ܡܙܡܘܪܐ 55 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ: ܒܩܝܬܪ̈ܐ. ܡܲܣܟܝܼܠ ܕܕܘܝܕ.

¹ ܗܲܒ݂ܠ ܢܵܬܵ‌ܐ، ܝܵܐ ܐܲܠܵܗܵܐ، ܠܨܠܘܿܬ‌ܝܼ، ܘܠܵܐ ܛܲܫܹܝܬ ܓܵܢܘܼܟ݂ ܡ̣ܢ ܦܲܪܦܲܠܬ‌ܝܼ.

² ܡܲܨܝܸܬ ܐܸܠܝܼ ܘܓ̰ܲܘܸܒ ܠܝܼ، ܢܲܟܢܘܼܟܹܐ ܝܘܸܢ ܒܬܲܢܲܚܬ‌ܝܼ ܘܛܠܝܼܩܬܵ‌ܐ ܝܠܵܗ̇ ܥܲܠܝܼ،

³ ܡ̣ܢ ܩܵܠܵܐ ܕܕܸܫ̃ܡܸܢ، ܡ̣ܢ ܥܵܘܩܵܢܵܐ ܕܪܲܫܝܼܥܵܐ، ܒܗ̇ܝ ܕܟܹܐ ܡܲܫܦܸܟ݂ܝܼ ܥܲܠܝܼ ܣܸܪܝܘܼܬܵ‌ܐ، ܘܒܚܸܡܬܵ‌ܐ ܟܹܐ ܣܵܢܝܼ ܐܸܠܝܼ.

⁴ ܠܸܒܝܼ ܟܹܐ ܪܵܓܹܕ ܒܓܵܘܝܼ، ܘܣܘܼܪ̈ܵܕܹܐ ܕܡܵܘܬܵ‌ܐ ܢܦܝܼܠ ܠܗܘܿܢ ܥܲܠܝܼ.

⁵ ܙܕܘܼܥܬܵ‌ܐ ܘܪܲܬܪܲܬܬܵ‌ܐ ܥܒ݂ܝܼܪܗܘܿܢ ܒܝܼܝܼ، ܘܪܓܘܼܕܵܐ ܩܵܡ ܟܲܣܹܐ ܠܝܼ.

⁶ ܘܐܡܝܼܪܝܼ: ”ܛܘܼܒ݂ܵܐ ܕܗܵܘܹܐ ܗܘܵܐ ܠܝܼ ܓܘܼܠܦܵܢܹ̈ܐ ܐܲܝܟ݂ ܝܵܘܢܵܐ، ܕܦܵܪܚܹܢ ܗܘܵܐ ܘܪܵܝܦܹܢ ܗܘܵܐ.

⁷ ”ܗܵܐ، ܒܸܬ ܥܵܪܩܹܢ ܗܘܵܐ ܪܸܚܩܵܐ، ܒܸܬ ܫܵܪܹܝܢ ܗܘܵܐ ܒܠܲܝܠܹܐ ܓܵܘ ܒܲܪܝܼܵܐ.ܣܹܠܵܗ

⁸ ”ܒܸܬ ܡܲܠܝܸܙܸܢ ܠܦܲܪܘܼܩܘܼܗ̇ ܓܵܢܝܼ، ܡ̣ܢ ܦܵܘܚܵܐ ܚܲܝܠܵܢܵܐ ܘܡ̣ܢ ܥܲܠܥܵܠܵܐ.“

⁹ ܒܲܠܒܸܠ، ܝܵܐ ܡܵܪܝܵܐ، ܦܲܠܸܥ ܠܸܫܵܢܵܝܗ‌ܝ، ܣܵܒܵܒ ܚܙܹܐ ܠܝܼ ܛܠܘܼܡܝܵܐ ܘܡܲܩܲܪܵܨܘܼܬܵ‌ܐ ܓܵܘ ܡܕܝܼܢ݇ܬܵ‌ܐ.

¹⁰ ܐܝܼܡܵܡܵܐ ܘܠܲܝܠܹܐ ܟܹܐ ܚܵܕܪܝܼ ܥܲܠ ܫܘܼܪ̈ܘܼܗ̇، ܘܥܵܘܠܵܐ ܘܐܘܼܠܨܵܢܵܐ ܒܓܵܘܘܼܗ̇ ܝܢܵܐ.

¹¹ ܚܪ̈ܵܒܹܐ ܐܝܼܬ ܓܵܘܘܼܗ̇، ܘܠܹܐ ܦܵܪܩܝܼ ܛܠܘܼܡܝܵܐ ܘܦܸܠܡܵܐ ܡ̣ܢ ܫܘܼܩܘܼܗ̇.

¹² ܣܵܒܵܒ ܠܹܐ ܝܗܘܵܐ ܕܸܫ̃ܡܸܢ ܕܠܝܼܡ ܠܹܗ ܐܸܠܝܼ، ܕܩܲܒܠܸܢ ܗܘܵܐ. ܠܹܐ ܝܗܘܵܐ ܣܵܢܝܵܢܝܼ ܕܓܘܼܪܘܸܣܵܐ ܠܹܗ ܓܵܢܹܗ ܥܲܠܝܼ، ܕܛܲܫܹܝܢ ܗܘܵܐ ܠܵܗ̇ ܓܵܢܝܼ ܡܸܢܹܗ.

