ܝܘܚܢܢ 17 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܨܠܘܬ‌ܐ ܡܪܢܝܬ‌ܐ

¹ ܡ̣ܢ ܒܵܬܪ ܕܗܘܼܡܙܸܡ ܠܹܗ ܝܼܫܘܿܥ ܐܲܢܹܐ، ܡܘܼܪܸܡ ܠܹܗ ܥܲܝܢܘܼ̈ܗ‌ܝ ܠܫܡܲܝܵܐ ܘܐܡܝܼܪܹܗ: ”ܝܵܐ ܒܵܒܵܐ، ܐܬܹ‌ܐ ܠܵܗ̇ ܣܵܥܲܬ، ܚܩܘܿܪ ܠܒܪܘܿܢܘܼܟ݂، ܘܐܘܼܦ ܒܪܘܿܢܘܼܟ݂ ܒܸܬ ܚܵܩܹܪܘܼܟ݂.

² ”ܝܘܼܗܒܹܠ ܠܘܼܟ݂ ܐܸܠܹܗ ܫܘܼܠܛܵܢܵܐ ܥܲܠ ܟܠܵܝܗ‌ܝ ܒܢܲܝ̈ܢܵܫܵܐ، ܕܝܵܗܒܹܠ ܚܲܝܹ̈ܐ ܕܠܥܵܠܲܡ ܠܟܠܵܝܗ‌ܝ ܐܵܢܝܼ ܕܝܘܼܗܒ݂ܵܝ ܠܘܼܟ݂ ܐܸܠܹܗ.

³ ”ܐܲܢܹܐ ܝܢܵܐ ܚܲܝܹ̈ܐ ܕܠܥܵܠܲܡ، ܕܝܵܕܥܝܼ ܠܘܼܟ݂، ܐܲܢ݇ܬ ܕܝܼܘܸܬ ܒܢܲܦ̮ܫܘܼܟ݂ ܐܲܠܵܗܵܐ ܫܲܪܝܼܪܵܐ، ܘܝܼܫܘܿܥ ܡܫܝܼܚܵܐ ܗ̇ܘ ܕܫܘܼܕܸܪܘܼܟ݂.

⁴ ”ܐܵܢܵܐ ܚܩܝܼܪܝܼ ܐܸܠܘܼܟ݂ ܥܲܠ ܐܲܪܥܵܐ ܒܬܲܡܲܡܬܵ‌ܐ ܕܦܘܼܠܚܵܢܵܐ ܕܝܘܼܗܒܹܠ ܠܘܼܟ݂ ܐܸܠܝܼ ܕܥܵܒ݂ܕܹܢ ܗܘܵܐ ܠܹܗ.

⁵ ”ܘܐܵܕܝܼܵܐ ܚܩܘܿܪܝܼ ܥܲܡܘܼܟ݂ ܝܵܐ ܒܵܒܵܐ، ܒܚܸܩܪܵܐ ܕܐܝܼܬ ܗܘܵܐ ܠܝܼ ܠܟܸܣܠܘܼܟ݂ ܡ̣ܢ ܩܲܕܡ ܕܕܘܼܢܝܹܐ ܦܵܝܫܵܐ ܗܘܵܐ ܒܪܝܼܬܵ‌ܐ.

⁶ ”ܓܠܹܐ ܠܝܼ ܫܸܡܘܼܟ݂ ܠܐܵܢܝܼ ܕܝܘܼܗܒ݂ܵܝ ܠܘܼܟ݂ ܐܸܠܝܼ ܡ̣ܢ ܓܵܘ ܥܵܠܡܵܐ ܕܐܵܗܵܐ ܕܘܼܢܝܹܐ. ܐܵܢܝܼ ܕܕܝܼܘܼܟ݂ ܝܼܗܘܵܘ، ܘܐܲܢ݇ܬ ܝܘܼܗܒ݂ܵܝ ܠܘܼܟ݂ ܐܸܠܝܼ، ܘܐܵܢܝܼ ܢܛܝܼܪܗܘܿܢ ܗܹܡܸܙܡܵܢܘܼ̈ܟ݂.

⁷ ”ܘܐܵܕܝܼܵܐ ܟܹܐ ܝܵܕܥܝܼ ܕܟܠ ܡܸܢܕܝܼ ܕܝܘܼܗܒܹܠ ܠܘܼܟ݂ ܐܸܠܝܼ ܡ̣ܢ ܠܟܸܣܠܘܼܟ݂ ܝܼܠܹܗ.

