ܡܙܡܘܪܐ 17 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܨܠܘܬ‌ܐ ܕܕܘܝܕ.

¹ ܫܡܹܥ، ܝܵܐ ܡܵܪܝܵܐ، ܠܦܲܪܦܲܠܬܵ‌ܐ ܙܲܕܝܼܩܬܵ‌ܐ، ܨܘܼܬ ܠܡܲܩܘܲܚܬ‌ܝܼ، ܗܲܒ݂ܠ ܢܵܬܵ‌ܐ ܠܨܠܘܿܬ‌ܝܼ، ܕܠܹܐ ܝܠܵܗ̇ ܒܣܸܦܘܵܬܹ̈‌ܐ ܕܦܸܠܡܵܐ.

² ܫܒ݂ܘܿܩ ܦܵܠܛܵܐ ܕܝܼܘܵܢܝܼ ܡܸܢܘܼܟ݂، ܥܲܝ̈ܢܘܼܟ݂ ܚܵܙܝܼ ܠܬܪ̈ܘܼܨܘܼܝܵܬܹ‌ܐ.

³ ܒܘܼܚܸܪܘܼܟ݂ ܠܸܒܝܼ، ܣܘܼܚܒܸܪܘܼܟ݂ ܐܸܠܝܼ ܒܠܲܝܠܹܐ، ܨܘܼܪܸܦܸܢܘܼܟ݂، ܠܵܐ ܡܘܼܫ݇ܟ̰ܸܚ ܠܘܼܟ݂ ܡܸܢܕܝܼ ܚܸܠܛܵܐ ܒܝܼܝܼ، ܥܒ݂ܝܼܕ ܠܝܼ ܩܛܵܥܬܵ‌ܐ ܕܠܹܐ ܚܵܛܹܐ ܦܘܼܡܝܼ.

⁴ ܒܘܼܬ ܦܘܼܠܚܵܢܹ̈ܐ ܕܒܲܪܢܵܫܵܐ، ܐܲܝܟ݂ ܗܹܡܸܙܡܵܢ ܕܣܸܦܘܵܬܘܼ̈ܟ݂، ܐܵܢܵܐ ܢܛܝܼܪܝܼ ܓܵܢܝܼ ܡ̣ܢ ܐܘܼܪ̈ܚܵܬܹ‌ܐ ܕܒܝܼܫܵܐ.

⁵ ܩܘܹܐ ܠܗܘܿܢ ܦܵܣܘܿܥܝܵܬ‌ܝܼ̈ ܒܫܒ݂ܝܼܠܘܼ̈ܟ݂، ܠܵܐ ܫܥܝܼܫ ܠܗܘܿܢ ܐܲܩܠܵܬ‌ܝܼ̈.

⁶ ܐܵܢܵܐ ܩܪܹܐ ܠܝܼ ܐܸܠܘܼܟ݂، ܝܵܐ ܐܲܠܵܗܵܐ، ܒܗ̇ܝ ܕܒܸܬ ܓ̰ܲܘܸܒܸܬ ܠܝܼ، ܡܲܟܸܦ ܢܵܬܘܼܟ݂ ܐܸܠܝܼ، ܫܡܹܥ ܠܗܹܡܸܙܡܵܢܝܼ̈.

⁷ ܡܲܚܙܝܼ ܛܲܝܒܘܼܬܘܼܟ݂ ܒܥܲܓ̰ܝܼܒܘܼܬܵ‌ܐ، ܝܵܐ ܦܵܪܘܿܩܵܐ ܕܐܵܢܝܼ ܕܡ̣ܢ ܕܸܫ̃ܡܸܢܵܝ̈ܗ‌ܝ ܫܵܩܠܝܼ ܓܵܘܣܵܐ ܒܝܲܡܝܼܢܘܼܟ݂.

