ܡܙܡܘܪܐ 19 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܡܙܡܘܪܐ ܕܕܘܝܕ.

¹ ܫܡܲܝܹ̈ܐ ܗܲܩܘܼܝܹܐ ܝܢܵܐ ܚܸܩܪܵܐ ܕܐܲܠܵܗܵܐ، ܘܪܩܝܼܥܵܐ ܡܲܕܘܼܥܹܐ ܝܠܹܗ ܦܘܼܠܚܵܢܹ̈ܐ ܕܐܝܼܕܵܬܘܼ̈ܗ‌ܝ.

² ܐܝܼܡܵܡܵܐ ܠܐܝܼܡܵܡܵܐ ܟܹܐ ܡܲܢܒܸܥ ܡܹܐܡܪܵܐ، ܘܠܲܝܠܹܐ ܠܠܲܝܠܹܐ ܟܹܐ ܡܲܚܙܹܐ ܝܕܵܥܬܵ‌ܐ.

³ ܠܲܝܬ ܡܹܐܡܪܵܐ ܘܠܲܝܬ ܗܹܡܸܙܡܵܢܹ̈ܐ، ܕܠܹܐ ܦܵܝܫܝܼ ܫܡܝܼܥܹܐ ܒܩܵܠܵܝܗ‌ܝ.

⁴ ܒܟܠܵܗ̇ ܐܲܪܥܵܐ ܦܠܝܼܛ ܠܹܗ ܟܝܘܼܠܵܝܗ‌ܝ، ܘܒܡܲܪܙܵܐ ܕܒܪܝܼܬܵ‌ܐ ܚܲܒܪ̈ܵܢܵܝܗ‌ܝ، ܩܵܐ ܫܸܡܫܵܐ ܢܩܝܼܫ ܠܹܗ ܡܲܫܟܢܵܐ ܒܓܵܘܵܝܗ‌ܝ.

⁵ ܘܗ̇ܘ ܐܲܝܟ݂ ܚܸܬܢܵܐ ܕܦܵܠܹܛ ܡ̣ܢ ܒܹܝܬ ܓܢܘܿܢܹܗ، ܟܹܐ ܦܵܨܹܚ ܐܲܝܟ݂ ܓܲܒܵܪܵܐ ܠܸܪܚܵܛܵܐ ܪܲܗܛܵܐ.

⁶ ܡ̣ܢ ܡܲܪܙܵܐ ܕܫܡܲܝܹ̈ܐ ܦܠܵܛܹܗ، ܘܚܕܵܪܬܹܗ ܡ̣ܢ ܚܲܕ ܓܹܒܵܐ ܠܓܹܒܵܐ ܐܚܹܪܢܵܐ، ܘܠܲܝܬ ܕܦܵܐܹܫ ܛܘܼܫܝܵܐ ܡ̣ܢ ܚܸܡܹܗ.

⁷ ܢܵܡܘܿܣܵܐ ܕܡܵܪܝܵܐ ܬܲܡܝܼܡܵܐ ܝܠܹܗ، ܡܲܕܸܪܵܢܵܐ ܕܓܵܢܵܐ، ܣܵܗܕܘܼܬܵ‌ܐ ܕܡܵܪܝܵܐ ܡܗܲܝܡܵܢܬܵ‌ܐ ܝܠܵܗ̇، ܟܹܐ ܥܵܒ݂ܕܵܐ ܚܲܟܝܼܡܵܐ ܠܦܫܝܼ̈ܛܹܐ.

⁸ ܦܘܼܩܵܕܹ̈ܐ ܕܡܵܪܝܵܐ ܬܪ̈ܘܼܨܹܐ ܝܢܵܐ، ܡܲܚܕܝܼܵܢܹ̈ܐ ܕܠܸܒܵܐ، ܦܘܼܩܕܵܢܵܐ ܕܡܵܪܝܵܐ ܕܸܟ݂ܝܵܐ ܝܠܹܗ، ܒܲܗܪܸܢܵܢܵܐ ܕܥܲܝ̈ܢܹܐ.

⁹ ܙܕܘܼܥܬܵ‌ܐ ܕܡܵܪܝܵܐ ܕܟ݂ܝܼܬܵ‌ܐ ܝܠܵܗ̇، ܩܲܝܵܡ ܠܥܵܠܲܡ، ܕܝܼܘܵܢܹ̈ܐ ܕܡܵܪܝܵܐ ܫܲܪܝܼܪܹ̈ܐ ܝܢܵܐ، ܙܲܕܝܼܩܹ̈ܐ ܒܟܠ ܥܕܵܢܵܐ.

¹⁰ ܒܘܼܫ ܫܘܼܗܘܸܬܹ‌ܐ ܝܢܵܐ ܡ̣ܢ ܕܲܗܒ݂ܵܐ، ܘܡ̣ܢ ܪܵܒܵܐ ܕܲܗܒ݂ܵܐ ܨܸܦܝܵܐ، ܘܒܘܼܫ ܚܸܠܝܹܐ ܝܢܵܐ ܡ̣ܢ ܕܸܒ݂ܫܵܐ، ܘܡ̣ܢ ܢܵܛܘܿܦܝܵܬܹ̈‌ܐ ܕܫܵܢܵܐ.

¹¹ ܐܘܼܦ ܪܹܓܘܼܟ݂ ܟܹܐ ܦܵܐܹܫ ܙܗܝܼܪܵܐ ܒܝܼܵܝܗ‌ܝ، ܒܢܛܵܪܬܵܝܗ‌ܝ ܐܝܼܬ ܦܘܼܪܥܵܢܵܐ ܓܘܼܪܵܐ.

¹² ܡܵܢܝܼ ܟܹܐ ܡܵܨܹܐ ܦܲܪܡܹܐ ܚܸܠܛܹܗ؟ ܥܒ݂ܘܿܕ ܠܝܼ ܙܲܟܵܝܵܐ ܡ̣ܢ ܚܛܝܼܵܬܹ̈‌ܐ ܕܠܵܐ ܒܝܕܵܥܬ‌ܝܼ.

¹³ ܐܘܼܦ ܡ̣ܢ ܚܬܵܪ̈ܝܵܬܹ‌ܐ ܚܣܘܿܟ݂ ܠܹܗ ܪܹܓܘܼܟ݂، ܠܵܐ ܫܵܒ݂ܩܹܬ ܗܵܘܹܐ ܠܗܘܿܢ ܫܘܼܠܛܵܢܵܐ ܥܲܠܝܼ، ܗ̇ܝܓܵܗ ܒܸܬ ܗܵܘܹܝܢ ܬܲܡܝܼܡܵܐ، ܘܒܸܬ ܗܵܘܹܝܢ ܙܲܟܵܝܵܐ ܡ̣ܢ ܓܢܵܗܵܐ ܓܘܼܪܬܵ‌ܐ.

¹⁴ ܗܵܘܝܼ ܡܩܲܒܠܹܐ ܩܲܕܡܘܼܟ݂ ܗܹܡܸܙܡܵܢܹ̈ܐ ܕܦܘܼܡܝܼ ܘܗܲܓܲܝܬܵ‌ܐ ܕܠܸܒܝܼ، ܝܵܐ ܡܵܪܝܵܐ، ܐܝܼܨܵܪܝܼ، ܘܦܵܪܘܿܩܝܼ.