ܪ̈ܗܘܡܝܐ 10 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܐܲܚܘܿܢܘܵܬ‌ܝܼ̈، ܫܲܗܘܲܬܬܵ‌ܐ ܕܠܸܒܝܼ ܘܦܲܪܦܲܠܬ‌ܝܼ ܒܐܲܠܵܗܵܐ ܒܘܼܬ ܒܢܲܝ̈ ܐܝܼܣܪܵܐܹܝܠ ܝܼܠܵܗ̇ ܕܦܵܪܩܝܼ.

² ܣܵܒܵܒ ܒܸܣܗܵܕܵܐ ܝܘܸܢ ܡ̣ܢ ܓܹܒܵܝܗ‌ܝ ܕܛܲܢܵܢܹ̈ܐ ܝܢܵܐ ܩܵܐ ܐܲܠܵܗܵܐ، ܐܝܼܢܵܐ ܠܵܐ ܒܝܕܵܥܬܵ‌ܐ.

³ ܟܲܕ ܠܵܐ ܒܝܼܕܵܥܵܐ ܟܹܐܢܘܼܬܵ‌ܐ ܕܐܲܠܵܗܵܐ، ܘܒܸܛܥܵܝܵܐ ܕܡܲܫ݇ܟ̰ܚܝܼ ܟܹܐܢܘܼܬܵ‌ܐ ܕܓܵܢܵܝܗ‌ܝ، ܠܵܐ ܗܘܹܐ ܠܗܘܿܢ ܙܲܒܛ ܠܟܹܐܢܘܼܬܵ‌ܐ ܕܐܲܠܵܗܵܐ.

⁴ ܣܵܒܵܒ ܡܫܝܼܚܵܐ ܝܠܹܗ ܚܘܼܬܵܡܵܐ ܕܙܲܕܝܼܩܘܼܬܵ‌ܐ ܕܟܹܐ ܐܵܬܝܵܐ ܒܝܲܕ ܢܵܡܘܿܣܵܐ، ܕܗܵܘܝܵܐ ܙܲܕܝܼܩܘܼܬܵ‌ܐ ܠܟܠ ܕܗܲܡܸܢ.

⁵ ܡܘܼܫܹܐ ܟܬܝܼܒ݂ ܠܹܗ ܒܘܼܬ ܙܲܕܝܼܩܘܼܬܵ‌ܐ ܕܟܹܐ ܐܵܬܝܵܐ ܒܝܲܕ ܢܵܡܘܿܣܵܐ ܘܐܡܝܼܪܹܗ: ܟܠ ܡ̇ܢ ܕܥܵܒܹܕ ܐܲܢܹܐ ܒܸܬ ܚܵܝܹܐ ܒܝܼܵܝܗ‌ܝ.

⁶ ܐܝܼܢܵܐ ܙܲܕܝܼܩܘܼܬܵ‌ܐ ܕܟܹܐ ܐܵܬܝܵܐ ܒܝܲܕ ܗܲܝܡܵܢܘܼܬܵ‌ܐ ܟܹܐ ܐܵܡܪܵܐ: ”ܠܵܐ ܐܵܡܪܹܬ ܓܵܘ ܠܸܒܘܼܟ݂، ’ܡܵܢܝܼ ܒܸܬ ܐܵܣܹܩ ܠܫܡܲܝܵܐ؟‘ܝܲܥܢܹܐ ܕܡܲܨܠܹܐ ܠܡܫܝܼܚܵܐ،

⁷ ”ܝܲܢ ’ܡܵܢܝܼ ܒܸܬ ܨܵܠܹܐ ܠܥܘܼܡܩܵܐ؟‘ܝܲܥܢܹܐ ܕܡܲܐܣܸܩ ܠܡܫܝܼܚܵܐ ܡ̣ܢ ܡܝܼ̈ܬܹ‌ܐ.“

⁸ ܐܝܼܢܵܐ ܡܘܼܕܝܼ ܟܹܐ ܐܵܡܪܵܐ؟ ܟܹܐ ܐܵܡܪܵܐ: ”ܗܹܡܸܙܡܵܢ ܩܘܼܪܒܘܼܟ݂ ܝܼܠܵܗ̇، ܐܘܼܦ ܓܵܘ ܦܘܼܡܘܼܟ݂ ܘܠܸܒܘܼܟ݂ ܝܼܠܵܗ̇،“ܝܲܥܢܹܐ ܗܹܡܸܙܡܵܢ ܕܗܲܝܡܵܢܘܼܬܵ‌ܐ ܕܡܲܟܪܘܼܙܘܼܗ̇ ܝܘܲܚ،

