ܡܙܡܘܪܐ 25 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܡܙܡܘܪܐ ܕܕܘܝܕ.

¹ ܐܸܠܘܼܟ݂، ܝܵܐ ܡܵܪܝܵܐ، ܡܲܪܘܼܡܘܼܗ̇ ܝܘܸܢ ܓܵܢܝܼ.

² ܐܲܠܵܗ‌ܝܼ ܒܝܼܘܼܟ݂ ܣܒܝܼܪܝܼ، ܠܵܐ ܫܵܒ݂ܩܹܬ ܢܵܟ݂ܦܹܢ، ܠܵܐ ܫܵܒ݂ܩܹܬ ܦܵܨܚܝܼ ܕܸܫ̃ܡܸܢܝܼ̈ ܥܲܠܝܼ.

³ ܐܘܼܦ ܟܠܵܝܗ‌ܝ ܣܵܦܪ̈ܵܢܹܐ ܐܸܠܘܼܟ݂ ܠܹܐ ܢܵܟ݂ܦܝܼ، ܒܸܬ ܢܵܟ݂ܦܝܼ ܐܵܢܝܼ ܕܚܵܝܝܼܢܹ̈ܐ ܝܢܵܐ ܒܠܵܐ ܥܸܠܬܵ‌ܐ.

⁴ ܐܘܼܪ̈ܚܵܬܘܼܟ݂، ܝܵܐ ܡܵܪܝܵܐ، ܡܲܕܸܥ ܠܗܘܿܢ ܐܸܠܝܼ، ܫܒ݂ܝܼܠܘܼ̈ܟ݂ ܡܲܠܸܦ ܠܗܘܿܢ ܐܸܠܝܼ.

⁵ ܡܲܚܕܸܪܝܼ ܒܫܲܪܝܼܪܘܼܬܘܼܟ݂ ܘܡܲܠܸܦ ܠܝܼ، ܣܵܒܵܒ ܐܲܢ݇ܬ ܝܼܘܸܬ ܐܲܠܵܗܵܐ ܕܦܘܼܪܩܵܢܝܼ، ܐܸܠܘܼܟ݂ ܣܦܝܼܪܝܼ ܟܠܹܗ ܝܵܘܡܵܐ.

⁶ ܕܟ݂ܘܿܪ ܪ̈ܲܚܡܘܼܟ݂ ܡܵܪܝܵܐ ܘܛܲܝܒܘܼܬܘܼܟ݂، ܣܵܒܵܒ ܡ̣ܢ ܥܵܠܲܡ ܝܼܢܵܐ.

⁷ ܚܛܵܗܹ̈ܐ ܕܥܠܲܝܡܘܼܬ‌ܝܼ ܘܓܢܵܗ‌ܝܼ̈ ܠܵܐ ܕܵܟ݂ܪܹܬ، ܐܲܝܟ݂ ܛܲܝܒܘܼܬܘܼܟ݂ ܕܟ݂ܘܿܪ ܐܸܠܝܼ ܐܲܢ݇ܬ، ܒܘܼܬ ܚܵܬܸܪ ܕܛܵܒ݂ܘܼܬܘܼܟ݂، ܝܵܐ ܡܵܪܝܵܐ.

⁸ ܛܵܒ݂ܵܐ ܘܬܪܘܼܨܵܐ ܝܠܹܗ ܡܵܪܝܵܐ، ܒܘܼܬ ܐܵܗܵܐ ܟܹܐ ܬܲܠܡܸܕ ܚܲܛܵܝܹ̈ܐ ܒܐܘܼܪܚܵܐ.

⁹ ܟܹܐ ܡܗܲܕܹܐ ܠܡܲܟܝܼܟܹ̈ܐ ܒܕܝܼܘܵܢ، ܘܡܲܠܸܦ ܠܡܲܟܝܼܟܹ̈ܐ ܐܘܼܪܚܹܗ.

¹⁰ ܛܲܝܒܘܼܬܵ‌ܐ ܘܫܲܪܝܼܪܘܼܬܵ‌ܐ ܝܢܵܐ ܟܠܵܝܗ‌ܝ ܐܘܼܪ̈ܚܵܬܹ‌ܐ ܕܡܵܪܝܵܐ، ܠܢܵܛܪ̈ܵܢܹܐ ܕܘܲܥܕܹܗ ܘܣܵܗܕܘܵܬܘܼ̈ܗ‌ܝ.

