ܡܙܡܘܪܐ 38 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܡܙܡܘܪܐ ܕܕܘܝܕ. ܠܕܘܟ݂ܪܢܐ.

¹ ܒܟܲܪܒܘܼܟ݂ ܠܵܐ ܡܲܢܟܸܣܸܬ ܠܝܼ، ܝܵܐ ܡܵܪܝܵܐ، ܘܒܚܸܡܬܘܼܟ݂ ܠܵܐ ܬܲܥܠܡܸܬ ܠܝܼ.

² ܒܗ̇ܝ ܕܓܹܐܪ̈ܘܼܟ݂ ܛܥܝܼܨ ܠܗܘܿܢ ܒܝܼܝܼ، ܘܥܲܠܝܼ ܨܠܹܐ ܠܵܗ̇ ܐܝܼܕܘܼܟ݂.

³ ܠܲܝܬ ܚܘܼܠܡܵܢܵܐ ܒܒܸܣܪܝܼ ܒܥܸܠܬܵ‌ܐ ܕܚܸܡܬܘܼܟ݂، ܠܲܝܬ ܫܲܠܡܘܼܬܵ‌ܐ ܒܓܲܪ̈ܡܝܼ ܒܥܸܠܬܵ‌ܐ ܕܚܛܝܼܬ‌ܝܼ.

⁴ ܣܵܒܵܒ ܐܣܝܼܩ ܠܗܘܿܢ ܥܵܘܠܝܼ̈ ܥܸܠܸܠ ܡ̣ܢ ܪܹܝܫܝܼ، ܐܲܝܟ݂ ܟܵܪܬܵ‌ܐ ܝܲܩܘܼܪܬܵ‌ܐ ܙܵܘܕܵܐ ܡ̣ܢ ܚܲܝܠܝܼ.

⁵ ܚܡܝܼܩ ܠܗܘܿܢ، ܓ̰ܪܹܐ ܠܗܘܿܢ ܕܲܪ̈ܒܵܬ‌ܝܼ، ܒܥܸܠܬܵ‌ܐ ܕܣܲܟ݂ܠܘܼܬ‌ܝܼ.

⁶ ܦܝܼܫ ܠܝܼ ܩܘܼܛܪܸܢܵܐ، ܟܝܼܦ ܠܝܼ ܗܲܠ ܦܪܵܩܬܵ‌ܐ، ܗܘܹܐ ܠܝܼ ܒܸܚܕܵܪܵܐ ܒܐܸܒ݂ܠܵܐ ܟܠܹܗ ܝܵܘܡܵܐ.

⁷ ܣܵܒܵܒ ܕܸܦܢܵܬ‌ܝܼ̈ ܡܸܠܝܹܐ ܝܢܵܐ ܩܝܘܼܕܵܐ، ܘܠܲܝܬ ܚܘܼܠܡܵܢܵܐ ܒܒܸܣܪܝܼ.

⁸ ܬܒ݂ܝܼܢܝܼ ܘܦܝܼܫ ܠܝܼ ܛܒ݂ܝܼܚܵܐ ܟ̰ܸܡ ܪܵܒܵܐ، ܒܘܼܪܒܸܪܝܼ ܡܣܵܒܵܒ ܫܓ݂ܝܼܫܘܼܬܵ‌ܐ ܕܠܸܒܝܼ.

⁹ ܡܵܪܝܵܐ، ܒܲܠܩܘܼܒ݂ܠܘܼܟ݂ ܝܼܠܵܗ̇ ܟܠܵܗ̇ ܛܠܵܒܬ‌ܝܼ، ܘܬܲܢܲܚܬ‌ܝܼ ܡܸܢܘܼܟ݂ ܠܹܐ ܝܠܵܗ̇ ܛܫܝܼܬܵ‌ܐ.

¹⁰ ܠܸܒܝܼ ܪܲܦܪܘܼܦܹܐ ܝܠܹܗ، ܫܒ݂ܝܼܩܸܢܹܗ ܚܲܝܠܝܼ، ܘܒܲܗܪܵܐ ܕܥܲܝܢܝܼ̈، ܐܘܼܦ ܗ̇ܘ ܠܲܝܬ ܥܲܡܝܼ.

¹¹ ܡܲܚܸܒܵܢܝܼ̈ ܘܪ̈ܵܚܡܝܼ ܟܹܐ ܟܵܠܝܼ ܪܚܝܼܩܹܐ ܡ̣ܢ ܡܚܘܿܬ‌ܝܼ، ܘܚܸܙܡܵܢܝܼ̈ ܪܸܚܩܵܐ ܟܸܠܝܹܐ ܝܢܵܐ.

