ܡܙܡܘܪܐ 104 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܒܲܪܸܟ݂ܝ، ܝܵܐ ܓܵܢܝܼ، ܠܡܵܪܝܵܐ، ܡܵܪܝܵܐ ܐܲܠܵܗ‌ܝܼ ܓܘܼܪܵܐ ܝܘܸܬ ܪܵܒܵܐ، ܙܲܗܝܘܼܬܵ‌ܐ ܘܣܸܩܠܵܐ ܠܒ݂ܝܼܫ ܠܘܼܟ݂.

² ܟܹܐ ܩܵܛܹܒ݂ ܒܲܗܪܵܐ ܐܲܝܟ݂ ܥܵܒܵܝܬܵ‌ܐ، ܟܹܐ ܡܵܬܹܚ ܫܡܲܝܵܐ ܐܲܝܟ݂ ܣܸܬܪܵܐ.

³ ܟܹܐ ܒܵܢܹܐ ܥܲܠ ܡ̈ܝܼܵܐ ܥܸܠܝܼܵܬܘܼ̈ܗ‌ܝ، ܟܹܐ ܥܵܒܹܕ ܥܲܝܒ݂ܵܬܹ̈‌ܐ ܡܲܪܟܲܒ݂ܬܹܗ، ܟܹܐ ܚܵܕܹܪ ܥܲܠ ܓܘܼܠܦܵܢܹ̈ܐ ܕܦܵܘܚܵܐ.

⁴ ܟܹܐ ܥܵܒܹܕ ܡܲܠܲܐܟ݂ܘܼ̈ܗ‌ܝ ܦܵܘܚܹ̈ܐ، ܡܫܲܡܫܵܢܘܼ̈ܗ‌ܝ ܢܘܼܪܵܐ ܠܵܗܝܵܢܵܐ.

⁵ ܡܘܼܩܘܹܐ ܠܹܗ ܐܲܪܥܵܐ ܥܲܠ ܫܲܬܐܸܣܬܘܼܗ̇، ܠܹܐ ܫܵܥܫܵܐ ܠܥܵܠܲܡ ܥܵܠܡܝܼܢ.

⁶ ܒܬܗܘܿܡܵܐ ܐܲܝܟ݂ ܠܒܼܝܼܫܬܵ‌ܐ ܟܘܼܣܹܐ ܠܘܼܟ݂ ܐܸܠܘܼܗ̇، ܥܲܠ ܛܘܼܪ̈ܵܢܹܐ ܟܠܹܐ ܠܗܘܿܢ ܡ̈ܝܼܵܐ.

⁷ ܡ̣ܢ ܢܓ̰ܵܘܬܘܼܟ݂ ܥܪܝܼܩ ܠܗܘܿܢ، ܡ̣ܢ ܩܵܠܵܐ ܕܪܲܥܡܘܼܟ݂ ܡܘܼܠܝܸܙ ܠܗܘܿܢ ܠܸܥܪܵܩܵܐ.

⁸ ܐܣܝܼܩ ܠܗܘܿܢ ܛܘܼܪ̈ܵܢܹܐ، ܨܠܹܐ ܠܗܘܿܢ ܪ̈ܵܘܘܿܠܹܐ، ܠܕܘܼܟܵܐ ܕܫܘܼܬܐܸܣ ܠܘܼܟ݂ ܐܸܠܵܝܗ‌ܝ.

⁹ ܬܚܘܼܡܵܐ ܡܘܼܬܸܒ݂ ܠܘܼܟ݂ ܕܠܵܐ ܥܵܒ݂ܪܝܼ، ܠܵܐ ܕܵܝܪܝܼ ܠܟܲܣܘܼܝܘܼܗ̇ ܐܲܪܥܵܐ.

¹⁰ ܟܹܐ ܫܲܕܸܪ ܥܲܝܢܵܬܹ̈‌ܐ ܓܵܘ ܪ̈ܵܘܘܿܠܹܐ، ܒܹܝܠ ܛܘܼܪ̈ܵܢܹܐ ܟܹܐ ܓ̰ܵܪܝܼ.

¹¹ ܟܹܐ ܡܲܫܬ‌ܝܼ ܠܟܠܵܝܗ‌ܝ ܗܲܝܘܵܢܹ̈ܐ ܕܕܸܫܬܵ‌ܐ، ܚܡܵܪܹ̈ܐ ܕܒܲܪܝܼܵܐ ܟܹܐ ܡܲܬܪܝܼ ܨܲܗܘܵܝܗ‌ܝ.

¹² ܠܟܸܣܠܵܝܗ‌ܝ ܛܲܝܪܹ̈ܐ ܕܫܡܲܝܵܐ ܟܹܐ ܪܵܝܦܝܼ، ܡ̣ܢ ܓܵܘܵܐ ܕܦܲܥܘܵܢܹ̈ܐ ܟܹܐ ܡܲܪܡܝܼ ܩܵܠܵܐ.