¹³ ܐܝܼܢܵܐ ܐܲܢ݇ܬ، ܐܢܵܫܵܐ ܐܲܝܟ݂ ܕܝܼܝܼ، ܪܵܚܡܝܼ ܘܝܵܕܥܵܢܝܼ،

¹⁴ ܕܥܲܡ ܚܕܵܕܹ̈ܐ ܥܒ݂ܝܼܕ ܠܲܢ ܫܵܘܬܵܦܘܼܬܵ‌ܐ ܚܠܝܼܬܵ‌ܐ، ܓܵܘ ܒܲܝܬܵ‌ܐ ܕܐܲܠܵܗܵܐ ܟܹܐ ܚܵܕܪܲܚ ܗܘܵܘ ܥܲܡ ܟܸܢܫܵܐ.

¹⁵ ܐܵܬܹ‌ܐ ܡܵܘܬܵ‌ܐ ܥܲܠܵܝܗ‌ܝ ܡܸܢܫܸܠܬܵܢܹܐ، ܨܵܠܝܼ ܠܫܝܘܿܠ ܟܲܕ ܚܵܝܹ̈ܐ، ܣܵܒܵܒ ܒܝܼܫܵܬܹ̈‌ܐ ܐܝܼܬ ܓܵܘ ܒܹܝܬ ܡܲܥܡܪ̈ܵܝܗ‌ܝ، ܒܓܵܘܵܝܗ‌ܝ.

¹⁶ ܐܝܼܢܵܐ ܐܵܢܵܐ، ܠܐܲܠܵܗܵܐ ܒܸܬ ܩܵܪܹܝܢ، ܘܡܵܪܝܵܐ ܒܸܬ ܦܲܪܸܩ ܠܝܼ.

¹⁷ ܪܲܡܫܵܐ، ܘܨܲܦܪܵܐ، ܘܛܲܗܪܵܐ، ܒܸܬ ܩܵܒ݂ܠܹܢ ܘܬܲܢܸܚܸܢ، ܘܒܸܬ ܫܵܡܹܥ ܠܹܗ ܩܵܠܝܼ.

¹⁸ ܒܸܬ ܦܲܪܸܩ ܒܫܠܵܡܵܐ ܓܵܢܝܼ ܡ̣ܢ ܦܠܵܫܵܐ ܕܥܲܠܝܼ، ܣܵܒܵܒ ܪܵܒܵܐ ܝܢܵܐ ܕܲܠܩܘܼܒ݂ܠܝܼ.

¹⁹ ܒܸܬ ܫܵܡܹܥ ܐܲܠܵܗܵܐ، ܝܵܬܒ݂ܵܢܵܐ ܕܡ̣ܢ ܙܲܒ݂ܢܹ̈ܐ ܩܲܕܝܼܡܵܝܹ̈ܐ، ܘܒܸܬ ܡܲܠܝܸܨ ܠܗܘܿܢ.ܣܹܠܵܗ ܣܵܒܵܒ ܠܹܐ ܫܲܚܠܸܦܝܼ، ܘܠܹܐ ܙܵܕܥܝܼ ܡ̣ܢ ܐܲܠܵܗܵܐ.

²⁰ ܦܘܼܫܸܛ ܠܹܗ ܐܝܼܕܵܬܘܼ̈ܗ‌ܝ ܥܲܠ ܕܐܵܢܝܼ ܕܝܼܢܵܐ ܒܫܠܵܡܵܐ ܥܲܡܹܗ، ܫܡܝܼܛ ܠܹܗ ܩܵܘܠܹܗ،

²¹ ܟ̰ܘܼܥܝܵܐ ܐܲܝܟ݂ ܟܲܪܥܵܐ ܦܘܼܡܹܗ، ܐܝܼܢܵܐ ܐܝܼܬ ܦܠܵܫܵܐ ܒܠܸܒܹܗ؛ ܪܲܟܝܼܟܹܐ ܚܲܒܪ̈ܘܼܗ‌ܝ ܡ̣ܢ ܡܸܫܚܵܐ، ܐܝܼܢܵܐ ܣܲܝܦܹ̈ܐ ܓܪ̈ܝܼܫܹܐ ܝܢܵܐ.

²² ܕܪܝܼ ܠܵܗ̇ ܥܲܠ ܡܵܪܝܵܐ ܟܵܪܬܘܼܟ݂، ܘܗ̇ܘ ܒܸܬ ܬܲܪܣܹܐ ܠܘܼܟ݂، ܠܹܐ ܫܵܒܹܩ ܠܥܵܠܲܡ ܙܲܕܝܼܩܵܐ ܫܵܥܹܫ.

²³ ܐܝܼܢܵܐ ܐܲܢ݇ܬ، ܝܵܐ ܐܲܠܵܗܵܐ، ܒܸܬ ܡܲܨܠܹܝܬ ܠܗܘܿܢ ܠܓܘܼܒܵܐ ܕܚܪܵܒ݂ܵܐ، ܫܲܦܟ݂ܵܢܹ̈ܐ ܕܕܸܡܵܐ ܘܥܵܒ݂ܕܵܢܹ̈ܐ ܕܦܸܠܡܵܐ ܠܹܐ ܡܵܛܝܼ ܠܦܲܠܓܵܐ ܕܚܲܝܵܝ̈ܗ‌ܝ؛ ܐܝܼܢܵܐ ܐܵܢܵܐ ܒܸܬ ܣܵܒܪܹܢ ܒܝܼܘܼܟ݂.