ܓܠܝܢܐ 16 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܦܝܠܣ̈ܐ ܕܚܡܬ‌ܐ ܕܐܠܗܐ

¹ ܘܫܡܝܼܥ ܠܝܼ ܩܵܠܵܐ ܪܵܡܵܐ ܡ̣ܢ ܗܲܝܟܠܵܐ ܒܹܐܡܵܪܵܐ ܠܐܵܢܝܼ ܫܲܒ݂ܥܵܐ ܡܲܠܲܐܟܹ̈ܐ: ”ܙܹܠ݇ܡܘܼܢ ܘܫܲܦܟ݂ܘܼܢ ܠܫܲܒ݂ܥܵܐ ܦܝܼܠܵܣܹ̈ܐ ܕܚܸܡܬܵ‌ܐ ܕܐܲܠܵܗܵܐ ܥܲܠ ܐܲܪܥܵܐ.“

² ܘܐܙܝܼܠ ܠܹܗ ܡܲܠܲܐܟ݂ܵܐ ܩܲܕܡܵܝܵܐ ܘܫܘܼܦܸܟ݂ ܠܹܗ ܦܝܼܠܵܣܹܗ ܥܲܠ ܐܲܪܥܵܐ، ܘܗܘܹܐ ܠܵܗ̇ ܕܲܪ̈ܒܵܬܹ‌ܐ ܣܸܪ̈ܝܹܐ ܘܒܝܼܫܹ̈ܐ ܥܲܠ ܐܢܵܫܹ̈ܐ ܕܐܝܼܬ ܗܘܵܘ ܠܗܘܿܢ ܪܘܼܫܡܵܐ ܕܕܵܒܵܐ ܘܕܣܓ݂ܝܼܕ ܠܗܘܿܢ ܠܨܲܠܡܹܗ.

³ ܡܲܠܲܐܟ݂ܵܐ ܕܬܪܹܝ ܫܘܼܦܸܟ݂ ܠܹܗ ܦܝܼܠܵܣܹܗ ܓܵܘ ܝܵܡܵܐ؛ ܘܚܕܝܼܪܵܗ̇ ܝܵܡܵܐ ܠܕܸܡܵܐ، ܐܲܝܟ݂ ܕܸܡܵܐ ܕܐܢܵܫܵܐ ܡܝܼܬܵ‌ܐ، ܘܟܠ ܓܵܢܵܐ ܚܵܝܬܵ‌ܐ ܒܝܵܡܵܐ ܡܝܼܬ ܠܵܗ̇.

⁴ ܡܲܠܲܐܟ݂ܵܐ ܕܬܠܵܬܵ‌ܐ ܫܘܼܦܸܟ݂ ܠܹܗ ܦܝܼܠܵܣܹܗ ܒܢܲܗܪ̈ܵܘܵܬܹ‌ܐ ܘܒܥܲܝܢܵܬܹ̈‌ܐ، ܘܚܕܝܼܪܗܘܿܢ ܠܕܸܡܵܐ.

⁵ ܗ̇ܝܓܵܗ ܫܡܝܼܥ ܠܝܼ ܡܲܠܲܐܟ݂ܵܐ ܕܡ̈ܝܼܵܐ ܒܹܐܡܵܪܵܐ: ܙܲܕܝܼܩܵܐ ܝܘܸܬ، ܐܲܢ݇ܬ ܕܝܼܘܸܬ، ܐܲܢ݇ܬ ܕܝܼܘܸܬ ܗܘܵܐ. ܐܲܢ݇ܬ ܩܲܕܝܼܫܵܐ ܝܘܸܬ، ܕܗܵܕܟ݂ܵܐ ܕܝܼܢܘܼܟ݂.

⁶ ܣܵܒܵܒ ܫܘܼܦܸܟ݂ ܠܗܘܿܢ ܕܸܡܵܐ ܕܩܲܕܝܼܫܹ̈ܐ ܘܕܢܒ݂ܝܼܹ̈ܐ، ܘܕܸܡܵܐ ܝܘܼܗܒܹܠ ܠܘܼܟ݂ ܐܸܠܵܝܗ‌ܝ ܠܸܫܬܵܝܵܐ ܐܲܝܟ݂ ܕܝܼܢܵܐ ܚܫܝܼܚܹܐ.

⁷ ܘܫܡܝܼܥ ܠܝܼ ܡܲܕܒܚܵܐ ܓ̰ܲܘܘܼܒܹܐ: ܗܹܐ، ܡܵܪܝܵܐ ܐܲܠܵܗܵܐ ܐܲܚܝܼܕ ܟܠ، ܫܲܪܝܼܪܹ̈ܐ ܘܙܲܕܝܼܩܹ̈ܐ ܝܢܵܐ ܕܝܼܘܵܢܘܼ̈ܟ݂.

