ܡܙܡܘܪܐ 141 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܝܵܐ ܡܵܪܝܵܐ، ܩܪܹܐ ܠܝܼ ܐܸܠܘܼܟ݂، ܡܲܠܝܸܙ ܠܟܸܣܠܝܼ، ܗܲܒ݂ܠ ܢܵܬܵ‌ܐ ܠܩܵܠܝܼ ܟܲܕ ܩܵܪܹܝܢ ܐܸܠܘܼܟ݂.

² ܗܵܘܝܵܐ ܨܠܘܿܬ‌ܝܼ ܐܲܝܟ݂ ܒܸܣܡܵܐ ܩܲܕܡܘܼܟ݂، ܡܲܪܲܡܬܵ‌ܐ ܕܐܝܼܕܵܬ‌ܝܼ̈ ܐܲܝܟ݂ ܩܘܼܪܒܵܢܵܐ ܕܪܲܡܫܵܐ.

³ ܝܵܐ ܡܵܪܝܵܐ، ܡܲܬܸܒ݂ ܢܛܵܪܬܵ‌ܐ ܠܦܘܼܡܝܼ، ܢܛܘܿܪ ܠܬܲܪܥܵܐ ܕܣܸܦܘܵܬ‌ܝܼ̈.

⁴ ܠܵܐ ܫܵܒ݂ܩܹܬ ܦܵܬܹܠ ܠܸܒܝܼ ܠܗܹܡܸܙܡܵܢ ܒܝܼܫܬܵ‌ܐ، ܠܸܥܒ݂ܵܕܵܐ ܥܒ݂ܵܕܹ̈ܐ ܒܪܲܫܝܼܥܘܼܬܵ‌ܐ، ܥܲܡ ܦܵܠܚܵܢܹ̈ܐ ܕܥܵܘܠܵܐ، ܘܠܵܐ ܫܵܒ݂ܩܹܬ ܐܵܟ݂ܠܹܢ ܡ̣ܢ ܛܲܥܡܵܬܵܝ̈ܗ‌ܝ.

⁵ ܫܒ݂ܘܿܩ ܡܵܚܹܐ ܠܝܼ ܙܲܕܝܼܩܵܐ، ܛܲܝܒܘܼܬܵ‌ܐ ܝܠܵܗ̇ ܐܵܗܵܐ، ܘܡܲܢܟܸܣ ܠܝܼ، ܡܸܫܚܵܐ ܕܪܹܝܫܵܐ ܝܠܹܗ، ܠܵܐ ܡܲܚܦܸܠ ܪܹܝܫܝܼ، ܒܗ̇ܝ ܕܗܸܫ ܨܠܘܿܬ‌ܝܼ ܕܲܠܩܘܼܒ݂ܠ ܕܒܝܼܫܵܬܵܝ̈ܗ‌ܝ ܝܠܵܗ̇.

⁶ ܟܲܕ ܦܵܝܫܝܼ ܪܘܼܦܝܹܐ ܒܕܸܦܢܵܬܹ̈‌ܐ ܕܩܵܝܵܐ ܕܲܝܵܢܵܝ̈ܗ‌ܝ، ܒܸܬ ܫܵܡܥܝܼ ܗܹܡܸܙܡܵܢܝܼ̈ ܒܗ̇ܝ ܕܒܲܣܝܼܡܹ̈ܐ ܝܢܵܐ.

⁷ ܐܲܝܟ݂ ܛܵܪܝܵܢܵܐ ܕܦܕܵܢܵܐ ܕܛܵܪܹܐ ܠܵܗ̇ ܐܲܪܥܵܐ، ܗܵܕܟ݂ܵܐ ܦܝܼܫ ܠܗܘܿܢ ܒܘܼܪܒܸܙܹܐ ܓܲܪ̈ܡܲܢ ܥܲܠ ܦܘܼܡܵܐ ܕܫܝܘܿܠ.

⁸ ܐܝܼܢܵܐ ܥܲܝܢܝܼ̈ ܐܸܠܘܼܟ݂ ܝܼܢܵܐ، ܝܵܐ ܡܵܪܝܵܐ ܐܲܠܵܗܵܐ، ܒܝܼܘܼܟ݂ ܫܩܝܼܠ ܠܝܼ ܓܵܘܣܵܐ، ܠܵܐ ܫܵܒ݂ܩܹܬ ܠܵܗ̇ ܓܵܢܝܼ ܒܠܵܐ ܢܛܵܪܬܵ‌ܐ.

⁹ ܢܛܘܿܪܝܼ ܡ̣ܢ ܦܲܚܹ̈ܐ ܕܡܘܼܬܸܒ݂ ܠܗܘܿܢ ܐܸܠܝܼ، ܘܡ̣ܢ ܢܸܫܒ݂ܵܐ ܕܦܵܠܚܵܢܹ̈ܐ ܕܥܵܘܠܵܐ.

¹⁰ ܢܵܦܠܝܼ ܪ̈ܲܫܝܼܥܹܐ ܥܲܡ ܚܕܵܕܹ̈ܐ ܒܓܲܪܕܵܝܗ‌ܝ، ܗܲܠ ܕܐܵܢܵܐ ܥܵܒ݂ܪܹܢ.