ܡܙܡܘܪܐ 72 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܡܙܡܘܪܐ ܕܫܠܝܡܘܢ.

¹ ܝܵܐ ܐܲܠܵܗܵܐ، ܕܝܼܘܵܢܘܼ̈ܟ݂ ܠܡܲܠܟܵܐ ܗܲܒ݂ܠ، ܘܙܲܕܝܼܩܘܼܬܘܼܟ݂ ܠܒܪܘܿܢܵܐ ܕܡܲܠܟܵܐ.

² ܒܸܬ ܕܵܐܹܢ ܠܥܲܡܘܼܟ݂ ܒܙܲܕܝܼܩܘܼܬܵ‌ܐ، ܘܠܡܸܣܟܹܢܘܼ̈ܟ݂ ܒܕܝܼܘܵܢ.

³ ܒܸܬ ܛܵܥܢܝܼ ܛܘܼܪܹ̈ܐ ܫܠܵܡܵܐ ܠܥܲܡܵܐ، ܘܪ̈ܘܼܡܝܵܬܹ‌ܐ ܒܙܲܕܝܼܩܘܼܬܵ‌ܐ.

⁴ ܒܸܬ ܥܵܒܹܕ ܕܝܼܘܵܢ ܕܡܸܣܟܹܢܹ̈ܐ ܕܥܲܡܵܐ، ܒܸܬ ܦܲܪܸܩ ܠܒܢܘܿܢܹ̈ܐ ܕܣܢܝܼܩܹ̈ܐ، ܘܒܸܬ ܒܵܠܹܣ ܠܛܵܠܘܿܡܵܐ.

⁵ ܒܸܬ ܙܵܕܥܝܼ ܡܸܢܘܼܟ݂ ܟܡܵܐ ܕܐܝܼܬ ܫܸܡܫܵܐ، ܘܟܡܵܐ ܕܐܝܼܬ ܣܲܗܪܵܐ، ܠܕܵܪܵܐ ܕܕܵܪܹ̈ܐ.

⁶ ܒܸܬ ܨܵܠܹܐ ܐܲܝܟ݂ ܡܸܛܪܵܐ ܥܲܠ ܥܸܩܪܵܐ ܕܓܸܠܵܐ ܚܨܝܼܕܵܐ، ܐܲܝܟ݂ ܩܲܫܩܲܫܝܵܬܹ̈‌ܐ ܒܸܫܦܵܟ݂ܵܐ ܥܲܠ ܐܲܪܥܵܐ.

⁷ ܒܸܬ ܡܲܓ̰ܝܸܢܵܐ ܙܲܕܝܼܩܘܼܬܵ‌ܐ ܒܝܵܘܡܵܢܘܼ̈ܗ‌ܝ، ܘܒܘܼܫܵܝܘܼܬܵ‌ܐ ܕܫܠܵܡܵܐ ܗܲܠ ܕܠܵܐ ܗܵܘܹܐ ܣܲܗܪܵܐ.

⁸ ܘܒܸܬ ܗܲܟܸܡ ܡ̣ܢ ܝܵܡܵܐ ܗܲܠ ܝܵܡܵܐ، ܘܡ̣ܢ ܢܲܗܪܵܐ ܕܦܪܵܬ ܗܲܠ ܡܲܪ̈ܙܵܢܹܐ ܕܐܲܪܥܵܐ.

⁹ ܩܲܕܡܘܼܗ‌ܝ ܒܸܬ ܛܵܥܦܝܼ ܥܵܡܪ̈ܵܢܹܐ ܕܒܲܪܝܼܵܐ، ܘܕܸܫ̃ܡܸܢܘܼ̈ܗ‌ܝ ܥܲܦܪܵܐ ܒܸܬ ܠܵܟܚܝܼ.

¹⁰ ܡܲܠܟܹ̈ܐ ܕܬܲܪܫܝܼܫ ܘܕܓܵܙܪ̈ܵܬܹ‌ܐ ܡܵܘܗܲܒ݂ܬܵ‌ܐ ܒܸܬ ܡܲܝܬ‌ܝܼ، ܡܲܠܟܹ̈ܐ ܕܫܒ݂ܵܐ ܘܕܣܵܒ݂ܵܐ ܕܲܫܢܵܐ ܒܸܬ ܡܲܩܪܸܒ݂ܝܼ.

¹¹ ܘܒܸܬ ܟܵܝܦܝܼ ܩܲܕܡܘܼܗ‌ܝ ܟܠܵܝܗ‌ܝ ܡܲܠܟܹ̈ܐ، ܟܠܵܝܗ‌ܝ ܐܸܡܘܵܬܹ̈‌ܐ ܒܸܬ ܦܵܠܚܝܼ ܐܸܠܹܗ.

