܼܪܹܗ: ܚܕܹܝܡܘܼܢ ܝܵܐ ܐܸܡܘܵܬܹ̈‌ܐ ܥܲܡ ܥܲܡܹܗ.

¹¹ ܘܡܸܢܕܪܸܫ: ܫܲܒܚܘܼܢ ܠܡܵܪܝܵܐ ܟܠܵܘܟ݂ܘܿܢ ܐܸܡܘܵܬܹ̈‌ܐ ܘܫܲܒܚܘܼܢ ܠܹܗ ܟܠܵܝܗ‌ܝ ܥܲܡܡܹ̈ܐ.

¹² ܐܹܫܲܥܝܵܐ ܡܸܢܕܪܸܫ ܐܡܝܼܪܹܗ: ܒܸܬ ܦܵܠܹܛ ܘܲܪܝܼܕܵܐ ܡ̣ܢ ܐܝܼܫܲܝ، ܒܸܬ ܥܵܒܹܕ ܫܘܼܠܛܵܢܵܐ ܥܲܠ ܐܸܡܘܵܬܹ̈‌ܐ، ܘܐܸܡܘܵܬܹ̈‌ܐ ܒܸܬ ܗܵܘܝܼ ܠܗܘܿܢ ܗܹܒ݂ܝܼ ܒܝܼܹܗ.

¹³ ܐܲܠܵܗܵܐ ܕܝܼܠܹܗ ܡܲܒܘܼܥܵܐ ܕܗܹܒ݂ܝܼ ܡܵܠܹܐ ܠܵܘܟ݂ܘܿܢ ܟܠܵܗ̇ ܚܲܕܘܼܬܵ‌ܐ ܘܫܠܵܡܵܐ ܐܲܝܟ݂ ܕܗܲܡܸܢܝܼܬܘܿܢ ܒܝܼܹܗ، ܕܙܵܝܕܝܼܬܘܿܢ ܒܗܹܒ݂ܝܼ ܒܝܲܕ ܚܲܝܠܵܐ ܕܪܘܼܚܵܐ ܕܩܘܼܕܫܵܐ.

ܦܘܠܘܣ ܫܠܝܚܐ ܕܐܡܘܬ̈‌ܐ

¹⁴ ܐܵܢܵܐ ܒܓܵܢܝܼ ܗܲܡܘܼܢܹܐ ܝܘܸܢ ܒܝܼܵܘܟ݂ܘܿܢ ܐܲܚܘܿܢܘܵܬ‌ܝܼ̈، ܕܡܸܠܝܹܐ ܝܬܘܿܢ ܛܵܒ݂ܬܵ‌ܐ ܘܟܠܵܗ̇ ܝܕܵܥܬܵ‌ܐ، ܘܡܵܨܹܝܬܘܿܢ ܡܲܠܦܝܼܬܘܿܢ ܚܲܕ ܠܗ̇ܘ ܐܚܹܪܢܵܐ.

¹⁵ ܐܝܼܢܵܐ ܒܩܲܫܕܲܪܬܵ‌ܐ ܓܘܼܪܬܵ‌ܐ ܟܬܝܼܒ݂ ܠܝܼ ܐܸܠܵܘܟ݂ܘܿܢ ܠܡܲܕܟ݂ܘܼܪܹܐ ܚܲܕܟܡܵܐ ܢܘܼܩܙܹ̈ܐ، ܒܝܲܕ ܫܵܦܵܩܲܬ ܕܐܲܠܵܗܵܐ ܕܦܝܼܫ ܠܵܗ̇ ܝܘܼܗܒܹܠܬܵ‌ܐ ܐܸܠܝܼ،

