ܡܙܡܘܪܐ 84 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܥܠ ܓܬܝܼܬ. ܡܙܡܘܪܐ ܕܒܢܝ̈ ܩܘܪܚ.

¹ ܟܡܵܐ ܡܘܼܚܸܒܹ̈ܐ ܝܢܵܐ ܡܲܫܟܢܘܼ̈ܟ݂، ܝܵܐ ܡܵܪܝܵܐ ܚܲܝܠܬܵܢܵܐ.

² ܪܘܼܚܪܸܚ ܠܵܗ̇ ܘܐܘܼܦ ܬܝܼܡ ܠܵܗ̇ ܓܵܢܝܼ ܠܕܵܪ̈ܵܬܹ‌ܐ ܕܡܵܪܝܵܐ، ܠܸܒܝܼ ܘܦܲܓ݂ܪܝܼ ܟܹܐ ܫܲܒܚܝܼ ܠܐܲܠܵܗܵܐ ܚܵܝܵܐ.

³ ܐܘܼܦ ܨܸܦܪܬܵ‌ܐ ܡܘܼܫ݇ܟ̰ܸܚ ܠܵܗ̇ ܒܲܝܬܵ‌ܐ، ܘܣܢܘܿܢܝܼܬܵ‌ܐ ܩܸܢܵܐ ܩܵܬܘܼܗ̇، ܕܡܲܬܒ݂ܵܐ ܙܲܥܝܘܼ̈ܗ̇، ܠܟܸܣ ܡܲܕܒܚܘܼ̈ܟ݂، ܝܵܐ ܡܵܪܝܵܐ ܚܲܝܠܬܵܢܵܐ، ܡܲܠܟܝܼ ܘܐܲܠܵܗ‌ܝܼ.

⁴ ܛܘܼܒ݂ܵܐ ܠܥܵܡܪ̈ܵܢܹܐ ܕܒܲܝܬܘܼܟ݂، ܗܲܪ ܒܸܬ ܫܲܒܚܝܼ ܠܘܼܟ݂.ܣܹܠܵܗ

⁵ ܛܘܼܒ݂ܵܐ ܠܐܢܵܫܹ̈ܐ ܕܚܲܝܠܵܝܗ‌ܝ ܒܝܼܘܼܟ݂ ܝܼܠܹܗ، ܫܒ݂ܝܼܠܹ̈ܐ ܕܠܨܸܗܝܘܿܢ ܒܠܸܒܵܝܗ‌ܝ.

⁶ ܥܵܒ݂ܪ̈ܵܢܹܐ ܕܪܵܘܘܿܠܵܐ ܕܒܸܟ݂ܝܵܐ، ܟܹܐ ܥܵܒ݂ܕܝܼ ܠܹܗ ܥܲܝܢܵܬܹ̈‌ܐ، ܐܘܼܦ ܡܸܛܪܵܐ ܩܲܕܡܵܝܬܵ‌ܐ ܟܹܐ ܡܲܒܪܝܼܵܐ ܒܸܪ̈ܟܹܐ ܕܡ̈ܝܼܵܐ.

⁷ ܟܹܐ ܐܵܙܠ݇ܝܼ ܡ̣ܢ ܚܲܝܠܵܐ ܠܚܲܝܠܵܐ، ܒܸܬ ܦܵܝܫܝܼ ܚܸܙܝܵܐ ܠܐܲܠܵܗܵܐ ܒܨܸܗܝܘܿܢ،

⁸ ܝܵܐ ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ، ܫܡܹܥ ܨܠܘܿܬ‌ܝܼ، ܗܲܒ݂ܠ ܢܵܬܵ‌ܐ، ܝܵܐ ܐܲܠܵܗܵܐ ܕܝܲܥܩܘܿܒ݂.ܣܹܠܵܗ

⁹ ܚܙܝܼ ܡܵܛܵܠܲܢ، ܝܵܐ ܐܲܠܵܗܵܐ، ܘܚܘܼܪ ܒܦܵܬܵ‌ܐ ܕܡܫܝܼܚܘܼܟ݂.

¹⁰ ܣܵܒܵܒ ܒܘܼܫ ܨܦܵܝܝܼ ܝܠܹܗ ܚܲܕ ܝܵܘܡܵܐ ܒܕܵܪ̈ܵܬܘܼܟ݂ ܡ̣ܢ ܐܲܠܦܵܐ ܒܕܘܼܟܵܐ ܐܚܹܪܬܵ‌ܐ. ܓܘܼܒܹܐ ܠܝܼ ܠܹܗܘܵܝܵܐ ܒܣܩܘܼܦܬܵ‌ܐ ܕܒܲܝܬܵ‌ܐ ܕܐܲܠܵܗ‌ܝܼ، ܡ̣ܢ ܠܸܥܡܵܪܵܐ ܒܡܲܫܟܢܹ̈ܐ ܕܪ̈ܲܫܝܼܥܹܐ.

¹¹ ܣܵܒܵܒ ܫܸܡܫܵܐ ܘܡܵܛܵܠܵܐ ܝܠܹܗ ܡܵܪܝܵܐ ܐܲܠܵܗܵܐ، ܫܵܦܵܩܲܬ ܘܐܝܼܩܵܪܵܐ ܒܸܬ ܝܵܗܒܹܠ ܡܵܪܝܵܐ، ܠܹܐ ܡܲܟܠܹܐ ܛܵܒ݂ܬܵ‌ܐ ܡ̣ܢ ܕܐܵܢܝܼ ܕܚܵܕܪܝܼ ܒܬܲܡܝܼܡܘܼܬܵ‌ܐ.

¹² ܝܵܐ ܡܵܪܝܵܐ ܚܲܝܠܬܵܢܵܐ، ܛܘܼܒ݂ܵܐ ܠܐܢܵܫܵܐ ܕܣܵܒܹܪ ܒܝܼܘܼܟ݂.