ܡܙܡܘܪܐ 34 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܡܙܡܘܪܐ ܕܕܘܝܕ، ܐܝܡܢ ܕܫܘܚܠܦ ܠܗ ܠܦܪܨܘܦܝܘܬܗ ܩܕܡ ܐܒ݂ܝܡܠܟ، ܘܗ̇ܘ ܩܡ ܛܪܕ ܠܗ ܘܐܙܝܠ ܠܗ.

¹ ܒܸܬ ܒܲܪܟܸܢ ܠܡܵܪܝܵܐ ܒܟܠ ܥܕܵܢܵܐ، ܐܲܡܝܼܢܵܐܝܼܬ ܬܸܫܒܘܿܚܬܹܗ ܒܦܘܼܡܝܼ ܝܠܵܗ̇.

² ܒܡܵܪܝܵܐ ܒܸܬ ܥܵܒ݂ܕܵܐ ܫܘܼܒ݂ܗܵܪܵܐ ܓܵܢܝܼ، ܫܵܡܥܝܼ ܡܸܣܟܹܢܹ̈ܐ ܘܚܵܕܝܼ.

³ ܥܲܡܝܼ ܓܲܪܘܸܣܘܼܢ ܠܡܵܪܝܵܐ، ܘܡܲܪܡܲܚ ܫܸܡܹܗ ܥܲܡ ܚܕܵܕܹ̈ܐ.

⁴ ܛܥܹܐ ܠܝܼ ܠܡܵܪܝܵܐ ܘܩܵܡ ܓ̰ܲܘܸܒ ܠܝܼ، ܘܡ̣ܢ ܟܠܵܝܗ‌ܝ ܙܕܘܼܥܝܵܬ‌ܝܼ̈ ܩܵܡ ܦܲܨܹܐ ܠܝܼ.

⁵ ܚܝܼܪܗܘܿܢ ܐܸܠܹܗ ܘܒܘܼܗܪܸܢܗܘܿܢ، ܘܦܵܬܘܵܬܵܝ̈ܗ‌ܝ ܠܹܐ ܦܵܝܫܝܼ ܢܟ݂ܝܼܦܹܐ.

⁶ ܐܵܗܵܐ ܡܸܣܟܹܢܵܐ ܩܪܹܐ ܠܹܗ، ܘܡܵܪܝܵܐ ܫܡܝܼܥ ܠܹܗ، ܘܡ̣ܢ ܟܠܵܝܗ‌ܝ ܐܘܼܠܨܵܢܘܼ̈ܗ‌ܝ ܦܘܼܪܸܩ ܠܹܗ.

⁷ ܟܹܐ ܡܵܚܹܐ ܡܲܫܪܝܼܬܵ‌ܐ ܡܲܠܲܐܟ݂ܵܐ ܕܡܵܪܝܵܐ ܚܵܕܸܪ̈ܘܵܢܹܐ ܕܙܕܝܼܥܘܼ̈ܗ‌ܝ، ܘܟܹܐ ܦܲܨܹܐ ܠܗܘܿܢ.

⁸ ܛܥܘܿܡܘܼܢ ܘܚܙܹܝܡܘܼܢ ܕܛܵܒ݂ܵܐ ܝܠܹܗ ܡܵܪܝܵܐ، ܛܘܼܒ݂ܵܐ ܠܐܢܵܫܵܐ ܕܫܵܩܹܠ ܓܵܘܣܵܐ ܒܝܼܹܗ.

⁹ ܙܕܹܥܡܘܼܢ ܡ̣ܢ ܡܵܪܝܵܐ، ܝܵܐ ܩܲܕܝܼܫܘܼ̈ܗ‌ܝ، ܣܵܒܵܒ ܠܲܝܬ ܚܘܼܣܪܵܢܵܐ ܠܙܕܝܼܥܘܼ̈ܗ‌ܝ.

¹⁰ ܓܘܼܪ̈ܝܹܐ ܕܐܲܪܝܵܐ ܡܘܼܣܟܸܢܗܘܿܢ ܘܟܦܝܼܢܗܘܿܢ، ܐܝܼܢܵܐ ܐܵܢܝܼ ܕܛܵܥܝܼ ܠܡܵܪܝܵܐ ܠܹܐ ܚܵܣܪܝܼ ܟܠ ܛܵܒ݂ܬܵ‌ܐ.

¹¹ ܬܹܝܡܘܼܢ ܒܢܘܿܢܹ̈ܐ، ܫܡܹܥܡܘܼܢ ܐܸܠܝܼ، ܙܕܘܼܥܬܵ‌ܐ ܕܡܵܪܝܵܐ ܡܲܠܦܸܢܵܘܟ݂ܘܿܢ.

