ܡܙܡܘܪܐ 116 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܡܘܼܚܸܒ ܠܝܼ ܠܡܵܪܝܵܐ ܣܵܒܵܒ ܫܡܝܼܥ ܠܹܗ ܩܵܠܝܼ ܘܦܲܪ̈ܦܲܠܝܵܬ‌ܝܼ.

² ܣܵܒܵܒ ܡܘܼܟܸܦ ܠܹܗ ܢܵܬܹܗ ܐܸܠܝܼ، ܒܝܘܼܪܟ݂ܵܐ ܕܝܵܘܡܵܢܝܼ̈ ܒܸܬ ܩܵܪܹܝܢ ܐܸܠܹܗ.

³ ܟܪܝܼܟܸܢܗܘܿܢ ܚܸܒ݂ܠܹ̈ܐ ܕܡܵܘܬܵ‌ܐ، ܘܡܘܼܫ݇ܟ̰ܚܸܢܗܘܿܢ ܐܘܼܠܨܵܢܹ̈ܐ ܕܫܝܘܿܠ، ܥܵܘܩܵܢܵܐ ܘܚܲܫܵܐ ܡܘܼܫ݇ܟ̰ܸܚ ܠܝܼ.

⁴ ܗ̇ܝܓܵܗ ܒܫܸܡܵܐ ܕܡܵܪܝܵܐ ܩܪܹܐ ܠܝܼ: ”ܐܘܿܗ، ܝܵܐ ܡܵܪܝܵܐ، ܦܲܨܝܼ ܠܓܵܢܝܼ.“

⁵ ܚܲܢܵܢܵܐ ܝܠܹܗ ܡܵܪܝܵܐ ܘܙܲܕܝܼܩܵܐ، ܘܐܲܠܵܗܲܢ ܡܪܲܚܡܵܢܵܐ ܝܠܹܗ.

⁶ ܟܹܐ ܢܵܛܹܪ ܠܦܫܝܼ̈ܛܹܐ ܡܵܪܝܵܐ، ܦܝܼܫ ܠܝܼ ܡܘܼܟܸܦܵܐ ܘܩܵܡ ܦܲܪܸܩ ܠܝܼ.

⁷ ܕܘܼܪܝ، ܝܵܐ ܓܵܢܝܼ، ܠܢܝܵܚܬܵܟ݂ܝ، ܣܵܒܵܒ ܡܵܪܝܵܐ ܦܪܝܼܥ ܠܹܗ ܐܸܠܵܟ݂ܝ ܒܦܸܪܝܘܼܬܵ‌ܐ.

⁸ ܣܵܒܵܒ ܦܘܼܨܹܐ ܠܘܼܟ݂ ܓܵܢܝܼ ܡ̣ܢ ܡܵܘܬܵ‌ܐ، ܥܲܝܢܝܼ ܡ̣ܢ ܕܸܡܥܝܼܬܵ‌ܐ، ܐܲܩܠܝܼ ܡ̣ܢ ܬܲܪܩܲܠܬܵ‌ܐ.

⁹ ܒܸܬ ܚܵܕܪܹܢ ܩܲܕܡ ܡܵܪܝܵܐ ܒܐܲܪ̈ܥܵܬܹ‌ܐ ܕܚܵܝܹ̈ܐ.

¹⁰ ܗܘܼܡܸܢܝܼ ܟܲܕ ܗܘܼܡܙܸܡ ܠܝܼ: ”ܐܵܢܵܐ ܦܝܼܫ ܠܝܼ ܡܘܼܠܝܸܨܵܐ ܪܵܒܵܐ.“

¹¹ ܐܵܢܵܐ ܐܡܝܼܪܝܼ ܓܵܘ ܡܲܠܝܲܙܬ‌ܝܼ: ”ܟܠ ܒܲܪܢܵܫܵܐ ܕܲܓܵܠܵܐ ܝܠܹܗ.“

¹² ܡܘܼܕܝܼ ܡܲܕܸܪܸܢ ܠܡܵܪܝܵܐ، ܒܘܼܬ ܟܠܹܗ ܦܘܼܪܥܵܢܹܗ ܐܸܠܝܼ؟

¹³ ܟܵܣܵܐ ܕܦܘܼܪ̈ܩܵܢܹܐ ܒܸܬ ܡܲܪܡܸܢ، ܘܒܫܸܡܵܐ ܕܡܵܪܝܵܐ ܒܸܬ ܩܵܪܹܝܢ.

¹⁴ ܢܸܕܪ̈ܝܼ ܠܡܵܪܝܵܐ ܒܸܬ ܬܲܡܸܡܸܢ ܩܲܕܡ ܦܵܬܵ‌ܐ ܕܟܠܹܗ ܥܲܡܹܗ.

¹⁵ ܝܲܩܝܼܪܵܐ ܝܠܹܗ ܒܥܲܝ̈ܢܹܐ ܕܡܵܪܝܵܐ ܡܵܘܬܵ‌ܐ ܕܙܲܕܝܼܩܘܼ̈ܗ‌ܝ.

¹⁶ ܐܘܿܗ، ܝܵܐ ܡܵܪܝܵܐ، ܗܹܐ، ܐܵܢܵܐ ܪܹܓܘܼܟ݂ ܝܼܘܸܢ، ܪܹܓܘܼܟ݂ ܒܪܘܿܢܵܐ ܕܚܸܕܲܡܬܘܼܟ݂، ܩܵܡ ܫܵܪܹܝܬ ܠܗܘܿܢ ܐܸܣܘܼܪ̈ܝܼ.

¹⁷ ܐܸܠܘܼܟ݂ ܒܸܬ ܕܵܒ݂ܚܹܢ ܕܸܒ݂ܚܵܐ ܕܫܲܟܲܪܬܵ‌ܐ، ܘܒܫܸܡܵܐ ܕܡܵܪܝܵܐ ܒܸܬ ܩܵܪܹܝܢ.

¹⁸ ܢܸܕܪ̈ܝܼ ܠܡܵܪܝܵܐ ܒܸܬ ܬܲܡܸܡܸܢ ܩܲܕܡ ܦܵܬܵ‌ܐ ܕܟܠܹܗ ܥܲܡܹܗ،

¹⁹ ܓܵܘ ܕܵܪ̈ܵܬܹ‌ܐ ܕܒܲܝܬܵ‌ܐ ܕܡܵܪܝܵܐ، ܒܓܵܘܵܟ݂ܝ، ܝܵܐ ܐܘܿܪܸܫܠܸܡ. ܗܲܠܸܠܘܼܝܵܐ