ܓܠܝܢܐ 2 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܥܕܬ‌ܐ ܕܓܘ ܐܦܣܘܣ

¹ ”ܠܡܲܠܲܐܟ݂ܵܐ ܕܥܹܕܬܵ‌ܐ ܕܓܵܘ ܐܵܦܸܣܘܿܣ، ܟܬܘܿܒ݂: ’ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܗ̇ܘ ܕܕܒ݂ܝܼܩܵܐ ܝܠܹܗ ܠܫܲܒ݂ܥܵܐ ܟܵܘܟ݂ܒܹ̈ܐ ܒܝܲܡܝܼܢܹܗ، ܘܕܒܸܚܕܵܪܵܐ ܝܠܹܗ ܒܒܹܝܦܲܠܓܵܐ ܕܫܒܲܥ ܡܢܵܪ̈ܵܬܹ‌ܐ ܕܕܲܗܒ݂ܵܐ:

² ”ܟܹܐ ܝܵܕܥܹܢ ܠܦܘܼܠܚܵܢܘܼ̈ܟ݂ ܘܠܥܲܡܠܘܼܟ݂ ܘܠܚܡܵܠܬܘܼܟ݂، ܘܕܠܹܐ ܡܵܨܹܝܬ ܩܲܒܠܸܬ ܠܒܝܼܫܹ̈ܐ، ܘܨܘܼܚܨܹܐ ܠܘܼܟ݂ ܠܐܵܢܝܼ ܕܒܹܐܡܵܪܵܐ ܝܢܵܐ ܒܘܼܬ ܓܵܢܵܝܗ‌ܝ ܕܫܠܝܼܚܹ̈ܐ ܝܢܵܐ، ܐܝܼܢܵܐ ܠܹܐ ܝܢܵܐ، ܘܡܘܼܫ݇ܟ̰ܚܵܝ ܠܘܼܟ݂ ܕܲܓܵܠܹ̈ܐ.

³ ”ܚܡܝܼܠ ܠܘܼܟ݂، ܘܩܘܼܒܸܠ ܠܘܼܟ݂ ܚܲܫܵܐ ܒܘܼܬ ܚܵܬܸܪ ܕܫܸܡܝܼ ܘܠܵܐ ܣܩܝܼܕ ܠܘܼܟ݂.

⁴ ”ܐܸܠܵܐ ܐܵܗܵܐ ܐܝܼܬ ܠܝܼ ܥܲܠܘܼܟ݂: ܚܘܼܒܘܼܟ݂ ܩܲܕܡܵܝܵܐ ܫܒ݂ܝܼܩ ܠܘܼܟ݂.

⁵ ”ܒܵܣ ܕܟ݂ܘܿܪ ܡ̣ܢ ܐܲܝܟܵܐ ܢܦܝܼܠ ܠܘܼܟ݂، ܘܬܲܘܸܒ، ܘܥܒ݂ܘܿܕ ܦܘܼܠܚܵܢܹ̈ܐ ܩܲܕܡܵܝܹ̈ܐ. ܘܐܸܢ ܠܵܐ، ܒܹܐܬܵܝܵܐ ܝܘܸܢ ܥܲܠܘܼܟ݂، ܘܒܸܬ ܫܵܩܠܹܢܵܗ̇ ܡܢܵܪܬܘܼܟ݂ ܡ̣ܢ ܕܘܼܟܬܘܼܗ̇، ܐܸܢ ܠܵܐ ܬܲܘܸܒܸܬ.

⁶ ”ܐܸܠܵܐ ܐܵܗܵܐ ܐܝܼܬ ܠܘܼܟ݂: ܟܹܐ ܣܵܢܹܝܬ ܠܦܘܼܠܚܵܢܹ̈ܐ ܕܢܝܼܩܠܝܼ̈ܛܘܿ، ܐܵܢܝܼ ܕܐܘܼܦ ܐܵܢܵܐ ܟܹܐ ܣܵܢܹܢܗܘܿܢ.