¹² ܣܵܒܵܒ ܒܸܬ ܦܲܨܹܐ ܠܣܢܝܼܩܵܐ ܕܩܲܘܸܚ، ܘܠܡܸܣܟܹܢܵܐ ܕܠܲܝܬ ܗܲܝܸܪܵܢܵܐ ܐܸܠܹܗ.

¹³ ܒܸܬ ܥܵܒܹܕ ܪ̈ܲܚܡܹܐ ܥܲܠ ܡܸܣܟܹܢܵܐ ܘܣܢܝܼܩܵܐ، ܘܓܵܢܵܬܹ̈‌ܐ ܕܣܢܝܼܩܹ̈ܐ ܒܸܬ ܦܲܪܸܩ.

¹⁴ ܡ̣ܢ ܛܠܘܼܡܝܵܐ ܘܡ̣ܢ ܚܸܡܬܵ‌ܐ ܒܸܬ ܦܲܪܸܩ ܓܵܢܵܝܗ‌ܝ، ܘܒܸܬ ܗܵܘܹܐ ܝܲܩܝܼܪܵܐ ܕܸܡܵܝܗ‌ܝ ܒܥܲܝܢܘܼ̈ܗ‌ܝ.

¹⁵ ܘܒܸܬ ܚܵܝܹܐ، ܘܒܸܬ ܝܵܗܒ݂ܝܼ ܐܸܠܹܗ ܡ̣ܢ ܕܲܗܒ݂ܵܐ ܕܫܒ݂ܵܐ، ܘܒܸܬ ܨܲܠܝܼ ܒܘܼܬ ܕܝܼܹܗ ܐܲܡܝܼܢܵܐܝܼܬ، ܟܠܹܗ ܝܵܘܡܵܐ ܒܸܬ ܒܲܪܟ݂ܝܼ ܠܹܗ.

¹⁶ ܒܸܬ ܗܵܘܝܵܐ ܦܸܪܝܘܼܬܵ‌ܐ ܕܕܲܚܠܵܐ ܒܐܲܪܥܵܐ ܒܪܹܝܫܵܐ ܕܛܘܼܪ̈ܵܢܹܐ، ܒܸܬ ܫܵܥܫܵܐ ܐܲܝܟ݂ ܠܸܒ݂ܢܵܢ ܛܥܘܼܢܬܹܗ، ܘܒܸܬ ܦܵܩܚܝܼ ܐܢܵܫܹ̈ܐ ܡ̣ܢ ܡܕܝܼܢ݇ܬܵ‌ܐ ܐܲܝܟ݂ ܓܸܠܵܐ ܕܐܲܪܥܵܐ.

¹⁷ ܒܸܬ ܗܵܘܹܐ ܫܸܡܹܗ ܠܥܵܠܲܡ، ܘܒܸܬ ܦܵܐܹܫ ܫܸܡܹܗ ܟܡܵܐ ܕܐܝܼܬ ܫܸܡܫܵܐ، ܘܒܸܬ ܦܵܝܫܝܼ ܒܘܼܪܟܹܐ ܒܝܼܹܗ ܟܠܵܝܗ‌ܝ ܐܸܡܘܵܬܹ̈‌ܐ، ܘܒܸܬ ܝܵܗܒ݂ܝܼ ܠܹܗ ܛܘܼܒ݂ܵܐ.

¹⁸ ܒܪܝܼܟ݂ܵܐ ܝܠܹܗ ܡܵܪܝܵܐ ܐܲܠܵܗܵܐ، ܐܲܠܵܗܵܐ ܕܐܝܼܣܪܵܐܹܝܠ، ܥܵܒ݂ܕܵܢܹ̈ܐ ܕܥܲܓ̰ܝܼܒܘܼܝܵܬܹ̈‌ܐ ܒܢܲܦ̮ܫܹܗ.

¹⁹ ܘܒܪܝܼܟ݂ܵܐ ܝܠܹܗ ܫܸܡܹܗ ܡܝܘܼܩܪܵܐ ܠܥܵܠܲܡ، ܘܦܵܝܫܵܐ ܡܠܝܼܬܵ‌ܐ ܟܠܵܗ̇ ܐܲܪܥܵܐ ܐܝܼܩܵܪܹܗ، ܐܵܡܹܝܢ ܘܐܵܡܹܝܢ.

²⁰ ܬܝܼܡ ܠܗܘܿܢ ܨܠܵܘܵܬܹ̈‌ܐ ܕܕܵܘܝܼܕ ܒܪܘܿܢܵܐ ܕܐܝܼܫܲܝ.