ܡܙܡܘܪܐ 22 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܥܠ ܐܲܝܠܸܬ ܫܵܚܲܪ. ܡܙܡܘܪܐ ܕܕܘܝܕ.

¹ ܐܲܠܵܗ‌ܝܼ، ܐܲܠܵܗ‌ܝܼ، ܩܵܡܘܿܕܝܼ ܫܒ݂ܝܼܩܸܢܘܼܟ݂، ܪܸܚܩܵܐ ܡ̣ܢ ܦܘܼܪܩܵܢܝܼ ܘܡ̣ܢ ܗܹܡܸܙܡܵܢܹ̈ܐ ܕܓܥܵܝܬ‌ܝܼ؟

² ܐܲܠܵܗ‌ܝܼ، ܒܸܩܪܵܝܵܐ ܝܘܸܢ ܒܐܝܼܡܵܡܵܐ ܘܠܹܐ ܝܘܸܬ ܓ̰ܲܘܘܼܒܹܐ، ܘܒܠܲܝܠܹܐ، ܘܠܲܝܬ ܫܠܵܝܬܵ‌ܐ ܐܸܠܝܼ.

³ ܘܐܲܢ݇ܬ ܩܲܕܝܼܫܵܐ ܝܘܸܬ، ܝܵܬܒ݂ܵܢܵܐ ܒܫܘܼܒ݂ܚܹ̈ܐ ܕܐܝܼܣܪܵܐܹܝܠ.

⁴ ܒܝܼܘܼܟ݂ ܣܒܝܼܪܗܘܿܢ ܐܲܒ݂ܵܗܵܬܲܢ̈، ܣܒܝܼܪܗܘܿܢ ܒܝܼܘܼܟ݂، ܘܦܘܼܨܝܵܝ ܠܘܼܟ݂.

⁵ ܐܸܠܘܼܟ݂ ܡܘܼܩܘܸܚ ܠܗܘܿܢ، ܘܦܝܼܫ ܠܗܘܿܢ ܦܘܼܪܩܹܐ، ܒܝܼܘܼܟ݂ ܣܒܝܼܪܗܘܿܢ، ܘܠܵܐ ܢܟ݂ܝܼܦ ܠܗܘܿܢ.

⁶ ܐܝܼܢܵܐ ܐܵܢܵܐ ܬܸܘܸܠܥܵܐ ܝܘܸܢ ܘܠܵܐ ܐܢܵܫܵܐ، ܠܵܘܡܵܐ ܕܒܲܪܢܵܫܵܐ ܘܡܘܼܣܠܝܼܵܐ ܒܥܲܡܵܐ.

⁷ ܟܠܵܝܗ‌ܝ ܚܵܙܝܵܢܝܼ̈ ܟܹܐ ܡܲܣܚܸܪܝܼ ܒܝܼܝܼ، ܟܹܐ ܡܲܦܟ̰ܸܠܝܼ ܦܘܼܡܵܐ، ܟܹܐ ܫܵܥܫܝܼ ܪܹܝܫܵܐ، ܒܹܐܡܵܪܵܐ:

⁸ ”ܕܵܪܹܐ ܣܲܒ݂ܪܹܗ ܥܲܠ ܡܵܪܝܵܐ، ܕܗ̇ܘ ܦܲܨܹܐ ܠܹܗ، ܫܒ݂ܘܿܩ ܦܲܪܸܩ ܠܹܗ ܒܗ̇ܝ ܕܟܹܐ ܒܵܣܡܵܐ ܠܹܗ ܒܝܼܹܗ.“

⁹ ܣܵܒܵܒ ܐܲܢ݇ܬ ܝܼܘܸܬ ܦܲܠܛܵܢܝܼ ܡ̣ܢ ܒܲܛܢܵܐ، ܘܥܒ݂ܝܼܕ ܠܘܼܟ݂ ܕܣܵܒܪܹܢ ܒܝܼܘܼܟ݂ ܥܲܠ ܨܲܕܪ̈ܵܢܹܐ ܕܝܸܡܝܼ.

¹⁰ ܕܝܼܘܼܟ݂ ܗܘܹܐ ܠܝܼ ܡ̣ܢ ܡܲܪܒܥܵܐ، ܐܲܠܵܗ‌ܝܼ ܝܘܸܬ ܐܲܢ݇ܬ ܡ̣ܢ ܒܲܛܢܵܐ ܕܝܸܡܝܼ.

¹¹ ܠܵܐ ܪܵܚܩܹܬ ܡܸܢܝܼ ܒܗ̇ܝ ܕܩܘܼܪܒܵܐ ܝܠܹܗ ܥܵܘܩܵܢܵܐ، ܒܗ̇ܝ ܕܠܲܝܬ ܗܲܝܸܪܵܢܵܐ.

