ܓܠܝܢܐ 14 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܦܐܪܐ ܘܡܐܐ ܘܐܪܒܥܝ ܘܐܪܒܥܐ ܐܠܦ̈ܐ

¹ ܗ̇ܝܓܵܗ ܓܘܼܫܸܩ ܠܝܼ ܘܚܙܹܐ ܠܝܼ ܦܹܐܪܵܐ ܟܸܠܝܵܐ ܥܲܠ ܛܘܼܪܵܐ ܕܨܸܗܝܘܿܢ، ܘܥܲܡܹܗ ܡܵܐܐ ܘܐܲܪܒܥܝܼ ܘܐܲܪܒܥܵܐ ܐܲܠܦܹ̈ܐ، ܕܐܝܼܬ ܠܗܘܿܢ ܫܸܡܹܗ ܘܫܸܡܵܐ ܕܒܵܒܘܼܗ‌ܝ ܟܬܝܼܒ݂ܵܐ ܥܲܠ ܩܸܨܵܝܗ‌ܝ.

² ܘܫܡܝܼܥ ܠܝܼ ܩܵܠܵܐ ܡ̣ܢ ܫܡܲܝܵܐ ܐܲܝܟ݂ ܩܵܠܵܐ ܕܡ̈ܝܼܵܐ ܪܵܒܵܐ ܘܐܲܝܟ݂ ܩܵܠܵܐ ܕܪܲܥܡܵܐ ܓܘܼܪܵܐ. ܘܩܵܠܵܐ ܕܫܡܝܼܥ ܠܝܼ ܐܲܝܟ݂ ܩܵܠܵܐ ܕܡܵܚܝܵܢܹ̈ܐ ܕܩܝܼܬܵܪܹ̈ܐ ܝܗܘܵܐ ܒܸܡܚܵܝܵܐ ܥܲܠ ܩܝܼܬܵܪ̈ܵܝܗ‌ܝ.

³ ܘܫܘܼܒܸܚ ܠܗܘܿܢ ܬܸܫܒܘܿܚܬܵ‌ܐ ܚܲܕܬܵ‌ܐ ܩܲܕܡ ܬܪܘܿܢܘܿܣ ܘܩܲܕܡ ܐܵܢܝܼ ܐܲܪܒܲܥ ܚܲܝܘܵܬܹ̈‌ܐ ܘܩܲܕܡ ܐܵܢܝܼ ܚܘܵܪ̈ܕܸܩܢܹܐ؛ ܘܠܵܐ ܐܢܵܫܵܐ ܡܨܹܐ ܠܹܗ ܝܵܠܹܦ ܗܘܵܐ ܠܬܸܫܒܘܿܚܬܵ‌ܐ ܫܒ݂ܘܿܩ ܡ̣ܢ ܐܵܢܝܼ ܡܵܐܐ ܘܐܲܪܒܥܝܼ ܘܐܲܪܒܥܵܐ ܐܲܠܦܹ̈ܐ ܕܦܝܼܫܹܐ ܝܗܘܵܘ ܙܒ݂ܝܼܢܹܐ ܡ̣ܢ ܐܲܪܥܵܐ.

⁴ ܐܵܢܝܼ ܝܢܵܐ ܐܲܢܹܐ ܕܠܵܐ ܦܝܼܫ ܠܗܘܿܢ ܟ̰ܘܼܦܠܸܢܹܐ ܒܒܲܟ݂ܬܵܬܹ̈‌ܐ، ܣܵܒܵܒ ܒܬܘܼ̈ܠܹܐ ܝܢܵܐ، ܘܟܹܐ ܬܵܒܥܝܼ ܠܦܹܐܪܵܐ ܟܠ ܕܘܼܟܵܐ ܕܐܵܙܹܠ. ܐܲܢܹܐ ܦܝܼܫ ܠܗܘܿܢ ܙܒ݂ܝܼܢܹܐ ܡ̣ܢ ܒܢܲܝ̈ܢܵܫܵܐ ܘܡܘܼܩܪܸܒܹܐ ܛܥܘܼܢܬܵ‌ܐ ܩܲܕܡܵܝܬܵ‌ܐ ܠܐܲܠܵܗܵܐ ܘܠܦܹܐܪܵܐ.

