ܓܠܝܢܐ 13 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܬܪܝ ܕܒ̈ܐ

¹ ܘܚܙܹܐ ܠܝܼ ܚܲܕ ܕܵܒܵܐ ܒܸܦܠܵܛܵܐ ܡ̣ܢ ܝܵܡܵܐ. ܐܝܼܬ ܗܘܵܐ ܠܹܗ ܥܸܣܪܵܐ ܩܲܪ̈݇ܢܵܢܹܐ ܘܫܲܒ݂ܥܵܐ ܪܹ̈ܝܫܵܢܹܐ، ܘܥܲܠ ܩܲܪ̈݇ܢܵܢܘܼܗ‌ܝ ܥܸܣܪܵܐ ܬܵܓܹ̈ܐ، ܘܥܲܠ ܪܹ̈ܝܫܵܢܘܼܗ‌ܝ ܫܸܡܵܢܹ̈ܐ ܕܓܘܼܕܵܦܵܐ.

² ܗ̇ܘ ܕܵܒܵܐ ܕܚܙܹܐ ܠܝܼ ܟܹܐ ܕܵܡܹܐ ܗܘܵܐ ܠܢܸܡܪܵܐ، ܘܐܲܩܠܵܬܘܼ̈ܗ‌ܝ ܐܲܝܟ݂ ܐܲܩܠܵܬܹ̈‌ܐ ܕܕܸܒܵܐ، ܘܦܘܼܡܹܗ ܐܲܝܟ݂ ܦܘܼܡܵܐ ܕܐܲܪܝܵܐ. ܝܘܼܗܒܹܠ ܠܹܗ ܬܲܢܝܼܢܵܐ ܠܕܵܒܵܐ ܚܲܝܠܹܗ، ܘܬܪܘܿܢܘܿܣܹܗ ܘܫܘܼܠܛܵܢܵܐ ܓܘܼܪܵܐ.

³ ܘܚܲܕ ܡ̣ܢ ܪܹ̈ܝܫܵܢܹܐ ܕܕܵܒܵܐ ܕܘܼܪܒܸܢܵܐ ܝܗܘܵܐ ܐܲܝܟ݂ ܡܚܘܿܬܵ‌ܐ، ܐܝܼܢܵܐ ܕܲܪܒܵܐ ܕܡܵܘܬܵ‌ܐ ܒܣܝܼܡ ܠܵܗ̇؛ ܘܟܠܵܗ̇ ܕܘܼܢܝܹܐ ܬܒܝܼܥ ܠܵܗ̇ ܠܗ̇ܘ ܕܵܒܵܐ.

⁴ ܘܐܢܵܫܹ̈ܐ ܣܓ݂ܝܼܕ ܠܗܘܿܢ ܠܬܲܢܝܼܢܵܐ ܣܵܒܵܒ ܝܘܼܗܒܹܠ ܠܹܗ ܫܘܼܠܛܵܢܵܐ ܠܕܵܒܵܐ، ܘܣܓ݂ܝܼܕ ܠܗܘܿܢ ܠܕܵܒܵܐ ܒܹܐܡܵܪܵܐ: ”ܡܵܢܝܼ ܝܠܹܗ ܐܲܝܟ݂ ܕܵܒܵܐ؟ ܘܡܵܢܝܼ ܡܵܨܹܐ ܦܵܠܹܫ ܥܲܡܹܗ؟“

⁵ ܦܝܼܫ ܠܹܗ ܝܘܼܗܒ݂ܵܐ ܠܕܵܒܵܐ ܦܘܼܡܵܐ ܕܗܲܡܙܸܡ ܡܸܢܕܝܼܵܢܹ̈ܐ ܓܘܼܪܹ̈ܐ ܘܓܘܼܕܵܦܹ̈ܐ؛ ܘܦܝܼܫ ܠܹܗ ܝܘܼܗܒ݂ܵܐ ܐܸܠܹܗ ܫܘܼܠܛܵܢܵܐ ܩܵܐ ܡܸܬܚܵܐ ܕܐܲܪܒܥܝܼ ܘܬܪܹܝ ܝܲܪ̈ܚܹܐ.

⁶ ܘܦܬܝܼܚ ܠܹܗ ܦܘܼܡܹܗ ܒܓܘܼܕܵܦܹ̈ܐ ܥܲܠ ܐܲܠܵܗܵܐ، ܒܸܓܕܵܦܵܐ ܥܲܠ ܫܸܡܹܗ، ܘܠܡܲܫܟܢܹܗ، ܘܠܐܵܢܝܼ ܕܒܸܥܡܵܪܵܐ ܝܢܵܐ ܒܫܡܲܝܵܐ.