⁷ ”ܗ̇ܘ ܕܐܝܼܬ ܠܹܗ ܢܵܬܝܵܬܹ̈‌ܐ، ܫܵܡܹܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈‌ܐ. ܠܗ̇ܘ ܕܓ݂ܵܠܹܒ، ܒܸܬ ܝܵܗܒܹܢܹܗ ܕܐܵܟܹܠ ܡ̣ܢ ܐܝܼܠܵܢܵܐ ܕܚܲܝܹ̈ܐ، ܕܝܼܠܹܗ ܓܵܘ ܦܲܪܕܲܝܣܵܐ ܕܐܲܠܵܗܵܐ.“‘

ܠܥܕܬ‌ܐ ܕܓܘ ܣܡܘܪܢܐ

⁸ ”ܘܠܡܲܠܲܐܟ݂ܵܐ ܕܥܹܕܬܵ‌ܐ ܕܓܵܘ ܣܡܘܿܪܢܵܐ، ܟܬܘܿܒ݂: ’ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܗ̇ܘ ܕܝܼܠܹܗ ܩܲܕܡܵܝܵܐ ܘܐܚܵܪܵܝܵܐ، ܗ̇ܘ ܕܡܝܼܬܵ‌ܐ ܝܗܘܵܐ، ܘܚܝܹܐ ܠܹܗ ܡܸܢܕܪܸܫ:

⁹ ”ܐܵܢܵܐ ܟܹܐ ܝܵܕܥܹܢ ܠܐܘܼܠܨܵܢܘܼܟ݂ ܘܠܡܸܣܟܹܢܘܼܬܘܼܟ݂، ܐܝܼܢܵܐ ܥܲܬܝܼܪܵܐ ܝܘܸܬ. ܟܹܐ ܝܵܕܥܹܢ ܠܓܘܼܕܵܦܹ̈ܐ ܕܐܵܢܝܼ ܕܒܹܐܡܵܪܵܐ ܝܢܵܐ ܒܘܼܬ ܓܵܢܵܝܗ‌ܝ ܕܝܗܘܼܕܵܝܹ̈ܐ ܝܢܵܐ، ܐܝܼܢܵܐ ܠܹܐ ܝܢܵܐ، ܐܸܠܵܐ ܟܢܘܼܫܬܵ‌ܐ ܕܣܵܛܵܢܵܐ ܝܢܵܐ.

¹⁰ ”ܠܵܐ ܙܵܕܥܹܬ ܡ̣ܢ ܓ̰ܘܼܢܓ̰ܵܪܹ̈ܐ ܕܗܕܝܼܪܵܐ ܝܘܸܬ ܕܩܲܒܠܸܬ. ܗܵܐ، ܗܕܝܼܪܵܐ ܝܠܹܗ ܐܵܟܹܠܩܲܪܨܵܐ ܠܸܕܪܵܝܵܐ ܚܲܕܟܡܵܐ ܡܸܢܵܘܟ݂ܘܿܢ ܓܵܘ ܒܹܝܬ ܐܲܣܝܼܪܹ̈ܐ ܕܦܵܝܫܝܼܬܘܿܢ ܓ̰ܘܼܪܒܹܐ، ܘܒܸܬ ܗܵܘܹܐ ܠܵܘܟ݂ܘܿܢ ܐܘܼܠܨܵܢܵܐ ܩܵܐ ܥܸܣܪܵܐ ܝܵܘܡܵܢܹ̈ܐ. ܗܘܝܼ ܡܗܘܼܡܢܵܐ ܗܲܠ ܡܵܘܬܵ‌ܐ، ܘܒܸܬ ܝܵܗܒܹܢܘܼܟ݂ ܟܠܝܼܠܵܐ ܕܚܲܝܹ̈ܐ.

¹¹ ”ܗ̇ܘ ܕܐܝܼܬ ܠܹܗ ܢܵܬܝܵܬܹ̈‌ܐ، ܫܵܡܹܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈‌ܐ. ܗ̇ܘ ܕܓ݂ܵܠܹܒ ܗܸܟ̃ ܠܹܐ ܦܵܐܹܫ ܚܘܼܙܕܸܓܵܐ ܒܡܵܘܬܵ‌ܐ ܬܪܲܝܵܢܵܐ.“‘

