ܡܙܡܘܪܐ 94 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܝܵܐ ܐܲܠܵܗܵܐ ܫܵܩܠܵܢܵܐ ܕܬܘܼܥܠܵܐ، ܝܵܐ ܡܵܪܝܵܐ، ܝܵܐ ܐܲܠܵܗܵܐ ܫܵܩܠܵܢܵܐ ܕܬܘܼܥܠܵܐ، ܙܪܘܿܩ.

² ܦܘܼܫ ܪܝܼܡܵܐ، ܝܵܐ ܕܲܝܵܢܵܐ ܕܐܲܪܥܵܐ، ܡܲܕܸܪ ܦܘܼܪܥܵܢܵܐ ܥܲܠ ܚܵܬܪ̈ܵܢܹܐ.

³ ܗܲܠ ܐܝܼܡܲܢ ܪ̈ܲܫܝܼܥܹܐ، ܝܵܐ ܡܵܪܝܵܐ، ܗܲܠ ܐܝܼܡܲܢ ܪ̈ܲܫܝܼܥܹܐ ܦܵܨܚܝܼ؟

⁴ ܟܹܐ ܓܲܒܓܸܒܝܼ، ܟܹܐ ܗܲܡܙܸܡܝܼ ܒܫܘܼܒ݂ܗܵܪܵܐ، ܟܹܐ ܚܵܬܪܝܼ ܒܓܵܢܵܝܗ‌ܝ ܟܠܵܝܗ‌ܝ ܦܵܠܚܵܢܹ̈ܐ ܕܥܵܘܠܵܐ.

⁵ ܠܥܲܡܘܼܟ݂، ܝܵܐ ܡܵܪܝܵܐ، ܟܹܐ ܛܲܚܛܸܚܝܼ، ܘܠܝܵܪܬܘܼܬܘܼܟ݂ ܟܹܐ ܡܲܠܝܸܨܝܼ.

⁶ ܠܐܲܪܡܸܠܬܵ‌ܐ ܘܠܡܵܫܵܚܲܛ ܟܹܐ ܩܵܛܠܝܼ، ܘܠܝܲܬܘܼܡܹ̈ܐ ܟܹܐ ܡܲܡܝܸܬ‌ܝܼ.

⁷ ܘܟܹܐ ܐܵܡܪܝܼ: ”ܠܹܐ ܚܵܙܹܐ ܡܵܪܝܵܐ، ܘܐܲܠܵܗܵܐ ܕܝܲܥܩܘܿܒ݂ ܠܹܐ ܡܲܣܸܡ ܒܵܠܵܐ.“

⁸ ܡܲܣܸܡܘܼܢ ܒܵܠܵܐ، ܝܵܐ ܐܲܗܡܲܩܹ̈ܐ ܕܓܵܘ ܥܲܡܵܐ؛ ܐܝܼܡܲܢ ܒܸܬ ܦܲܪܡܹܝܬܘܿܢ، ܝܵܐ ܣܲܟ݂ܠܹ̈ܐ؟

⁹ ܢܵܨܒ݂ܵܢܵܐ ܕܢܵܬܵ‌ܐ، ܗܵܐ، ܠܹܐ ܫܵܡܹܥ؟ ܝܲܢ ܓܵܒ݂ܠܵܢܵܐ ܕܥܲܝܢܵܐ، ܗܵܐ، ܠܹܐ ܚܵܙܹܐ؟

¹⁰ ܬܲܠܡܸܕܵܢܵܐ ܕܐܸܡܘܵܬܹ̈‌ܐ، ܗܵܐ، ܠܹܐ ܡܲܢܟܸܣ، ܗ̇ܘ ܕܟܹܐ ܡܲܠܸܦ ܝܕܵܥܬܵ‌ܐ ܠܒܲܪܢܵܫܵܐ؟

¹¹ ܡܵܪܝܵܐ ܟܹܐ ܝܵܕܹܥ ܚܘܼܫܵܒܹ̈ܐ ܕܐܢܵܫܵܐ ܕܣܪܝܼܩܘܼܬܵ‌ܐ ܝܢܵܐ.

¹² ܛܘܼܒ݂ܵܐ ܠܐܢܵܫܵܐ ܕܬܲܠܡܸܕܸܬ ܠܹܗ، ܝܵܐ ܡܵܪܝܵܐ، ܘܡ̣ܢ ܢܵܡܘܿܣܘܼܟ݂ ܡܲܠܦܸܬ ܠܹܗ،

¹³ ܠܝܼܵܗܒܹܗ ܢܝܵܚܵܐ ܡ̣ܢ ܝܵܘܡܵܢܹ̈ܐ ܕܒܝܼܫܬܵ‌ܐ، ܗܲܠ ܕܦܵܐܹܫ ܚܦܝܼܪܵܐ ܓܘܼܒܵܐ ܠܪܲܫܝܼܥܵܐ.

