ܡܙܡܘܪܐ 32 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܡܙܡܘܪܐ ܕܕܘܝܕ. ܡܲܣܟܝܼܠ.

¹ ܛܘܼܒ݂ܵܐ ܠܗ̇ܘ ܕܦܝܼܫܬܵ‌ܐ ܝܠܵܗ̇ ܦܘܼܚܸܠܬܵ‌ܐ ܓܢܵܗܹܗ، ܘܡܘܼܟܸܣܬܵ‌ܐ ܝܠܵܗ̇ ܚܛܝܼܬܹܗ.

² ܛܘܼܒ݂ܵܐ ܠܐܢܵܫܵܐ ܕܠܵܐ ܚܲܫܒܸܢ ܡܵܪܝܵܐ ܐܸܠܹܗ ܥܵܘܠܵܐ، ܘܠܗ̇ܘ ܕܠܲܝܬ ܒܪܘܼܚܹܗ ܦܸܠܡܵܐ.

³ ܡ̣ܢ ܫܸܬܩܝܼ ܒܠܹܐ ܠܗܘܿܢ ܓܲܪ̈ܡܝܼ، ܒܬܲܢܲܚܬ‌ܝܼ ܟܠܹܗ ܝܵܘܡܵܐ.

⁴ ܣܵܒܵܒ ܒܐܝܼܡܵܡܵܐ ܘܒܠܲܝܠܹܐ ܝܘܼܩܪܸܢܵܗ̇ ܥܲܠܝܼ ܐܝܼܕܘܼܟ݂، ܚܕܝܼܪܵܗ̇ ܬܲܠܝܼܠܘܼܬ‌ܝܼ ܠܒܸܪ̈ܙܹܐ ܕܩܲܝܛܵܐ.ܣܹܠܵܗ

⁵ ܚܛܝܼܬ‌ܝܼ ܡܘܼܕܸܥ ܠܝܼ ܐܸܠܘܼܟ݂ ܘܥܵܘܠܝܼ ܠܵܐ ܟܘܼܣܹܐ ܠܝܼ، ܐܡܝܼܪܝܼ: ”ܒܸܬ ܡܵܘܕܸܢܗܘܿܢ ܓܢܵܗ‌ܝܼ̈ ܠܡܵܪܝܵܐ،“ ܘܐܲܢ݇ܬ ܫܒ݂ܝܼܩ ܠܘܼܟ݂ ܥܵܘܠܵܐ ܕܚܛܝܼܬ‌ܝܼ.ܣܹܠܵܗ

⁶ ܒܘܼܬ ܐܵܗܵܐ، ܒܸܬ ܨܲܠܹܐ ܟܠ ܛܵܒ݂ܵܐ ܐܸܠܘܼܟ݂ ܟܲܕ ܐܝܼܬ ܦܘܼܪܣܵܐ، ܒܫܪܵܪܵܐ، ܐܝܼܡܲܢ ܕܫܵܦܟ݂ܝܼ ܡ̈ܝܼܵܐ ܪܵܒܵܐ، ܠܹܐ ܡܵܛܝܼ ܐܸܠܹܗ.

⁷ ܐܲܢ݇ܬ ܣܸܬܵܪܵܐ ܝܘܸܬ ܩܵܬ‌ܝܼ، ܒܸܬ ܢܵܛܪܹܬ ܠܝܼ ܡ̣ܢ ܥܵܘܩܵܢܵܐ، ܒܩܲܘܲܚ̈ܝܵܬܹ‌ܐ ܕܦܘܼܪܩܵܢܵܐ ܒܸܬ ܟܵܪܟܹܬ ܠܝܼ.ܣܹܠܵܗ

⁸ ܒܸܬ ܡܲܦܪܸܡܸܢܘܼܟ݂ ܘܒܸܬ ܡܲܠܦܸܢܘܼܟ݂ ܒܐܘܼܪܚܵܐ ܕܐܵܙܹܠ݇ܬ، ܒܸܬ ܥܵܒ݂ܕܹܢ ܡܸܠܟܵܐ ܟܲܕ ܥܲܝܢܝܼ ܥܲܠܘܼܟ݂.

⁹ ܠܵܐ ܗܵܘܹܝܬܘܿܢ ܐܲܝܟ݂ ܣܘܼܣܵܐ ܝܲܢ ܐܲܝܟ݂ ܟܵܘܸܕܢܵܐ ܕܠܲܝܬ ܠܗܘܿܢ ܦܲܪܡܲܝܬܵ‌ܐ، ܐܲܝܢܝܼ ܕܐܵܬ‌ܝܼ ܠܙܲܒܛܘܼܢܹܐ ܒܦܓ݂ܘܼܕܵܐ ܘܠܲܥܡܵܐ، ܐܸܢ ܠܵܐ، ܠܹܐ ܩܲܪܒܸܢܝܼ ܐܸܠܘܼܟ݂.

¹⁰ ܪܵܒܵܐ ܝܢܵܐ ܕܲܪ̈ܕܹܐ ܕܪܲܫܝܼܥܵܐ، ܐܝܼܢܵܐ ܣܵܒܪܵܢܵܐ ܒܡܵܪܝܵܐ ܛܲܝܒܘܼܬܵ‌ܐ ܒܸܬ ܟܵܪܟ݂ܵܐ ܠܹܗ.

¹¹ ܚܕܹܝܡܘܼܢ ܒܡܵܪܝܵܐ ܘܦܨܘܿܚܘܼܢ، ܝܵܐ ܙܲܕܝܼܩܹ̈ܐ، ܘܩܲܘܸܚܘܼܢ ܟܠܵܝܗ‌ܝ ܬܪ̈ܘܼܨܹܐ ܕܠܸܒܵܐ.