¹¹ ܒܘܼܬ ܫܸܡܘܼܟ݂، ܝܵܐ ܡܵܪܝܵܐ، ܫܒ݂ܘܿܩ ܠܥܵܘܠܝܼ ܒܗ̇ܝ ܕܝܼܠܹܗ ܓܘܼܪܵܐ.

¹² ܡܵܢܝܼ ܝܠܹܗ ܙܕܝܼܥܵܐ ܕܡܵܪܝܵܐ؟ ܒܸܬ ܡܲܠܸܦ ܠܹܗ ܐܘܼܪܚܵܐ ܕܓܲܒܹܐ.

¹³ ܓܵܢܹܗ ܒܛܵܒ݂ܬܵ‌ܐ ܒܸܬ ܫܵܪܝܵܐ، ܘܙܲܪܥܹܗ ܒܸܬ ܝܵܪܹܬ ܐܲܪܥܵܐ.

¹⁴ ܫܵܘܬܵܦܘܼܬܵ‌ܐ ܕܡܵܪܝܵܐ ܥܲܡ ܙܕܝܼܥܘܼ̈ܗ‌ܝ ܝܠܵܗ̇، ܘܘܲܥܕܹܗ ܒܸܬ ܡܲܕܸܥ ܐܸܠܵܝܗ‌ܝ.

¹⁵ ܥܲܝܢܝܼ̈ ܐܲܡܝܼܢܵܐܝܼܬ ܠܡܵܪܝܵܐ ܝܢܵܐ، ܣܵܒܵܒ ܗ̇ܘ ܒܸܬ ܦܲܠܸܛ ܠܗܘܿܢ ܐܲܩܠܝܼ̈ ܡ̣ܢ ܓܲܪܕܵܐ.

¹⁶ ܕܘܼܪ ܠܟܸܣܠܝܼ ܘܪܲܚܸܡ ܥܲܠܝܼ، ܒܗ̇ܝ ܕܒܢܲܦ̮ܫܝܼ ܝܘܸܢ ܘܡܸܣܟܹܢܵܐ.

¹⁷ ܥܵܘܩܵܢܹ̈ܐ ܕܠܸܒܝܼ ܙܝܼܕ ܠܗܘܿܢ، ܡ̣ܢ ܐܘܼܠܨܵܢܝܼ ܦܲܠܸܛ ܠܝܼ.

¹⁸ ܚܙܝܼ ܥܵܘܩܵܢܝܼ ܘܥܲܡܠܝܼ، ܘܦܲܚܸܠ ܠܟܠܵܝܗ‌ܝ ܚܛܝܼܵܬ‌ܝܼ̈.

¹⁹ ܚܙܝܼ ܠܕܸܫ̃ܡܸܢܝܼ̈ ܕܙܝܼܕܹܐ ܝܢܵܐ، ܘܒܣܢܵܝܬܵ‌ܐ ܚܸܡܬܵܢܬܵ‌ܐ ܩܵܡ ܣܵܢܝܼ ܠܝܼ.

²⁰ ܢܛܘܿܪ ܓܵܢܝܼ ܘܦܲܨܝܼ ܠܝܼ، ܠܵܐ ܫܵܒ݂ܩܹܬ ܢܵܟ݂ܦܹܢ ܒܗ̇ܝ ܕܫܩܝܼܠ ܠܝܼ ܓܵܘܣܵܐ ܒܝܼܘܼܟ݂.

²¹ ܫܒ݂ܘܿܩ ܬܲܡܝܼܡܘܼܬܵ‌ܐ ܘܬܪܘܼܨܘܼܬܵ‌ܐ ܚܲܡܹܐ ܠܝܼ، ܒܗ̇ܝ ܕܣܦܝܼܪܝܼ ܥܲܠܘܼܟ݂.

²² ܦܲܪܸܩ، ܝܵܐ ܐܲܠܵܗܵܐ، ܠܐܝܼܣܪܵܐܹܝܠ، ܡ̣ܢ ܟܠܵܝܗ‌ܝ ܥܵܘܩܵܢܘܼ̈ܗ‌ܝ.