ܡܙܡܘܪܐ 56 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ: ܥܠ ܝܵܘܢܲܬ ܐܹܠܸܡ ܪܚܘܿܩܝܼܡ. ܡܸܟ݂ܬܵܡ ܕܕܘܝܕ، ܐܝܡܢ ܕܕܒ݂ܝܩ ܠܗܘܢ ܐܠܗ ܦܠܫܬܝ̈ܐ ܒܓܬ.

¹ ܪܲܚܸܡ ܥܲܠܝܼ، ܝܵܐ ܐܲܠܵܗܵܐ، ܒܗ̇ܝ ܕܩܵܡ ܕܵܐܹܫ ܠܝܼ ܒܲܪܢܵܫܵܐ، ܟܠܹܗ ܝܵܘܡܵܐ ܦܵܠܫܵܢܹ̈ܐ ܡܲܠܝܘܼܨܝܼ ܝܢܵܐ.

² ܩܵܡ ܕܵܝܫܝܼ ܠܝܼ ܕܸܫ̃ܡܸܢܝܼ̈ ܟܠܹܗ ܝܵܘܡܵܐ، ܒܗ̇ܝ ܕܪܵܒܵܐ ܝܢܵܐ ܦܵܠܫܵܢܹ̈ܐ ܥܲܡܝܼ ܒܚܬܝܼܪܘܼܬܵ‌ܐ.

³ ܝܵܘܡܵܐ ܕܙܵܕܥܹܢ ܐܵܢܵܐ، ܒܝܼܘܼܟ݂ ܒܸܬ ܣܵܒܪܹܢ.

⁴ ܒܐܲܠܵܗܵܐ، ܗ̇ܘ ܕܟܹܐ ܚܵܩܪܹܢ ܗܹܡܸܙܡܵܢܹܗ، ܒܐܲܠܵܗܵܐ ܣܒܝܼܪܝܼ، ܠܹܐ ܙܵܕܥܹܢ. ܡܘܼܕܝܼ ܡܵܨܹܐ ܥܵܒܹܕ ܒܲܪܢܵܫܵܐ ܐܸܠܝܼ؟

⁵ ܟܠܹܗ ܝܵܘܡܵܐ ܗܹܡܸܙܡܵܢܝܼ̈ ܟܹܐ ܡܲܦܟ̰ܸܠܝܼ، ܟܠܵܝܗ‌ܝ ܚܘܼܫܵܒ݂ܵܝ̈ܗ‌ܝ ܒܘܼܬ ܕܝܼܝܼ ܠܒܝܼܫܬܵ‌ܐ ܝܢܵܐ.

⁶ ܓ̰ܡܝܼܥ ܠܗܘܿܢ، ܝܬܝܼܒ݂ ܠܗܘܿܢ ܒܟܡܹܐܢܵܐ ܐܵܢܝܼ، ܢܛܝܼܪܗܘܿܢ ܥܸܩܒܝܼ̈، ܒܸܣܦܵܪܵܐ ܕܫܵܩܠܝܼ ܠܓܵܢܝܼ.

⁷ ܠܲܝܬ ܚܠܵܨܵܐ ܐܸܠܵܝܗ‌ܝ ܡ̣ܢ ܥܸܠܬܵ‌ܐ ܕܥܵܘܠܵܝܗ‌ܝ، ܡܲܨܠܝܼ ܠܗܘܿܢ ܥܲܡܡܹ̈ܐ ܒܚܸܡܬܵ‌ܐ، ܝܵܐ ܐܲܠܵܗܵܐ.

⁸ ܚܕܵܪ̈ܝܵܬ‌ܝܼ ܡܢܹܐ ܠܘܼܟ݂ ܐܲܢ݇ܬ، ܡܲܬܸܒ݂ ܕܸܡܥܝܼ̈ ܒܓܘܼܕܘܼܟ݂. ܗܵܐ، ܠܹܐ ܝܢܵܐ ܒܟܬܵܒ݂ܘܼܟ݂؟

⁹ ܗ̇ܝܓܵܗ ܒܸܬ ܕܵܝܪܝܼ ܕܸܫ̃ܡܸܢܝܼ̈ ܠܒܵܬܪܵܐ ܒܝܵܘܡܵܐ ܕܩܵܪܹܝܢ، ܐܵܗܵܐ ܝܕܝܼܥ ܠܝܼ، ܕܐܲܠܵܗܵܐ ܩܵܬ‌ܝܼ ܝܠܹܗ.

¹⁰ ܒܐܲܠܵܗܵܐ، ܗ̇ܘ ܕܟܹܐ ܚܵܩܪܹܢ ܗܹܡܸܙܡܵܢܹܗ، ܒܡܵܪܝܵܐ، ܗ̇ܘ ܕܟܹܐ ܚܵܩܪܹܢ ܗܹܡܸܙܡܵܢܹܗ،

¹¹ ܒܐܲܠܵܗܵܐ ܣܒܝܼܪܝܼ، ܠܹܐ ܙܵܕܥܹܢ؛ ܡܘܼܕܝܼ ܡܵܨܹܐ ܥܵܒܹܕ ܒܲܪܢܵܫܵܐ ܐܸܠܝܼ؟

¹² ܘܵܠܝܼܬ‌ܝܼ ܝܢܵܐ ܢܸܕܪܹ̈ܐ ܕܐܸܠܘܼܟ݂، ܝܵܐ ܐܲܠܵܗܵܐ، ܒܸܬ ܬܲܡܸܡܸܢ ܕܸܒ݂ܚܹ̈ܐ ܕܫܲܟܲܪ̈ܝܵܬܹ‌ܐ ܐܸܠܘܼܟ݂،

¹³ ܒܗ̇ܝ ܕܩܵܡ ܦܲܨܹܝܬ ܠܵܗ̇ ܓܵܢܝܼ ܡ̣ܢ ܡܵܘܬܵ‌ܐ، ܗܹܐ، ܐܲܩܠܵܬ‌ܝܼ̈ ܡ̣ܢ ܬܲܪܩܲܠܬܵ‌ܐ، ܕܚܵܕܪܹܢ ܩܲܕܡ ܐܲܠܵܗܵܐ ܒܒܲܗܪܵܐ ܕܚܵܝܹ̈ܐ.