ܡܙܡܘܪܐ 50 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܐܹܝܠ، ܐܲܠܵܗܵܐ، ܡܵܪܝܵܐ، ܗܘܼܡܙܸܡ ܠܹܗ، ܘܩܪܹܐ ܠܹܗ ܠܐܲܪܥܵܐ ܡ̣ܢ ܙܪܵܩܵܐ ܕܫܸܡܫܵܐ ܗܲܠ ܓܢܵܝܬܹܗ.

² ܡ̣ܢ ܨܸܗܝܘܿܢ، ܓܡܝܼܪܘܼܬܵ‌ܐ ܕܫܘܼܦܪܵܐ، ܐܲܠܵܗܵܐ ܙܪܝܼܩ ܠܹܗ.

³ ܒܸܬ ܐܵܬܹ‌ܐ ܐܲܠܵܗܲܢ ܘܠܹܐ ܫܵܬܹܩ، ܩܲܕܡܘܼܗ‌ܝ ܢܘܼܪܵܐ ܒܸܬ ܐܵܟܹܠ، ܚܵܕܸܪ̈ܘܵܢܘܼܗ‌ܝ ܥܲܠܥܵܠܵܐ ܪܵܒܵܐ.

⁴ ܒܸܬ ܩܵܪܹܐ ܠܫܡܲܝܵܐ ܡ̣ܢ ܥܸܠܸܠ، ܘܠܐܲܪܥܵܐ ܠܸܕܝܵܢܵܐ ܠܥܲܡܹܗ.

⁵ ”ܓ̰ܲܡܸܥܡܘܼܢ ܠܟܸܣܠܝܼ ܡܗܘܼܡܢܝܼ̈، ܩܵܛܥܵܢܹ̈ܐ ܕܘܲܥܕܝܼ ܒܕܸܒ݂ܚܵܐ.“

⁶ ܘܟܹܐ ܡܲܕܥܵܐ ܫܡܲܝܵܐ ܙܲܕܝܼܩܘܼܬܹܗ، ܣܵܒܵܒ ܐܲܠܵܗܵܐ ܝܠܹܗ ܕܲܝܵܢܵܐ ܗ̇ܘ.ܣܹܠܵܗ

⁷ ”ܫܡܹܥ، ܝܵܐ ܥܲܡܝܼ، ܘܒܸܬ ܗܲܡܙܸܡܸܢ، ܝܵܐ ܐܝܼܣܪܵܐܹܝܠ، ܘܒܸܬ ܣܵܗܕܹܢ ܕܲܠܩܘܼܒ݂ܠܘܼܟ݂، ܐܲܠܵܗܵܐ، ܐܲܠܵܗܘܼܟ݂ ܐܵܢܵܐ ܝܘܸܢ.

⁸ ”ܒܘܼܬ ܕܸܒ݂ܚܘܼ̈ܟ݂ ܠܹܐ ܡܲܢܟܸܣܸܢܘܼܟ݂، ܝܲܢ ܒܘܼܬ ܕܸܒ݂ܚܘܼ̈ܟ݂ ܡܘܼܩܕܹ̈ܐ ܕܝܼܢܵܐ ܠܒܲܠܩܘܼܒ݂ܠܝܼ ܐܲܡܝܼܢܵܐܝܼܬ.

⁹ ”ܠܹܐ ܫܵܩܠܹܢ ܡ̣ܢ ܒܲܝܬܘܼܟ݂ ܬܵܘܪܵܐ، ܠܵܐ ܡ̣ܢ ܓܘܼܡܵܢܘܼ̈ܟ݂ ܢܹܐܪ̈ܝܼܹܐ.

¹⁰ ”ܣܵܒܵܒ ܕܝܼܝܼ ܝܢܵܐ ܟܠܵܝܗ‌ܝ ܚܲܝܘܵܬܹ̈‌ܐ ܕܥܵܒ݂ܵܐ، ܘܒܥܝܼܪܹ̈ܐ ܕܒܐܲܠܦܵܐ ܛܘܼܪ̈ܵܢܹܐ.

¹¹ ”ܟܹܐ ܝܵܕܥܹܢ ܠܟܠܵܗ̇ ܦܵܪܲܚܬܵ‌ܐ ܕܛܘܼܪ̈ܵܢܹܐ، ܘܓ̰ܵܘܓ̰ܵܢܹ̈ܐ ܕܕܸܫܬܵ‌ܐ ܥܲܡܝܼ ܝܢܵܐ.

¹² ”ܐܸܢ ܟܵܦܢܹܢ ܗܘܵܐ ܠܹܐ ܐܵܡܪܹܢ ܗܘܵܐ ܐܸܠܘܼܟ݂، ܣܵܒܵܒ ܕܝܼܝܼ ܝܠܵܗ̇ ܒܪܝܼܬܵ‌ܐ ܘܡܸܠܝܘܼܬܘܼܗ̇.

