ܡܙܡܘܪܐ 107 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܣܸܦܪܵܐ ܚܡܝܼܫܵܝܵܐ ܡܙܡܘܪ̈ܐ 107‏‐150

¹ ܫܲܟܪܘܼܢ ܠܡܵܪܝܵܐ ܣܵܒܵܒ ܛܵܒ݂ܵܐ ܝܠܹܗ، ܣܵܒܵܒ ܠܥܵܠܲܡ ܝܼܠܵܗ̇ ܛܲܝܒܘܼܬܹܗ.

² ܫܒ݂ܘܿܩ ܐܵܡܪܝܼ ܦܪ̈ܝܼܩܹܐ ܕܡܵܪܝܵܐ، ܕܦܘܼܪܩܵܝ ܠܹܗ ܡ̣ܢ ܐܝܼܕܵܐ ܕܡܲܠܝܸܨܵܢܵܐ،

³ ܘܡ̣ܢ ܐܲܪ̈ܥܵܬܹ‌ܐ ܓ̰ܘܼܡܥܵܝ ܠܹܗ، ܡ̣ܢ ܡܲܕܢܚܵܐ ܘܡ̣ܢ ܡܲܥܪܒ݂ܵܐ، ܡ̣ܢ ܓܲܪܒܝܵܐ ܘܡ̣ܢ ܬܲܝܡܢܵܐ.

⁴ ܚܕܝܼܪܗܘܿܢ ܓܵܘ ܒܲܪܝܼܵܐ، ܒܐܘܼܪܚܵܐ ܚܵܪܵܒܵܐ، ܠܵܐ ܡܘܼܫ݇ܟ̰ܸܚ ܠܗܘܿܢ ܡܕܝܼܢ݇ܬܵ‌ܐ ܕܥܡܵܪܵܐ.

⁵ ܟܦܝܼܢܹ̈ܐ ܐܘܼܦ ܨܹܗܝܹ̈ܐ، ܓܵܢܵܝܗ‌ܝ ܕܘܼܪܕܸܫ̃ ܠܵܗ̇ ܒܓܵܘܵܝܗ‌ܝ.

⁶ ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܵܝܗ‌ܝ، ܘܡ̣ܢ ܐܘܼܠܨܵܢܵܝ̈ܗ‌ܝ ܦܘܼܨܝܵܝ ܠܹܗ.

⁷ ܘܠܘܼܒܠܵܝ ܠܹܗ ܒܐܘܼܪܚܵܐ ܬܪܘܼܨܬܵ‌ܐ، ܠܹܐܙܵܠܵܐ ܠܡܕܝܼܢ݇ܬܵ‌ܐ ܕܥܡܵܪܵܐ.

⁸ ܫܒ݂ܘܿܩ ܫܲܟܪܝܼ ܠܡܵܪܝܵܐ ܒܘܼܬ ܛܲܝܒܘܼܬܹܗ، ܘܒܘܼܬ ܕܘܼܡܵܪ̈ܘܼܗ‌ܝ ܠܒܢܲܝ̈ܢܵܫܵܐ.

⁹ ܣܵܒܵܒ ܟܹܐ ܡܲܣܒܸܥ ܓܵܢܵܐ ܨܗܝܼܬܵ‌ܐ، ܘܟܹܐ ܡܵܠܹܐ ܛܵܒ݂ܬܵ‌ܐ ܠܓܵܢܵܐ ܟܦܝܼܢܬܵ‌ܐ.

¹⁰ ܐܚܹܪ̈ܢܹܐ ܝܬܝܼܒ݂ ܠܗܘܿܢ ܒܚܸܫܟܵܐ ܘܒܛܸܠܵܢܝܼܬܵ‌ܐ ܕܡܵܘܬܵ‌ܐ، ܐܲܣܝܼܪܹ̈ܐ ܒܐܘܼܠܨܵܢܵܐ ܘܒܦܪܸ̈ܙܠܹܐ،

¹¹ ܣܵܒܵܒ ܥܒ݂ܝܼܕ ܠܗܘܿܢ ܡܵܪܘܿܕܘܼܬܵ‌ܐ ܥܲܠ ܗܹܡܸܙܡܵܢܹ̈ܐ ܕܐܲܠܵܗܵܐ، ܘܡܸܠܟܵܐ ܕܥܸܠܵܝܵܐ ܡܘܼܣܠܹܐ ܠܗܘܿܢ.