¹⁶ ܕܗܵܘܹܝܢ ܥܵܒ݂ܕܵܢܵܐ ܕܚܸܠܡܲܬ ܕܡܫܝܼܚܵܐ ܝܼܫܘܿܥ ܩܵܐ ܐܸܡܘܵܬܹ̈‌ܐ، ܒܸܥܒ݂ܵܕܵܐ ܚܸܠܡܲܬ ܠܐܹܘܲܢܓܲܠܝܼܘܿܢ ܕܐܲܠܵܗܵܐ ܐܲܝܟ݂ ܟܵܗܢܵܐ، ܕܐܘܼܦ ܐܸܡܘܵܬܹ̈‌ܐ ܗܵܘܝܼ ܩܘܼܪܒܵܢܵܐ ܩܘܼܒܠܵܐ ܠܐܲܠܵܗܵܐ، ܡܩܘܼܕܫܵܐ ܒܪܘܼܚܵܐ ܕܩܘܼܕܫܵܐ.

¹⁷ ܒܘܼܬ ܐܵܗܵܐ ܐܝܼܬ ܠܝܼ ܫܘܼܒ݂ܗܵܪܵܐ ܒܝܼܫܘܿܥ ܡܫܝܼܚܵܐ ܠܟܸܣ ܐܲܠܵܗܵܐ.

¹⁸ ܣܵܒܵܒ ܠܹܐ ܩܲܫܕܸܪܸܢ ܕܗܲܡܙܸܡܸܢ ܥܲܠ ܡܸܢܕܝܼ ܕܠܵܐ ܬܘܼܡܸܡ ܠܹܗ ܡܫܝܼܚܵܐ ܒܝܲܕ ܕܝܼܝܼ، ܕܥܵܒ݂ܕܹܢ ܕܐܸܡܘܵܬܹ̈‌ܐ ܡܲܨܝܸܬ‌ܝܼ ܒܗܹܡܸܙܡܵܢ ܘܒܦܘܼܠܚܵܢܵܐ. ܐܵܢܵܐ ܥܒ݂ܝܼܕ ܠܝܼ ܐܵܗܵܐ،

¹⁹ ܒܚܲܝܠܵܐ ܕܢܝܼܫܲܢܩܹ̈ܐ ܘܕܕܘܼܡܵܪܹ̈ܐ، ܘܒܚܲܝܠܵܐ ܕܪܘܼܚܵܐ، ܗܵܕܟ݂ܵܐ ܡܘܼܟܪܸܙ ܠܝܼ ܐܹܘܲܢܓܲܠܝܼܘܿܢ ܕܡܫܝܼܚܵܐ ܒܡܸܠܝܘܼܬܵ‌ܐ، ܡ̣ܢ ܐܘܿܪܸܫܠܸܡ ܘܚܵܕܸܪ̈ܘܵܢܘܼܗ̇ ܗܲܠ ܐܹܠܘܿܪܝܼܩܘܿܢ.

²⁰ ܚܘܼܦܛܵܐ ܝܘܸܢ ܒܟܠ ܙܲܒ݂ܢܵܐ ܕܡܲܟܪܸܙܸܢ ܐܹܘܲܢܓܲܠܝܼܘܿܢ ܐܲܝܟܵܐ ܕܡܫܝܼܚܵܐ ܠܹܐ ܝܠܹܗ ܦܝܼܫܵܐ ܝܕܝܼܥܵܐ، ܕܠܵܐ ܗܵܘܝܵܐ ܕܒܵܢܹܝܢ ܥܲܠ ܒܸܢܝܲܬ ܕܚܲܕ ܐܚܹܪܢܵܐ.

²¹ ܐܝܼܢܵܐ ܐܲܝܟ݂ ܕܝܼܠܹܗ ܟܬܝܼܒ݂ܵܐ: ܐܵܢܝܼ ܕܠܹܐ ܝܗܘܵܘ ܦܝܼܫܹܐ ܡܘܼܕܸܥܹܐ ܒܘܼܬ ܕܝܼܹܗ ܒܸܬ ܚܵܙܝܼ، ܘܐܵܢܝܼ ܕܠܹܐ ܝܢܵܐ ܫܡܝܼܥܹܐ ܒܸܬ ܦܲܪܡܝܼ.

