ܡܙܡܘܪܐ 62 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܥܠ ܝܕܘܬܘܢ. ܡܙܡܘܪܐ ܕܕܘܝܕ.

¹ ܐܲܚܟ̰ܝܼ ܠܐܲܠܵܗܵܐ ܒܫܸܬܩܵܐ ܒܸܣܦܵܪܵܐ ܝܠܵܗ̇ ܓܵܢܝܼ، ܡܸܢܹܗ ܝܠܹܗ ܦܘܼܪܩܵܢܝܼ.

² ܐܲܚܟ̰ܝܼ ܗ̇ܘ ܝܼܠܹܗ ܐܝܼܨܵܪܝܼ ܘܦܘܼܪܩܵܢܝܼ، ܩܲܠܥܝܼ ܝܠܹܗ، ܗܲܪ ܠܹܐ ܫܵܥܫܹܢ.

³ ܗܲܠ ܐܝܼܡܲܢ ܒܸܬ ܬܵܪܥܝܼܬܘܿܢ ܥܲܠ ܐܢܵܫܵܐ؟ ܟܠܵܘܟ݂ܘܿܢ ܒܵܥܹܝܬܘܿܢ ܠܸܩܛܵܠܵܐ ܐܸܠܹܗ، ܐܲܝܟ݂ ܓܘܼܕܵܐ ܓܸܢܝܵܐ، ܣܝܵܓ݂ܵܐ ܚܘܼܪܙܸܦܵܐ.

⁴ ܐܲܚܟ̰ܝܼ ܥܒ݂ܝܼܕ ܠܗܘܿܢ ܡܸܠܟܵܐ ܠܸܛܪܵܕܹܗ ܡ̣ܢ ܪܵܡܘܼܬܹܗ، ܟܹܐ ܒܵܣܡܵܐ ܠܗܘܿܢ ܒܕܘܼܓܠܵܐ، ܒܦܘܼܡܵܝܗ‌ܝ ܟܹܐ ܒܲܪܟ݂ܝܼ، ܐܝܼܢܵܐ ܒܓܵܘܵܝܗ‌ܝ ܟܹܐ ܠܵܝܛܝܼ.ܣܹܠܵܗ

⁵ ܐܲܚܟ̰ܝܼ ܠܐܲܠܵܗܵܐ ܒܫܸܬܩܵܐ ܣܦܘܿܪܝ، ܝܵܐ ܓܵܢܝܼ، ܣܵܒܵܒ ܡܸܢܹܗ ܝܠܹܗ ܣܲܒ݂ܪܝܼ.

⁶ ܐܲܚܟ̰ܝܼ ܗ̇ܘ ܝܼܠܹܗ ܐܝܼܨܵܪܝܼ ܘܦܘܼܪܩܵܢܝܼ، ܩܲܠܥܝܼ ܝܠܹܗ، ܠܹܐ ܫܵܥܫܹܢ.

⁷ ܥܲܠ ܐܲܠܵܗܵܐ ܝܠܹܗ ܦܘܼܪܩܵܢܝܼ ܘܐܝܼܩܵܪܝܼ، ܗ̇ܘ ܝܼܠܹܗ ܐܝܼܨܵܪܵܐ ܕܥܘܼܫܢܝܼ، ܒܹܝܬ ܓܵܘܣܝܼ ܒܐܲܠܵܗܵܐ.

⁸ ܣܒܘܿܪܘܼܢ ܒܝܼܹܗ ܒܟܠ ܙܲܒ݂ܢܵܐ، ܝܵܐ ܥܲܡܵܐ، ܫܲܦܟ݂ܘܼܢ ܩܲܕܡܘܼܗ‌ܝ ܠܸܒܵܘܟ݂ܘܿܢ، ܐܲܠܵܗܵܐ ܒܹܝܬ ܓܵܘܣܵܐ ܝܠܹܗ ܩܵܬܲܢ.ܣܹܠܵܗ

⁹ ܫܲܪܝܼܪܵܐܝܼܬ، ܣܪܝܼܩܘܼܬܵ‌ܐ ܝܢܵܐ ܒܢܲܝ̈ ܐܵܕܵܡ، ܕܘܼܓܠܵܐ ܝܢܵܐ ܒܢܲܝ̈ܢܵܫܵܐ، ܥܲܠ ܡܲܣܲܐܬܵ‌ܐ ܟܹܐ ܐܵܣܩܝܼ، ܐܵܢܝܼ ܥܲܠ ܚܕܵܕܹ̈ܐ ܒܘܼܫ ܩܲܠܘܼ̈ܠܹܐ ܝܢܵܐ ܡ̣ܢ ܢܫܲܡܬܵ‌ܐ.

¹⁰ ܠܵܐ ܡܲܬܒ݂ܝܼܬܘܿܢ ܣܲܒ݂ܪܵܐ ܥܲܠ ܛܠܘܼܡܝܵܐ، ܘܒܚܛܘܼܦܝܵܐ ܠܵܐ ܗܵܘܝܼ ܠܵܘܟ݂ܘܿܢ ܬܘܼܟ݂ܠܵܢܵܐ ܣܪܝܼܩܵܐ، ܥܘܼܬܪܵܐ ܟܲܕ ܙܵܐܹܕ، ܠܵܐ ܡܲܬܒ݂ܝܼܬܘܿܢ ܠܸܒܵܐ ܥܲܠܘܼܗ‌ܝ.

¹¹ ܚܕܵܐ ܓܵܗܵܐ ܗܘܼܡܙܸܡ ܠܹܗ ܐܲܠܵܗܵܐ، ܐܲܢܹܐ ܬܲܪܬܹܝ ܫܡܝܼܥ ܠܝܼ، ܕܚܲܝܠܵܐ ܝܼܠܹܗ ܕܐܲܠܵܗܵܐ،

¹² ܘܕܝܼܘܼܟ݂ ܝܼܠܵܗ̇ ܛܲܝܒܘܼܬܵ‌ܐ، ܝܵܐ ܡܵܪܝܵܐ، ܒܗ̇ܝ ܕܐܲܢ݇ܬ ܟܹܐ ܦܵܪܥܹܬ ܠܐܢܵܫܵܐ ܐܲܝܟ݂ ܦܘܼܠܚܵܢܹܗ.