ܪ̈ܗܘܡܝܐ 13 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܡܨܝܬܬ‌ܐ ܠܪ̈ܝܫܢܐ

¹ ܟܠ ܚܲܕ ܫܵܠܹܡ ܠܫܘܼܠܛܵܢܹ̈ܐ ܥܸܠܵܝܹ̈ܐ، ܣܵܒܵܒ ܠܲܝܬ ܫܘܼܠܛܵܢܵܐ ܐܸܠܵܐ ܡ̣ܢ ܐܲܠܵܗܵܐ. ܘܫܘܼܠܛܵܢܹ̈ܐ ܕܐܝܼܬ، ܦܝܼܫܹܐ ܝܢܵܐ ܝܘܼܗܒܹܐ ܒܝܲܕ ܐܲܠܵܗܵܐ.

² ܒܘܼܬ ܐܵܗܵܐ، ܡ̇ܢ ܕܩܵܐܹܡ ܕܲܠܩܘܼܒ݂ܠ ܕܫܘܼܠܛܵܢܵܐ ܒܸܩܝܵܡܵܐ ܝܠܹܗ ܕܲܠܩܘܼܒ݂ܠ ܕܦܘܼܩܕܵܢܵܐ ܕܐܲܠܵܗܵܐ، ܘܐܵܢܝܼ ܕܩܵܝܡܝܼ ܕܲܠܩܘܼܒ݂ܠ ܕܦܘܼܩܕܵܢܵܐ ܕܐܲܠܵܗܵܐ ܒܸܬ ܩܲܒܠܝܼ ܕܝܵܢܬܵ‌ܐ ܥܲܠ ܓܵܢܵܝܗ‌ܝ.

³ ܫܲܠܝܼ̈ܛܹܐ ܠܹܐ ܝܢܵܐ ܙܕܘܼܥܬܵ‌ܐ ܠܐܵܢܝܼ ܕܥܵܒ݂ܕܝܼ ܛܵܒ݂ܵܬܹ̈‌ܐ، ܐܸܠܵܐ ܠܐܵܢܝܼ ܕܥܵܒ݂ܕܝܼ ܒܝܼܫܵܬܹ̈‌ܐ. ܒܵܥܹܝܬ ܕܠܵܐ ܙܵܕܥܹܬ ܡ̣ܢ ܫܘܼܠܛܵܢܵܐ؟ ܥܒ݂ܘܿܕ ܛܵܒ݂ܬܵ‌ܐ، ܘܒܸܬ ܗܵܘܹܐ ܠܘܼܟ݂ ܚܸܩܪܵܐ ܡܸܢܹܗ.

⁴ ܣܵܒܵܒ ܥܵܒ݂ܕܵܢܵܐ ܕܚܸܠܡܲܬ ܕܐܲܠܵܗܵܐ ܝܠܹܗ ܐܸܠܘܼܟ݂ ܠܛܵܒ݂ܬܵ‌ܐ. ܐܝܼܢܵܐ ܐܸܢ ܥܵܒ݂ܕܹܬ ܒܝܼܫܬܵ‌ܐ، ܙܕܹܥ، ܣܵܒܵܒ ܫܘܼܠܛܵܢܵܐ ܠܹܐ ܝܠܹܗ ܫܩܝܼܠܵܐ ܣܲܝܦܵܐ ܒܣܪܝܼܩܘܼܬܵ‌ܐ. ܗ̇ܘ ܥܵܒ݂ܕܵܢܵܐ ܕܚܸܠܡܲܬ ܕܐܲܠܵܗܵܐ ܝܠܹܗ، ܘܫܵܩܠܵܢܵܐ ܕܬܘܼܥܠܵܐ ܕܟܲܪܒܵܐ ܡ̣ܢ ܗ̇ܘ ܕܥܵܒܹܕ ܒܝܼܫܬܵ‌ܐ.

⁵ ܗܵܕܟ݂ܵܐ ܘܵܠܹܐ ܝܠܵܗ̇ ܕܗܵܘܲܚ ܫܵܠܡܵܢܹ̈ܐ، ܠܵܐ ܐܲܚܟ̰ܝܼ ܕܒܸܬ ܦܵܝܫܲܚ ܕܝܼܢܹܐ ܒܟܲܪܒܵܐ، ܐܝܼܢܵܐ ܐܘܼܦ ܒܘܼܬ ܐܸܢܝܲܬܲܢ.

⁶ ܒܘܼܬ ܐܵܗܵܐ ܟܹܐ ܦܵܪܥܝܼܬܘܿܢ ܙܘܼܙܵܐ ܕܪܹܝܫܝܼܬܵ‌ܐ، ܣܵܒܵܒ ܫܘܼܠܛܵܢܹ̈ܐ ܥܵܒ݂ܕܵܢܹ̈ܐ ܕܚܸܠܡܲܬ ܕܐܲܠܵܗܵܐ ܝܢܵܐ، ܘܟܹܐ ܕܵܒ݂ܚܝܼ ܥܕܵܢܵܝܗ‌ܝ ܠܐܵܗܵܐ ܫܘܼܠܵܐ.