¹² ܒܘܼܬ ܐܵܗܵܐ، ܡܘܼܟܸܦ ܠܹܗ ܒܥܲܡܠܵܐ ܠܸܒܵܝܗ‌ܝ، ܬܘܼܪܩܸܠ ܠܗܘܿܢ ܘܠܲܝܬ ܗܘܵܐ ܗܲܝܸܪܵܢܵܐ.

¹³ ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܵܝܗ‌ܝ، ܘܡ̣ܢ ܐܘܼܠܨܵܢܵܝ̈ܗ‌ܝ ܦܘܼܪܩܵܝ ܠܹܗ.

¹⁴ ܦܘܼܠܛܵܝ ܠܹܗ ܡ̣ܢ ܚܸܫܟܵܐ ܘܛܸܠܵܢܝܼܬܵ‌ܐ ܕܡܵܘܬܵ‌ܐ، ܘܩܛܝܼܥ ܠܹܗ ܐܸܣܘܼܪ̈ܵܝܗ‌ܝ.

¹⁵ ܫܒ݂ܘܿܩ ܫܲܟܪܝܼ ܠܡܵܪܝܵܐ ܒܘܼܬ ܛܲܝܒܘܼܬܹܗ، ܘܒܘܼܬ ܕܘܼܡܵܪ̈ܘܼܗ‌ܝ ܠܒܢܲܝ̈ܢܵܫܵܐ.

¹⁶ ܣܵܒܵܒ ܬܒ݂ܝܼܪܹܗ ܬܲܪ̈ܥܵܢܹܐ ܕܢܚܵܫܵܐ، ܘܢܣܝܼܪܹܗ ܕܵܒ݂ܪܹ̈ܐ ܕܦܪܸܙܠܵܐ.

¹⁷ ܣܲܟ݂ܠܹ̈ܐ ܡ̣ܢ ܐܘܼܪܚܵܐ ܕܓܢܵܗܵܝܗ‌ܝ، ܦܝܼܫ ܠܗܘܿܢ ܡܘܼܠܝܸܨܹܐ ܡ̣ܢ ܥܸܠܬܵ‌ܐ ܕܥܵܘܠܵܝܗ‌ܝ.

¹⁸ ܡ̣ܢ ܟܠ ܡܹܐܟ݂ܘܼܠܬܵ‌ܐ ܓܘܼܢܓܸܙ ܠܵܗ̇ ܓܵܢܵܝܗ‌ܝ، ܘܩܘܼܪܒܸܢܗܘܿܢ ܗܲܠ ܬܲܪ̈ܥܵܢܹܐ ܕܡܵܘܬܵ‌ܐ.

¹⁹ ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܵܝܗ‌ܝ، ܘܡ̣ܢ ܐܘܼܠܨܵܢܵܝ̈ܗ‌ܝ ܦܘܼܪܩܵܝ ܠܹܗ.

²⁰ ܫܘܼܕܸܪܹܗ ܚܲܒܪܹܗ ܘܒܘܼܣܡܵܝ ܠܹܗ، ܘܦܘܼܨܝܵܝ ܠܹܗ ܡ̣ܢ ܚܪ̈ܵܒ݂ܵܝܗ‌ܝ.

²¹ ܫܒ݂ܘܿܩ ܫܲܟܪܝܼ ܠܡܵܪܝܵܐ ܒܘܼܬ ܛܲܝܒܘܼܬܹܗ، ܘܒܘܼܬ ܕܘܼܡܵܪ̈ܘܼܗ‌ܝ ܠܒܢܲܝ̈ܢܵܫܵܐ.

