ܡܙܡܘܪܐ 49 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܡܙܡܘܪܐ ܕܒܢܝ̈ ܩܘܪܚ.

¹ ܫܡܹܥܡܘܼܢ ܐܵܗܵܐ ܟܠܵܝܗ‌ܝ ܥܲܡܡܹ̈ܐ، ܗܲܒ݂ܠܘܼܢ ܢܵܬܵ‌ܐ ܟܠܵܝܗ‌ܝ ܥܵܡܪ̈ܵܢܹܐ ܕܒܪܝܼܬܵ‌ܐ،

² ܐܘܼܦ ܒܢܲܝ̈ ܐܵܕܵܡ ܐܘܼܦ ܒܢܲܝ̈ܢܵܫܵܐ، ܥܲܡ ܚܕܵܕܹ̈ܐ ܥܲܬܝܼܪܵܐ ܘܣܢܝܼܩܵܐ.

³ ܦܘܼܡܝܼ ܒܸܬ ܗܲܡܙܸܡ ܚܸܟ݂ܡܬܵ‌ܐ، ܘܗܲܓܲܝܬܵ‌ܐ ܕܠܸܒܝܼ ܦܲܪܡܲܝܬܵ‌ܐ.

⁴ ܒܸܬ ܨܲܠܹܝܢ ܠܡܲܬܠܵܐ ܢܵܬ‌ܝܼ، ܘܦܵܬܚܹܢ ܒܟܸܢܵܪܵܐ ܩܸܨܸܡܬ‌ܝܼ.

⁵ ܩܵܡܘܿܕܝܼ ܙܵܕܥܹܢ ܒܝܵܘܡܵܢܹ̈ܐ ܕܒܝܼܫܬܵ‌ܐ، ܟܲܕ ܥܵܘܠܵܐ ܕܕܵܒ݂ܩܵܢܹ̈ܐ ܕܥܸܩܒܝܼ̈ ܚܲܪܕܝܼ ܠܝܼ؟

⁶ ܐܵܢܝܼ ܟܹܐ ܣܵܒܪܝܼ ܒܕܵܘܸܠܬܵܝܗ‌ܝ، ܘܒܦܸܪܝܘܼܬܵ‌ܐ ܕܥܘܼܬܪܵܝܗ‌ܝ ܟܹܐ ܫܲܒ݂ܗܸܪܝܼ.

⁷ ܠܐܲܚܘܿܢܵܐ ܦܲܪܘܼܩܹܐ ܠܹܐ ܡܵܨܹܐ ܦܲܪܸܩ ܐܢܵܫܵܐ، ܠܹܐ ܡܵܨܹܐ ܝܵܗܒܹܠ ܠܐܲܠܵܗܵܐ ܛܝܼܡܵܐ ܕܦܘܼܪܩܵܢܹܗ،

⁸ (ܣܵܒܵܒ ܛܝܼܡܵܢܵܐ ܝܠܹܗ ܦܘܼܪܩܵܢܵܐ ܕܓܵܢܵܐ، ܒܵܣ ܫܒ݂ܘܿܩ ܫܵܠܹܐ ܠܥܵܠܲܡ)

⁹ ܘܗܸܫ ܚܵܝܹܐ ܠܥܵܠܲܡ، ܘܠܵܐ ܚܵܙܹܐ ܚܪܵܒ݂ܵܐ.

¹⁰ ܣܵܒܵܒ ܟܹܐ ܚܵܙܹܐ ܠܚܲܟܝܼܡܹ̈ܐ ܕܟܹܐ ܡܵܝܬ‌ܝܼ، ܥܲܡ ܚܕܵܕܹ̈ܐ ܣܲܟ݂ܠܵܐ ܘܐܲܗܡܲܩ ܟܹܐ ܛܵܠܩܝܼ، ܘܟܹܐ ܫܵܒ݂ܩܝܼ ܠܐܚܹܪ̈ܢܹܐ ܕܵܘܸܠܬܵܝܗ‌ܝ.

¹¹ ܟܹܐ ܚܵܫܒ݂ܝܼ ܒܵܬܵܝ̈ܗ‌ܝ ܠܥܵܠܲܡ ܝܼܢܵܐ، ܒܹܝܬ ܡܲܥܡܪܵܝܗ‌ܝ ܠܕܵܪܵܐ ܘܕܵܪܵܐ، ܘܩܪܹܐ ܠܗܘܿܢ ܐܲܪ̈ܥܵܬܹ‌ܐ ܒܫܸܡܵܢܵܝ̈ܗ‌ܝ.