⁸ ܡܲܠܲܐܟ݂ܵܐ ܕܐܲܪܒܥܵܐ ܫܘܼܦܸܟ݂ ܠܹܗ ܦܝܼܠܵܣܹܗ ܥܲܠ ܫܸܡܫܵܐ، ܘܫܸܡܫܵܐ ܦܝܼܫ ܠܹܗ ܝܘܼܗܒ݂ܵܐ ܚܲܝܠܵܐ ܠܡܲܟܘܘܼܝܹܐ ܐܢܵܫܹ̈ܐ ܒܢܘܼܪܵܐ.

⁹ ܘܦܝܼܫ ܠܗܘܿܢ ܡܘܼܟܘܝܼܹܐ ܐܢܵܫܹ̈ܐ ܒܫܚܘܼܢܝܵܐ ܓܘܼܪܵܐ، ܘܓܕܝܼܦ ܠܗܘܿܢ ܥܲܠ ܫܸܡܵܐ ܕܐܲܠܵܗܵܐ، ܗ̇ܘ ܕܐܝܼܬ ܠܹܗ ܫܘܼܠܛܵܢܵܐ ܥܲܠ ܐܲܢܹܐ ܡܲܚܘܵܬܹ̈‌ܐ، ܐܝܼܢܵܐ ܠܵܐ ܬܘܼܘܸܒ ܠܗܘܿܢ ܕܝܵܗܒ݂ܝܼ ܠܹܗ ܫܘܼܒ݂ܚܵܐ.

¹⁰ ܡܲܠܲܐܟ݂ܵܐ ܕܚܲܡܫܵܐ ܫܘܼܦܸܟ݂ ܠܹܗ ܦܝܼܠܵܣܹܗ ܥܲܠ ܬܪܘܿܢܘܿܣ ܕܕܵܒܵܐ، ܘܚܘܼܫܟܸܢܵܗ̇ ܡܲܠܟܘܼܬܹܗ، ܘܠܥܘܼܣܠܸܣ ܠܗܘܿܢ ܐܢܵܫܹ̈ܐ ܠܸܫܵܢܵܝܗ‌ܝ ܡ̣ܢ ܓ̰ܘܼܢܓ̰ܵܪܹ̈ܐ،

¹¹ ܘܓܕܝܼܦ ܠܗܘܿܢ ܠܐܲܠܵܗܵܐ ܕܫܡܲܝܵܐ ܡ̣ܢ ܓ̰ܘܼܢܓ̰ܵܪ̈ܵܝܗ‌ܝ ܘܡ̣ܢ ܕܲܪ̈ܒܵܬܵܝܗ‌ܝ، ܐܝܼܢܵܐ ܠܵܐ ܬܘܼܘܸܒ ܠܗܘܿܢ ܡ̣ܢ ܦܘܼܠܚܵܢܵܝ̈ܗ‌ܝ.

¹² ܡܲܠܲܐܟ݂ܵܐ ܕܫܬܵ‌ܐ ܫܘܼܦܸܟ݂ ܠܹܗ ܦܝܼܠܵܣܹܗ ܥܲܠ ܢܲܗܪܵܐ ܓܘܼܪܵܐ، ܦܪܵܬ؛ ܘܒܪܝܼܙ ܠܗܘܿܢ ܡ̈ܝܼܘܼܗ‌ܝ ܕܦܵܝܫܵܐ ܗܘܵܐ ܗܘܼܕܸܪܬܵ‌ܐ ܐܘܼܪܚܵܐ ܩܵܐ ܡܲܠܟܹ̈ܐ ܡ̣ܢ ܡܲܕܢܚܵܐ.

¹³ ܗ̇ܝܓܵܗ ܚܙܹܐ ܠܝܼ ܬܠܵܬ ܪ̈ܘܼܚܹܐ ܛܲܡܐܹ̈ܐ ܒܸܕܡܵܝܵܐ ܠܦܸܩܵܩܹ̈ܐ ܒܸܦܠܵܛܵܐ ܡ̣ܢ ܦܘܼܡܵܐ ܕܬܲܢܝܼܢܵܐ، ܘܡ̣ܢ ܦܘܼܡܵܐ ܕܗ̇ܘ ܕܵܒܵܐ ܘܡ̣ܢ ܦܘܼܡܵܐ ܕܗ̇ܘ ܢܒ݂ܝܼܵܐ ܕܲܓܵܠܵܐ.

¹⁴ ܐܲܢܹܐ ܝܢܵܐ ܪ̈ܘܼܚܹܐ ܕܫܹܐܕܹ̈ܐ، ܒܸܥܒ݂ܵܕܵܐ ܢܝܼܫܲܢܩܹ̈ܐ، ܕܒܹܐܙܵܠܵܐ ܝܢܵܐ ܠܟܸܣ ܡܲܠܟܹ̈ܐ ܕܟܠܵܗ̇ ܒܪܝܼܬܵ‌ܐ ܠܓ̰ܲܡܘܼܥܵܝܗ‌ܝ ܕܥܵܒ݂ܕܝܼ ܦܠܵܫܵܐ ܒܗ̇ܘ ܝܵܘܡܵܐ ܓܘܼܪܵܐ ܕܐܲܠܵܗܵܐ ܐܲܚܝܼܕ ܟܠ.