¹³ ”ܗܵܐ، ܒܸܬ ܐܵܟ݂ܠܹܢ ܒܸܣܪܵܐ ܕܡܘܼܓ̰ܹ̈ܐ، ܘܫܵܬܹܝܢ ܕܸܡܵܐ ܕܢܹܐܪ̈ܝܼܹܐ؟

¹⁴ ”ܕܒ݂ܘܿܚ ܠܐܲܠܵܗܵܐ ܫܲܟܲܪܬܵ‌ܐ، ܘܬܲܡܸܡ ܠܥܸܠܵܝܵܐ ܢܸܕܪ̈ܘܼܟ݂.

¹⁵ ”ܘܩܪܝܼ ܐܸܠܝܼ ܒܝܵܘܡܵܐ ܕܐܘܼܠܨܵܢܵܐ، ܒܸܬ ܦܲܨܸܢܘܼܟ݂ ܘܒܸܬ ܡܝܲܩܪܸܬ ܠܝܼ.“

¹⁶ ܐܝܼܢܵܐ ܠܪܲܫܝܼܥܵܐ ܒܹܐܡܵܪܵܐ ܝܠܹܗ ܐܲܠܵܗܵܐ: ”ܡܵܐ ܠܘܼܟ݂ ܠܗܲܩܘܼܝܹܐ ܩܵܢܘܿܢܝܼ̈، ܘܠܸܫܩܵܠܵܐ ܘܲܥܕܝܼ ܒܦܘܼܡܘܼܟ݂؟

¹⁷ ”ܣܵܒܵܒ ܐܲܢ݇ܬ ܣܢܹܐ ܠܘܼܟ݂ ܬܲܥܠܲܡܬܵ‌ܐ، ܘܪܘܼܦܹܐ ܠܘܼܟ݂ ܗܹܡܸܙܡܵܢܝܼ̈ ܒܵܬܪܘܼܟ݂.

¹⁸ ”ܐܸܢ ܚܙܹܐ ܠܘܼܟ݂ ܓܹܢܵܒ݂ܵܐ، ܟܹܐ ܒܵܣܡܵܐ ܠܘܼܟ݂ ܒܝܼܹܗ، ܘܥܲܡ ܓܲܝܵܪܹ̈ܐ ܝܠܹܗ ܣܵܗܡܘܼܟ݂.

¹⁹ ”ܦܘܼܡܘܼܟ݂ ܝܘܼܗܒܹܠ ܠܘܼܟ݂ ܠܒܝܼܫܬܵ‌ܐ، ܘܠܸܫܵܢܘܼܟ݂ ܟܹܐ ܡܲܠܚܸܡ ܦܸܠܡܵܐ.

²⁰ ”ܟܹܐ ܝܵܬܒܹܬ ܗܲܡܙܸܡܸܬ ܕܲܠܩܘܼܒ݂ܠ ܕܐܲܚܘܿܢܘܼܟ݂، ܥܲܠ ܒܪܘܿܢܵܐ ܕܝܸܡܘܼܟ݂ ܟܹܐ ܕܵܪܹܝܬ ܒܘܼܚܬܵܢ.

²¹ ”ܐܲܢܹܐ ܥܒ݂ܝܼܕ ܠܘܼܟ݂ ܘܐܵܢܵܐ ܫܬܝܼܩ ܠܝܼ؛ ܚܫܝܼܒ݂ ܠܘܼܟ݂ ܗܘܵܝܵܐ ܒܸܬ ܗܵܘܹܝܢ ܐܲܝܟ݂ ܕܝܼܘܼܟ݂، ܐܝܼܢܵܐ ܒܸܬ ܡܲܢܟܸܣܸܢܘܼܟ݂ ܘܒܸܬ ܚܵܪܙܹܢ ܥܒ݂ܵܕܘܼ̈ܟ݂ ܩܲܕܡ ܥܲܝ̈ܢܘܼܟ݂.

²² ”ܦܲܪܡܹܝܡܘܼܢ ܐܵܗܵܐ، ܝܵܐ ܢܵܫܝܵܢܹ̈ܐ ܕܐܲܠܵܗܵܐ، ܕܠܵܐ ܗܵܘܝܵܐ ܕܦܲܪܦܸܛܸܢ ܘܠܵܐ ܗܵܘܹܐ ܦܲܨܝܵܢܵܐ.

²³ ”ܟܠ ܕܕܵܒܹܚ ܫܲܟܲܪܬܵ‌ܐ ܟܹܐ ܡܝܲܩܸܪܝܼ، ܘܠܡܲܪܝܸܙܸܢܵܐ ܕܐܘܼܪܚܹܗ ܒܸܬ ܡܲܚܙܹܝܢ ܦܘܼܪܩܵܢܵܐ ܕܐܲܠܵܗܵܐ.“