ܡܙܡܘܪܐ 81 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܥܠ ܓܬܝܼܬ. ܡܙܡܘܪܐ ܕܐܣܦ.

¹ ܫܲܒܚܘܼܢ ܠܐܲܠܵܗܵܐ ܥܘܼܫܢܲܢ، ܩܲܘܸܚܘܼܢ ܠܐܲܠܵܗܵܐ ܕܝܲܥܩܘܿܒ݂.

² ܡܲܪܡܘܼܢ ܙܡܵܪܬܵ‌ܐ ܘܡܚܹܝܡܘܼܢ ܦܠܲܓܵܐ، ܟܸܢܵܪܵܐ ܒܲܣܝܼܡܬܵ‌ܐ ܥܲܡ ܩܝܼܬܵܪܵܐ.

³ ܡܚܹܝܡܘܼܢ ܫܝܼܦܘܿܪܵܐ ܒܪܹܝܫ ܝܲܪܚܵܐ، ܒܡܸܠܝܘܼܬܵ‌ܐ ܕܣܲܗܪܵܐ، ܒܝܵܘܡܵܐ ܕܥܹܐܕܲܢ،

⁴ ܣܵܒܵܒ ܩܵܢܘܿܢܵܐ ܝܠܹܗ ܠܐܝܼܣܪܵܐܹܝܠ، ܕܝܼܘܵܢ ܕܐܲܠܵܗܵܐ ܕܝܲܥܩܘܿܒ݂.

⁵ ܩܵܡ ܡܲܬܸܒ݂ ܠܹܗ ܣܵܗܕܘܼܬܵ‌ܐ ܒܝܵܘܣܸܦ، ܟܲܕ ܦܠܝܼܛ ܠܹܗ ܥܲܠ ܐܲܪܥܵܐ ܕܡܸܨܪܹܝܢ. ܠܸܫܵܢܵܐ ܕܠܵܐ ܝܕܝܼܥ ܠܝܼ ܫܡܝܼܥ ܠܝܼ:

⁶ ܡܘܼܩܠܸܒ ܠܝܼ ܪܘܼܦ̮ܫܹܗ ܡ̣ܢ ܟܵܪܬܵ‌ܐ، ܫܪܹܐ ܠܝܼ ܐܝܼܕܵܬܘܼ̈ܗ‌ܝ ܡ̣ܢ ܩܸܪܛܵܠܵܐ.

⁷ ܓܵܘ ܐܘܼܠܨܵܢܵܐ ܩܪܹܐ ܠܘܼܟ݂ ܘܩܵܡ ܦܲܨܸܢܘܼܟ݂، ܩܵܡ ܓ̰ܲܘܸܒܸܢܘܼܟ݂ ܒܣܸܬܵܪܵܐ ܕܪܲܥܡܵܐ، ܩܵܡ ܒܵܚܪܹܢܘܼܟ݂ ܒܡ̈ܝܼܵܐ ܕܡܪܝܼܒ݂ܵܐ.ܣܹܠܵܗ

⁸ ܫܡܹܥ، ܝܵܐ ܥܲܡܝܼ، ܘܣܵܗܕܹܢ ܥܲܠܘܼܟ݂، ܝܵܐ ܐܝܼܣܪܵܐܹܝܠ، ܛܘܼܒ݂ܵܐ ܕܫܵܡܥܹܬ ܐܸܠܝܼ.

⁹ ܠܵܐ ܗܵܘܹܐ ܓܵܘܘܼܟ݂ ܐܲܠܵܗܵܐ ܩܵܪܝܼܒܵܝܵܐ، ܘܠܵܐ ܣܵܓ݂ܕܹܬ ܠܐܲܠܵܗܵܐ ܢܘܼܟ݂ܪܵܝܵܐ.

¹⁰ ܐܵܢܵܐ ܝܘܸܢ ܡܵܪܝܵܐ ܐܲܠܵܗܘܼܟ݂، ܕܩܵܡ ܡܲܐܣܩܸܢܘܼܟ݂ ܡ̣ܢ ܐܲܪܥܵܐ ܕܡܸܨܪܹܝܢ، ܦܬܘܿܚ ܠܹܗ ܦܘܼܡܘܼܟ݂ ܘܒܸܬ ܡܵܠܹܢܹܗ.

¹¹ ܐܝܼܢܵܐ ܥܲܡܝܼ ܠܵܐ ܩܵܡ ܫܵܡܹܥ ܠܹܗ ܩܵܠܝܼ، ܘܐܝܼܣܪܵܐܹܝܠ ܠܵܐ ܒܥܹܐ ܠܹܗ ܡܲܨܝܸܬ ܐܸܠܝܼ.

¹² ܒܘܼܬ ܐܵܗܵܐ، ܣܘܼܦܝܵܝ ܠܝܼ ܠܩܸܫܝܘܼܬܵ‌ܐ ܕܠܸܒܵܝܗ‌ܝ، ܕܚܵܕܪܝܼ ܒܚܘܼܫܵܒ݂ܵܝܗ‌ܝ.

¹³ ܛܘܼܒ݂ܵܐ ܕܥܲܡܝܼ ܫܵܡܹܥ ܗܘܵܐ ܐܸܠܝܼ، ܐܝܼܣܪܵܐܹܝܠ ܒܐܘܼܪ̈ܚܵܬ‌ܝܼ ܚܵܕܹܪ ܗܘܵܐ.

¹⁴ ܒܵܬܪ ܚܲܕܟ̰ܵܐ ܕܸܫ̃ܡܸܢܵܝ̈ܗ‌ܝ ܒܸܬ ܙܲܒܛܸܢܸܢ ܗܘܵܐ ܠܗܘܿܢ، ܘܥܲܠ ܡܲܠܝܸܨܵܢܵܝ̈ܗ‌ܝ ܒܸܬ ܡܲܕܸܪܸܢ ܗܘܵܐ ܐܝܼܕܝܼ.

¹⁵ ܣܵܢܝܵܢܹ̈ܐ ܕܡܵܪܝܵܐ ܒܸܬ ܫܵܠܡܝܼ ܗܘܵܘ ܐܸܠܹܗ، ܘܒܸܬ ܗܵܘܹܐ ܗܘܵܐ ܚܸܠܩܵܝܗ‌ܝ ܠܥܵܠܲܡ.

¹⁶ ܐܝܼܢܵܐ ܒܸܬ ܡܲܐܟ݂ܠܸܢ ܗܘܵܐ ܠܘܼܟ݂ ܡ̣ܢ ܫܲܡܝܼܢܘܼܬܵ‌ܐ ܕܚܸܛܹ̈ܐ، ܘܡ̣ܢ ܕܸܒ݂ܫܵܐ ܕܐܝܼܨܵܪܵܐ ܒܸܬ ܡܲܣܒܸܥܸܢ ܗܘܵܐ ܠܘܼܟ݂.