⁵ ܕܘܼܓܠܵܐ ܠܲܝܬ ܓܵܘ ܦܘܼܡܵܝܗ‌ܝ؛ ܕܠܵܐ ܡܘܼܡܵܐ ܝܢܵܐ.

ܬܠܬ‌ܐ ܡܠܐܟ݂̈ܐ

⁶ ܘܚܙܹܐ ܠܝܼ ܡܲܠܲܐܟ݂ܵܐ ܐܚܹܪܢܵܐ ܒܸܦܪܵܚܵܐ ܒܹܝܦܲܠܓܵܐ ܕܫܡܲܝܵܐ، ܕܐܝܼܬ ܗܘܵܐ ܠܹܗ ܐܹܘܲܢܓܲܠܝܼܘܿܢ ܥܵܠܡܝܼܢܵܝܵܐ ܠܡܲܟܪܘܼܙܹܐ ܠܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ: ܠܟܠ ܐܘܼܡܬܵ‌ܐ ܘܫܲܒ݂ܛܵܐ ܘܠܸܫܵܢܵܐ ܘܛܵܝܸܦܵܐ.

⁷ ܘܐܡܝܼܪܹܗ ܒܩܵܠܵܐ ܪܵܡܵܐ: ”ܙܕܹܥܡܘܼܢ ܡ̣ܢ ܐܲܠܵܗܵܐ ܘܗܲܒ݂ܠܘܼܢ ܠܹܗ ܫܘܼܒ݂ܚܵܐ، ܣܵܒܵܒ ܐܬܹ‌ܐ ܠܵܗ̇ ܣܵܥܲܬ ܕܕܝܼܘܵܢܹܗ. ܣܓ݂ܘܿܕܘܼܢ ܠܗ̇ܘ ܕܒܪܹܐ ܠܹܗ ܠܫܡܲܝܵܐ ܘܠܐܲܪܥܵܐ ܘܠܝܵܡܵܐ ܘܠܥܲܝܢܵܬܹ̈‌ܐ ܕܡ̈ܝܼܵܐ.“

⁸ ܘܡܲܠܲܐܟ݂ܵܐ ܐܚܹܪܢܵܐ، ܕܬܪܹܝ، ܬܒܝܼܥ ܠܹܗ ܐܸܠܹܗ ܒܹܐܡܵܪܵܐ: ”ܢܦܝܼܠ ܠܵܗ̇، ܢܦܝܼܠ ܠܵܗ̇، ܒܵܒܹܠ ܓܘܼܪܬܵ‌ܐ، ܗ̇ܝ ܕܡܘܼܫܬܹ‌ܐ ܠܵܗ̇ ܠܟܠܵܝܗ‌ܝ ܐܸܡܘܵܬܹ̈‌ܐ ܡ̣ܢ ܚܲܡܪܵܐ ܕܚܸܡܬܵ‌ܐ ܕܙܵܢܝܘܼܬܘܼܗ̇.“

⁹ ܘܡܲܠܲܐܟ݂ܵܐ ܐܚܹܪܢܵܐ، ܕܬܠܵܬܵ‌ܐ، ܬܒܝܼܥ ܠܹܗ ܐܸܠܵܝܗ‌ܝ ܒܹܐܡܵܪܵܐ ܒܩܵܠܵܐ ܪܵܡܵܐ: ”ܐܸܢ ܚܲܕ ܣܵܓܹܕ ܠܕܵܒܵܐ ܘܠܨܲܠܡܹܗ ܘܩܲܒܸܠ ܪܘܼܫܡܹܗ ܥܲܠ ܩܸܨܹܗ ܝܲܢ ܥܲܠ ܐܝܼܕܹܗ،

¹⁰ ”ܐܘܼܦ ܗ̇ܘ ܒܸܬ ܫܵܬܹ‌ܐ ܡ̣ܢ ܚܲܡܪܵܐ ܕܚܸܡܬܵ‌ܐ ܕܐܲܠܵܗܵܐ، ܕܝܼܠܹܗ ܕܸܪܝܵܐ ܕܠܵܐ ܡܙܵܓ݂ܵܐ ܒܟܵܣܵܐ ܕܟܲܪܒܹܗ، ܘܒܸܬ ܦܵܐܹܫ ܓ̰ܘܼܢܓ̰ܸܪܵܐ ܒܢܘܼܪܵܐ ܘܟܸܒܪܝܼܬ ܩܲܕܡ ܡܲܠܲܐܟܹ̈ܐ ܩܲܕܝܼܫܹ̈ܐ ܘܩܲܕܡ ܦܹܐܪܵܐ.

