ܡܙܡܘܪܐ 27 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܡܙܡܘܪܐ ܕܕܘܝܕ.

¹ ܡܵܪܝܵܐ ܒܲܗܪܝܼ ܝܠܹܗ ܘܦܘܼܪܩܵܢܝܼ، ܡ̣ܢ ܡܵܢܝܼ ܙܵܕܥܹܢ؟ ܡܵܪܝܵܐ ܩܲܠܥܵܐ ܕܚܲܝܝܼ̈ ܝܠܹܗ، ܡ̣ܢ ܡܵܢܝܼ ܫܵܥܫܹܢ؟

² ܟܲܕ ܩܘܼܪܒܸܢܗܘܿܢ ܥܲܠܝܼ ܒܝܼܫܹ̈ܐ ܕܐܵܟ݂ܠܝܼ ܒܸܣܪܝܼ، ܡܲܠܝܸܨܵܢܝܼ̈ ܘܕܸܫ̃ܡܸܢܝܼ̈، ܐܵܢܝܼ ܬܘܼܪܩܸܠ ܠܗܘܿܢ ܘܢܦܝܼܠ ܠܗܘܿܢ.

³ ܐܸܢ ܫܵܪܝܵܐ ܥܲܠܝܼ ܡܲܫܪܝܼܬܵ‌ܐ، ܠܹܐ ܙܵܕܹܥ ܠܸܒܝܼ؛ ܐܸܢ ܩܵܐܹܡ ܥܲܠܝܼ ܦܠܵܫܵܐ، ܗܸܫ ܐܵܢܵܐ ܒܣܲܒ݂ܪܵܐ ܝܘܸܢ.

⁴ ܚܕܵܐ ܛܠܵܒܬܵ‌ܐ ܥܒ݂ܝܼܕ ܠܝܼ ܡ̣ܢ ܡܵܪܝܵܐ، ܠܗ̇ܝ ܒܸܬ ܛܵܥܹܝܢ: ܕܝܵܬܒܹܢ ܒܒܲܝܬܵ‌ܐ ܕܡܵܪܝܵܐ ܟܠܵܝܗ‌ܝ ܝܵܘܡܵܢܹ̈ܐ ܕܚܲܝܝܼ̈؛ ܠܸܚܙܵܝܵܐ ܒܲܣܝܼܡܘܼܬܵ‌ܐ ܕܡܵܪܝܵܐ، ܘܠܦܲܪܦܘܼܠܹܐ ܒܗܲܝܟܠܹܗ.

⁵ ܣܵܒܵܒ ܒܸܬ ܛܲܫܹܐ ܠܝܼ ܒܡܛܲܠܠܹܗ ܒܝܵܘܡܵܐ ܕܒܝܼܫܬܵ‌ܐ، ܒܸܬ ܟܲܣܹܐ ܠܝܼ ܒܣܸܬܵܪܵܐ ܕܡܲܫܟܢܹܗ، ܥܲܠ ܐܝܼܨܵܪܵܐ ܒܸܬ ܡܲܪܸܡ ܠܝܼ.

⁶ ܘܐܵܕܝܼܵܐ ܒܸܬ ܦܵܐܹܫ ܡܘܼܪܡܵܐ ܪܹܝܫܝܼ ܥܸܠܸܠ ܡ̣ܢ ܕܸܫ̃ܡܸܢܝܼ̈ ܕܠܚܵܕܸܪ̈ܘܵܢܝܼ، ܘܒܸܬ ܕܵܒ݂ܚܹܢ ܒܡܲܫܟܢܹܗ ܕܸܒ݂ܚܹ̈ܐ ܟܲܕ ܫܲܒܘܼܚܹܐ، ܒܸܬ ܫܲܒܚܸܢ ܘܒܸܬ ܙܵܡܪܹܢ ܠܡܵܪܝܵܐ.

⁷ ܫܡܹܥ ܡܵܪܝܵܐ ܩܵܠܝܼ ܐܝܼܡܲܢ ܕܩܵܪܹܝܢ، ܘܪܲܚܸܡ ܥܲܠܝܼ ܘܓ̰ܲܘܸܒ ܠܝܼ.

⁸ ܐܝܼܡܲܢ ܕܐܡܝܼܪܘܼܟ݂: ”ܛܥܹܝܡܘܼܢ ܐܸܠܝܼ،“ ܐܡܝܼܪܹܗ ܐܸܠܘܼܟ݂ ܠܸܒܝܼ: ”ܐܸܠܘܼܟ݂، ܝܵܐ ܡܵܪܝܵܐ، ܒܸܬ ܛܵܥܹܝܢ.“

⁹ ܠܵܐ ܛܲܫܹܝܬ ܦܵܬܘܼܟ݂ ܡܸܢܝܼ، ܠܵܐ ܡܲܕܸܪܸܬ ܠܹܗ ܪܹܓܘܼܟ݂ ܒܟܲܪܒܵܐ، ܗܲܝܲܪܬ‌ܝܼ ܗܘܹܐ ܠܘܼܟ݂، ܠܵܐ ܪܲܦܹܝܬ ܠܝܼ ܘܠܵܐ ܫܵܒ݂ܩܹܬ ܠܝܼ، ܝܵܐ ܐܲܠܵܗܵܐ ܕܦܘܼܪܩܵܢܝܼ؛

¹⁰ ܣܵܒܵܒ ܒܵܒܝܼ ܘܝܸܡܝܼ ܫܒ݂ܝܼܩܸܢܗܘܿܢ، ܐܝܼܢܵܐ ܡܵܪܝܵܐ ܒܸܬ ܓ̰ܲܡܸܥ ܠܝܼ.

¹¹ ܡܲܠܸܦ ܠܝܼ، ܝܵܐ ܡܵܪܝܵܐ، ܐܘܼܪܚܘܼܟ݂، ܘܡܗܲܕܝܼ ܠܝܼ ܒܫܒ݂ܝܼܠܵܐ ܬܪܘܼܨܵܐ، ܡ̣ܢ ܥܸܠܬܵ‌ܐ ܕܕܸܫ̃ܡܸܢܝܼ̈.

¹² ܠܵܐ ܣܲܦܹܝܬ ܠܝܼ ܒܨܸܒ݂ܝܵܢܵܐ ܕܕܲܠܩܘܼܒ݂ܠܵܝܝܼ̈، ܣܵܒܵܒ ܩܝܼܡ ܠܗܘܿܢ ܥܲܠܝܼ ܣܵܗܕܹ̈ܐ ܕܲܓܵܠܹ̈ܐ ܘܢܵܦܚܵܢܹ̈ܐ ܕܚܸܡܬܵ‌ܐ.

¹³ ܐܵܢܵܐ ܗܘܼܡܸܢܝܼ ܠܸܚܙܵܝܵܐ ܠܛܵܒ݂ܬܵ‌ܐ ܕܡܵܪܝܵܐ ܒܐܲܪܥܵܐ ܕܚܵܝܹ̈ܐ.

¹⁴ ܣܦܘܿܪ ܠܡܵܪܝܵܐ، ܚܲܠܸܢ ܘܙܲܪܒܸܢ ܠܸܒܘܼܟ݂، ܘܣܦܘܿܪ ܠܡܵܪܝܵܐ.