ܡܙܡܘܪܐ 52 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܡܲܣܟܝܼܠ ܕܕܘܝܕ، ܐܝܡܢ ܕܐܬ‌ܐ ܠܗ ܕܘܐܓ݂ ܐܕܘܡܝܐ ܘܡܘܕܥ ܠܗ ܠܫܐܘܠ، ܘܐܡܝܪܗ ܐܠܗ: ”ܐܬ‌ܐ ܠܗ ܕܘܝܕ ܠܒܝܬ‌ܐ ܕܐܚܝܡܠܟ.“

¹ ܩܵܡܘܿܕܝܼ ܫܲܒ݂ܗܘܼܪܹܐ ܝܘܸܬ ܒܒܝܼܫܬܵ‌ܐ، ܝܵܐ ܓܲܒܵܪܵܐ؟ ܛܲܝܒܘܼܬܵ‌ܐ ܕܐܲܠܵܗܵܐ ܒܟܠܹܗ ܝܵܘܡܵܐ ܝܠܵܗ̇.

² ܡܲܚܪܲܒ݂ܬܵ‌ܐ ܬܲܚܡܘܼܢܹܐ ܝܠܹܗ ܠܸܫܵܢܘܼܟ݂، ܐܲܝܟ݂ ܡܲܓܪܲܥܬܵ‌ܐ ܚܲܪܝܼܦܬܵ‌ܐ، ܝܵܐ ܥܵܒ݂ܕܵܢܵܐ ܕܦܸܠܡܵܐ.

³ ܡܘܼܚܸܒ ܠܘܼܟ݂ ܒܝܼܫܬܵ‌ܐ ܒܘܼܫ ܡ̣ܢ ܛܵܒ݂ܬܵ‌ܐ، ܕܲܓܵܠܘܼܬܵ‌ܐ ܡ̣ܢ ܠܗܲܡܙܘܼܡܹܐ ܙܲܕܝܼܩܘܼܬܵ‌ܐ.ܣܹܠܵܗ

⁴ ܡܘܼܚܸܒ ܠܘܼܟ݂ ܟܠܵܝܗ‌ܝ ܗܹܡܸܙܡܵܢܹ̈ܐ ܒܵܠܥܵܢܹ̈ܐ، ܝܵܐ ܠܸܫܵܢܵܐ ܕܦܸܠܡܵܐ.

⁵ ܗܵܕܟ݂ܵܐ ܐܲܠܵܗܵܐ ܒܸܬ ܬܵܠܹܚ ܠܘܼܟ݂ ܠܥܵܠܲܡ، ܒܸܬ ܚܵܛܹܦ ܠܘܼܟ݂ ܘܣܵܬܹܪܘܼܟ݂ ܡ̣ܢ ܡܲܫܟܢܘܼܟ݂، ܘܒܸܬ ܥܵܩܹܪܘܼܟ݂ ܡ̣ܢ ܐܲܪܥܵܐ ܕܚܵܝܹ̈ܐ.ܣܹܠܵܗ

⁶ ܘܒܸܬ ܚܵܙܝܼ ܙܲܕܝܼܩܹ̈ܐ ܘܒܸܬ ܙܵܕܥܝܼ، ܘܥܲܠܘܼܗ‌ܝ ܒܸܬ ܓܵܚܟܝܼ، ܒܹܐܡܵܪܵܐ:

⁷ ”ܗܵܐ، ܓܲܒ݂ܪܵܐ ܕܠܹܐ ܥܵܒܹܕ ܠܹܗ ܐܲܠܵܗܵܐ ܩܲܠܥܹܗ، ܐܸܠܵܐ ܡܘܼܬܸܒ݂ ܠܹܗ ܣܲܒ݂ܪܹܗ ܒܦܸܪܝܘܼܬܵ‌ܐ ܕܥܘܼܬܪܹܗ، ܘܚܘܼܠܸܢܹܗ ܒܫܲܗܘܲܬܬܹܗ ܡܲܚܪܸܒ݂ܵܢܬܵ‌ܐ.“

⁸ ܐܝܼܢܵܐ ܐܵܢܵܐ، ܐܲܝܟ݂ ܙܲܝܬܵ‌ܐ ܩܝܼܢܵܐ ܝܘܸܢ ܓܵܘ ܒܲܝܬܵ‌ܐ ܕܐܲܠܵܗܵܐ، ܡܘܼܬܸܒ݂ ܠܝܼ ܣܲܒ݂ܪܝܼ ܒܛܲܝܒܘܼܬܵ‌ܐ ܕܐܲܠܵܗܵܐ ܠܥܵܠܲܡ ܥܵܠܡܝܼܢ.

⁹ ܒܸܬ ܫܲܟܪܸܢܘܼܟ݂ ܠܥܵܠܲܡ ܣܵܒܵܒ ܥܒ݂ܝܼܕ ܠܘܼܟ݂ ܐܵܗܵܐ، ܘܒܸܬ ܡܲܬܒܸܢ ܣܲܒ݂ܪܝܼ ܒܫܸܡܘܼܟ݂ ܣܵܒܵܒ ܛܵܒ݂ܵܐ ܝܠܹܗ ܩܲܕܡ ܗܲܡܸܢܵܢܘܼ̈ܟ݂.