²² ܘܕܵܒ݂ܚܝܼ ܕܸܒ݂ܚܵܐ ܕܫܲܟܲܪܬܵ‌ܐ، ܘܗܲܩܝܼ ܒܘܼܬ ܦܘܼܠܚܵܢܘܼ̈ܗ‌ܝ ܒܩܲܘܲܚܬܵ‌ܐ.

²³ ܨܵܠܝܵܢܹ̈ܐ ܕܝܵܡܵܐ ܒܓܵܡܝܼܹ̈ܐ، ܬܲܓܵܪܹ̈ܐ ܒܡ̈ܝܼܵܐ ܪ̈ܘܝܼܚܹܐ.

²⁴ ܐܵܢܝܼ ܚܙܹܐ ܠܗܘܿܢ ܦܘܼܠܚܵܢܹ̈ܐ ܕܡܵܪܝܵܐ، ܘܕܘܼܡܵܪ̈ܘܼܗ‌ܝ ܒܥܘܼܡܩܹ̈ܐ.

²⁵ ܐܡܝܼܪܹܗ ܘܡܘܼܩܸܡ ܠܹܗ ܦܵܘܚܵܐ ܕܥܲܠܥܵܠܵܐ، ܘܦܝܼܫ ܠܗܘܿܢ ܡܘܼܪܡܹܐ ܠܲܦܹ̈ܐ ܕܝܵܡܵܐ.

²⁶ ܐܣܝܼܩ ܠܗܘܿܢ ܠܫܡܲܝܵܐ ܘܨܠܹܐ ܠܗܘܿܢ ܠܬܗܘܿܡܹ̈ܐ، ܦܫܝܼܪܵܗ̇ ܓܵܢܵܝܗ‌ܝ ܒܣܸܪܝܘܼܬܵ‌ܐ.

²⁷ ܦܘܼܢܦܸܠ ܠܗܘܿܢ ܘܫܥܝܼܫ ܠܗܘܿܢ ܐܲܝܟ݂ ܪ̈ܵܘܵܝܹܐ، ܘܟܠܵܗ̇ ܚܸܟ݂ܡܬܵܝܗ‌ܝ ܦܝܼܫ ܠܵܗ̇ ܒܠܝܼܥܬܵ‌ܐ.

²⁸ ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܵܝܗ‌ܝ، ܘܡ̣ܢ ܐܘܼܠܨܵܢܵܝ̈ܗ‌ܝ ܩܵܡ ܦܲܠܸܛ ܠܗܘܿܢ.

²⁹ ܡܘܼܫܬܸܩ ܠܹܗ ܠܥܲܠܥܵܠܵܐ، ܘܗܘܹܐ ܠܗܘܿܢ ܫܸܠܝܹܐ ܠܲܦܹ̈ܐ.

³⁰ ܘܚܕܹܐ ܠܗܘܿܢ ܟܲܕ ܫܬܝܼܩ ܠܵܗ̇، ܘܡܕܘܼܒܪܵܝ ܠܹܗ ܠܠܡܹܐܢܵܐ ܕܨܸܒ݂ܝܵܢܵܝܗ‌ܝ.

³¹ ܫܒ݂ܘܿܩ ܫܲܟܪܝܼ ܠܡܵܪܝܵܐ ܒܘܼܬ ܛܲܝܒܘܼܬܹܗ، ܘܒܘܼܬ ܕܘܼܡܵܪ̈ܘܼܗ‌ܝ ܠܒܢܲܝ̈ܢܵܫܵܐ.

³² ܘܡܲܪܡܝܼ ܠܹܗ ܒܟܸܢܫܵܐ ܕܥܲܡܵܐ، ܘܓܵܘ ܡܵܘܬܒ݂ܵܐ ܕܚܘܵܪ̈ܕܸܩܢܹܐ ܚܵܩܪܝܼ ܠܹܗ.

