ܡܙܡܘܪܐ 71 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܒܝܼܘܼܟ݂، ܝܵܐ ܡܵܪܝܵܐ، ܫܩܝܼܠ ܠܝܼ ܓܵܘܣܵܐ، ܠܵܐ ܫܵܒ݂ܩܹܬ ܢܵܟ݂ܦܹܢ ܠܥܵܠܲܡ.

² ܒܙܲܕܝܼܩܘܼܬܘܼܟ݂ ܦܲܨܹܝܬ ܠܝܼ ܘܦܲܪܩܸܬ ܠܝܼ، ܡܲܨܠܝܼ ܢܵܬܘܼܟ݂ ܐܸܠܝܼ ܘܗܲܒ݂ܠ ܠܝܼ ܦܘܼܪܩܵܢܵܐ.

³ ܗܘܝܼ ܐܸܠܝܼ ܠܐܝܼܨܵܪܵܐ ܕܡܲܥܡܪܵܐ ܕܥܵܒ݂ܪܹܢ ܓܵܘܹܗ ܒܟܠ ܥܕܵܢܵܐ، ܦܩܝܼܕ ܠܘܼܟ݂ ܠܦܲܪܘܼܩܹܐ ܐܸܠܝܼ، ܒܗ̇ܝ ܕܩܵܝܝܼ ܘܚܸܣܢܝܼ ܐܲܢ݇ܬ ܝܼܘܸܬ.

⁴ ܝܵܐ ܐܲܠܵܗ‌ܝܼ، ܦܲܨܝܼ ܠܝܼ ܡ̣ܢ ܐܝܼܕܵܐ ܕܪܲܫܝܼܥܵܐ، ܡ̣ܢ ܟ̰ܲܢܓܘܼܪܬܵ‌ܐ ܕܥܵܘܵܠܵܐ ܘܛܵܠܘܿܡܵܐ.

⁵ ܒܗ̇ܝ ܕܐܲܢ݇ܬ ܝܼܘܸܬ ܣܲܒ݂ܪܝܼ، ܝܵܐ ܡܵܪܝܵܐ ܐܲܠܵܗܵܐ، ܬܘܼܟ݂ܠܵܢܝܼ ܡ̣ܢ ܙܥܘܿܪܘܼܬ‌ܝܼ.

⁶ ܥܲܠܘܼܟ݂ ܣܢܝܼܕ ܠܝܼ ܡ̣ܢ ܒܲܛܢܵܐ، ܐܲܢ݇ܬ ܝܼܘܸܬ ܦܲܠܛܵܢܝܼ ܡ̣ܢ ܡܲܪܒܥܵܐ ܕܝܸܡܝܼ، ܐܸܠܘܼܟ݂ ܝܼܠܵܗ̇ ܬܸܫܒܘܿܚܬ‌ܝܼ ܐܲܡܝܼܢܵܐܝܼܬ.

⁷ ܐܲܝܟ݂ ܕܘܼܡܵܪܵܐ ܗܘܹܐ ܠܝܼ ܠܪܵܒܵܐ، ܐܝܼܢܵܐ ܐܲܢ݇ܬ ܒܹܝܬ ܓܵܘܣܝܼ ܥܲܫܝܼܢܵܐ ܝܘܸܬ.

⁸ ܡܸܠܝܵܐ ܝܠܹܗ ܦܘܼܡܝܼ ܬܸܫܒܘܿܚܬܘܼܟ݂، ܘܟܠܹܗ ܝܵܘܡܵܐ ܚܸܩܪܘܼܟ݂.

⁹ ܠܵܐ ܪܲܦܹܝܬ ܠܝܼ ܒܙܲܒ݂ܢܵܐ ܕܣܲܝܒܘܼܬ‌ܝܼ، ܟܲܕ ܬܵܐܹܡ ܚܲܝܠܝܼ ܠܵܐ ܫܵܒ݂ܩܹܬ ܠܝܼ.

¹⁰ ܒܗ̇ܝ ܕܗܘܼܡܙܸܡ ܠܗܘܿܢ ܕܸܫ̃ܡܸܢܝܼ̈ ܥܲܠܝܼ، ܘܢܵܛܪ̈ܵܢܹܐ ܠܓܵܢܝܼ ܥܒ݂ܝܼܕ ܠܗܘܿܢ ܡܸܠܟܵܐ ܥܲܡ ܚܕܵܕܹ̈ܐ،

¹¹ ܒܹܐܡܵܪܵܐ: ”ܐܲܠܵܗܵܐ ܩܵܡ ܫܵܒܹܩ ܠܹܗ؛ ܢܦܘܿܠܘܼܢ ܒܵܬܪܹܗ ܘܕܒ݂ܘܿܩܘܼܢ ܠܹܗ، ܒܗ̇ܝ ܕܠܲܝܬ ܠܹܗ ܦܲܨܝܵܢܵܐ.“

¹² ܝܵܐ ܐܲܠܵܗܵܐ، ܠܵܐ ܪܵܚܩܹܬ ܡܸܢܝܼ، ܝܵܐ ܐܲܠܵܗ‌ܝܼ، ܡܲܠܝܸܙ ܠܗܲܝܲܪܬ‌ܝܼ.

¹³ ܢܵܟ݂ܦܝܼ ܘܬܵܝܡܝܼ ܥܵܒ݂ܕܵܢܹ̈ܐ ܕܕܲܠܩܘܼܒ݂ܠܘܼܬܵ‌ܐ ܠܓܵܢܝܼ، ܠܵܒ݂ܫܝܼ ܠܵܘܡܵܐ ܘܢܟ݂ܝܼܦܬܵ‌ܐ ܛܵܥܝܵܢܹ̈ܐ ܠܒܝܼܫܬ‌ܝܼ.