¹² ܘܡܘܼܬܸܒ݂ ܠܗܘܿܢ ܢܸܫܒܹ̈ܐ ܛܵܥܝܵܢܹ̈ܐ ܠܓܵܢܝܼ، ܘܒܵܥܝܵܢܹ̈ܐ ܕܒܝܼܫܬ‌ܝܼ ܗܘܼܡܙܸܡ ܠܗܘܿܢ ܒܘܼܬ ܚܪܵܒ݂ܝܼ، ܘܟܹܐ ܗܲܓܝܼ ܦܸܠܡܹ̈ܐ ܟܠܹܗ ܝܵܘܡܵܐ.

¹³ ܐܝܼܢܵܐ ܐܵܢܵܐ ܐܲܝܟ݂ ܚܲܪܫܵܐ ܝܘܸܢ ܕܠܹܐ ܫܵܡܹܥ، ܘܐܲܝܟ݂ ܠܲܥܠܵܐ ܕܠܹܐ ܦܵܬܹܚ ܦܘܼܡܹܗ.

¹⁴ ܘܗܘܹܐ ܠܝܼ ܐܲܝܟ݂ ܐܢܵܫܵܐ ܕܠܹܐ ܫܵܡܹܥ، ܘܕܠܲܝܬ ܕܪܵܫܬܵ‌ܐ ܒܦܘܼܡܹܗ.

¹⁵ ܣܵܒܵܒ ܐܸܠܘܼܟ݂، ܝܵܐ ܡܵܪܝܵܐ، ܣܒܝܼܪܝܼ، ܐܲܢ݇ܬ ܒܸܬ ܓ̰ܲܘܸܒܸܬ، ܡܵܪܝܵܐ ܐܲܠܵܗ‌ܝܼ.

¹⁶ ܒܗ̇ܝ ܕܐܡܝܼܪܝܼ: ”ܠܵܐ ܗܵܘܹܐ ܕܚܵܕܝܼ ܥܲܠܝܼ، ܒܓ̰ܪܵܛܬܵ‌ܐ ܕܐܲܩܠܝܼ ܓܲܪܘܸܣܝܼ ܓܵܢܵܝܗ‌ܝ.“

¹⁷ ܣܵܒܵܒ ܐܵܢܵܐ ܩܘܼܪܒܵܐ ܝܘܸܢ ܠܸܢܦܵܠܵܐ، ܘܟܹܐܒ݂ܝܼ ܥܲܡܝܼ ܝܠܹܗ ܒܟܠ ܥܕܵܢܵܐ.

¹⁸ ܗܹܐ، ܒܸܬ ܡܵܘܕܸܢܹܗ ܥܵܘܠܝܼ، ܒܸܬ ܦܵܫܡܹܢ ܒܘܼܬ ܚܛܝܼܬ‌ܝܼ.

¹⁹ ܘܕܸܫ̃ܡܸܢܝܼ̈ ܚܵܝܹ̈ܐ ܝܢܵܐ ܪܵܒܵܐ ܘܓܘܼܪܹ̈ܐ ܒܡܸܢܝܵܢܵܐ، ܘܦܸܪ̈ܝܹܐ ܝܢܵܐ ܣܵܢܝܵܢܝܼ̈ ܒܠܵܐ ܥܸܠܬܵ‌ܐ.

²⁰ ܘܦܵܪ̈ܥܵܢܹܐ ܕܒܝܼܫܬܵ‌ܐ ܡ̣ܢ ܓܹܒܵܐ ܕܛܵܒ݂ܬܵ‌ܐ ܗܘܹܐ ܠܗܘܿܢ ܕܲܠܩܘܼܒ݂ܠܝܼ، ܒܗ̇ܝ ܕܢܦܝܼܠ ܠܝܼ ܒܵܬܪ ܛܵܒ݂ܬܵ‌ܐ.

²¹ ܠܵܐ ܫܵܒ݂ܩܹܬ ܠܝܼ، ܝܵܐ ܡܵܪܝܵܐ، ܝܵܐ ܐܲܠܵܗ‌ܝܼ، ܠܵܐ ܪܵܚܩܹܬ ܡܸܢܝܼ؛

²² ܡܲܠܝܸܙ ܠܗܲܝܲܪܬ‌ܝܼ، ܝܵܐ ܡܵܪܝܵܐ، ܦܘܼܪܩܵܢܝܼ.