³³ ܟܹܐ ܡܲܚܕܸܪ ܢܲܗܪ̈ܵܘܵܬܹ‌ܐ ܠܒܲܪܝܼܵܐ، ܘܡܲܒܘܼܥܹ̈ܐ ܕܡ̈ܝܼܵܐ ܠܐܲܪܥܵܐ ܨܗܝܼܬܵ‌ܐ،

³⁴ ܘܐܲܪܥܵܐ ܕܛܥܘܼܢܝܵܬܹ̈‌ܐ ܠܐܲܪܥܵܐ ܡܸܠܚܵܢܬܵ‌ܐ، ܡ̣ܢ ܥܸܠܬܵ‌ܐ ܕܒܝܼܫܘܼܬܵ‌ܐ ܕܝܵܬܒ݂ܵܢܹ̈ܐ ܕܓܵܘܘܼܗ̇.

³⁵ ܟܹܐ ܡܲܚܕܸܪ ܒܲܪܝܼܵܐ ܠܒܸܪ̈ܟܹܐ ܕܡ̈ܝܼܵܐ، ܘܐܲܪܥܵܐ ܨܗܝܼܬܵ‌ܐ ܠܡܲܒܘܼܥܹ̈ܐ ܕܡ̈ܝܼܵܐ.

³⁶ ܘܟܹܐ ܡܲܬܸܒ݂ ܬܵܡܵܐ ܟܦܝܼܢܹ̈ܐ، ܘܟܹܐ ܫܲܬܐܸܣܝܼ ܡܕܝܼܢ݇ܬܵ‌ܐ ܠܸܥܡܵܪܵܐ.

³⁷ ܘܟܹܐ ܙܵܪܥܝܼ ܚܲܩܠܵܢܹ̈ܐ ܘܢܵܨܒ݂ܝܼ ܟܲܪ̈ܡܵܢܹܐ، ܘܫܵܩܠܝܼ ܛܥܘܼܢܝܵܬܹ̈‌ܐ ܦܸܪ̈ܝܹܐ.

³⁸ ܘܟܹܐ ܒܲܪܸܟ݂ ܠܗܘܿܢ ܘܟܹܐ ܙܵܝܕܝܼ ܪܵܒܵܐ، ܘܪܸܣܩܵܝܗ‌ܝ ܠܹܐ ܡܲܒܨܸܪ.

³⁹ ܐܝܼܡܲܢ ܕܚܵܣܪܝܼ ܘܦܵܝܫܝܼ ܡܘܼܟܸܦܹܐ ܡ̣ܢ ܙܠܘܼܡܝܵܐ، ܒܝܼܫܘܼܬܵ‌ܐ، ܘܚܲܫܵܐ،

⁴⁰ ܟܹܐ ܫܲܦܸܟ݂ ܡܲܣܠܲܝܬܵ‌ܐ ܥܲܠ ܢܲܨܝܼܚܹ̈ܐ، ܘܟܹܐ ܡܲܚܠܸܛ ܠܵܗ̇ ܐܘܼܪܚܵܝܗ‌ܝ ܒܐܲܪܥܵܐ ܚܵܪܵܒܵܐ ܕܠܲܝܬ ܠܵܗ̇ ܦܠܵܛܵܐ.

⁴¹ ܐܝܼܢܵܐ ܟܹܐ ܡܲܪܸܡ ܠܗܘܿܢ ܣܢܝܼܩܹ̈ܐ ܠܫܲܝܢܵܐ ܡ̣ܢ ܐܘܼܠܨܵܢܵܐ، ܘܟܹܐ ܥܵܒܹܕ ܐܲܝܟ݂ ܦܸܣܩܵܐ ܫܲܪ̈ܒܵܬܵܝܗ‌ܝ.

⁴² ܒܸܬ ܚܵܙܝܼ ܬܪ̈ܘܼܨܹܐ ܘܒܸܬ ܚܵܕܝܼ، ܘܟܠ ܥܵܘܠܵܐ ܒܸܬ ܐܵܟ̰ܹܡ ܦܘܼܡܹܗ.

⁴³ ܡܵܢܝܼ ܝܠܹܗ ܚܲܟܝܼܡܵܐ؟ ܫܒ݂ܘܿܩ ܢܵܛܹܪ ܐܲܢܹܐ، ܘܦܲܪܡܹܐ ܛܲܝܒܘܼܬܵ‌ܐ ܕܡܵܪܝܵܐ.