¹⁴ ܣܵܒܵܒ ܠܹܐ ܪܲܦܹܐ ܡܵܪܝܵܐ ܠܥܲܡܹܗ، ܘܠܝܵܪܬܘܼܬܹܗ ܠܹܐ ܫܵܒܹܩ.

¹⁵ ܣܵܒܵܒ ܠܙܲܕܝܼܩܘܼܬܵ‌ܐ ܒܸܬ ܕܵܝܪܵܐ ܕܝܼܘܵܢ، ܘܒܸܬ ܐܵܙܠ݇ܝܼ ܒܵܬܪܘܼܗ̇ ܟܠܵܝܗ‌ܝ ܬܪ̈ܘܼܨܹܐ ܕܠܸܒܵܐ.

¹⁶ ܡܵܢܝܼ ܒܸܬ ܩܵܐܹܡ ܩܵܬ‌ܝܼ ܕܲܠܩܘܼܒ݂ܠ ܕܥܵܒ݂ܕܵܢܹ̈ܐ ܕܒܝܼܫܬܵ‌ܐ؟ ܡܵܢܝܼ ܒܸܬ ܟܵܠܹܐ ܩܵܬ‌ܝܼ ܕܲܠܩܘܼܒ݂ܠ ܕܦܵܠܚܵܢܹ̈ܐ ܕܥܵܘܠܵܐ؟

¹⁷ ܐܸܢ ܠܵܐ ܗܵܘܹܐ ܗܘܵܐ ܡܵܪܝܵܐ ܗܲܝܲܪܬܵ‌ܐ ܐܸܠܝܼ، ܒܵܬܪ ܚܲܕܟ̰ܵܐ ܒܸܬ ܫܵܪܝܵܐ ܗܘܵܐ ܓܵܢܝܼ ܒܕܘܼܝܵܪܵܐ ܕܫܸܬܩܵܐ.

¹⁸ ܐܸܢ ܐܡܝܼܪܝܼ: ”ܓ̰ܪܝܼܛ ܠܵܗ̇ ܐܲܩܠܝܼ،“ ܛܲܝܒܘܼܬܘܼܟ݂، ܝܵܐ ܡܵܪܝܵܐ، ܟܹܐ ܣܵܢܕܵܐ ܠܝܼ.

¹⁹ ܟܲܕ ܙܵܝܕܝܼ ܚܲܡܝܼ̈ ܒܓܵܘܝܼ، ܒܘܼܝܵܐܘܼ̈ܟ݂ ܟܹܐ ܡܲܚܕܝܼ ܠܓܵܢܝܼ.

²⁰ ܗܵܐ، ܡܵܨܝܼ ܥܵܒ݂ܕܝܼ ܚܲܒ݂ܪܘܼܬܵ‌ܐ ܥܲܡܘܼܟ݂ ܫܘܼܠܛܵܢܹ̈ܐ ܕܛܠܘܼܡܝܵܐ، ܐܵܢܝܼ ܕܟܹܐ ܓܵܒ݂ܠܝܼ ܡܲܠܝܲܨܬܵ‌ܐ ܒܩܵܢܘܿܢܵܐ؟

²¹ ܘܟܹܐ ܓ̰ܵܡܥܝܼ ܥܲܠ ܓܵܢܵܐ ܕܙܲܕܝܼܩܵܐ، ܘܕܸܡܵܐ ܙܲܟܵܝܵܐ ܟܹܐ ܥܵܒ݂ܕܝܼ ܚܲܝܵܒ݂ܵܐ.

²² ܐܝܼܢܵܐ ܗܘܹܐ ܠܹܗ ܡܵܪܝܵܐ ܐܸܠܝܼ ܩܲܠܥܵܐ، ܘܐܲܠܵܗ‌ܝܼ ܐܝܼܨܵܪܵܐ ܕܒܹܝܬ ܓܵܘܣܝܼ.

²³ ܘܒܸܬ ܡܲܕܸܪ ܥܲܠܵܝܗ‌ܝ ܥܵܘܠܵܝܗ‌ܝ، ܘܓܵܘ ܒܝܼܫܘܼܬܵܝܗ‌ܝ ܒܸܬ ܛܲܠܸܩ ܠܗܘܿܢ، ܒܸܬ ܛܲܠܸܩ ܠܗܘܿܢ ܡܵܪܝܵܐ ܐܲܠܵܗܲܢ.