⁹ ܕܐܸܢ ܡܵܘܕܹܝܬ ܒܦܘܼܡܘܼܟ݂ ܕܝܼܫܘܿܥ ܡܵܪܲܢ ܝܼܠܹܗ، ܘܗܲܡܸܢܸܬ ܒܠܸܒܘܼܟ݂ ܕܐܲܠܵܗܵܐ ܡܘܼܩܸܡ ܠܹܗ ܐܸܠܹܗ ܡ̣ܢ ܓܵܘ ܡܝܼ̈ܬܹ‌ܐ، ܒܸܬ ܦܵܪܩܹܬ.

¹⁰ ܣܵܒܵܒ ܒܠܸܒܘܼܟ݂ ܟܹܐ ܗܲܡܸܢܸܬ ܘܟܹܐ ܦܵܝܫܹܬ ܡܘܼܟܫܸܛܵܐ، ܘܒܦܘܼܡܘܼܟ݂ ܟܹܐ ܡܵܘܕܹܝܬ ܘܟܹܐ ܦܵܪܩܹܬ.

¹¹ ܕܵܐܟ݂ܝܼ ܕܒܹܐܡܵܪܵܐ ܝܠܹܗ ܟܬܵܒ݂ܵܐ: ܟܠ ܡ̇ܢ ܕܗܲܡܸܢ ܒܝܼܹܗ ܠܹܐ ܢܵܟܹܦ.

¹² ܣܵܒܵܒ ܠܲܝܬ ܦܘܼܪܫܘܼܢܝܵܐ ܒܹܝܠ ܝܗܘܼܕܵܝܵܐ ܘܝܵܘܢܵܝܵܐ، ܣܵܒܵܒ ܚܲܕ ܡܵܪܝܵܐ ܝܠܹܗ ܥܲܠ ܟܠܵܝܗ‌ܝ، ܘܪܵܒܵܐ ܟܹܐ ܒܲܪܸܟ݂ ܠܐܵܢܝܼ ܕܩܵܪܝܼ ܠܹܗ.

¹³ ܣܵܒܵܒ ܟܠ ܡ̇ܢ ܕܩܵܪܹܐ ܒܫܸܡܵܐ ܕܡܵܪܝܵܐ ܒܸܬ ܦܵܪܹܩ.

¹⁴ ܐܝܼܢܵܐ ܕܵܐܟ݂ܝܼ ܒܸܬ ܩܵܪܝܼ ܒܫܸܡܵܐ ܕܚܲܕ ܕܠܹܐ ܗܲܡܸܢܝܼ ܒܝܼܹܗ؟ ܘܕܵܐܟ݂ܝܼ ܒܸܬ ܗܲܡܸܢܝܼ ܒܚܲܕ ܕܠܹܐ ܝܢܵܐ ܫܡܝܼܥܹܐ ܒܘܼܬ ܕܝܼܹܗ؟ ܘܕܵܐܟ݂ܝܼ ܒܸܬ ܫܵܡܥܝܼ ܕܠܵܐ ܡܲܟܪܸܙܵܢܵܐ؟

¹⁵ ܘܕܵܐܟ݂ܝܼ ܒܸܬ ܡܲܟܪܸܙܝܼ ܐܸܢ ܠܹܐ ܝܢܵܐ ܦܝܼܫܹܐ ܫܘܼܕܪܹܐ؟ ܐܲܝܟ݂ ܕܝܼܠܹܗ ܟܬܝܼܒ݂ܵܐ: ܟܡܵܐ ܫܲܦܝܼܪܹ̈ܐ ܝܢܵܐ ܐܲܩܠܵܬܹ̈‌ܐ ܕܡܲܫܚܸܕܵܢܹ̈ܐ ܕܐܹܘܲܢܓܲܠܝܼܘܿܢ!