²² ܒܘܼܬ ܐܵܗܵܐ ܪܵܒܵܐ ܓܵܗܹ̈ܐ ܦܝܼܫ ܠܝܼ ܡܘܼܟܠܝܼܵܐ ܡ̣ܢ ܠܹܐܬܵܝܵܐ ܠܟܸܣܠܵܘܟ݂ܘܿܢ.

ܦܘܠܘܣ ܫܠܝܚܐ ܒܥܐ ܕܐܙܠ ܠܪܗܘܡܐ

²³ ܐܝܼܢܵܐ ܐܵܕܝܼܵܐ ܒܗ̇ܝ ܕܠܲܝܬ ܠܝܼ ܦܝܵܫܵܐ ܕܘܼܟܵܢܹ̈ܐ ܪܵܒܵܐ ܠܸܦܠܵܚܵܐ ܓܵܘ ܐܲܢܹܐ ܐܲܬܪ̈ܵܘܵܬܹ‌ܐ، ܘܣܵܒܵܒ ܫܘܼܗܘܸܬ ܠܝܼ ܪܵܒܵܐ ܓܵܗܹ̈ܐ ܡ̣ܢ ܩܲܕܡ ܚܲܕܟܡܵܐ ܫܸܢܹ̈ܐ ܕܐܵܬܹܝܢ ܗܘܵܐ ܠܟܸܣܠܵܘܟ݂ܘܿܢ،

²⁴ ܐܝܼܡܲܢ ܕܐܵܙܹܠ݇ܢ ܠܐܸܣܦܵܢܝܼܵܐ، ܒܵܥܹܝܢ ܕܐܵܬܹܝܢ ܠܟܸܣܠܵܘܟ݂ܘܿܢ. ܐܝܼܬ ܠܝܼ ܗܹܒ݂ܝܼ ܕܚܵܙܹܢܵܘܟ݂ܘܿܢ ܒܐܘܼܪܚܝܼ، ܘܡܲܦܫܸܛܝܼܬܘܿܢ ܠܝܼ ܠܬܵܡܵܐ، ܡ̣ܢ ܒܵܬܪ ܕܚܵܕܹܝܢ ܒܚܙܵܝܬܵܘܟ݂ܘܿܢ ܩܵܐ ܚܲܕ ܡܸܬܚܵܐ ܟܸܪܝܵܐ.

²⁵ ܐܝܼܢܵܐ ܐܵܕܝܼܵܐ ܒܹܐܙܵܠܵܐ ܝܘܸܢ ܠܐܘܿܪܸܫܠܸܡ ܕܥܵܒ݂ܕܹܢ ܚܸܠܡܲܬ ܠܩܲܕܝܼܫܹ̈ܐ ܕܝܼܢܵܐ ܬܵܡܵܐ.

²⁶ ܣܵܒܵܒ ܒܣܝܼܡ ܠܵܗ̇ ܠܗܘܿܢ ܐܵܢܝܼ ܕܓܵܘ ܡܵܩܹܕܘܿܢܝܼܵܐ ܘܐܵܟ݂ܵܐܝܼܵܐ ܕܗܲܝܸܪܝܼ ܙܘܼܙܵܢܵܐܝܼܬ ܠܡܸܣܟܹܢܹ̈ܐ ܕܩܲܕܝܼܫܹ̈ܐ ܕܓܵܘ ܐܘܿܪܸܫܠܸܡ.