¹¹ ”ܘܬܸܢܵܐ ܕܓ̰ܘܼܢܓ̰ܵܪ̈ܵܝܗ‌ܝ ܒܸܬ ܐܵܣܹܩ ܠܥܵܠܲܡ ܥܵܠܡܝܼܢ، ܘܠܹܐ ܗܵܘܹܐ ܠܗܘܿܢ ܢܝܵܚܵܐ، ܠܵܐ ܒܐܝܼܡܵܡܵܐ ܘܠܵܐ ܒܠܲܝܠܹܐ، ܠܐܵܢܝܼ ܕܣܵܓ݂ܕܝܼ ܠܕܵܒܵܐ ܘܠܨܲܠܡܹܗ، ܝܲܢ ܠܟܠ ܕܩܲܒܸܠ ܪܘܼܫܡܵܐ ܕܫܸܡܹܗ.“

¹² ܠܲܐܟ݂ܵܐ ܘܵܠܹܐ ܝܠܵܗ̇ ܠܩܲܕܝܼܫܹ̈ܐ ܕܗܵܘܹܐ ܠܗܘܿܢ ܚܡܵܠܬܵ‌ܐ، ܐܵܢܝܼ ܕܢܵܛܪܝܼ ܦܘܼܩܕܵܢܹ̈ܐ ܕܐܲܠܵܗܵܐ ܘܗܲܝܡܵܢܘܼܬܵ‌ܐ ܒܝܼܫܘܿܥ.

¹³ ܘܫܡܝܼܥ ܠܝܼ ܩܵܠܵܐ ܡ̣ܢ ܫܡܲܝܵܐ ܒܹܐܡܵܪܵܐ: ”ܟܬܘܿܒ݂: ’ܛܘܼܒ݂ܵܐ ܠܐܵܢܝܼ ܡܝܼ̈ܬܹ‌ܐ، ܕܡܵܝܬ‌ܝܼ ܒܡܵܪܝܵܐ ܡ̣ܢ ܐܵܕܝܼܵܐ ܠܒܵܬܪ.‘“ ”ܗܹܐ،“ ܒܹܐܡܵܪܵܐ ܝܠܹܗ ܪܘܼܚܵܐ، ”ܕܡܲܢܝܸܚܝܼ ܡ̣ܢ ܥܲܡܠܵܝܗ‌ܝ، ܘܦܘܼܠܚܵܢܵܝ̈ܗ‌ܝ ܒܸܬ ܬܵܒܥܝܼ ܐܸܠܵܝܗ‌ܝ.“

ܚܨܕܐ ܕܐܪܥܐ

¹⁴ ܗ̇ܝܓܵܗ ܓܘܼܫܸܩ ܠܝܼ ܘܚܙܹܐ ܠܝܼ ܥܢܵܢܵܐ ܚܘܵܪܬܵ‌ܐ، ܘܥܲܠ ܥܢܵܢܵܐ ܝܬܝܼܒ݂ܵܐ ܚܲܕ ܒܸܕܡܵܝܵܐ ܠܒܪܘܿܢܵܐ ܕܐܢܵܫܵܐ، ܥܲܠ ܪܹܝܫܹܗ ܟܠܝܼܠܵܐ ܕܕܲܗܒ݂ܵܐ، ܘܒܐܝܼܕܹܗ ܡܲܓܠܵܐ ܚܲܪܝܼܦܵܐ.

