ܡܙܡܘܪܐ 60 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܥܠ ܫܘܼܫܲܢ ܥܹܕܘܿܬ. ܡܸܟ݂ܬܵܡ ܕܕܘܝܕ ܠܡܠܘܦܐ، ܐܝܡܢ ܕܦܠܝܫ ܠܗ ܥܡ ܐܪܡ ܢܗܪ̈ܝܢ ܘܥܡ ܐܪܡ ܨܘܒ݂ܐ، ܘܕܝܪܗ ܝܘܐܒ݂ ܘܡܚܐ ܠܗ ܬܪܥܣܪ ܐܠܦ̈ܐ ܐܕܘܡܝ̈ܐ ܒܪܘܘܠܐ ܕܡܠܚܐ.

¹ ܝܵܐ ܐܲܠܵܗܵܐ، ܩܵܡ ܡܲܚܦܸܠܸܬ ܠܲܢ ܘܩܵܡ ܬܵܪܥܹܬ ܠܲܢ، ܟܪܝܼܒ ܠܘܼܟ݂؛ ܡܲܕܸܪܸܬ ܠܲܢ.

² ܕܘܼܪܘܸܕܵܐ ܠܘܼܟ݂ ܐܲܪܥܵܐ، ܟ̰ܠܝܼܦܵܐ ܠܘܼܟ݂، ܒܲܣܸܡ ܬܒ݂ܵܪܬܘܼܗ̇ ܣܵܒܵܒ ܫܥܝܼܫܬܵ‌ܐ ܝܠܵܗ̇.

³ ܡܘܼܚܙܹܐ ܠܘܼܟ݂ ܠܥܲܡܘܼܟ݂ ܩܸܫܝܘܼܬܵ‌ܐ، ܩܵܡ ܡܲܫܬܹܝܬ ܠܲܢ ܚܲܡܪܵܐ ܦܲܢܦܸܠܵܢܵܐ.

⁴ ܝܘܼܗܒܹܠ ܠܘܼܟ݂ ܐܵܬܵ‌ܐ ܠܙܕܝܼܥܘܼ̈ܟ݂، ܠܸܥܪܵܩܵܐ ܟܸܣ ܠܘܼܗ̇ ܡܩܲܕܡ ܩܸܫܬܵ‌ܐ،ܣܹܠܵܗ

⁵ ܩܵܐ ܕܚܵܠܨܝܼ ܡܘܼܚܸܒܘܼ̈ܟ݂، ܦܲܪܸܩ ܒܝܲܡܝܼܢܘܼܟ݂ ܘܓ̰ܲܘܸܒ ܠܲܢ.

⁶ ܐܲܠܵܗܵܐ ܗܘܼܡܙܸܡ ܠܹܗ ܒܩܘܼܕܫܹܗ: ”ܒܸܬ ܦܵܨܚܹܢ، ܒܸܬ ܦܲܠܥܸܢ ܠܫܟܹܝܡ ܘܪܵܘܘܿܠܵܐ ܕܣܵܟܘܼܬ ܒܸܬ ܟܵܝܠܹܢ.

⁷ ”ܕܝܼܝܼ ܝܠܹܗ ܓܸܠܥܵܕ، ܘܕܝܼܝܼ ܝܠܹܗ ܡܢܲܫܹܐ، ܐܲܦܪܹܝܡ ܣܲܢܘܲܪܬܵ‌ܐ ܕܪܹܝܫܝܼ، ܝܼܗܘܼܕܵܐ ܚܘܼܛܪܝܼ.

⁸ ”ܡܘܼܐܵܒ݂ ܡܵܪܸܓܠܵܐ ܕܚܲܠܲܠܬ‌ܝܼ، ܥܲܠ ܐܲܕܘܿܡ ܒܸܬ ܪܲܦܹܝܢ ܨܵܘܸܠܬ‌ܝܼ، ܥܲܠ ܦܠܸܫܬ ܒܸܬ ܡܲܩܘܸܚܸܢ.“

⁹ ܡܵܢܝܼ ܒܸܬ ܠܲܒܸܠ ܠܝܼ ܠܡܕܝܼܢ݇ܬܵ‌ܐ ܡܘܼܩܘܝܼܬܵ‌ܐ؟ ܡܵܢܝܼ ܒܸܬ ܡܗܲܕܹܐ ܠܝܼ ܗܲܠ ܐܲܕܘܿܡ؟

¹⁰ ܗܵܐ، ܠܹܐ ܝܘܸܬ ܐܲܢ݇ܬ ܡܘܼܚܦܸܠܵܐ ܐܸܠܲܢ، ܝܵܐ ܐܲܠܵܗܵܐ؟ ܘܠܹܐ ܦܵܠܛܹܬ ܥܲܡ ܚܲܝܠܵܘܵܬܲܢ̈، ܝܵܐ ܐܲܠܵܗܵܐ؟

¹¹ ܗܲܒ݂ܠ ܠܲܢ ܗܲܝܲܪܬܵ‌ܐ ܩܲܕܡ ܕܸܫ̃ܡܸܢ، ܣܵܒܵܒ ܣܪܝܼܩܘܼܬܵ‌ܐ ܝܠܵܗ̇ ܦܲܪܲܩܬܵ‌ܐ ܕܒܲܪܢܵܫܵܐ.

¹² ܒܐܲܠܵܗܵܐ ܒܸܬ ܥܵܒ݂ܕܲܚ ܓܲܒܵܪܘܼܬܵ‌ܐ، ܘܗ̇ܘ ܒܸܬ ܕܲܫܕܸܫ ܠܕܸܫ̃ܡܸܢܲܢ̈.