¹² ܐܝܼܢܵܐ ܒܲܪܢܵܫܵܐ ܒܐܝܼܩܵܪܵܐ ܠܹܐ ܥܲܪܩܸܠ، ܟܹܐ ܕܵܡܹܐ ܠܗܲܝܘܵܢܹ̈ܐ ܕܛܵܠܩܝܼ،

¹³ ܐܵܗܵܐ ܝܠܵܗ̇ ܐܘܼܪܚܵܝܗ‌ܝ، ܣܲܟ݂ܠܘܼܬܵ‌ܐ ܐܸܠܵܝܗ‌ܝ، ܘܐܵܙܵܠ݇ܢܹ̈ܐ ܕܒܵܬܪܵܝܗ‌ܝ ܕܒܵܣܡܵܐ ܠܗܘܿܢ ܒܚܲܒܪ̈ܵܝܗ‌ܝ.ܣܹܠܵܗ

¹⁴ ܐܲܝܟ݂ ܥܸܪ̈ܒܹܐ ܠܫܝܘܿܠ ܪܫܝܼܡܹܐ ܝܢܵܐ، ܡܵܘܬܵ‌ܐ ܒܸܬ ܗܵܘܹܐ ܪܵܥܝܵܝܗ‌ܝ، ܘܬܪ̈ܘܼܨܹܐ ܒܸܬ ܗܲܟܡܝܼ ܥܲܠܵܝܗ‌ܝ ܒܨܲܦܪܵܐ، ܘܨܘܼܪܬܵܝܗ‌ܝ ܒܸܬ ܒܵܠܝܵܐ ܒܫܝܘܿܠ ܪܸܚܩܵܐ ܡ̣ܢ ܒܵܬܵܝ̈ܗ‌ܝ ܫܲܦܝܼܪܹ̈ܐ.

¹⁵ ܐܝܼܢܵܐ ܐܲܠܵܗܵܐ ܒܸܬ ܦܲܪܸܩ ܠܓܵܢܝܼ ܡ̣ܢ ܐܝܼܕܵܐ ܕܫܝܘܿܠ، ܣܵܒܵܒ ܒܸܬ ܩܲܒܸܠ ܠܝܼ.ܣܹܠܵܗ

¹⁶ ܠܵܐ ܙܵܕܥܹܬ ܟܲܕ ܗܵܘܹܐ ܥܲܬܝܼܪܵܐ ܐܢܵܫܵܐ، ܟܲܕ ܙܵܐܹܕ ܐܝܼܩܵܪܵܐ ܕܒܲܝܬܹܗ.

¹⁷ ܣܵܒܵܒ ܒܡܵܘܬܹܗ ܠܹܐ ܠܲܒܸܠ ܡܸܢܕܝܼ، ܠܹܐ ܨܵܠܹܐ ܒܵܬܪܹܗ ܐܝܼܩܵܪܹܗ.

¹⁸ ܐܵܦܸܢ ܒܚܲܝܘܼ̈ܗ‌ܝ ܠܓܵܢܹܗ ܟܹܐ ܒܲܪܸܟ݂ ܗܘܵܐ، (ܒܗ̇ܝ ܕܒܸܬ ܚܲܩܪܝܼ ܠܘܼܟ݂ ܟܲܕ ܥܵܒ݂ܕܹܬ ܛܵܒ݂ܬܵ‌ܐ ܠܓܵܢܘܼܟ݂)،

¹⁹ ܒܸܬ ܐܵܙܹܠ ܠܟܸܣ ܐܲܒ݂ܵܗܵܬܘܼ̈ܗ‌ܝ، ܗܲܠ ܥܵܠܲܡ ܠܹܐ ܚܵܙܝܼ ܒܲܗܪܵܐ.

²⁰ ܒܲܪܢܵܫܵܐ ܕܐܝܼܬ ܠܹܗ ܐܝܼܩܵܪܵܐ ܐܝܼܢܵܐ ܠܵܐ ܦܲܪܡܹܐ، ܟܹܐ ܕܵܡܹܐ ܠܗܲܝܘܵܢܹ̈ܐ ܕܛܵܠܩܝܼ.