ܡܙܡܘܪܐ 73 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܣܸܦܪܵܐ ܬܠܝܼܬܵܝܵܐ ܡܙܡܘܪ̈ܐ 73‏‐89 ܡܙܡܘܪܐ ܕܐܣܦ.

¹ ܒܫܪܵܪܵܐ، ܛܵܒ݂ܵܐ ܝܠܹܗ ܠܐܝܼܣܪܵܐܹܝܠ ܐܲܠܵܗܵܐ، ܠܕܸܟ݂ܝܹ̈ܐ ܕܠܸܒܵܐ.

² ܘܐܵܢܵܐ، ܒܵܬܪ ܚܲܕܟ̰ܵܐ ܒܸܬ ܬܲܪܩܸܠܝܼ ܗܘܵܘ ܐܲܩܠܵܬ‌ܝܼ̈، ܚܲܕܟ̰ܵܐ ܦܝܼܫ ܠܵܗ̇ ܕܓ̰ܵܪܦܝܼ ܗܘܵܘ ܦܵܣܘܿܥܝܵܬ‌ܝܼ̈.

³ ܣܵܒܵܒ ܒܘܼܚܸܠ ܠܝܼ ܒܚܬܝܼܪܹ̈ܐ، ܫܠܵܡܵܐ ܕܪ̈ܲܫܝܼܥܹܐ ܚܙܹܐ ܠܝܼ.

⁴ ܣܵܒܵܒ ܠܲܝܬ ܚܸܒ݂ܠܹ̈ܐ ܒܡܵܘܬܵܝܗ‌ܝ، ܘܛܪܝܼܨܵܐ ܝܠܹܗ ܦܲܓ݂ܪܵܝܗ‌ܝ.

⁵ ܒܥܲܡܠܵܐ ܕܐܢܵܫܵܐ ܠܹܐ ܝܢܵܐ، ܘܒܡܲܚܘܵܬܹ̈‌ܐ ܕܒܲܪܢܵܫܵܐ ܠܹܐ ܦܵܝܫܝܼ ܡܸܚܝܹܐ.

⁶ ܒܘܼܬ ܐܵܗܵܐ، ܠܒ݂ܝܼܫ ܠܗܘܿܢ ܫܘܼܒ݂ܗܵܪܵܐ ܠܬܵܘܩܵܝܗ‌ܝ، ܟܹܐ ܟܲܣܹܐ ܠܒ݂ܘܼܫܵܐ ܕܙܠܘܼܡܝܵܐ ܐܸܠܵܝܗ‌ܝ.

⁷ ܦܠܝܼܛܹܐ ܝܢܵܐ ܡ̣ܢ ܬܲܪܒܵܐ ܥܲܝ̈ܢܵܝܗ‌ܝ، ܥܒ݂ܝܼܪܗܘܿܢ ܡ̣ܢ ܟܝܘܼܠܵܐ ܚܘܼܫܵܒܹ̈ܐ ܕܠܸܒܵܝܗ‌ܝ.

⁸ ܟܹܐ ܡܲܣܚܸܪܝܼ ܘܟܹܐ ܗܲܡܙܸܡܝܼ ܒܒܝܼܫܬܵ‌ܐ، ܡ̣ܢ ܪܵܡܘܼܬܵ‌ܐ ܟܹܐ ܗܲܡܙܸܡܝܼ ܙܠܘܼܡܝܵܐ.

⁹ ܡܘܼܬܸܒ݂ ܠܗܘܿܢ ܒܫܡܲܝܵܐ ܦܘܼܡܵܝܗ‌ܝ، ܘܠܸܫܵܢܵܝܗ‌ܝ ܟܹܐ ܚܵܕܹܪ ܒܐܲܪܥܵܐ.

¹⁰ ܒܘܼܬ ܐܵܗܵܐ، ܥܲܡܵܐ ܟܹܐ ܕܵܐܹܪ ܠܟܸܣܠܵܝܗ‌ܝ، ܘܡ̈ܝܼܵܐ ܕܟܵܣܵܐ ܡܸܠܝܵܐ ܟܹܐ ܦܵܝܫܝܼ ܣܪܝܼܦܹܐ ܒܝܼܵܝܗ‌ܝ.

¹¹ ܘܟܹܐ ܐܵܡܪܝܼ: ”ܕܵܐܟ݂ܝܼ ܟܹܐ ܝܵܕܹܥ ܐܲܠܵܗܵܐ؟ ܐܝܼܬ ܝܕܵܥܬܵ‌ܐ ܒܥܸܠܵܝܵܐ؟“

¹² ܗܵܐ، ܐܲܢܹܐ ܝܢܵܐ ܪ̈ܲܫܝܼܥܹܐ، ܒܫܲܝܢܵܐ ܝܢܵܐ ܠܥܵܠܲܡ، ܘܡܘܼܙܝܸܕܹܐ ܝܢܵܐ ܥܘܼܬܪܵܐ.

¹³ ܒܫܪܵܪܵܐ، ܣܪܝܼܩܵܐܝܼܬ ܕܘܼܟܹܐ ܠܝܼ ܠܸܒܝܼ، ܘܚܘܼܠܸܠ ܠܝܼ ܒܙܲܟܵܝܘܼܬܵ‌ܐ ܐܝܼܕܵܬ‌ܝܼ̈.

¹⁴ ܘܗܘܹܐ ܠܝܼ ܡܸܚܝܵܐ ܒܡܲܚܘܵܬܹ̈‌ܐ ܟܠܹܗ ܝܵܘܡܵܐ، ܘܡܲܢܟܲܣܬ‌ܝܼ ܟܠ ܨܲܦܪܵܐ ܝܠܵܗ̇.

