ܡܙܡܘܪܐ 41 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܡܙܡܘܪܐ ܕܕܘܝܕ.

¹ ܛܘܼܒ݂ܵܐ ܠܡ̇ܢ ܕܬܲܚܡܸܢ ܒܘܼܬ ܡܸܣܟܹܢܵܐ، ܒܝܵܘܡܵܐ ܕܒܝܼܫܬܵ‌ܐ ܒܸܬ ܦܲܨܹܐ ܠܹܗ ܡܵܪܝܵܐ.

² ܡܵܪܝܵܐ ܒܸܬ ܢܵܛܹܪܹܗ ܘܚܲܡܹܐ ܠܹܗ ܚܵܝܵܐ، ܒܸܬ ܗܵܘܹܐ ܛܘܼܒ݂ܵܢܵܐ ܒܐܲܪܥܵܐ، ܘܠܹܐ ܣܲܦܹܝܬ ܠܹܗ ܒܨܸܒ݂ܝܵܢܵܐ ܕܕܸܫ̃ܡܸܢܘܼ̈ܗ‌ܝ.

³ ܡܵܪܝܵܐ ܒܸܬ ܣܵܢܹܕ ܠܹܗ ܥܲܠ ܫܘܝܼܬܵ‌ܐ ܕܟܹܐܒ݂ܘܼ̈ܗ‌ܝ، ܠܚܘܼܠܡܵܢܵܐ ܡܘܼܕܸܪܘܼܟ݂ ܟܠܹܗ ܡܲܪܥܹܗ.

⁴ ܐܵܢܵܐ ܐܡܝܼܪܝܼ: ”ܝܵܐ ܡܵܪܝܵܐ، ܪܲܚܸܡ ܥܲܠܝܼ، ܒܲܣܸܡ ܠܓܵܢܝܼ ܒܗ̇ܝ ܕܚܛܹܐ ܠܝܼ ܐܸܠܘܼܟ݂.“

⁵ ܕܸܫ̃ܡܸܢܝܼ̈ ܟܹܐ ܐܵܡܪܝܼ ܒܝܼܫܬܵ‌ܐ ܥܲܠܝܼ: ”ܐܝܼܡܲܢ ܒܸܬ ܡܵܐܹܬ ܘܛܵܠܹܩ ܫܸܡܹܗ؟“

⁶ ܘܐܸܢ ܐܵܬܹ‌ܐ ܠܸܚܙܵܝܝܼ ܣܪܝܼܩܘܼܬܵ‌ܐ ܟܹܐ ܗܲܡܙܸܡ، ܟܹܐ ܓ̰ܲܡܸܥ ܥܵܘܠܵܐ ܠܸܒܹܗ، ܟܹܐ ܦܵܠܹܛ ܠܫܘܼܩܵܐ ܘܟܹܐ ܗܲܡܙܸܡ.

⁷ ܟܠܵܝܗ‌ܝ ܣܵܢܝܵܢܝܼ̈ ܡܸܚܕܵܕܹ̈ܐ ܟܹܐ ܦܲܛܦܸܛܝܼ ܠܕܲܠܩܘܼܒ݂ܠܝܼ، ܟܹܐ ܚܵܫܒ݂ܝܼ ܒܝܼܫܬܵ‌ܐ ܥܲܠܝܼ، ܒܹܐܡܵܪܵܐ:

⁸ ”ܡܸܢܕܝܼ ܣܸܪܝܵܐ ܫܦܝܼܟ݂ܵܐ ܝܠܹܗ ܥܲܠܘܼܗ‌ܝ، ܘܐܝܼܡܲܢ ܕܕܵܡܹܟ݂ ܠܹܐ ܩܵܐܹܡ ܡܸܢܕܪܸܫ.“

⁹ ܐܘܼܦ ܪܵܚܡܝܼ ܕܩܘܼܪܒܵܐ، ܗ̇ܘ ܕܗܘܼܡܸܢܝܼ ܒܝܼܹܗ، ܐܵܟ݂ܠܵܢܵܐ ܕܠܲܚܡܝܼ، ܡܘܼܪܸܡ ܠܹܗ ܥܲܠܝܼ ܥܸܩܒܹܗ.

¹⁰ ܐܝܼܢܵܐ ܐܲܢ݇ܬ، ܝܵܐ ܡܵܪܝܵܐ، ܪܲܚܸܡ ܥܲܠܝܼ، ܘܡܲܩܸܡ ܠܝܼ ܕܦܵܪܥܹܢܗܘܿܢ.

¹¹ ܒܐܵܗܵܐ ܝܕܝܼܥ ܠܝܼ ܕܟܹܐ ܒܵܣܡܵܐ ܠܘܼܟ݂ ܒܝܼܝܼ، ܒܗ̇ܝ ܕܠܹܐ ܡܲܩܘܸܚ ܕܸܫ̃ܡܸܢܝܼ ܒܙܵܟ݂ܘܼܬܵ‌ܐ ܥܲܠܝܼ.

¹² ܘܒܘܼܬ ܕܝܼܝܼ، ܩܵܡ ܣܵܢܕܹܬ ܠܝܼ ܒܬܲܡܝܼܡܘܼܬ‌ܝܼ، ܘܢܨܝܼܒ݂ ܠܘܼܟ݂ ܐܸܠܝܼ ܩܲܕܡ ܦܵܬܘܼܟ݂ ܠܥܵܠܲܡ.

¹³ ܒܪܝܼܟ݂ܵܐ ܝܠܹܗ ܡܵܪܝܵܐ ܐܲܠܵܗܵܐ ܕܐܝܼܣܪܵܐܹܝܠ، ܡ̣ܢ ܥܵܠܲܡ ܗܲܠ ܥܵܠܲܡ، ܐܵܡܹܝܢ ܘܐܵܡܹܝܢ.