¹⁶ ܐܝܼܢܵܐ ܟܠܵܝܗ‌ܝ ܒܢܲܝ̈ ܐܝܼܣܪܵܐܹܝܠ ܠܵܐ ܩܘܼܒܸܠ ܠܗܘܿܢ ܠܐܹܘܲܢܓܲܠܝܼܘܿܢ. ܐܲܝܟ݂ ܕܐܡܝܼܪܹܗ ܐܹܫܲܥܝܵܐ: ܡܵܪܝܼ، ܡܵܢܝܼ ܗܘܼܡܸܢܹܗ ܠܗܹܡܸܙܡܵܢܲܢ؟

¹⁷ ܗܵܕܟ݂ܵܐ، ܗܲܝܡܵܢܘܼܬܵ‌ܐ ܟܹܐ ܐܵܬܝܵܐ ܡ̣ܢ ܫܡܵܥܬܵ‌ܐ، ܘܫܡܵܥܬܵ‌ܐ ܡ̣ܢ ܗܹܡܸܙܡܵܢ ܕܡܫܝܼܚܵܐ.

¹⁸ ܐܝܼܢܵܐ ܐܵܢܵܐ ܒܲܩܘܼܪܹܐ ܝܘܸܢ: ܠܹܐ ܝܢܵܐ ܫܡܝܼܥܹܐ ܐܵܢܝܼ؟ ܗܹܐ، ܫܡܝܼܥܹܐ ܝܢܵܐ. ܒܟܠܵܗ̇ ܐܲܪܥܵܐ ܦܠܝܼܛ ܠܹܗ ܩܵܠܵܝܗ‌ܝ، ܘܒܡܲܪ̈ܙܵܢܹܐ ܕܕܘܼܢܝܹܐ ܗܹܡܸܙܡܵܢܵܝܗ‌ܝ.

¹⁹ ܡܸܢܕܪܸܫ ܒܲܩܘܼܪܹܐ ܝܘܸܢ، ܠܵܐ ܝܕܝܼܥ ܠܗܘܿܢ ܒܢܲܝ̈ ܐܝܼܣܪܵܐܹܝܠ؟ ܡ̣ܢ ܩܲܕܡܵܝܬܵ‌ܐ ܡܘܼܫܹܐ ܐܡܝܼܪܹܗ: ܒܸܬ ܥܵܒ݂ܕܹܢܵܘܟ݂ܘܿܢ ܕܒܲܚܸܠܝܼܬܘܿܢ ܒܐܘܼܡܬܵ‌ܐ ܕܠܹܐ ܝܠܵܗ̇ ܐܘܼܡܬܵ‌ܐ، ܘܒܸܬ ܡܲܟܪܸܒܸܢܵܘܟ݂ܘܿܢ ܒܐܘܼܡܬܵ‌ܐ ܕܠܵܐ ܦܲܪܡܲܝܬܵ‌ܐ.

²⁰ ܐܹܫܲܥܝܵܐ ܩܘܼܫܕܸܪܹܗ ܘܐܡܝܼܪܹܗ: ܦܝܼܫ ܠܝܼ ܡܘܼܫ݇ܟ̰ܚܵܐ ܠܐܵܢܝܼ ܕܠܵܐ ܛܥܹܐ ܠܗܘܿܢ ܐܸܠܝܼ، ܘܦܝܼܫ ܠܝܼ ܓܸܠܝܵܐ ܠܐܵܢܝܼ ܕܠܵܐ ܒܘܼܩܸܪܗܘܿܢ ܥܲܠܝܼ.

²¹ ܐܝܼܢܵܐ ܒܘܼܬ ܐܝܼܣܪܵܐܹܝܠ ܐܡܝܼܪܹܗ: ܟܠܹܗ ܝܵܘܡܵܐ ܦܘܼܫܸܛ ܠܝܼ ܐܝܼܕܵܬ‌ܝܼ̈ ܠܟܸܣ ܥܲܡܵܐ ܠܵܐ ܡܲܨܝܸܬܵܢܵܐ، ܘܡܲܩܪܸܨܵܢܵܐ.