¹² ܡܵܢܝܼ ܝܠܹܗ ܐܢܵܫܵܐ ܕܒܵܣܡܝܼ ܠܹܗ ܚܲܝܹ̈ܐ، ܗ̇ܘ ܕܡܲܚܸܒ ܝܵܘܡܵܢܹ̈ܐ ܠܸܚܙܵܝܵܐ ܛܵܒ݂ܬܵ‌ܐ؟

¹³ ܢܛܘܿܪ ܠܸܫܵܢܘܼܟ݂ ܡ̣ܢ ܒܝܼܫܬܵ‌ܐ، ܘܣܸܦܘܵܬܘܼ̈ܟ݂ ܡ̣ܢ ܗܲܡܙܘܼܡܹܐ ܦܸܠܡܵܐ.

¹⁴ ܩܠܘܿܒ ܡ̣ܢ ܒܝܼܫܬܵ‌ܐ ܘܥܒ݂ܘܿܕ ܛܵܒ݂ܬܵ‌ܐ، ܛܥܝܼ ܫܠܵܡܵܐ ܘܢܦܘܿܠ ܒܵܬܪܹܗ.

¹⁵ ܥܲܝ̈ܢܹܐ ܕܡܵܪܝܵܐ ܠܙܲܕܝܼܩܹ̈ܐ ܝܢܵܐ، ܘܢܵܬܝܵܬܘܼ̈ܗ‌ܝ ܠܓܥܵܝܬܵܝܗ‌ܝ،

¹⁶ ܦܵܬܵ‌ܐ ܕܡܵܪܝܵܐ ܕܲܠܩܘܼܒ݂ܠ ܕܥܵܒ݂ܕܵܢܹ̈ܐ ܕܒܝܼܫܬܵ‌ܐ ܝܠܵܗ̇، ܠܸܩܛܵܥܵܐ ܡ̣ܢ ܐܲܪܥܵܐ ܕܟ݂ܵܪܵܝܗ‌ܝ.

¹⁷ ܡܘܼܩܘܸܚ ܠܗܘܿܢ ܘܡܵܪܝܵܐ ܫܡܝܼܥ ܠܹܗ، ܘܡ̣ܢ ܟܠܵܝܗ‌ܝ ܐܘܼܠܨܵܢܵܝ̈ܗ‌ܝ ܦܘܼܨܝܵܝ ܠܹܗ.

¹⁸ ܩܘܼܪܒܵܐ ܝܠܹܗ ܡܵܪܝܵܐ ܠܬܒ݂ܝܼܪܹ̈ܐ ܕܠܸܒܵܐ، ܘܠܡܲܟܝܼܟܹ̈ܐ ܒܪܘܼܚܵܐ ܟܹܐ ܦܲܪܸܩ.

¹⁹ ܪܵܒܵܐ ܝܢܵܐ ܥܵܘܩܵܢܹ̈ܐ ܕܙܲܕܝܼܩܵܐ، ܘܡ̣ܢ ܟܠܵܝܗ‌ܝ ܟܹܐ ܦܲܨܹܐ ܠܹܗ ܡܵܪܝܵܐ.

²⁰ ܟܹܐ ܢܵܛܹܪ ܠܟܠܵܝܗ‌ܝ ܓܲܪ̈ܡܘܼܗ‌ܝ، ܐܘܼܦ ܚܲܕ ܠܵܐ ܦܝܼܫ ܠܹܗ ܬܒ݂ܝܼܪܵܐ.

²¹ ܒܝܼܫܬܵ‌ܐ ܒܸܬ ܡܲܡܝܸܬܵ‌ܐ ܠܪܲܫܝܼܥܵܐ، ܘܣܵܢܝܵܢܹ̈ܐ ܕܙܲܕܝܼܩܵܐ ܒܸܬ ܗܵܘܝܼ ܚܲܝܵܒܹ̈ܐ.

²² ܟܹܐ ܦܲܪܸܩ ܡܵܪܝܵܐ ܓܵܢܵܐ ܕܪܹ̈ܓܵܘܵܬܘܼܗ‌ܝ، ܘܠܹܐ ܗܵܘܝܼ ܚܲܝܵܒܹ̈ܐ ܟܠܵܝܗ‌ܝ ܐܵܢܝܼ ܕܫܵܩܠܝܼ ܓܵܘܣܵܐ ܒܝܼܹܗ.