ܠܥܕܬ‌ܐ ܕܓܘ ܦܪܓܡܘܣ

¹² ”ܘܠܡܲܠܲܐܟ݂ܵܐ ܕܥܹܕܬܵ‌ܐ ܕܓܵܘ ܦܲܪܓܵܡܘܿܣ ܟܬܘܿܒ݂: ’ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܗ̇ܘ ܕܐܝܼܬ ܠܹܗ ܣܲܝܦܵܐ ܚܲܪܝܼܦܵܐ ܕܬܪܹܝ ܦܘܼܡܵܢܹ̈ܐ:

¹³ ”ܒܝܼܕܵܥܵܐ ܝܘܸܢ ܐܲܝܟܵܐ ܟܹܐ ܥܵܡܪܹܬ، ܐܲܝܟܵܐ ܕܝܼܠܹܗ ܬܪܘܿܢܘܿܣ ܕܣܵܛܵܢܵܐ، ܐܝܼܢܵܐ ܟܠܹܐ ܠܘܼܟ݂ ܩܸܘܝܵܐ ܒܘܼܬ ܫܸܡܝܼ ܘܠܵܐ ܣܪܝܼܒ݂ ܠܘܼܟ݂ ܠܗܲܝܡܵܢܘܼܬܘܼܟ݂ ܒܝܼܝܼ ܐܘܼܦ ܒܝܵܘܡܵܢܹ̈ܐ ܕܐܲܢܛܝܼܦܘܿܣ، ܣܵܗܕܵܐ ܡܗܘܼܡܢܵܐ ܕܝܼܝܼ، ܗ̇ܘ ܕܦܝܼܫ ܠܹܗ ܩܛܝܼܠܵܐ ܠܟܸܣܠܵܘܟ݂ܘܿܢ ܐܲܝܟܵܐ ܕܟܹܐ ܥܵܡܹܪ ܣܵܛܵܢܵܐ.

¹⁴ ”ܐܝܼܢܵܐ ܐܝܼܬ ܠܝܼ ܥܲܠܘܼܟ݂ ܚܲܕܟܡܵܐ ܡܸܢܕܝܼܵܢܹ̈ܐ، ܣܵܒܵܒ ܐܝܼܬ ܓܵܘܵܘܟ݂ܘܿܢ ܚܲܕܟܡܵܐ ܕܝܼܢܵܐ ܕܒ݂ܝܼܩܹܐ ܒܝܘܼܠܦܵܢܵܐ ܕܒܸܠܥܵܡ، ܗ̇ܘ ܕܡܘܼܠܸܦ ܠܹܗ ܠܒܵܠܵܩ ܠܸܕܪܵܝܵܐ ܬܘܼܪܩܵܠܵܐ ܩܲܕܡ ܒܢܲܝ̈ ܐܝܼܣܪܵܐܹܝܠ، ܠܹܐܟ݂ܵܠܵܐ ܕܸܒ݂ܚܹ̈ܐ ܡܘܼܩܪܸܒܹܐ ܠܨܵܢܲܡܹ̈ܐ، ܘܠܸܙܢܵܝܵܐ.

¹⁵ ”ܗܲܪ ܗܵܕܵܐ ܐܝܼܬ ܠܘܼܟ݂ ܐܘܼܦ ܐܲܢ݇ܬ ܐܵܢܝܼ ܕܝܼܢܵܐ ܕܒ݂ܝܼܩܹܐ ܒܝܘܼܠܦܵܢܵܐ ܕܢܝܼܩܠܝܼ̈ܛܘܿ.

¹⁶ ”ܒܵܣ ܬܲܘܸܒ، ܘܐܸܢ ܠܵܐ، ܒܸܬ ܐܵܬܹܝܢ ܥܲܠܘܼܟ݂ ܒܓ̰ܲܠܕܘܼܬܵ‌ܐ، ܘܒܸܬ ܦܵܠܫܹܢ ܥܲܡܵܝܗ‌ܝ ܒܣܲܝܦܵܐ ܕܦܘܼܡܝܼ.