¹⁴ ܘܐܵܢܵܐ ܐܲܡܝܼܢܵܐܝܼܬ ܒܸܬ ܣܵܦܪܹܢ، ܘܒܸܬ ܝܵܗܒܹܢܘܼܟ݂ ܬܸܫܒܘܿܚܬܵ‌ܐ ܥܲܠ ܬܸܫܒܘܿܚܬܵ‌ܐ.

¹⁵ ܦܘܼܡܝܼ ܒܸܬ ܗܲܩܹܐ ܙܲܕܝܼܩܘܼܬܘܼܟ݂، ܟܠܹܗ ܝܵܘܡܵܐ ܦܘܼܪܩܵܢܘܼܟ݂، ܒܗ̇ܝ ܕܠܵܐ ܝܕܝܼܥ ܠܝܼ ܡܸܢܝܵܢܵܝܗ‌ܝ.

¹⁶ ܒܸܬ ܐܵܬܹܝܢ ܒܓܲܒܵܪ̈ܘܼܝܵܬܹ‌ܐ ܕܡܵܪܝܵܐ ܐܲܠܵܗܵܐ، ܒܸܬ ܡܲܕܟܸܪܸܢ ܙܲܕܝܼܩܘܼܬܵ‌ܐ ܕܕܝܼܘܼܟ݂ ܐܲܚܟ̰ܝܼ.

¹⁷ ܝܵܐ ܐܲܠܵܗܵܐ، ܩܵܡ ܡܲܠܦܸܬ ܠܝܼ ܡ̣ܢ ܙܥܘܿܪܘܼܬ‌ܝܼ، ܘܗܲܠ ܠܲܐܟ݂ܵܐ ܡܘܼܕܸܥ ܠܝܼ ܕܘܼܡܵܪ̈ܘܼܟ݂.

¹⁸ ܘܐܘܼܦ ܗܲܠ ܚܘܵܪܕܸܩܢܘܼܬܵ‌ܐ ܘܣܲܝܒܘܼܬܵ‌ܐ، ܝܵܐ ܐܲܠܵܗܵܐ، ܠܵܐ ܪܲܦܹܝܬ ܠܝܼ، ܗܲܠ ܕܡܲܕܥܸܢ ܚܲܝܠܘܼܟ݂ ܠܕܵܪܵܐ ܐܚܹܪܢܵܐ، ܓܲܒܵܪܘܼܬܘܼܟ݂ ܠܟܠ ܕܐܵܬܹ‌ܐ.

¹⁹ ܙܲܕܝܼܩܘܼܬܘܼܟ݂، ܝܵܐ ܐܲܠܵܗܵܐ، ܗܲܠ ܡܪܵܘܡܵܐ ܝܠܵܗ̇، ܐܲܢ݇ܬ ܕܥܒ݂ܝܼܕ ܠܘܼܟ݂ ܦܘܼܠܚܵܢܹ̈ܐ ܓܘܼܪܹ̈ܐ، ܝܵܐ ܐܲܠܵܗܵܐ، ܡܵܢܝܼ ܝܠܹܗ ܐܲܝܟ݂ ܕܝܼܘܼܟ݂؟

²⁰ ܐܲܢ݇ܬ ܕܩܵܡ ܡܲܚܙܹܝܬ ܠܝܼ ܪܵܒܵܐ ܥܵܘܩܵܢܹ̈ܐ ܣܸܪ̈ܝܹܐ، ܒܸܬ ܕܵܝܪܹܬ ܡܲܚܹܝܬ ܠܝܼ، ܘܡ̣ܢ ܥܘܼܡܩܹ̈ܐ ܕܐܲܪܥܵܐ ܒܸܬ ܕܵܝܪܹܬ ܡܲܐܣܩܸܬ ܠܝܼ.

²¹ ܒܸܬ ܡܲܙܝܸܕܸܬ ܓܘܼܪܘܼܬ‌ܝܼ، ܘܒܸܬ ܕܵܝܪܹܬ ܝܵܗܒܹܬ ܠܝܼ ܠܸܒܵܐ.

²² ܐܘܼܦ ܐܵܢܵܐ ܒܸܬ ܫܲܟܪܸܢܘܼܟ݂ ܒܩܝܼܬܵܪܵܐ، ܩܵܐ ܫܲܪܝܼܪܘܼܬܘܼܟ݂، ܝܵܐ ܐܲܠܵܗ‌ܝܼ، ܒܸܬ ܙܵܡܪܹܢ ܐܸܠܘܼܟ݂ ܒܟܸܢܵܪܵܐ، ܝܵܐ ܩܲܕܝܼܫܵܐ ܕܐܝܼܣܪܵܐܹܝܠ.

²³ ܒܸܬ ܫܲܒܚܝܼ ܣܸܦܘܵܬ‌ܝܼ̈ ܟܲܕ ܙܵܡܪܹܢ ܐܸܠܘܼܟ݂، ܐܘܼܦ ܓܵܢܝܼ ܕܦܘܼܪܩܵܐ ܠܘܼܟ݂.

²⁴ ܐܘܼܦ ܠܸܫܵܢܝܼ ܟܠܹܗ ܝܵܘܡܵܐ ܒܸܬ ܗܲܡܙܸܡ ܙܲܕܝܼܩܘܼܬܘܼܟ݂، ܒܗ̇ܝ ܕܢܟ݂ܝܼܦ ܠܗܘܿܢ ܕܦܝܼܫ ܠܗܘܿܢ ܡܘܼܟܸܦܹܐ ܛܵܥܝܵܢܹ̈ܐ ܠܒܝܼܫܬ‌ܝܼ.