¹⁵ ”ܗܵܐ، ܒܹܐܬܵܝܵܐ ܝܘܸܢ ܐܲܝܟ݂ ܓܹܢܵܒ݂ܵܐ. ܛܘܼܒ݂ܵܐ ܠܗ̇ܘ ܕܝܼܠܹܗ ܪܥܝܼܫܵܐ ܘܢܵܛܹܪ ܓ̰ܘܼܠܘܼ̈ܗ‌ܝ، ܕܠܵܐ ܚܵܕܹܪ ܫܘܼܠܚܵܝܵܐ ܕܚܵܙܝܼ ܐܢܵܫܹ̈ܐ ܢܟܸܦܬܹܗ.“

¹⁶ ܘܓ̰ܘܼܡܸܥܵܝ ܠܗܘܿܢ ܠܕܘܼܟܵܐ ܕܟܹܐ ܦܵܝܫܵܐ ܩܪܝܼܬܵ‌ܐ ܒܠܸܫܵܢܵܐ ܕܥܸܒ݂ܪ̈ܵܝܹܐ، ܗܲܪܡܵܐܓܸܕܘܿܢ.

¹⁷ ܗ̇ܝܓܵܗ ܡܲܠܲܐܟ݂ܵܐ ܕܫܲܒ݂ܥܵܐ ܫܘܼܦܸܟ݂ ܠܹܗ ܦܝܼܠܵܣܹܗ ܓܵܘ ܗܵܘܵܐ، ܘܦܠܝܼܛ ܠܹܗ ܩܵܠܵܐ ܡ̣ܢ ܬܪܘܿܢܘܿܣ ܕܓܵܘ ܗܲܝܟܠܵܐ، ܒܹܐܡܵܪܵܐ: ”ܗܘܹܐ ܠܵܗ̇.“

¹⁸ ܘܗܘܹܐ ܠܗܘܿܢ ܒܸܪ̈ܩܹܐ ܘܩܵܠܹ̈ܐ ܘܪ̈ܲܥܡܹܐ، ܘܪܵܘܕܵܢܵܐ ܓܘܼܪܵܐ ܕܠܲܝܬ ܗܘܝܼܵܐ ܐܲܝܟ݂ ܕܝܼܹܗ ܗܵܐ ܡ̣ܢ ܥܕܵܢܵܐ ܕܒܲܪܢܵܫܵܐ ܚܝܼܵܐ ܝܠܹܗ ܥܲܠ ܐܲܪܥܵܐ، ܗܵܕܟ݂ܵܐ ܓܘܼܪܵܐ ܝܗܘܵܐ ܪܵܘܕܵܢܵܐ.

¹⁹ ܘܟ̰ܠܝܼܦ ܠܵܗ̇ ܗ̇ܝ ܡܕܝܼܢ݇ܬܵ‌ܐ ܓܘܼܪܬܵ‌ܐ ܠܬܠܵܬܵ‌ܐ ܣܵܗܡܹ̈ܐ، ܘܢܦܝܼܠ ܠܗܘܿܢ ܡܕܝܼܢܵܬܹ̈‌ܐ ܕܐܸܡܘܵܬܹ̈‌ܐ. ܘܐܲܠܵܗܵܐ ܕܟ݂ܝܼܪܹܗ ܠܒܵܒܹܠ ܓܘܼܪܬܵ‌ܐ، ܘܝܘܼܗܒܹܠ ܠܹܗ ܐܸܠܘܼܗ̇ ܟܵܣܵܐ ܕܚܲܡܪܵܐ ܕܚܸܡܬܵ‌ܐ ܕܟܲܪܒܹܗ.

²⁰ ܗ̇ܝܓܵܗ ܟܠ ܓܵܙܲܪܬܵ‌ܐ ܥܪܝܼܩ ܠܵܗ̇، ܘܛܘܼܪ̈ܵܢܹܐ ܠܵܐ ܦܝܼܫ ܠܗܘܿܢ ܡܫ݇ܟ̰ܝܼܚܹܐ.

²¹ ܘܒܲܪܕܵܐ ܓܘܼܪܵܐ، ܟܠ ܚܲܕ ܐܲܝܟ݂ ܝܘܼܩܪܵܐ ܕܐܲܪܒܥܝܼ ܟܝܼܠܘܿܝܹ̈ܐ، ܢܦܝܼܠ ܠܹܗ ܡ̣ܢ ܫܡܲܝܵܐ ܥܲܠ ܐܢܵܫܹ̈ܐ. ܘܓܕܝܼܦ ܠܗܘܿܢ ܐܢܵܫܹ̈ܐ ܥܲܠ ܐܲܠܵܗܵܐ ܒܘܼܬ ܡܚܘܿܬܵ‌ܐ ܕܒܲܪܕܵܐ، ܣܵܒܵܒ ܪܵܒܵܐ ܓܘܼܪܬܵ‌ܐ ܝܗܘܵܐ ܡܚܘܿܬܵ‌ܐ.