¹⁷ ”ܗ̇ܘ ܕܐܝܼܬ ܠܹܗ ܢܵܬܝܵܬܹ̈‌ܐ ܫܵܡܹܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈‌ܐ. ܠܗ̇ܘ ܕܓ݂ܵܠܹܒ ܒܸܬ ܝܵܗܒܹܢܹܗ ܡ̣ܢ ܡܲܢܢܵܐ ܕܝܼܠܹܗ ܛܸܫܝܵܐ، ܘܒܸܬ ܝܵܗܒܹܢܹܗ ܟܹܐܦܵܐ ܚܘܵܪܵܐ، ܘܥܲܠ ܟܹܐܦܵܐ ܟܬܝܼܒ݂ܵܐ ܫܸܡܵܐ ܚܵܕܬܵ‌ܐ، ܐܲܝܢܝܼ ܕܐܢܵܫܵܐ ܠܹܐ ܝܵܕܹܥ ܠܹܗ ܫܒ݂ܘܿܩ ܡ̣ܢ ܗ̇ܘ ܕܩܲܒܸܠ ܠܹܗ.“‘

ܠܥܕܬ‌ܐ ܕܓܘ ܬܐܘܛܝܪܐ

¹⁸ ”ܘܠܡܲܠܲܐܟ݂ܵܐ ܕܥܹܕܬܵ‌ܐ ܕܓܵܘ ܬܹܐܘܿܛܝܼܪܵܐ ܟܬܘܿܒ݂: ’ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܒܪܘܿܢܵܐ ܕܐܲܠܵܗܵܐ، ܗ̇ܘ ܕܐܝܼܬ ܠܹܗ ܥܲܝ̈ܢܹܐ ܐܲܝܟ݂ ܠܵܗܵܐ ܕܢܘܼܪܵܐ، ܘܐܲܩܠܵܬܘܼ̈ܗ‌ܝ ܟܹܐ ܕܵܡܝܼ ܠܢܚܵܫܵܐ ܡܘܼܒܪܸܩܵܐ:

¹⁹ ”ܟܹܐ ܝܵܕܥܹܢ ܠܦܘܼܠܚܵܢܘܼ̈ܟ݂، ܘܠܚܘܼܒܘܼܟ݂، ܘܠܗܲܝܡܵܢܘܼܬܘܼܟ݂، ܘܠܚܸܠܡܲܬܘܼܟ݂، ܘܠܚܡܵܠܬܘܼܟ݂، ܘܕܒܸܥܒ݂ܵܕܵܐ ܝܘܸܬ ܦܘܼܠܚܵܢܹ̈ܐ ܐܵܕܝܼܵܐ ܒܘܼܫ ܙܵܘܕܵܐ ܡ̣ܢ ܩܲܕܡܵܝܬܵ‌ܐ.

²⁰ ”ܐܝܼܢܵܐ ܐܝܼܬ ܠܝܼ ܐܵܗܵܐ ܥܲܠܘܼܟ݂: ܒܸܫܒ݂ܵܩܵܐ ܝܘܸܬ ܠܗ̇ܝ ܒܲܟ݂ܬܵ‌ܐ ܐܝܼܙܒܸܠ، ܗ݁ܝ ܕܒܸܩܪܵܝܘܼܗ̇ ܝܠܵܗ̇ ܓܵܢܘܼܗ̇ ܢܒ݂ܝܼܬܵ‌ܐ، ܘܡܲܠܘܼܦܹܐ ܝܠܵܗ̇ ܘܡܲܚܠܘܼܛܹܐ ܠܪܹ̈ܓܵܘܵܬ‌ܝܼ ܠܸܙܢܵܝܵܐ ܘܠܹܐܟ݂ܵܠܵܐ ܕܸܒ݂ܚܹ̈ܐ ܡܘܼܩܪܸܒܹܐ ܠܨܵܢܲܡܹ̈ܐ.

²¹ ”ܩܵܡ ܝܵܗܒܹܢܵܗ̇ ܥܕܵܢܵܐ ܠܬܲܘܘܼܒܹܐ، ܐܝܼܢܵܐ ܠܹܐ ܒܵܥܝܵܐ ܕܬܲܘܸܒܵܐ ܡ̣ܢ ܙܵܢܝܘܼܬܘܼܗ̇.