¹⁵ ܘܡܲܠܲܐܟ݂ܵܐ ܐܚܹܪܢܵܐ ܦܠܝܼܛ ܠܹܗ ܡ̣ܢ ܗܲܝܟܠܵܐ ܡܲܩܘܘܼܚܹܐ ܒܩܵܠܵܐ ܪܵܡܵܐ ܠܗ̇ܘ ܕܝܼܗܘܵܐ ܝܬܝܼܒ݂ܵܐ ܥܲܠ ܥܢܵܢܵܐ: ”ܕܪܝܼ ܡܲܓܠܘܼܟ݂ ܘܚܨܘܿܕ، ܣܵܒܵܒ ܐܬܹ‌ܐ ܠܵܗ̇ ܣܵܥܲܬ ܕܚܸܨܕܵܐ، ܘܡܛܹܐ ܠܹܗ ܚܸܨܕܵܐ ܕܐܲܪܥܵܐ.“

¹⁶ ܘܗ̇ܘ ܕܝܬܝܼܒ݂ܵܐ ܝܗܘܵܐ ܥܲܠ ܥܢܵܢܵܐ ܕܪܹܐ ܠܹܗ ܡܲܓܠܹܗ ܥܲܠ ܐܲܪܥܵܐ ܘܦܝܼܫ ܠܵܗ̇ ܚܨܝܼܕܬܵ‌ܐ ܐܲܪܥܵܐ.

¹⁷ ܡܲܠܲܐܟ݂ܵܐ ܐܚܹܪܢܵܐ ܦܠܝܼܛ ܠܹܗ ܡ̣ܢ ܗܲܝܟܠܵܐ ܕܒܫܡܲܝܵܐ، ܐܘܼܦ ܗ̇ܘ ܐܝܼܬ ܗܘܵܐ ܠܹܗ ܡܲܓܠܵܐ ܚܲܪܝܼܦܵܐ.

¹⁸ ܘܡܲܠܲܐܟ݂ܵܐ ܐܚܹܪܢܵܐ ܦܠܝܼܛ ܠܹܗ ܡ̣ܢ ܡܲܕܒܚܵܐ، ܗ̇ܘ ܕܐܝܼܬ ܗܘܵܐ ܠܹܗ ܫܘܼܠܛܵܢܵܐ ܥܲܠ ܢܘܼܪܵܐ؛ ܡܘܼܩܘܸܚ ܠܹܗ ܒܩܵܠܵܐ ܪܵܡܵܐ ܠܗ̇ܘ ܕܐܝܼܬ ܗܘܵܐ ܠܹܗ ܡܲܓܠܵܐ ܚܲܪܝܼܦܵܐ، ܒܹܐܡܵܪܵܐ: ”ܕܪܝܼ ܡܲܓܠܘܼܟ݂ ܚܲܪܝܼܦܵܐ ܘܩܛܘܿܦ ܠܩܘܼܢܛܵܝܦܹ̈ܐ ܕܓܸܦܬܵ‌ܐ ܕܐܲܪܥܵܐ، ܣܵܒܵܒ ܡܛܹܐ ܠܗܘܿܢ ܥܲܢܒ݂ܘܼ̈ܗ̇.“

¹⁹ ܘܕܪܹܐ ܠܹܗ ܡܲܠܲܐܟ݂ܵܐ ܡܲܓܠܹܗ ܒܐܲܪܥܵܐ ܘܩܛܝܼܦ ܠܹܗ ܠܓܸܦܬܵ‌ܐ ܕܐܲܪܥܵܐ ܘܕܸܪܝܵܐ ܠܹܗ ܓܵܘ ܡܲܥܨܲܪܬܵ‌ܐ ܓܘܼܪܬܵ‌ܐ ܕܚܸܡܬܵ‌ܐ ܕܐܲܠܵܗܵܐ.

²⁰ ܦܝܼܫ ܠܵܗ̇ ܡܪܝܼܟ̰ܬܵ‌ܐ ܡܲܥܨܲܪܬܵ‌ܐ ܠܒܲܕܲܪ ܡ̣ܢ ܡܕܝܼܢ݇ܬܵ‌ܐ، ܘܦܠܝܼܛ ܠܹܗ ܕܸܡܵܐ ܡ̣ܢ ܡܲܥܨܲܪܬܵ‌ܐ ܗܲܠ ܠܲܥܡܹ̈ܐ ܕܣܘܼܣܵܘܵܬܹ̈‌ܐ ܩܵܐ ܪܸܚܩܵܝܘܼܬܵ‌ܐ ܕܡܵܐܐ ܘܬܡܵܢܝܼ ܡܝܼܠܹ̈ܐ.