ܡܙܡܘܪܐ 145 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܒܸܬ ܡܲܪܡܸܢܘܼܟ݂، ܝܵܐ ܐܲܠܵܗ‌ܝܼ ܡܲܠܟܵܐ، ܘܒܸܬ ܒܲܪܟܸܢ ܫܸܡܘܼܟ݂ ܠܥܵܠܲܡ ܥܵܠܡܝܼܢ.

² ܒܟܠ ܝܘܿܡ ܒܸܬ ܒܲܪܟܸܢܘܼܟ݂، ܘܒܸܬ ܫܲܒܚܸܢ ܠܫܸܡܘܼܟ݂ ܠܥܵܠܲܡ ܥܵܠܡܝܼܢ.

³ ܓܘܼܪܵܐ ܝܠܹܗ ܡܵܪܝܵܐ ܘܡܫܘܼܒܚܵܐ ܪܵܒܵܐ، ܘܠܓܘܼܪܘܼܬܹܗ ܠܲܝܬ ܨܲܚܨܲܝܬܵ‌ܐ.

⁴ ܕܵܪܵܐ ܒܸܬ ܫܲܒܸܚ ܦܘܼܠܚܵܢܘܼ̈ܟ݂ ܠܕܵܪܵܐ، ܘܓܲܒܵܪ̈ܘܼܝܵܬܘܼܟ݂ ܒܸܬ ܡܲܕܥܝܼ.

⁵ ܠܣܸܩܠܵܐ ܕܚܸܩܪܵܐ ܕܫܘܼܒ݂ܚܘܼܟ݂، ܘܥܒ݂ܵܕܘܼ̈ܟ݂ ܡܲܥܓ̰ܸܒܵܢܹ̈ܐ ܒܸܬ ܗܲܓܹܝܢ.

⁶ ܘܒܘܼܬ ܚܲܝܠܵܐ ܕܥܒ݂ܵܕܘܼ̈ܟ݂ ܣܲܗܡܵܢܹ̈ܐ ܒܸܬ ܐܵܡܪܝܼ، ܘܓܘܼܪܘܼܬܘܼܟ݂ ܒܸܬ ܗܲܩܹܝܢ.

⁷ ܕܟ݂ܵܪܵܐ ܕܦܸܪܝܘܼܬܵ‌ܐ ܕܛܵܒ݂ܘܼܬܘܼܟ݂ ܒܸܬ ܬܲܢܝܼ، ܘܙܲܕܝܼܩܘܼܬܘܼܟ݂ ܒܸܬ ܡܲܩܘܸܚܝܼ.

⁸ ܚܲܢܵܢܵܐ ܝܠܹܗ ܘܡܪܲܚܡܵܢܵܐ ܡܵܪܝܵܐ، ܝܲܪܝܼܟ݂ܬܵ‌ܐ ܒܹܐܢܹܗ ܘܓܘܼܪܬܵ‌ܐ ܛܲܝܒܘܼܬܹܗ.

⁹ ܛܵܒ݂ܵܐ ܝܠܹܗ ܡܵܪܝܵܐ ܠܟܠܵܝܗ‌ܝ، ܘܪ̈ܲܚܡܘܼܗ‌ܝ ܥܲܠ ܟܠܵܝܗ‌ܝ ܦܘܼܠܚܵܢܘܼ̈ܗ‌ܝ.

¹⁰ ܒܸܬ ܫܲܟܪܝܼ ܠܘܼܟ݂، ܝܵܐ ܡܵܪܝܵܐ، ܟܠܵܝܗ‌ܝ ܦܘܼܠܚܵܢܘܼ̈ܟ݂، ܘܡܗܘܼܡܢܘܼ̈ܟ݂ ܒܸܬ ܒܲܪܟ݂ܝܼ ܠܘܼܟ݂.