⁷ ܦܝܼܫ ܠܹܗ ܝܘܼܗܒ݂ܵܐ ܐܸܠܹܗ ܚܲܝܠܵܐ ܠܸܦܠܵܫܵܐ ܕܲܠܩܘܼܒ݂ܠ ܕܩܲܕܝܼܫܹ̈ܐ ܘܠܸܓ݂ܠܵܒܵܝ. ܘܐܘܼܦ ܦܝܼܫ ܠܹܗ ܝܘܼܗܒ݂ܵܐ ܐܸܠܹܗ ܫܘܼܠܛܵܢܵܐ ܥܲܠ ܟܠ ܫܲܒ݂ܛܵܐ ܘܛܵܝܸܦܵܐ ܘܠܸܫܵܢܵܐ ܘܐܘܼܡܬܵ‌ܐ.

⁸ ܟܠܵܝܗ‌ܝ ܥܵܡܪ̈ܵܢܹܐ ܕܐܲܪܥܵܐ ܒܸܬ ܣܵܓ݂ܕܝܼ ܠܕܵܒܵܐ، ܟܠ ܕܠܹܐ ܝܠܹܗ ܟܬܝܼܒ݂ܵܐ ܫܸܡܹܗ ܓܵܘ ܟܬܵܒ݂ܵܐ ܕܚܲܝܹ̈ܐ ܕܗ̇ܘ ܦܹܐܪܵܐ ܦܪܝܼܡܵܐ ܡ̣ܢ ܫܘܼܪܵܝܵܐ ܕܒܪܝܼܬܵ‌ܐ.

⁹ ܗ̇ܘ ܕܐܝܼܬ ܠܹܗ ܢܵܬܝܵܬܹ̈‌ܐ، ܫܵܡܹܥ.

¹⁰ ܗ̇ܘ ܕܗܕܝܼܪܵܐ ܝܠܹܗ ܕܐܵܙܹܠ ܒܣܠܵܒܵܐ، ܒܣܠܵܒܵܐ ܒܸܬ ܐܵܙܹܠ؛ ܗ̇ܘ ܕܒܣܲܝܦܵܐ ܩܵܛܹܠ، ܒܣܲܝܦܵܐ ܒܸܬ ܦܵܐܹܫ ܩܛܝܼܠܵܐ. ܠܲܐܟ݂ܵܐ ܘܵܠܹܐ ܝܠܵܗ̇ ܠܩܲܕܝܼܫܹ̈ܐ ܕܗܵܘܹܐ ܠܗܘܿܢ ܚܡܵܠܬܵ‌ܐ ܘܗܲܝܡܵܢܘܼܬܵ‌ܐ.

ܕܒܐ ܡ̣ܢ ܐܪܥܐ

¹¹ ܗ̇ܝܓܵܗ ܚܙܹܐ ܠܝܼ ܚܲܕ ܕܵܒܵܐ ܐܚܹܪܢܵܐ ܒܸܦܠܵܛܵܐ ܡ̣ܢ ܐܲܪܥܵܐ. ܐܝܼܬ ܗܘܵܐ ܠܹܗ ܬܪܹܝ ܩܲܪ̈݇ܢܵܢܹܐ ܐܲܝܟ݂ ܩܲܪ̈݇ܢܵܢܹܐ ܕܦܹܐܪܵܐ، ܐܝܼܢܵܐ ܗܲܡܙܘܼܡܹܐ ܝܗܘܵܐ ܐܲܝܟ݂ ܬܲܢܝܼܢܵܐ.

¹² ܘܒܸܥܒ݂ܵܕܵܐ ܝܗܘܵܐ ܩܲܕܡ ܥܲܝܢܘܼ̈ܗ‌ܝ ܟܠܹܗ ܫܘܼܠܛܵܢܵܐ ܕܗ̇ܘ ܕܵܒܵܐ ܩܲܕܡܵܝܵܐ، ܘܥܒ݂ܝܼܕ ܠܹܗ ܠܐܲܪܥܵܐ ܘܠܥܵܡܪ̈ܵܢܹܐ ܕܥܲܠܘܼܗ̇ ܕܣܵܓ݂ܕܝܼ ܠܗ̇ܘ ܕܵܒܵܐ ܩܲܕܡܵܝܵܐ، ܗ̇ܘ ܕܒܣܝܼܡ ܠܹܗ ܡ̣ܢ ܡܚܘܿܬܵ‌ܐ ܕܡܵܘܬܵ‌ܐ.