¹² ܩܵܡ ܚܲܪܕܝܼ ܠܝܼ ܬܵܘܪܹ̈ܐ ܪܵܒܵܐ، ܩܵܡ ܟܵܪܟ݂ܝܼ ܠܝܼ ܬܵܘܪܹ̈ܐ ܙܲܪ̈ܒܵܢܹܐ ܕܒܲܝܫܵܢ.

¹³ ܦܬܝܼܚ ܠܗܘܿܢ ܥܲܠܝܼ ܦܘܼܡܵܝܗ‌ܝ، ܐܲܝܟ݂ ܐܲܪܝܵܐ ܦܵܪܘܿܛܵܐ ܘܓܲܪܓܸܡܵܢܵܐ.

¹⁴ ܐܲܝܟ݂ ܡ̈ܝܼܵܐ ܦܝܼܫ ܠܝܼ ܫܘܼܦܟ݂ܵܐ، ܘܫܪܹܐ ܠܗܘܿܢ ܟܠܵܝܗ‌ܝ ܓܲܪܡܝܼ، ܗܘܹܐ ܠܹܗ ܠܸܒܝܼ ܐܲܝܟ݂ ܫܲܡܲܥ، ܦܫܝܼܪܹܗ ܒܓܵܘܵܐ ܕܨܲܕܪܝܼ.

¹⁵ ܒܪܝܼܙ ܠܹܗ ܐܲܝܟ݂ ܦܹܚܵܪܵܐ ܚܲܝܠܝܼ، ܘܠܸܫܵܢܝܼ ܫܸܥܝܵܐ ܝܠܹܗ ܠܫܵܡܵܟܝܼ، ܘܩܵܡ ܡܲܬܒܸܬ ܠܝܼ ܠܥܲܦܪܵܐ ܕܡܵܘܬܵ‌ܐ.

¹⁶ ܒܗ̇ܝ ܕܩܵܡ ܚܲܪܕܝܼ ܠܝܼ ܟܲܠܒܹ̈ܐ، ܟܸܢܫܵܐ ܕܒܝܼܫܹ̈ܐ ܩܵܡ ܟܵܪܟ݂ܝܼ ܠܝܼ، ܒܙܝܼܥ ܠܗܘܿܢ ܠܐܝܼܕܵܬ‌ܝܼ̈ ܘܠܐܲܩܠܵܬ‌ܝܼ̈.

¹⁷ ܡܵܨܹܝܢ ܡܵܢܹܝܢ ܟܠܵܝܗ‌ܝ ܓܲܪ̈ܡܝܼ، ܐܵܢܝܼ ܓܘܼܫܸܩ ܠܗܘܿܢ ܘܚܝܼܪܗܘܿܢ ܒܝܼܝܼ.

¹⁸ ܦܘܼܠܸܥ ܠܗܘܿܢ ܓ̰ܘܼܠܝܼ̈ ܒܹܝܠܵܝܗ‌ܝ، ܘܥܲܠ ܠܒ݂ܝܼܫܬ‌ܝܼ ܕܪܹܐ ܠܗܘܿܢ ܦܸܫܟܵܐ.

¹⁹ ܘܐܲܢ݇ܬ، ܝܵܐ ܡܵܪܝܵܐ، ܠܵܐ ܟܵܠܹܝܬ ܪܸܚܩܵܐ، ܝܵܐ ܚܲܝܠܝܼ، ܡܲܠܝܸܙ ܠܗܲܝܲܪܬ‌ܝܼ.

²⁰ ܦܲܨܝܼ ܡ̣ܢ ܣܲܝܦܵܐ ܠܓܵܢܝܼ، ܡ̣ܢ ܐܝܼܕܵܐ ܕܟܲܠܒܵܐ ܐܝܼܚܝܼܕܵܝܘܼܬ‌ܝܼ.

²¹ ܦܲܪܸܩ ܠܝܼ ܡ̣ܢ ܦܘܼܡܵܐ ܕܐܲܪܝܵܐ، ܘܦܲܨܝܼ ܠܝܼ ܡ̣ܢ ܩܲܪ̈݇ܢܵܢܹܐ ܕܪ̈ܲܝܡܹܐ.

²² ܒܸܬ ܗܲܩܹܝܢ ܫܸܡܘܼܟ݂ ܠܐܲܚܘܿܢܘܵܬ‌ܝܼ̈، ܒܓܵܘܵܐ ܕܟܸܢܫܵܐ ܒܸܬ ܫܲܒܚܸܢܘܼܟ݂.