⁷ ܦܪܹܥܡܘܼܢ ܠܐܢܵܫܵܐ ܕܕܲܝܢܵܢܹܐ ܝܬܘܿܢ ܐܸܠܹܗ. ܠܡ̇ܢ ܕܪܹܝܫܝܼܬܵ‌ܐ، ܪܹܝܫܝܼܬܵ‌ܐ، ܘܠܡ̇ܢ ܕܡܲܟ݂ܣܵܐ، ܡܲܟ݂ܣܵܐ، ܘܠܡ̇ܢ ܕܙܕܘܼܥܬܵ‌ܐ، ܙܕܘܼܥܬܵ‌ܐ، ܘܠܡ̇ܢ ܕܐܝܼܩܵܪܵܐ، ܐܝܼܩܵܪܵܐ.

⁸ ܠܵܐ ܗܵܘܹܝܬܘܿܢ ܕܲܝܢܵܢܹ̈ܐ ܠܐܘܼܦ ܚܲܕ، ܫܒ݂ܘܿܩ ܡ̣ܢ ܕܡܲܚܸܒܝܼܬܘܿܢ ܚܲܕ ܠܗ̇ܘ ܐܚܹܪܢܵܐ، ܣܵܒܵܒ ܡ̇ܢ ܕܡܲܚܸܒ ܠܚܲܕ ܐܚܹܪܢܵܐ، ܬܲܡܘܼܡܹܐ ܝܠܹܗ ܢܵܡܘܿܣܵܐ.

⁹ ܦܘܼܩܕܵܢܹ̈ܐ ܒܹܐܡܵܪܵܐ ܝܢܵܐ: ܠܵܐ ܙܵܢܹܝܬ، ܠܵܐ ܩܵܛܠܹܬ، ܠܵܐ ܓܵܢܒܹܬ، ܠܵܐ ܫܲܗܘܸܬܸܬ. ܘܐܸܢ ܐܝܼܬ ܦܘܼܩܕܵܢܵܐ ܐܚܹܪܢܵܐ، ܦܝܼܫܵܐ ܝܠܹܗ ܚܒ݂ܝܼܫܵܐ ܓܵܘ ܐܵܗܵܐ ܦܘܼܩܕܵܢܵܐ: ܡܲܚܸܒܸܬ ܠܫܒ݂ܵܒ݂ܘܼܟ݂ ܐܲܝܟ݂ ܓܵܢܘܼܟ݂.

¹⁰ ܚܘܼܒܵܐ ܠܹܐ ܦܵܠܹܚ ܒܝܼܫܬܵ‌ܐ ܠܫܒ݂ܵܒܹܗ. ܗܵܕܟ݂ܵܐ ܚܘܼܒܵܐ ܬܲܡܲܡܬܵ‌ܐ ܕܢܵܡܘܿܣܵܐ ܝܠܹܗ.

ܐܬܝܬ‌ܐ ܕܝܘܡܐ ܕܡܫܝܚܐ

¹¹ ܗܵܐ ܟܹܐ ܝܵܕܥܝܼܬܘܿܢ ܕܐܵܕܝܼܵܐ ܝܠܵܗ̇ ܥܕܵܢܵܐ ܕܪܵܥܫܝܼܬܘܿܢ ܡ̣ܢ ܫܸܢܬܵܘܟ݂ܘܿܢ، ܣܵܒܵܒ ܦܘܼܪܩܵܢܲܢ ܐܵܕܝܼܵܐ ܒܘܼܫ ܩܘܼܪܒܵܐ ܝܠܹܗ ܐܸܠܲܢ ܡ̣ܢ ܕܗܘܼܡܸܢܲܢ ܒܫܘܼܪܵܝܵܐ.

¹² ܠܲܝܠܹܐ ܒܸܥܒ݂ܵܪܵܐ ܝܠܹܗ، ܘܐܝܼܡܵܡܵܐ ܩܲܪܒܘܼܢܹܐ ܝܠܹܗ. ܫܵܒ݂ܩܲܚ ܠܗܘܿܢ ܦܘܼܠܚܵܢܹ̈ܐ ܕܚܸܫܟܵܐ ܘܠܵܒ݂ܫܲܚ ܙܲܝܢܵܐ ܕܒܲܗܪܵܐ.

¹³ ܚܵܕܪܲܚ ܒܢܲܟ݂ܦܘܼܬܵ‌ܐ ܐܲܝܟ݂ ܕܒܝܵܘܡܵܐ ܒܸܚܕܵܪܵܐ ܝܘܲܚ، ܠܵܐ ܒܫܪܝܼܚܘܼܬܵ‌ܐ ܘܒܪܵܘܵܝܘܼܬܵ‌ܐ، ܘܒܕܡܵܟ݂ܵܐ ܛܲܢܦܵܐ، ܘܒܦܲܚܙܘܼܬܵ‌ܐ، ܘܒܡܲܩܲܪܵܨܘܼܬܵ‌ܐ، ܘܒܒܲܚܸܠܵܢܘܼܬܵ‌ܐ،

¹⁴ ܐܝܼܢܵܐ ܠܒ݂ܘܿܫܘܼܢ ܠܡܵܪܲܢ ܝܼܫܘܿܥ ܡܫܝܼܚܵܐ، ܘܠܵܐ ܬܲܚܡܸܢܝܼܬܘܿܢ ܠܣܲܦܘܼܝܹܗ ܦܲܓ݂ܪܵܘܟ݂ܘܿܢ ܠܗܵܕܟ݂ܵܐ ܫܲܗܘܲܬܝܵܬܹ̈‌ܐ.