¹³ ܟܹܐ ܥܵܒܹܕ ܢܝܼܫܲܢܩܹ̈ܐ ܓܘܼܪܹ̈ܐ، ܗܵܕܵܐ ܕܐܘܼܦ ܢܘܼܪܵܐ ܡܘܼܨܠܹܐ ܠܹܗ ܡ̣ܢ ܫܡܲܝܵܐ ܠܐܲܪܥܵܐ ܩܲܕܡ ܒܢܲܝ̈ܢܵܫܵܐ.

¹⁴ ܘܡܘܼܚܠܸܛ ܠܹܗ ܠܥܵܡܪ̈ܵܢܹܐ ܕܐܲܪܥܵܐ ܒܘܼܬ ܢܝܼܫܲܢܩܹ̈ܐ ܕܦܝܼܫܹܐ ܝܗܘܵܘ ܝܘܼܗܒܹܐ ܐܸܠܹܗ ܠܸܥܒ݂ܵܕܵܐ ܩܲܕܡ ܕܵܒܵܐ، ܒܹܐܡܵܪܵܐ ܠܥܵܡܪ̈ܵܢܹܐ ܕܐܲܪܥܵܐ ܕܥܵܒ݂ܕܝܼ ܨܲܠܡܵܐ ܠܕܵܒܵܐ ܕܦܝܼܫܵܐ ܝܗܘܵܐ ܕܘܼܪܒܸܢܵܐ ܒܣܲܝܦܵܐ، ܘܚܝܹܐ ܠܹܗ.

¹⁵ ܘܦܝܼܫ ܠܹܗ ܝܘܼܗܒ݂ܵܐ ܐܸܠܹܗ ܚܲܝܠܵܐ ܕܝܵܗܒܹܠ ܚܲܝܹ̈ܐ ܠܨܲܠܡܵܐ ܕܕܵܒܵܐ، ܗܵܕܟ݂ܵܐ ܕܨܲܠܡܵܐ ܕܕܵܒܵܐ ܐܘܼܦ ܡܵܨܹܐ ܗܲܡܙܸܡ، ܘܐܘܼܦ ܥܵܒܹܕ ܟܠܵܝܗ‌ܝ ܐܵܢܝܼ ܕܠܵܐ ܣܵܓ݂ܕܝܼ ܠܨܲܠܡܵܐ ܕܕܵܒܵܐ ܕܦܵܝܫܝܼ ܩܛܝܼܠܹܐ.

¹⁶ ܘܕܥܵܒܹܕ ܠܟܠܵܝܗ‌ܝ، ܠܓܘܼܪܵܐ ܘܠܙܥܘܿܪܵܐ، ܠܥܲܬܝܼܪܹ̈ܐ ܘܠܡܸܣܟܹܢܹ̈ܐ، ܠܚܹܐܪܹ̈ܐ ܘܠܥܲܒ݂ܕܹ̈ܐ، ܕܦܵܝܫܝܼ ܝܘܼܗܒܹܐ ܢܝܼܫܲܢܩܵܐ ܥܲܠ ܐܝܼܕܵܝܗ‌ܝ ܕܝܲܡܝܼܢܵܐ ܝܲܢ ܥܲܠ ܩܸܨܵܝܗ‌ܝ،

¹⁷ ܗܵܕܟ݂ܵܐ ܕܐܘܼܦ ܚܲܕ ܠܵܐ ܡܵܨܹܐ ܙܵܒܹܢ ܝܲܢ ܙܲܒܸܢ، ܫܒ݂ܘܿܩ ܡ̣ܢ ܗ̇ܘ ܕܐܝܼܬ ܠܹܗ ܢܝܼܫܲܢܩܵܐ، ܕܝܼܠܹܗ ܫܸܡܵܐ ܕܕܵܒܵܐ، ܝܲܢ ܡܸܢܝܵܢܵܐ ܕܫܸܡܹܗ.

¹⁸ ܠܲܐܟ݂ܵܐ ܝܠܵܗ̇ ܚܸܟ݂ܡܬܵ‌ܐ. ܗ̇ܘ ܕܐܝܼܬ ܠܹܗ ܗܵܘܢܵܐ ܚܲܫܒܸܢ ܡܸܢܝܵܢܵܐ ܕܕܵܒܵܐ؛ ܣܵܒܵܒ ܡܸܢܝܵܢܵܐ ܕܒܲܪܢܵܫܵܐ ܝܠܹܗ؛ ܘܡܸܢܝܵܢܹܗ ܝܼܠܹܗ ܫܬܵܡܵܐܐ ܘܫܬ‌ܝܼ ܘܫܬܵ‌ܐ.