²⁷ ܒܫܲܪܝܼܪܘܼܬܵ‌ܐ ܒܣܝܼܡ ܠܵܗ̇ ܠܗܘܿܢ ܕܗܲܝܸܪܝܼ، ܘܕܲܝܢܵܢܹ̈ܐ ܝܢܵܐ ܕܥܵܒ݂ܕܝܼ ܗܵܕܟ݂ܵܐ. ܐܸܢ ܐܸܡܘܵܬܹ̈‌ܐ ܩܘܼܒܸܠ ܠܗܘܿܢ ܒܘܼܪ̈ܟܵܬܹ‌ܐ ܪ̈ܘܼܚܵܢܵܝܹܐ ܡ̣ܢ ܝܗܘܼܕܵܝܹ̈ܐ، ܒܵܣ ܐܸܡܘܵܬܹ̈‌ܐ ܕܲܝܢܵܢܹ̈ܐ ܝܢܵܐ ܠܝܗܘܼܕܵܝܹ̈ܐ ܕܥܵܒ݂ܕܝܼ ܠܗܘܿܢ ܚܸܠܡܲܬ ܒܒܘܼܪ̈ܟܵܬܹ‌ܐ ܗܘܼܠܵܢܵܝܹ̈ܐ.

²⁸ ܒܘܼܬ ܐܵܗܵܐ ܡ̣ܢ ܒܵܬܪ ܕܬܲܡܸܡܸܢ ܠܐܵܗܵܐ ܫܘܼܠܵܐ، ܘܗܵܘܹܝܢ ܚܵܬܸܪܓ̰ܲܡܥ ܕܩܲܒܠܝܼ ܠܐܵܗܵܐ ܛܥܘܼܢܬܵ‌ܐ، ܒܸܬ ܐܵܙܹܠ݇ܢ ܠܐܸܣܦܵܢܝܼܵܐ ܘܒܐܘܼܪܚܝܼ ܒܸܬ ܚܵܙܹܢܵܘܟ݂ܘܿܢ.

²⁹ ܒܝܼܕܵܥܵܐ ܝܘܸܢ ܐܝܼܡܲܢ ܕܐܵܬܹܝܢ ܠܟܸܣܠܵܘܟ݂ܘܿܢ، ܒܸܬ ܐܵܬܹܝܢ ܒܡܸܠܝܘܼܬܵ‌ܐ ܕܒܘܼܪܟܬܵ‌ܐ ܕܐܹܘܲܢܓܲܠܝܼܘܿܢ ܕܡܫܝܼܚܵܐ.

³⁰ ܦܲܪܦܘܼܠܹܐ ܝܘܸܢ ܒܝܼܵܘܟ݂ܘܿܢ ܐܲܚܘܿܢܘܵܬ‌ܝܼ̈، ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ ܘܒܚܘܼܒܵܐ ܕܪܘܼܚܵܐ ܕܫܲܪܸܟܝܼܬܘܿܢ ܥܲܡܝܼ ܒܦܘܼܠܚܵܢܵܐ ܩܸܫܝܵܐ ܒܝܲܕ ܨܠܵܘܵܬܹ̈‌ܐ ܠܟܸܣ ܐܲܠܵܗܵܐ ܒܘܼܬ ܕܝܼܝܼ.

³¹ ܨܲܠܹܝܡܘܼܢ ܕܦܵܝܫܹܢ ܦܘܼܪܩܵܐ ܡ̣ܢ ܐܵܢܝܼ ܕܠܹܐ ܝܢܵܐ ܡܗܘܼܡܢܹ̈ܐ ܓܵܘ ܝܼܗܘܼܕ، ܘܕܦܵܝܫܵܐ ܩܒܝܼܠܬܵ‌ܐ ܚܸܠܡܲܬ‌ܝܼ ܒܝܲܕ ܩܲܕܝܼܫܹ̈ܐ ܕܓܵܘ ܐܘܿܪܸܫܠܸܡ،

³² ܕܒܚܲܕܘܼܬܵ‌ܐ ܐܵܬܹܝܢ ܠܟܸܣܠܵܘܟ݂ܘܿܢ ܒܨܸܒ݂ܝܵܢܵܐ ܕܐܲܠܵܗܵܐ ܕܩܲܒܠܲܚ ܢܝܵܚܵܐ ܥܲܡ ܥܘܼܕܵܠܹܐ.

³³ ܐܲܠܵܗܵܐ ܕܫܠܵܡܵܐ ܗܵܘܹܐ ܥܲܡ ܟܠܵܘܟ݂ܘܿܢ، ܐܵܡܹܝܢ.