ܡܙܡܘܪܐ 85 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܡܙܡܘܪܐ ܕܒܢܝ̈ ܩܘܪܚ.

¹ ܒܣܝܼܡ ܠܵܗ̇ ܠܘܼܟ݂، ܝܵܐ ܡܵܪܝܵܐ، ܒܐܲܪܥܘܼܟ݂، ܡܘܼܕܸܪܘܼܟ݂ ܠܝܲܥܩܘܿܒ݂ ܡ̣ܢ ܓܵܠܘܼܬܵ‌ܐ.

² ܫܒ݂ܝܼܩ ܠܘܼܟ݂ ܠܥܲܡܘܼܟ݂ ܥܵܘܠܵܝܗ‌ܝ، ܟܘܼܣܹܐ ܠܘܼܟ݂ ܠܟܠ ܚܛܝܼܬܵܝܗ‌ܝ.ܣܹܠܵܗ

³ ܡܘܼܥܒܸܪܘܼܟ݂ ܟܠܵܗ̇ ܚܸܡܬܘܼܟ݂، ܕܝܼܪܘܼܟ݂ ܡ̣ܢ ܚܸܡܬܵ‌ܐ ܕܟܲܪܒܘܼܟ݂.

⁴ ܡܲܕܸܪܲܢ، ܝܵܐ ܐܲܠܵܗܵܐ ܕܦܘܼܪܩܵܢܲܢ، ܘܒܲܛܸܠ ܠܟܲܪܒܘܼܟ݂ ܡܸܢܲܢ.

⁵ ܗܵܐ، ܠܥܵܠܲܡ ܒܸܬ ܟܵܪܒܹܬ ܥܲܠܲܢ، ܡܲܓܪܸܫܸܬ ܚܸܡܬܘܼܟ݂ ܠܕܵܪܵܐ ܘܕܵܪܵܐ؟

⁶ ܗܵܐ، ܐܲܢ݇ܬ ܠܹܐ ܕܵܝܪܹܬ ܡܲܚܹܝܬ ܠܲܢ، ܩܵܐ ܕܥܲܡܘܼܟ݂ ܚܵܕܝܼ ܒܝܼܘܼܟ݂؟

⁷ ܡܲܚܙܝܼ ܠܲܢ ܛܲܝܒܘܼܬܘܼܟ݂، ܝܵܐ ܡܵܪܝܵܐ، ܘܦܘܼܪܩܵܢܘܼܟ݂ ܝܵܗܒܹܬ ܐܸܠܲܢ.

⁸ ܫܵܡܥܹܢ ܡܘܼܕܝܼ ܒܸܬ ܗܲܡܙܸܡ ܐܲܠܵܗܵܐ ܡܵܪܝܵܐ، ܣܵܒܵܒ ܒܸܬ ܗܲܡܙܸܡ ܫܠܵܡܵܐ ܠܥܲܡܹܗ ܘܠܙܲܕܝܼܩܘܼ̈ܗ‌ܝ، ܘܠܵܐ ܕܵܝܪܝܼ ܠܣܲܟ݂ܠܘܼܬܵ‌ܐ.

⁹ ܗܹܐ، ܩܘܼܪܒܵܐ ܝܠܹܗ ܠܙܕܝܼܥܘܼ̈ܗ‌ܝ ܦܘܼܪܩܵܢܹܗ، ܕܫܵܪܹܐ ܚܸܩܪܵܐ ܒܐܲܪܥܲܢ.

¹⁰ ܛܲܝܒܘܼܬܵ‌ܐ ܘܫܲܪܝܼܪܘܼܬܵ‌ܐ ܬܦܝܼܩ ܠܗܘܿܢ، ܙܲܕܝܼܩܘܼܬܵ‌ܐ ܘܫܠܵܡܵܐ ܢܫܝܼܩ ܠܗܘܿܢ.

¹¹ ܫܲܪܝܼܪܘܼܬܵ‌ܐ ܡ̣ܢ ܐܲܪܥܵܐ ܒܸܬ ܡܲܓ̰ܝܸܢܵܐ، ܘܙܲܕܝܼܩܘܼܬܵ‌ܐ ܡ̣ܢ ܫܡܲܝܵܐ ܒܸܬ ܓܲܫܩܵܐ.

¹² ܐܘܼܦ ܡܵܪܝܵܐ ܒܸܬ ܝܵܗܒܹܠ ܛܵܒ݂ܬܵ‌ܐ، ܘܐܲܪܥܲܢ ܒܸܬ ܝܵܗܒ݂ܵܐ ܛܥܘܼܢܬܘܼܗ̇.

¹³ ܙܲܕܝܼܩܘܼܬܵ‌ܐ ܩܲܕܡܘܼܗ‌ܝ ܒܸܬ ܐܵܙܵܠ݇ܐ، ܘܫܵܘܦܵܦܹ̈ܐ ܕܐܲܩܠܘܼ̈ܗ̇ ܒܸܬ ܥܵܒ݂ܕܝܼ ܐܘܼܪܚܵܐ.