ܡܙܡܘܪܐ 77 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܥܠ ܝܕܘܬܘܢ. ܡܙܡܘܪܐ.

¹ ܟܹܐ ܕܵܪܹܝܢ ܩܵܠܹ̈ܐ ܠܐܲܠܵܗܵܐ، ܘܒܸܬ ܡܲܩܘܸܚܸܢ، ܟܹܐ ܕܵܪܹܝܢ ܩܵܠܹ̈ܐ ܠܐܲܠܵܗܵܐ، ܘܒܸܬ ܝܵܗܒܹܠ ܢܵܬܵ‌ܐ ܐܸܠܝܼ.

² ܒܝܵܘܡܵܐ ܕܥܵܘܩܵܢܝܼ ܠܡܵܪܝܵܐ ܛܥܹܐ ܠܝܼ، ܐܝܼܕܝܼ ܒܠܲܝܠܹܐ ܦܝܼܫ ܠܵܗ̇ ܦܘܼܫܸܛܬܵ‌ܐ ܘܠܵܐ ܬܒ݂ܝܼܢܵܗ̇، ܡܘܼܚܦܸܠ ܠܵܗ̇ ܠܸܫܩܵܠܵܐ ܠܸܒܵܐ ܓܵܢܝܼ.

³ ܟܹܐ ܕܵܟ݂ܪܹܢ ܠܐܲܠܵܗܵܐ ܘܟܹܐ ܢܲܟܢܸܟܸܢ، ܟܹܐ ܗܲܓܹܝܢ ܘܦܝܼܫ ܠܵܗ̇ ܕܘܼܪܕܸܫ̃ܬܵ‌ܐ ܪܘܼܚܝܼ.ܣܹܠܵܗ

⁴ ܠܵܐ ܫܒ݂ܝܼܩ ܠܘܼܟ݂ ܐܵܟ̰ܡܝܼ ܛܸܠܦܵܦܝܼ̈، ܦܝܼܫ ܠܝܼ ܫܓ݂ܝܼܫܵܐ ܗܵܕܵܐ ܕܠܹܐ ܡܵܨܹܝܢ ܗܲܡܙܸܡܸܢ.

⁵ ܬܘܼܚܡܸܢܝܼ ܒܘܼܬ ܝܵܘܡܵܢܹ̈ܐ ܥܲܬܝܼܩܹ̈ܐ، ܫܸܢܹ̈ܐ ܕܥܵܠܡܝܼܢ.

⁶ ܒܸܕܟ݂ܵܪܵܐ ܝܘܸܢ ܙܡܵܪܬ‌ܝܼ ܒܠܲܝܠܹܐ، ܒܠܸܒܝܼ ܟܹܐ ܗܲܓܹܝܢ ܘܟܹܐ ܨܲܚܨܝܼܵܐ ܪܘܼܚܝܼ.

⁷ ܗܵܐ، ܒܸܬ ܪܲܦܹܐ ܠܝܼ ܡܵܪܝܵܐ ܠܥܵܠܡܝܼܢ، ܘܠܹܐ ܡܲܙܝܸܕ ܗܸܢܝܵܢܹܗ ܡܸܢܕܪܸܫ؟

⁸ ܗܵܐ، ܫܠܹܐ ܠܵܗ̇ ܠܥܵܠܲܡ ܛܲܝܒܘܼܬܹܗ، ܬܝܼܡ ܠܹܗ ܩܵܘܠܹܗ ܠܕܵܪܵܐ ܘܕܵܪܵܐ؟

⁹ ܗܵܐ، ܡܘܼܢܫܹܐ ܠܹܗ ܠܸܥܒ݂ܵܕܵܐ ܪ̈ܲܚܡܹܐ ܐܲܠܵܗܵܐ، ܝܲܢ ܒܚܸܡܬܵ‌ܐ ܚܣܝܼܟ݂ܵܝ ܠܹܗ ܪ̈ܲܚܡܘܼܗ‌ܝ؟ܣܹܠܵܗ

¹⁰ ܘܐܡܝܼܪܝܼ: ”ܒܸܒܙܵܥܵܐ ܝܠܹܗ ܠܸܒܝܼ ܒܘܼܬ ܫܲܚܠܲܦܬܵ‌ܐ ܕܝܲܡܝܼܢܵܐ ܕܥܸܠܵܝܵܐ.