¹³ ܟܹܐ ܡܲܫܬܹ‌ܐ ܛܘܼܪ̈ܵܢܹܐ ܡ̣ܢ ܥܸܠܝܼܵܬܘܼ̈ܗ‌ܝ، ܡ̣ܢ ܛܥܘܼܢܝܵܬܹ̈‌ܐ ܕܦܘܼܠܚܵܢܘܼ̈ܟ݂ ܒܸܬ ܣܵܒ݂ܥܵܐ ܐܲܪܥܵܐ.

¹⁴ ܟܹܐ ܡܲܓ̰ܝܸܢ ܓܸܠܵܐ ܩܵܐ ܪܸܣܩܵܐ، ܘܝܲܪܩܵܐ ܩܵܐ ܡܲܦܠܲܚܬܵ‌ܐ ܕܒܲܪܢܵܫܵܐ، ܘܠܦܲܠܘܼܛܹܐ ܬܘܼܪܣܵܝܵܐ ܡ̣ܢ ܐܲܪܥܵܐ،

¹⁵ ܘܚܲܡܪܵܐ ܕܟܹܐ ܡܲܚܕܹܐ ܠܸܒܵܐ ܕܐܢܵܫܵܐ، ܡܸܫܚܵܐ ܠܡܲܒܪܘܼܩܹܐ ܦܵܬܘܵܬܹ̈‌ܐ، ܘܠܲܚܡܵܐ ܕܟܹܐ ܣܵܢܹܕ ܠܸܒܵܐ ܕܐܢܵܫܵܐ.

¹⁶ ܟܹܐ ܣܵܒ݂ܥܝܼ ܐܝܼܠܵܢܹ̈ܐ ܕܡܵܪܝܵܐ، ܐܲܪ̈ܙܹܐ ܕܠܸܒ݂ܢܵܢ ܕܢܨܝܼܒ݂ ܠܹܗ،

¹⁷ ܕܬܵܡܵܐ ܛܲܝܪܹ̈ܐ ܟܹܐ ܬܲܪܨܝܼ ܩܸܢܵܬܹ̈‌ܐ، ܠܲܩܠܵܩ ܒܲܝܬܘܼܗ̇ ܒܫܲܪ̈ܘܲܝܢܹܐ.

¹⁸ ܛܘܼܪ̈ܵܢܹܐ ܪ̈ܵܡܹܐ ܩܵܐ ܕܲܝܨܹ̈ܐ، ܩܵܝܹ̈ܐ ܣܸܬܵܪܵܐ ܠܝܲܪ̈ܒܘܼܥܹܐ.

¹⁹ ܥܒ݂ܝܼܕ ܠܹܗ ܣܲܗܪܵܐ ܠܘܲܥܕܹ̈ܐ، ܫܸܡܫܵܐ ܟܹܐ ܝܵܕܹܥ ܓܢܵܝܬܹܗ.

²⁰ ܟܹܐ ܡܲܬܒܸܬ ܚܸܫܟܵܐ ܘܟܹܐ ܗܵܘܹܐ ܠܲܝܠܹܐ، ܒܓܵܘܹܗ ܟܹܐ ܚܵܕܪܝܼ ܗܲܝܘܵܢܹ̈ܐ ܕܡܲܝܫܵܐ.

²¹ ܓܘܼܪ̈ܝܹܐ ܕܐܲܪ̈ܝܹܐ ܟܹܐ ܓܲܪܓܸܡܝܼ ܥܲܠ ܨܲܝܕܵܝܗ‌ܝ، ܠܸܛܠܵܒܵܐ ܡ̣ܢ ܐܲܠܵܗܵܐ ܡܹܐܟ݂ܘܼܠܬܵܝܗ‌ܝ.

²² ܒܙܪܵܩܵܐ ܕܫܸܡܫܵܐ ܟܹܐ ܓ̰ܵܡܥܝܼ، ܘܓܵܘ ܒܹܝܬ ܡܲܥܡܪܵܝܗ‌ܝ ܟܹܐ ܕܵܡܟ݂ܝܼ.

²³ ܟܹܐ ܦܵܠܹܛ ܒܲܪܢܵܫܵܐ ܠܫܘܼܠܹܗ، ܘܠܦܘܼܠܚܵܢܹܗ ܗܲܠ ܪܲܡܫܵܐ.