⁸ ܢܛܘܿܪܝܼ ܐܲܝܟ݂ ܒܹܒܸܠܬܵ‌ܐ ܕܥܲܝܢܵܐ، ܒܛܸܠܵܢܝܼܬܵ‌ܐ ܕܓܘܼܠܦܵܢܘܼ̈ܟ݂ ܛܲܫܹܝܬ ܠܝܼ؛

⁹ ܡ̣ܢ ܩܲܕܡ ܒܝܼܫܹ̈ܐ ܕܦܲܪܦܘܼܣܝܼ ܝܢܵܐ، ܡ̣ܢ ܕܸܫ̃ܡܸܢܝܼ̈ ܕܚܲܪܕܝܼ ܠܓܵܢܝܼ.

¹⁰ ܕܒ݂ܝܼܪܘܼܗ‌ܝ ܝܢܵܐ ܠܸܒܵܝܗ‌ܝ ܩܸܫܝܵܐ، ܒܦܘܼܡܵܝܗ‌ܝ ܟܹܐ ܗܲܡܙܸܡܝܼ ܫܘܼܒ݂ܗܵܪܵܐ.

¹¹ ܚܘܼܪܕܝܼܹܐ ܝܢܵܐ ܐܸܠܝܼ ܐܵܕܝܼܵܐ ܒܦܵܣܘܿܥܝܵܬ‌ܝܼ̈، ܡܘܼܬܸܒ݂ ܠܗܘܿܢ ܥܲܝ̈ܢܵܝܗ‌ܝ ܠܪܲܦܘܼܝܝܼ ܠܐܲܪܥܵܐ.

¹² ܒܸܕܡܵܝܵܐ ܠܐܲܪܝܵܐ ܕܫܲܗܘܸܬ ܠܸܦܪܵܛܵܐ، ܘܠܓܘܼܪܝܵܐ ܕܐܲܪܝܵܐ ܝܬܝܼܒ݂ܵܐ ܒܣܸܬܵܪܹ̈ܐ.

¹³ ܩܘܼܡ، ܝܵܐ ܡܵܪܝܵܐ، ܟܠܝܼ ܩܲܕܡ ܦܵܬܵܝܗ‌ܝ ܘܡܲܒܪܸܟ ܠܗܘܿܢ، ܦܲܨܝܼ ܠܓܵܢܝܼ ܡ̣ܢ ܪ̈ܲܫܝܼܥܹܐ ܒܝܲܕ ܣܲܝܦܘܼܟ݂؛

¹⁴ ܡ̣ܢ ܐܢܵܫܹ̈ܐ ܒܝܲܕ ܐܝܼܕܘܼܟ݂، ܝܵܐ ܡܵܪܝܵܐ، ܡ̣ܢ ܐܢܵܫܹ̈ܐ ܕܐܵܗܵܐ ܥܵܠܡܵܐ، ܕܣܵܗܡܵܝܗ‌ܝ ܒܐܲܢܹܐ ܚܲܝܹ̈ܐ ܝܠܹܗ، ܘܒܣܝܼܡܬܘܼܟ݂ ܟܹܐ ܡܵܠܹܝܬ ܟܹܪ݇ܣܵܝܗ‌ܝ، ܘܟܹܐ ܣܵܒ݂ܥܝܼ ܒܢܘܿܢܵܝ̈ܗ‌ܝ، ܘܫܵܒ݂ܩܝܼ ܫܲܪܟܵܢܵܐ ܠܝܲܠܘܼܕܵܝ̈ܗ‌ܝ.

¹⁵ ܐܝܼܢܵܐ ܐܵܢܵܐ، ܒܸܬ ܚܵܙܹܝܢ ܠܦܵܬܘܼܟ݂ ܒܙܲܕܝܼܩܘܼܬܵ‌ܐ، ܒܸܬ ܣܵܒ݂ܥܹܢ ܒܨܘܼܪܬܘܼܟ݂ ܐܝܼܡܲܢ ܕܪܵܥܫܹܢ.