ܡܙܡܘܪܐ 64 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܡܙܡܘܪܐ ܕܕܘܝܕ.

¹ ܫܡܹܥ، ܝܵܐ ܐܲܠܵܗܵܐ، ܩܵܠܝܼ ܟܲܕ ܩܵܒ݂ܠܹܢ، ܢܛܘܿܪܘܼܢ ܚܲܝܝܼ̈ ܡ̣ܢ ܙܕܘܼܥܬܵ‌ܐ ܕܕܸܫ̃ܡܸܢ.

² ܛܲܫܝܼ ܠܝܼ ܡ̣ܢ ܒܘܼܨܵܐ ܕܥܵܒ݂ܕܵܢܹ̈ܐ ܕܒܝܼܫܬܵ‌ܐ، ܡ̣ܢ ܫܓ݂ܘܼܫܝܵܐ ܕܦܵܠܚܵܢܹ̈ܐ ܕܥܵܘܠܵܐ.

³ ܕܡܘܼܚܪܸܦ ܠܗܘܿܢ ܠܸܫܵܢܵܝܗ‌ܝ ܐܲܝܟ݂ ܣܲܝܦܵܐ، ܡܬܝܼܚ ܠܗܘܿܢ ܗܹܡܸܙܡܵܢ ܡܲܪܝܼܪܬܵ‌ܐ ܐܲܝܟ݂ ܓܹܐܪܵܝܗ‌ܝ.

⁴ ܠܪܲܦܘܼܝܹܐ ܡ̣ܢ ܣܸܬܵܪܹ̈ܐ ܥܲܠ ܬܲܡܝܼܡܵܐ، ܡܸܢܫܸܠܬܵܢܹܐ ܟܹܐ ܪܲܦܝܼ ܥܲܠܘܼܗ‌ܝ، ܘܠܹܐ ܙܵܕܥܝܼ.

⁵ ܟܹܐ ܚܲܠܸܢܝܼ ܠܵܗ̇ ܓܵܢܵܝܗ‌ܝ ܒܨܒ݂ܘܼܬܵ‌ܐ ܒܝܼܫܬܵ‌ܐ، ܗܘܼܡܙܸܡ ܠܗܘܿܢ ܒܘܼܬ ܛܲܫܘܼܝܹܐ ܦܲܚܹ̈ܐ؛ ܐܡܝܼܪܗܘܿܢ: ”ܡܵܢܝܼ ܒܸܬ ܚܵܙܹܐ ܠܗܘܿܢ؟“

⁶ ܟܹܐ ܬܲܚܡܸܢܝܼ ܥܵܘ̈ܠܹܐ، ܒܹܐܡܵܪܵܐ: ”ܡܛܹܐ ܠܲܢ ܠܬܲܚܡܲܢܬܵ‌ܐ ܨܢܝܼܥܬܵ‌ܐ.“ ܘܓܵܘܵܐ ܕܐܢܵܫܵܐ ܘܠܸܒܹܗ ܥܲܡܘܼܩܹ̈ܐ ܝܢܵܐ.

⁷ ܐܝܼܢܵܐ ܐܲܠܵܗܵܐ ܒܸܬ ܕܵܪܹܐ ܓܹܐܪܵܐ ܥܲܠܵܝܗ‌ܝ، ܒܸܬ ܗܵܘܝܼ ܡܲܚܘܵܬܵܝ̈ܗ‌ܝ ܡܸܢܫܸܠܬܵܢܹܐ.

⁸ ܒܸܬ ܦܵܝܫܝܼ ܬܘܼܪܩܸܠܹܐ، ܒܠܸܫܵܢܵܐ ܕܓܵܢܵܝܗ‌ܝ ܚܕܝܼܪܵܐ ܠܕܲܠܩܘܼܒ݂ܠܵܝܗ‌ܝ. ܒܸܬ ܡܲܫܥܸܫ ܪܹܝܫܵܐ ܟܠ ܕܚܵܙܹܐ ܐܸܠܵܝܗ‌ܝ.

⁹ ܘܒܸܬ ܙܵܕܥܝܼ ܟܠܵܝܗ‌ܝ ܐܢܵܫܹ̈ܐ، ܘܡܲܕܥܝܼ ܦܘܼܠܚܵܢܵܐ ܕܐܲܠܵܗܵܐ، ܘܥܒ݂ܵܕܹܗ ܒܸܬ ܦܲܪܡܝܼ.

¹⁰ ܒܸܬ ܚܵܕܹܐ ܙܲܕܝܼܩܵܐ ܒܡܵܪܝܵܐ ܘܫܵܩܹܠ ܓܵܘܣܵܐ ܒܝܼܹܗ، ܘܒܸܬ ܥܵܒ݂ܕܝܼ ܫܘܼܒ݂ܗܵܪܵܐ ܟܠܵܝܗ‌ܝ ܬܪ̈ܘܼܨܹܐ ܕܠܸܒܵܐ.