ܡܙܡܘܪܐ 12 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ: ܥܠ ܫܡܝܼܢܝܼܬ. ܡܙܡܘܪܐ ܕܕܘܝܕ.

¹ ܦܲܪܸܩ، ܝܵܐ ܡܵܪܝܵܐ، ܒܗ̇ܝ ܕܬܝܼܡ ܠܹܗ ܙܲܕܝܼܩܵܐ، ܒܗ̇ܝ ܕܦܪܝܼܩ ܠܗܘܿܢ ܡܗܘܼܡܢܹ̈ܐ ܡ̣ܢ ܓܵܘ ܒܢܲܝ̈ܢܵܫܵܐ.

² ܣܪܝܼܩܘܼܬܵ‌ܐ ܟܹܐ ܗܲܡܙܸܡܝܼ ܐܢܵܫܵܐ ܥܲܡ ܚܲܒ݂ܪܹܗ؛ ܒܣܸܦܘܵܬܹ̈‌ܐ ܟ̰ܘܼܥܝܹ̈ܐ، ܒܬܪܹܝ ܠܸܒܹ̈ܐ ܦܪ̈ܝܼܫܹܐ ܟܹܐ ܗܲܡܙܸܡܝܼ.

³ ܒܸܬ ܩܵܛܹܥ ܡܵܪܝܵܐ ܟܠܵܝܗ‌ܝ ܣܸܦܘܵܬܹ̈‌ܐ ܟ̰ܘܼܥܝܹ̈ܐ، ܘܠܸܫܵܢܵܐ ܕܗܲܡܙܸܡ ܡܸܢܕܝܼܵܢܹ̈ܐ ܓܘܼܪܹ̈ܐ.

⁴ ܐܵܢܝܼ ܕܐܡܝܼܪܗܘܿܢ: ”ܒܠܸܫܵܢܲܢ ܒܸܬ ܙܲܪܒܸܢܲܚ، ܣܸܦܘܵܬܲܢ̈ ܕܝܼܲܢ ܝܼܢܵܐ، ܡܵܢܝܼ ܝܠܹܗ ܡܵܪܵܐ ܥܲܠܲܢ؟“

⁵ ”ܡ̣ܢ ܥܸܠܬܵ‌ܐ ܕܛܠܘܼܡܝܵܐ ܕܡܸܣܟܹܢܹ̈ܐ، ܡ̣ܢ ܥܸܠܬܵ‌ܐ ܕܬܲܢܲܚܬܵ‌ܐ ܕܣܢܝܼܩܹ̈ܐ، ܐܵܕܝܼܵܐ ܒܸܬ ܩܵܝܡܹܢ،“ ܒܹܐܡܵܪܵܐ ܝܠܹܗ ܡܵܪܝܵܐ، ”ܒܸܬ ܡܲܬܒܸܢܗܘܿܢ ܒܫܲܝܢܵܐ، ܐܲܝܟܵܐ ܕܪܲܚܪܘܼܚܹܐ ܝܢܵܐ ܕܗܵܘܝܼ.“

⁶ ܗܹܡܸܙܡܵܢܹ̈ܐ ܕܡܵܪܝܵܐ، ܗܹܡܸܙܡܵܢܹ̈ܐ ܕܸܟ݂ܝܹ̈ܐ ܝܢܵܐ، ܐܲܝܟ݂ ܣܹܐܡܵܐ ܨܘܼܪܸܦܵܐ ܒܐܲܬܘܼܢܵܐ ܕܐܲܪܥܵܐ، ܨܘܼܦܝܵܐ ܫܒܲܥ ܓܵܗܹ̈ܐ.

⁷ ܐܲܢ݇ܬ، ܝܵܐ ܡܵܪܝܵܐ، ܒܸܬ ܢܵܛܪܹܬ ܠܗܘܿܢ، ܒܸܬ ܚܲܡܹܝܬ ܠܗܘܿܢ ܡ̣ܢ ܐܵܗܵܐ ܕܵܪܵܐ ܗܲܠ ܥܵܠܲܡ.

⁸ ܒܟܠ ܓܹܒܵܐ ܪ̈ܲܫܝܼܥܹܐ ܟܹܐ ܚܵܕܪܝܼ، ܐܝܼܡܲܢ ܕܡܲܣܠܲܝܬܵ‌ܐ ܦܵܝܫܵܐ ܡܝܘܼܩܸܪܬܵ‌ܐ ܓܵܘ ܒܢܲܝ̈ܢܵܫܵܐ.