ܡܙܡܘܪܐ 91 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܝܵܬܒ݂ܵܢܵܐ ܒܣܸܬܵܪܵܐ ܕܥܸܠܵܝܵܐ، ܒܛܸܠܵܢܝܼܬܵ‌ܐ ܕܚܲܝܠܬܵܢܵܐ ܒܸܬ ܫܵܪܹܐ.

² ܒܸܬ ܐܵܡܪܹܢ ܒܘܼܬ ܡܵܪܝܵܐ: ”ܗ̇ܘ ܝܼܠܹܗ ܒܹܝܬ ܓܵܘܣܝܼ ܘܚܸܣܢܝܼ، ܐܲܠܵܗ‌ܝܼ، ܒܸܬ ܣܵܒܪܹܢ ܒܝܼܹܗ.“

³ ܒܗ̇ܝ ܕܗ̇ܘ ܒܸܬ ܦܲܨܹܐ ܠܘܼܟ݂ ܡ̣ܢ ܢܸܫܒ݂ܵܐ ܕܨܲܝܵܕܵܐ، ܡ̣ܢ ܡܲܪ̈ܥܹܐ ܩܵܛܠܵܢܹ̈ܐ ܘܛܲܠܩܵܢܹ̈ܐ.

⁴ ܒܦܲܪ̈ܘܼܗ‌ܝ ܒܸܬ ܟܲܣܹܐ ܠܘܼܟ݂، ܘܬܚܘܿܬ ܓܘܼܠܦܵܢܘܼ̈ܗ‌ܝ ܒܸܬ ܥܵܪܩܹܬ، ܣܲܟܪܵܐ ܘܡܵܛܵܠܵܐ ܝܠܵܗ̇ ܫܲܪܝܼܪܘܼܬܹܗ.

⁵ ܠܹܐ ܙܵܕܥܹܬ ܡ̣ܢ ܙܕܘܼܥܬܵ‌ܐ ܕܠܲܝܠܹܐ، ܡ̣ܢ ܓܹܐܪܵܐ ܕܦܵܪܹܚ ܒܐܝܼܡܵܡܵܐ،

⁶ ܡ̣ܢ ܡܲܪܥܵܐ ܩܵܛܠܵܢܵܐ ܕܚܵܕܹܪ ܒܚܸܫܟܵܐ، ܡ̣ܢ ܡܲܚܪܲܒ݂ܬܵ‌ܐ ܕܛܲܠܩܵܐ ܒܛܲܗܪܵܐ.

⁷ ܟܲܕ ܢܵܦܠܝܼ ܐܲܠܦܵܐ ܡ̣ܢ ܕܸܦܢܘܼܟ݂، ܘܪܸܒܘܼܬܵ‌ܐ ܡ̣ܢ ܝܲܡܝܼܢܘܼܟ݂، ܠܟܸܣܠܘܼܟ݂ ܠܹܐ ܩܲܪܒܸܢ.

⁸ ܐܲܚܟ̰ܝܼ ܒܥܲܝ̈ܢܘܼܟ݂ ܒܸܬ ܚܵܝܪܹܬ، ܘܦܘܼܪܥܵܢܵܐ ܕܪ̈ܲܫܝܼܥܹܐ ܒܸܬ ܚܵܙܹܝܬ.

⁹ ܒܗ̇ܝ ܕܠܡܵܪܝܵܐ ܥܸܠܵܝܵܐ، ܗ̇ܘ ܕܝܼܠܹܗ ܒܹܝܬ ܓܵܘܣܝܼ، ܥܒ݂ܝܼܕ ܠܘܼܟ݂ ܡܲܥܡܪܘܼܟ݂،

¹⁰ ܠܹܐ ܬܵܦܩܵܐ ܒܝܼܘܼܟ݂ ܒܝܼܫܬܵ‌ܐ، ܘܠܹܐ ܩܲܪܒܸܢܵܐ ܠܡܲܫܟܢܘܼܟ݂ ܡܚܘܿܬܵ‌ܐ.

¹¹ ܣܵܒܵܒ ܒܸܬ ܦܵܩܹܕ ܠܡܲܠܲܐܟ݂ܘܼ̈ܗ‌ܝ ܒܘܼܬ ܕܝܼܘܼܟ݂، ܕܢܵܛܪܝܼ ܠܘܼܟ݂ ܒܟܠܵܝܗ‌ܝ ܐܘܼܪ̈ܚܵܬܘܼܟ݂.

¹² ܥܲܠ ܐܝܼܕܵܬܵܝ̈ܗ‌ܝ ܒܸܬ ܛܵܥܢܝܼ ܠܘܼܟ݂، ܕܠܵܐ ܬܲܪܩܸܠܵܐ ܒܟܹܐܦܵܐ ܐܲܩܠܘܼܟ݂.

¹³ ܥܲܠ ܐܲܪܝܵܐ ܘܦܲܬܢܵܐ ܒܸܬ ܦܵܣܥܹܬ، ܓܘܼܪܝܵܐ ܕܐܲܪܝܵܐ ܘܬܲܢܝܼܢܵܐ ܒܸܬ ܕܲܫܕܸܫܸܬ.

¹⁴ ”ܒܸܬ ܦܲܨܹܢܹܗ ܣܵܒܵܒ ܡܘܼܚܸܒ ܠܹܗ ܐܸܠܝܼ، ܒܸܬ ܡܲܪܡܸܢܹܗ ܠܫܲܝܢܵܐ ܒܗ̇ܝ ܕܝܕܝܼܥ ܠܹܗ ܫܸܡܝܼ.

¹⁵ ”ܒܸܬ ܓ̰ܲܘܸܒܸܢܹܗ ܐܝܼܡܲܢ ܕܩܵܪܹܐ ܠܝܼ، ܥܲܡܹܗ ܝܘܸܢ ܐܵܢܵܐ ܒܥܕܵܢܵܐ ܕܥܵܘܩܵܢܵܐ، ܒܸܬ ܦܲܨܹܢܹܗ ܘܒܸܬ ܡܝܲܩܪܸܢܹܗ.

¹⁶ ”ܒܝܘܼܪܟ݂ܵܐ ܕܝܵܘܡܵܢܹ̈ܐ ܒܸܬ ܡܲܣܒܸܥܸܢܹܗ، ܘܒܸܬ ܡܲܚܙܹܝܢ ܐܸܠܹܗ ܦܘܼܪܩܵܢܝܼ.“