²³ ܙܕܝܼ̈ܥܹܐ ܕܡܵܪܝܵܐ ܫܲܒܚܘܼܢ ܐܸܠܹܗ، ܟܠܹܗ ܙܲܪܥܵܐ ܕܝܲܥܩܘܿܒ݂ ܡܝܲܩܪܘܼܢ ܠܹܗ، ܘܙܕܹܥܡܘܼܢ ܡܸܢܹܗ ܟܠܹܗ ܙܲܪܥܵܐ ܕܐܝܼܣܪܵܐܹܝܠ.

²⁴ ܒܗ̇ܝ ܕܠܵܐ ܡܘܼܣܠܹܐ ܠܹܗ ܘܠܵܐ ܓܘܼܢܓܸܙ ܠܹܗ ܡ̣ܢ ܐܘܼܠܨܵܢܵܐ ܕܡܘܼܠܝܸܨܵܐ، ܘܠܵܐ ܛܘܼܫܹܐ ܠܹܗ ܦܵܬܹܗ ܡܸܢܹܗ، ܐܸܠܵܐ ܫܡܝܼܥ ܠܹܗ ܟܲܕ ܡܘܼܩܘܸܚ ܠܹܗ ܐܸܠܹܗ.

²⁵ ܡ̣ܢ ܠܟܸܣ ܠܘܼܟ݂ ܝܼܠܵܗ̇ ܬܸܫܒܘܿܚܬ‌ܝܼ ܒܟܸܢܫܵܐ ܓܘܼܪܵܐ، ܢܸܕܪ̈ܝܼ ܒܸܬ ܬܲܡܸܡܸܢ ܩܲܕܡ ܙܕܝܼܥܘܼ̈ܗ‌ܝ.

²⁶ ܒܸܬ ܐܵܟ݂ܠܝܼ ܡܸܣܟܹܢܹ̈ܐ ܘܣܵܒ݂ܥܝܼ، ܒܸܬ ܫܲܒܚܝܼ ܠܡܵܪܝܵܐ ܛܵܥܝܵܢܹ̈ܐ ܐܸܠܹܗ، ܚܵܝܹܐ ܠܸܒܵܘܟ݂ܘܿܢ ܠܥܵܠܲܡ.

²⁷ ܒܸܬ ܕܵܟ݂ܪܝܼ ܘܕܵܝܪܝܼ ܠܟܸܣ ܡܵܪܝܵܐ ܟܠܵܝܗ‌ܝ ܡܲܪ̈ܙܵܢܹܐ ܕܐܲܪܥܵܐ، ܘܒܸܬ ܣܵܓ݂ܕܝܼ ܩܲܕܡܘܼܟ݂ ܟܠܵܝܗ‌ܝ ܫܲܪ̈ܒܵܬܹ‌ܐ ܕܐܸܡܘܵܬܹ̈‌ܐ.

²⁸ ܒܗ̇ܝ ܕܠܡܵܪܝܵܐ ܝܠܵܗ̇ ܡܲܠܟܘܼܬܵ‌ܐ، ܘܗ̇ܘ ܝܼܠܹܗ ܗܲܟܡܵܢܵܐ ܠܐܸܡܘܵܬܹ̈‌ܐ.

²⁹ ܘܒܸܬ ܐܵܟ݂ܠܝܼ ܘܒܸܬ ܣܵܓ݂ܕܝܼ ܟܠܵܝܗ‌ܝ ܥܲܬܝܼܪܹ̈ܐ ܕܐܲܪܥܵܐ، ܩܲܕܡܘܼܗ‌ܝ ܒܸܬ ܟܵܝܦܝܼ ܟܠܵܝܗ‌ܝ ܨܵܠܝܵܢܹ̈ܐ ܠܥܲܦܪܵܐ، ܘܐܘܼܦ ܗ̇ܘ ܕܠܹܐ ܡܵܨܹܐ ܚܲܡܹܐ ܠܵܗ̇ ܓܵܢܹܗ ܚܵܝܬܵ‌ܐ.

³⁰ ܙܲܪܥܵܐ ܒܸܬ ܦܵܠܹܚ ܐܸܠܹܗ، ܒܸܬ ܗܲܩܝܼ ܒܘܼܬ ܡܵܪܝܵܐ ܠܕܵܪܵܐ ܕܐܵܬܹ‌ܐ.

³¹ ܒܸܬ ܐܵܬ‌ܝܼ ܘܒܸܬ ܡܲܕܥܝܼ ܙܲܕܝܼܩܘܼܬܹܗ ܠܥܲܡܵܐ ܕܦܵܐܹܫ ܝܠܝܼܕܵܐ، ܕܗ̇ܘ ܥܒ݂ܝܼܕ ܠܹܗ ܐܵܗܵܐ.