¹¹ ”ܒܸܬ ܡܲܕܟܸܪܸܢ ܥܒ݂ܵܕܹ̈ܐ ܕܡܵܪܝܵܐ، ܗܹܐ، ܒܸܬ ܕܵܟ݂ܪܹܢ ܕܘܼܡܵܪ̈ܘܼܟ݂ ܡ̣ܢ ܙܲܒ݂ܢܵܐ ܩܲܕܝܼܡܵܝܵܐ.

¹² ”ܘܒܸܬ ܗܲܓܹܝܢ ܟܠܹܗ ܦܘܼܠܚܵܢܘܼܟ݂، ܘܒܘܼܬ ܥܒ݂ܵܕܘܼ̈ܟ݂ ܒܸܬ ܬܲܚܡܸܢܸܢ.“

¹³ ܝܵܐ ܐܲܠܵܗܵܐ، ܒܩܲܕܝܼܫܘܼܬܵ‌ܐ ܝܠܵܗ̇ ܐܘܼܪܚܘܼܟ݂؛ ܡܵܢܝܼ ܝܠܹܗ ܐܲܠܵܗܵܐ ܓܘܼܪܵܐ ܐܲܝܟ݂ ܐܲܠܵܗܲܢ؟

¹⁴ ܐܲܢ݇ܬ ܝܼܘܸܬ ܐܲܠܵܗܵܐ ܥܵܒ݂ܕܵܢܹ̈ܐ ܕܕܘܼܡܵܪܹ̈ܐ، ܡܘܼܕܸܥ ܠܘܼܟ݂ ܓܵܘ ܥܲܡܡܹ̈ܐ ܚܲܝܠܘܼܟ݂.

¹⁵ ܦܘܼܪܸܩ ܠܘܼܟ݂ ܒܕܪܲܥܢܘܼܟ݂ ܠܥܲܡܘܼܟ݂، ܒܢܲܝ̈ ܝܲܥܩܘܿܒ݂ ܘܝܵܘܣܸܦ.ܣܹܠܵܗ

¹⁶ ܚܙܹܐ ܠܗܘܿܢ ܐܸܠܘܼܟ݂ ܡ̈ܝܼܵܐ، ܝܵܐ ܐܲܠܵܗܵܐ، ܚܙܹܐ ܠܗܘܿܢ ܐܸܠܘܼܟ݂ ܡ̈ܝܼܵܐ ܘܪܘܼܬܪܸܬ ܠܗܘܿܢ، ܐܘܼܦ ܪܓܝܼܕ ܠܗܘܿܢ ܬܗܘܿܡܹ̈ܐ.

¹⁷ ܥܢܵܢܹ̈ܐ ܫܘܼܦܸܟ݂ ܠܗܘܿܢ ܡ̈ܝܼܵܐ، ܩܘܼܪܩܸܡ ܠܗܘܿܢ ܫܡܲܝܹ̈ܐ، ܐܘܼܦ ܓܹܐܪ̈ܘܼܟ݂ ܣܛܹܐ ܠܗܘܿܢ.

¹⁸ ܩܵܠܵܐ ܕܩܲܪ̈ܩܲܡܝܵܬܘܼܟ݂ ܒܓܵܪܕܵܒܘܼܠܹܐ، ܒܘܼܗܪܸܢܗܘܿܢ ܒܸܪ̈ܩܹܐ ܠܒܪܝܼܬܵ‌ܐ، ܪܓܝܼܕ ܠܵܗ̇ ܘܕܘܼܪܘܸܕ ܠܵܗ̇ ܐܲܪܥܵܐ.

¹⁹ ܒܝܵܡܵܐ ܝܼܗܘܵܐ ܐܘܼܪܚܘܼܟ݂، ܘܫܒ݂ܝܼܠܘܼܟ݂ ܝܼܗܘܵܐ ܒܡ̈ܝܼܵܐ ܪܵܒܵܐ، ܘܫܵܘܦܵܦܹ̈ܐ ܕܐܲܩܠܘܼ̈ܟ݂ ܠܵܐ ܦܝܼܫ ܠܗܘܿܢ ܚܸܙܝܹܐ.

²⁰ ܡܗܘܼܕܹܐ ܠܘܼܟ݂ ܐܲܝܟ݂ ܥܸܪ̈ܒܹܐ ܠܥܲܡܘܼܟ݂، ܒܐܝܼܕܵܐ ܕܡܘܼܫܹܐ ܘܕܐܲܗܪܘܿܢ.