²⁴ ܟܡܵܐ ܪܵܒܵܐ ܝܢܵܐ ܥܒ݂ܵܕܘܼ̈ܟ݂، ܝܵܐ ܡܵܪܝܵܐ، ܟܠܵܝܗ‌ܝ ܒܚܸܟ݂ܡܬܵ‌ܐ ܥܒ݂ܝܼܕ ܠܘܼܟ݂، ܡܠܹܐ ܠܵܗ̇ ܐܲܪܥܵܐ ܡ̣ܢ ܥܘܼܬܪܘܼܟ݂.

²⁵ ܐܵܗܵܐ ܝܵܡܵܐ ܓܘܼܪܬܵ‌ܐ ܘܪܘܝܼܚܬܵ‌ܐ، ܬܵܡܵܐ ܐܝܼܬ ܪ̈ܲܚܫܹܐ ܕܠܵܐ ܡܸܢܝܵܢܵܐ، ܚܲܝܘܵܬܹ̈‌ܐ ܙܥܘܿܪܹ̈ܐ ܥܲܡ ܓܘܼܪܹ̈ܐ.

²⁶ ܬܵܡܵܐ ܓܵܡܝܼܹ̈ܐ ܟܹܐ ܚܵܕܪܝܼ، ܘܠܹܘܝܵܬܵܢ ܕܒܪܹܐ ܠܘܼܟ݂ ܠܛܲܐܘܼܠܹܐ ܓܵܘܘܼܗ̇.

²⁷ ܟܠܵܝܗ‌ܝ ܐܸܠܘܼܟ݂ ܟܹܐ ܣܵܒܪܝܼ، ܠܝܼܵܗܒ݂ܵܐ ܡܹܐܟ݂ܘܼܠܬܵܝܗ‌ܝ ܒܥܕܵܢܘܼܗ̇.

²⁸ ܟܹܐ ܝܵܗܒܹܬ ܐܸܠܵܝܗ‌ܝ، ܟܹܐ ܟܲܦܫܝܼ، ܟܹܐ ܦܵܬܚܹܬ ܐܝܼܕܘܼܟ݂، ܟܹܐ ܣܵܒ݂ܥܝܼ ܒܛܵܒ݂ܬܵ‌ܐ.

²⁹ ܟܹܐ ܛܲܫܹܝܬ ܦܵܬܘܼܟ݂، ܟܹܐ ܦܵܝܫܝܼ ܫܓ݂ܝܼܫܹܐ، ܟܹܐ ܫܵܩܠܹܬ ܪܘܼܚܵܝܗ‌ܝ، ܟܹܐ ܦܵܝܫܝܼ ܛܠܝܼܩܹܐ، ܘܠܥܲܦܪܵܝܗ‌ܝ ܟܹܐ ܕܵܝܪܝܼ.

³⁰ ܟܹܐ ܫܲܕܪܸܬ ܪܘܼܚܘܼܟ݂، ܟܹܐ ܦܵܝܫܝܼ ܒܸܪܝܹܐ، ܘܟܹܐ ܚܲܕܸܬܸܬ ܦܵܬܵ‌ܐ ܕܐܲܪܥܵܐ.

³¹ ܗܵܘܹܐ ܚܸܩܪܵܐ ܕܡܵܪܝܵܐ ܠܥܵܠܲܡ، ܚܵܕܹܐ ܡܵܪܝܵܐ ܒܦܘܼܠܚܵܢܘܼ̈ܗ‌ܝ.

³² ܟܹܐ ܚܵܐܹܪ ܒܐܲܪܥܵܐ ܘܟܹܐ ܪܲܬܪܸܬܵ‌ܐ، ܟܹܐ ܕܵܩܹܪ ܒܛܘܼܪ̈ܵܢܹܐ ܘܟܹܐ ܬܲܢܬܸܢܝܼ.

³³ ܒܸܬ ܫܲܒܚܸܢ ܠܡܵܪܝܵܐ ܒܚܲܝܝܼ̈، ܒܸܬ ܙܵܡܪܹܢ ܠܐܲܠܵܗ‌ܝܼ ܟܡܵܐ ܕܝܼܘܸܢ.

³⁴ ܗܵܘܝܵܐ ܒܲܣܝܼܡܬܵ‌ܐ ܐܸܠܹܗ ܗܲܓܲܝܬ‌ܝܼ، ܐܵܢܵܐ ܒܸܬ ܚܵܕܹܝܢ ܒܡܵܪܝܵܐ.

³⁵ ܬܵܝܡܝܼ ܚܲܛܵܝܹ̈ܐ ܡ̣ܢ ܦܵܬܵ‌ܐ ܕܐܲܪܥܵܐ، ܘܪ̈ܲܫܝܼܥܹܐ ܐܚܹܪܢܵܐ ܠܵܐ ܗܵܘܝܼ. ܒܲܪܸܟ݂ܝ، ܝܵܐ ܓܵܢܝܼ، ܠܡܵܪܝܵܐ. ܗܲܠܸܠܘܼܝܵܐ