¹⁵ ܐܸܢ ܐܵܡܪܹܢ ܗܘܵܐ: ”ܒܸܬ ܗܲܩܹܝܢ ܗܵܕܟ݂ܵܐ،“ ܗܵܐ، ܠܬܵܘܠܲܕܬܵ‌ܐ ܕܒܢܘܿܢܘܼ̈ܟ݂ ܒܸܬ ܥܵܒ݂ܕܹܢ ܗܘܵܐ ܚܵܝܝܼܢܘܼܬܵ‌ܐ،

¹⁶ ܘܐܝܼܡܲܢ ܕܬܘܼܚܡܸܢܝܼ ܕܦܲܪܡܹܝܢ ܐܵܗܵܐ، ܚܙܹܐ ܠܝܼ ܕܥܲܡܠܵܐ ܝܗܘܵܐ ܒܥܲܝܢܝܼ̈،

¹⁷ ܗܲܠ ܕܥܒ݂ܝܼܪܝܼ ܠܡܲܩܕܫܵܐ ܕܐܲܠܵܗܵܐ، ܘܦܘܼܪܡܹܐ ܠܝܼ ܠܚܲܪܬܵܝܗ‌ܝ.

¹⁸ ܬܪܘܼܨܵܐ، ܟܹܐ ܡܲܬܒܸܬ ܠܗܘܿܢ ܒܕܘܼܟܵܢܹ̈ܐ ܡܲܓ̰ܪܸ̈ܛܵܢܹܐ، ܟܹܐ ܡܲܢܦܸܠܸܬ ܠܗܘܿܢ ܠܚܵܪ̈ܵܒܹܐ.

¹⁹ ܕܐܲܝܟ݂ ܐܬܹ‌ܐ ܠܗܘܿܢ ܠܚܪܵܒ݂ܵܐ ܒܛܲܪܦܲܛܬܵ‌ܐ ܕܥܲܝܢܵܐ، ܩܛܝܼܥ ܠܗܘܿܢ ܘܬܝܼܡ ܠܗܘܿܢ ܒܓܘܼܢܚܹ̈ܐ.

²⁰ ܐܲܝܟ݂ ܚܸܠܡܵܐ ܝܢܵܐ ܡܒܵܬܪ ܪܥܵܫܬܵ‌ܐ، ܝܵܐ ܡܵܪܝܵܐ، ܒܬܥܵܪܬܘܼܟ݂ ܨܲܠܡܵܝܗ‌ܝ ܒܸܬ ܡܲܣܠܹܝܬ.

²¹ ܐܝܼܡܲܢ ܕܦܝܼܫ ܠܹܗ ܡܘܼܡܪܸܪܵܐ ܠܸܒܝܼ، ܘܓܵܘܝܼ ܦܝܼܫ ܠܹܗ ܟ̰ܪܝܼܙܵܐ،

²² ܐܵܢܵܐ ܐܲܗܡܲܩ ܝܼܘܸܢ ܗܘܵܐ، ܘܠܵܐ ܝܕܝܼܥ ܠܝܼ، ܗܲܝܘܵܢ ܗܘܹܐ ܠܝܼ ܟܸܣ ܠܘܼܟ݂.

²³ ܘܗܸܫ ܐܵܢܵܐ ܐܲܡܝܼܢܵܐܝܼܬ ܥܲܡܘܼܟ݂ ܝܼܘܸܢ، ܕܒ݂ܝܼܩ ܠܘܼܟ݂ ܒܐܝܼܕܝܼ ܕܝܲܡܝܼܢܵܐ.

²⁴ ܒܡܸܠܟܘܼܟ݂ ܒܸܬ ܬܲܓܒܸܪܸܬ ܠܝܼ، ܘܒܵܬܪ ܗܵܕܵܐ ܒܐܝܼܩܵܪܵܐ ܩܲܒܠܸܬ ܠܝܼ.

²⁵ ܡܵܢܝܼ ܐܝܼܬ ܠܝܼ ܒܫܡܲܝܵܐ؟ ܘܫܒ݂ܘܿܩ ܡܸܢܘܼܟ݂ ܠܹܐ ܒܵܣܡܵܐ ܠܝܼ ܒܡܸܢܕܝܼ ܒܐܲܪܥܵܐ.

²⁶ ܬܝܼܡ ܠܹܗ ܒܸܣܪܝܼ ܘܠܸܒܝܼ، ܐܝܼܨܵܪܵܐ ܕܠܸܒܝܼ ܘܣܵܗܡܝܼ ܐܲܠܵܗܵܐ ܝܠܹܗ ܠܥܵܠܲܡ.

²⁷ ܣܵܒܵܒ ܗܵܐ، ܐܵܢܝܼ ܕܝܼܢܵܐ ܪܸܚܩܵܐ ܡܸܢܘܼܟ݂ ܒܸܬ ܛܵܠܩܝܼ، ܦܘܼܢܹܐ ܠܘܼܟ݂ ܟܠ ܙܲܢܵܝܵܐ ܡ̣ܢ ܟܸܣ ܠܘܼܟ݂.

²⁸ ܘܐܵܢܵܐ، ܩܲܪܒܲܢܬܵ‌ܐ ܠܐܲܠܵܗܵܐ ܩܵܬ‌ܝܼ ܨܦܵܝܝܼ ܝܠܵܗ̇، ܡܘܼܬܸܒ݂ ܠܝܼ ܒܡܵܪܝܵܐ ܐܲܠܵܗܵܐ ܒܹܝܬ ܓܵܘܣܝܼ، ܠܗܲܩܘܼܝܹܐ ܟܠܵܝܗ‌ܝ ܦܘܼܠܚܵܢܘܼ̈ܟ݂.