ܡܙܡܘܪܐ 115 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܠܵܐ ܐܸܠܲܢ، ܝܵܐ ܡܵܪܝܵܐ، ܠܵܐ ܐܸܠܲܢ، ܐܸܠܵܐ ܠܫܸܡܘܼܟ݂ ܗܲܒ݂ܠ ܐܝܼܩܵܪܵܐ، ܒܘܼܬ ܛܲܝܒܘܼܬܘܼܟ݂، ܒܘܼܬ ܫܲܪܝܼܪܘܼܬܘܼܟ݂.

² ܩܵܡܘܿܕܝܼ ܐܵܡܪܝܼ ܐܸܡܘܵܬܹ̈‌ܐ: ”ܐܲܝܟܵܐ ܝܠܹܗ ܐܲܠܵܗܵܝܗ‌ܝ؟“

³ ܟܲܕ ܐܲܠܵܗܲܢ ܒܫܡܲܝܵܐ ܝܠܹܗ، ܟܠ ܕܒܵܣܡܵܐ ܠܹܗ ܟܹܐ ܥܵܒܹܕ.

⁴ ܨܵܢܲܡܵܝ̈ܗ‌ܝ ܣܹܐܡܵܐ ܘܕܲܗܒ݂ܵܐ ܝܢܵܐ، ܦܘܼܠܚܵܢܵܐ ܕܐܝܼܕܵܬܹ̈‌ܐ ܕܒܲܪܢܵܫܵܐ.

⁵ ܦܘܼܡܵܐ ܐܝܼܬ ܠܗܘܿܢ، ܐܝܼܢܵܐ ܠܹܐ ܗܲܡܙܸܡܝܼ، ܥܲܝ̈ܢܹܐ ܐܝܼܬ ܠܗܘܿܢ، ܐܝܼܢܵܐ ܠܹܐ ܚܵܙܝܼ.

⁶ ܢܵܬܝܵܬܹ̈‌ܐ ܐܝܼܬ ܠܗܘܿܢ، ܐܝܼܢܵܐ ܠܹܐ ܫܵܡܥܝܼ، ܢܵܚܝܼܪܵܐ ܐܝܼܬ ܠܗܘܿܢ، ܐܝܼܢܵܐ ܠܹܐ ܫܵܩܠܝܼ ܪܹܝܚܵܐ.

⁷ ܐܝܼܕܵܬܹ̈‌ܐ ܐܝܼܬ ܠܗܘܿܢ، ܐܝܼܢܵܐ ܠܹܐ ܪܵܓ݂ܫܝܼ، ܐܲܩܠܵܬܹ̈‌ܐ ܐܝܼܬ ܠܗܘܿܢ، ܐܝܼܢܵܐ ܠܹܐ ܚܵܕܪܝܼ، ܠܹܐ ܦܲܠܛܝܼ ܩܵܠܵܐ ܒܒܵܠܘܿܥܬܵܝܗ‌ܝ.

⁸ ܐܲܝܟ݂ ܕܝܼܵܝܗ‌ܝ ܒܸܬ ܗܵܘܝܼ ܬܲܪ̈ܨܵܢܵܝܗ‌ܝ، ܘܟܠ ܕܣܵܒܹܪ ܒܝܼܵܝܗ‌ܝ.

⁹ ܝܵܐ ܐܝܼܣܪܵܐܹܝܠ، ܣܒܘܿܪ ܒܡܵܪܝܵܐ، ܗܲܝܲܪܬܵܝܗ‌ܝ ܘܡܵܛܵܠܵܝܗ‌ܝ ܗ̇ܘ ܝܼܠܹܗ.

¹⁰ ܝܵܐ ܒܹܝܬ ܐܲܗܪܘܿܢ، ܣܒܘܿܪܘܼܢ ܒܡܵܪܝܵܐ، ܗܲܝܲܪܬܵܝܗ‌ܝ ܘܡܵܛܵܠܵܝܗ‌ܝ ܗ̇ܘ ܝܼܠܹܗ.

¹¹ ܝܵܐ ܙܕܝܼ̈ܥܹܐ ܕܡܵܪܝܵܐ، ܣܒܘܿܪܘܼܢ ܒܡܵܪܝܵܐ، ܗܲܝܲܪܬܵܝܗ‌ܝ ܘܡܵܛܵܠܵܝܗ‌ܝ ܗ̇ܘ ܝܼܠܹܗ.

¹² ܡܵܪܝܵܐ ܩܵܡ ܕܵܟܹܪܲܢ؛ ܒܸܬ ܒܲܪܸܟ݂، ܒܸܬ ܒܲܪܸܟ݂ ܠܒܹܝܬ ܐܝܼܣܪܵܐܹܝܠ، ܒܸܬ ܒܲܪܸܟ݂ ܠܒܹܝܬ ܐܲܗܪܘܿܢ.

¹³ ܒܸܬ ܒܲܪܸܟ݂ ܠܙܕܝܼ̈ܥܹܐ ܕܡܵܪܝܵܐ، ܙܥܘܿܪܹ̈ܐ ܥܲܡ ܓܘܼܪܹ̈ܐ.

¹⁴ ܡܲܙܝܸܕ ܡܵܪܝܵܐ ܥܲܠܵܘܟ݂ܘܿܢ، ܥܲܠܵܘܟ݂ܘܿܢ ܘܥܲܠ ܒܢܘܿܢܵܘ̈ܟ݂ܘܿܢ.

¹⁵ ܒܪܝܼܟܹܐ ܝܬܘܿܢ ܠܡܵܪܝܵܐ، ܥܵܒ݂ܕܵܢܵܐ ܕܫܡܲܝܵܐ ܘܐܲܪܥܵܐ.

¹⁶ ܫܡܲܝܹ̈ܐ، ܫܡܲܝܹ̈ܐ ܕܡܵܪܝܵܐ ܝܢܵܐ، ܐܝܼܢܵܐ ܐܲܪܥܵܐ ܝܘܼܗܒܹܠ ܠܹܗ ܠܒܢܲܝ̈ܢܵܫܵܐ.

¹⁷ ܡܝܼ̈ܬܹ‌ܐ ܠܹܐ ܫܲܒܚܝܼ ܠܡܵܪܝܵܐ، ܐܵܦܠܵܐ ܟܠܵܝܗ‌ܝ ܨܵܠܝܵܢܹ̈ܐ ܠܫܸܬܩܵܐ.

¹⁸ ܐܝܼܢܵܐ ܐܲܚܢܲܢ ܒܸܬ ܒܲܪܟܲܚ ܠܡܵܪܝܵܐ، ܡ̣ܢ ܐܵܕܝܼܵܐ ܘܗܲܠ ܥܵܠܲܡ. ܗܲܠܸܠܘܼܝܵܐ.