²² ”ܗܵܐ، ܒܸܬ ܕܵܪܹܝܢܵܗ̇ ܒܫܘܝܼܬܵ‌ܐ ܕܡܲܪܥܵܐ، ܘܐܵܢܝܼ ܕܝܼܢܵܐ ܒܸܥܒ݂ܵܕܵܐ ܓܲܝܵܪܘܼܬܵ‌ܐ ܥܲܡܘܼܗ̇ ܒܸܬ ܕܵܪܹܝܢܗܘܿܢ ܒܐܘܼܠܨܵܢܵܐ ܓܘܼܪܵܐ، ܐܸܢ ܠܵܐ ܬܲܘܸܒܝܼ ܡ̣ܢ ܦܘܼܠܚܵܢܘܼ̈ܗ̇.

²³ ”ܘܠܒܢܘܿܢܘܼ̈ܗ̇ ܒܸܬ ܡܵܚܹܝܢ ܒܡܵܘܬܵ‌ܐ؛ ܗ̇ܝܓܵܗ ܒܸܬ ܝܵܕܥܝܼ ܟܠܵܝܗ‌ܝ ܥܹܕܵܬܹ̈‌ܐ ܕܐܵܢܵܐ ܝܘܸܢ ܒܲܚܪܵܢܵܐ ܕܪܸ̈ܥܝܵܢܹܐ ܘܕܠܸܒܵܘܵܬܹ̈‌ܐ، ܘܒܸܬ ܝܵܗܒܹܢ ܠܟܠ ܚܲܕ ܡܸܢܵܘܟ݂ܘܿܢ ܐܲܝܟ݂ ܦܘܼܠܚܵܢܘܼ̈ܗ‌ܝ.

²⁴ ”ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܠܫܲܪܟܵܐ ܕܓܵܘ ܬܹܐܘܿܛܝܼܪܵܐ، ܐܵܢܝܼ ܕܠܹܐ ܝܢܵܐ ܕܒ݂ܝܼܩܹܐ ܒܐܵܗܵܐ ܝܘܼܠܦܵܢܵܐ، ܘܕܠܹܐ ܝܵܕܥܝܼ ܡܸܢܕܝܼܵܢܹ̈ܐ ܥܲܡܘܼܩܹ̈ܐ ܕܣܵܛܵܢܵܐ، ܐܲܝܟ݂ ܕܟܹܐ ܦܵܝܫܝܼ ܩܸܪܝܹܐ، ܠܹܐ ܕܵܪܹܝܢ ܥܲܠܵܘܟ݂ܘܿܢ ܝܘܼܩܪܵܐ ܐܚܹܪܢܵܐ.

²⁵ ”ܒܵܣ ܕܒ݂ܘܿܩܘܼܢ ܒܗ̇ܘ ܡܸܢܕܝܼ ܕܐܝܼܬ ܠܵܘܟ݂ܘܿܢ ܗܲܠ ܕܐܵܬܹܝܢ.

²⁶ ”ܗ̇ܘ ܕܓ݂ܵܠܹܒ ܘܢܵܛܹܪ ܦܘܼܠܚܵܢܝܼ̈ ܗܲܠ ܚܲܪܬܵ‌ܐ، ܒܸܬ ܝܵܗܒܹܢܹܗ ܫܘܼܠܛܵܢܵܐ ܥܲܠ ܐܸܡܘܵܬܹ̈‌ܐ،

²⁷ ”ܘܒܸܬ ܥܵܒܹܕ ܫܘܼܠܛܵܢܵܐ ܥܲܠܵܝܗ‌ܝ ܒܚܘܼܛܪܵܐ ܕܦܪܸܙܠܵܐ، ܘܐܲܝܟ݂ ܡܵܐܢܵܐ ܕܦܲܚܵܪܵܐ ܒܸܬ ܦܵܝܫܝܼ ܛܘܼܚܛܸܚܹܐ،ܕܵܐܟ݂ܝܼ ܕܐܘܼܦ ܐܵܢܵܐ ܩܘܼܒܸܠ ܠܝܼ ܫܘܼܠܛܵܢܵܐ ܡ̣ܢ ܒܵܒܝܼ،

²⁸ ”ܘܒܸܬ ܝܵܗܒܹܢܹܗ ܟܵܘܟ݂ܒ݂ܵܐ ܕܨܲܦܪܵܐ.

²⁹ ”ܗ̇ܘ ܕܐܝܼܬ ܠܹܗ ܢܵܬܝܵܬܹ̈‌ܐ، ܫܵܡܹܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈‌ܐ.“‘