¹¹ ܒܘܼܬ ܚܸܩܪܵܐ ܕܡܲܠܟܘܼܬܘܼܟ݂ ܒܸܬ ܐܵܡܪܝܼ، ܘܓܲܒܵܪܘܼܬܘܼܟ݂ ܒܸܬ ܗܲܡܙܸܡܝܼ،

¹² ܠܡܲܕܘܼܥܹܐ ܠܒܢܲܝ̈ܢܵܫܵܐ ܓܲܒܵܪ̈ܘܼܝܵܬܘܼܟ݂، ܘܚܸܩܪܵܐ ܕܣܸܩܠܵܐ ܕܡܲܠܟܘܼܬܘܼܟ݂.

¹³ ܡܲܠܟܘܼܬܘܼܟ݂ ܡܲܠܟܘܼܬܵ‌ܐ ܥܵܠܡܝܼܢܵܝܬܵ‌ܐ ܝܠܵܗ̇، ܘܫܘܼܠܛܵܢܘܼܟ݂ ܒܟܠ ܕܵܪܵܐ ܘܕܵܪܵܐ.

¹⁴ ܟܹܐ ܣܵܢܹܕ ܡܵܪܝܵܐ ܠܟܠܵܝܗ‌ܝ ܢܵܦܠܵܢܹ̈ܐ، ܘܟܹܐ ܡܲܩܸܡ ܠܟܠܵܝܗ‌ܝ ܛܥܝܼ̈ܦܹܐ.

¹⁵ ܥܲܝ̈ܢܹܐ ܕܟܠܵܝܗ‌ܝ ܐܸܠܘܼܟ݂ ܟܹܐ ܣܵܦܪܝܼ، ܘܐܲܢ݇ܬ ܟܹܐ ܝܵܗܒܹܬ ܠܗܘܿܢ ܡܹܐܟ݂ܘܼܠܬܵܝܗ‌ܝ ܒܥܕܵܢܘܼܗ̇.

¹⁶ ܟܹܐ ܦܵܬܚܹܬ ܐܝܼܕܘܼܟ݂، ܘܟܹܐ ܡܲܣܒܸܥܸܬ ܠܨܸܒ݂ܝܵܢܵܐ ܕܟܠ ܚܵܝܵܐ.

¹⁷ ܙܲܕܝܼܩܵܐ ܝܠܹܗ ܡܵܪܝܵܐ ܒܟܠܵܝܗ‌ܝ ܐܘܼܪ̈ܚܵܬܘܼܗ‌ܝ، ܘܡܗܘܼܡܢܵܐ ܒܟܠܵܝܗ‌ܝ ܦܘܼܠܚܵܢܘܼ̈ܗ‌ܝ.

¹⁸ ܩܘܼܪܒܵܐ ܝܠܹܗ ܡܵܪܝܵܐ ܠܟܠܵܝܗ‌ܝ ܩܵܪ̈ܝܵܢܘܼܗ‌ܝ، ܠܟܠ ܡ̇ܢ ܕܩܵܪܹܐ ܠܹܗ ܒܫܲܪܝܼܪܘܼܬܵ‌ܐ.

¹⁹ ܨܸܒ݂ܝܵܢܵܐ ܕܙܕܝܼܥܘܼ̈ܗ‌ܝ ܟܹܐ ܥܵܒܹܕ، ܘܡܲܩܘܲܚܬܵܝܗ‌ܝ ܟܹܐ ܫܵܡܹܥ، ܘܟܹܐ ܦܲܪܸܩ ܠܗܘܿܢ.

²⁰ ܟܹܐ ܢܵܛܹܪ ܡܵܪܝܵܐ ܠܟܠܵܝܗ‌ܝ ܡܲܚܸܒܵܢܘܼ̈ܗ‌ܝ، ܐܝܼܢܵܐ ܠܟܠܵܝܗ‌ܝ ܪ̈ܲܫܝܼܥܹܐ ܒܸܬ ܛܲܠܸܩ.

²¹ ܬܸܫܒܘܿܚܬܵ‌ܐ ܕܡܵܪܝܵܐ ܒܸܬ ܗܲܡܙܸܡ ܦܘܼܡܝܼ، ܘܒܸܬ ܒܲܪܟ݂ܵܐ ܟܠ ܓܵܢܵܐ ܫܸܡܵܐ ܕܩܘܼܕܫܹܗ ܠܥܵܠܲܡ ܥܵܠܡܝܼܢ.