⁸ ”ܣܵܒܵܒ ܗܹܡܸܙܡܵܢܹ̈ܐ ܕܝܘܼܗܒܹܠ ܠܘܼܟ݂ ܐܸܠܝܼ ܝܘܼܗܒ݂ܵܝ ܠܝܼ ܐܸܠܵܝܗ‌ܝ، ܘܐܵܢܝܼ ܩܘܼܒܠܵܝ ܠܗܘܿܢ، ܘܫܲܪܝܼܪܵܐܝܼܬ ܝܕܝܼܥ ܠܗܘܿܢ ܘܗܘܼܡܸܢܗܘܿܢ ܕܡ̣ܢ ܠܟܸܣܠܘܼܟ݂ ܦܠܝܼܛ ܠܝܼ ܘܐܲܢ݇ܬ ܫܘܼܕܸܪܘܼܟ݂ ܐܸܠܝܼ.

⁹ ”ܒܘܼܬ ܐܲܢܹܐ ܨܲܠܘܼܝܹܐ ܝܘܸܢ، ܘܠܵܐ ܒܘܼܬ ܟܠܹܗ ܥܵܠܡܵܐ، ܐܝܼܢܵܐ ܒܘܼܬ ܐܵܢܝܼ ܕܝܘܼܗܒ݂ܵܝ ܠܘܼܟ݂ ܐܸܠܝܼ، ܣܵܒܵܒ ܕܝܼܢܵܐ ܕܝܼܘܼܟ݂.

¹⁰ ”ܟܠ ܡܸܢܕܝܼ ܕܝܼܠܹܗ ܕܝܼܝܼ، ܕܝܼܘܼܟ݂ ܝܼܠܹܗ، ܘܟܠ ܡܸܢܕܝܼ ܕܝܼܠܹܗ ܕܝܼܘܼܟ݂، ܕܝܼܝܼ ܝܠܹܗ، ܘܐܵܢܵܐ ܦܝܵܫܵܐ ܝܘܸܢ ܚܩܝܼܪܵܐ ܒܝܼܵܝܗ‌ܝ.

¹¹ ”ܡ̣ܢ ܐܵܕܝܼܵܐ ܐܵܢܵܐ ܠܹܐ ܗܵܘܹܝܢ ܓܵܘ ܕܘܼܢܝܹܐ، ܐܝܼܢܵܐ ܐܵܢܝܼ ܗܸܫ ܓܵܘ ܕܘܼܢܝܹܐ ܝܢܵܐ، ܘܐܵܢܵܐ ܒܹܐܬܵܝܵܐ ܝܘܸܢ ܠܟܸܣܠܘܼܟ݂. ܒܵܒܵܐ ܩܲܕܝܼܫܵܐ، ܢܛܘܿܪܗܘܿܢ ܒܫܸܡܘܼܟ݂ ܕܝܘܼܗܒܹܠ ܠܘܼܟ݂ ܐܸܠܝܼ، ܕܗܵܘܝܼ ܚܲܕ، ܕܵܐܟ݂ܝܼ ܕܝܼܘܲܚ ܐܲܚܢܲܢ.

¹² ”ܐܝܼܡܲܢ ܕܐܵܢܵܐ ܥܲܡܵܝܗ‌ܝ ܝܘܸܢ ܗܘܵܐ ܓܵܘ ܕܘܼܢܝܹܐ، ܢܛܝܼܪܵܝ ܠܝܼ ܒܫܸܡܘܼܟ݂ ܕܝܘܼܗܒܹܠ ܠܘܼܟ݂ ܐܸܠܝܼ. ܘܐܘܼܦ ܚܲܕ ܡܸܢܵܝܗ‌ܝ ܠܵܐ ܛܠܝܼܩ ܠܹܗ ܐܸܠܵܐ ܒܪܘܿܢܵܐ ܕܐܲܒ݂ܕܵܢܵܐ، ܕܦܵܐܹܫ ܬܘܼܡܸܡܵܐ ܟܬܵܒ݂ܵܐ.

¹³ ”ܘܐܵܕܝܼܵܐ ܒܹܐܬܵܝܵܐ ܝܘܸܢ ܠܟܸܣܠܘܼܟ݂، ܗܲܡܙܘܼܡܹܐ ܝܘܸܢ ܐܲܢܹܐ ܓܵܘ ܕܘܼܢܝܹܐ ܕܦܵܝܫܵܐ ܬܘܼܡܸܡܬܵ‌ܐ ܚܲܕܘܼܬ‌ܝܼ ܒܝܼܵܝܗ‌ܝ.

¹⁴ ”ܐܵܢܵܐ ܝܘܼܗܒܹܠ ܠܝܼ ܐܸܠܵܝܗ‌ܝ ܗܹܡܸܙܡܵܢܘܼ̈ܟ݂، ܘܥܵܠܡܵܐ ܩܵܡ ܣܵܢܹܐ ܠܗܘܿܢ، ܣܵܒܵܒ ܠܹܐ ܝܢܵܐ ܡ̣ܢ ܥܵܠܡܵܐ، ܕܵܐܟ݂ܝܼ ܕܐܵܢܵܐ ܠܹܐ ܝܘܸܢ ܡ̣ܢ ܥܵܠܡܵܐ.

¹⁵ ”ܠܹܐ ܝܘܸܢ ܨܲܠܘܼܝܹܐ ܕܫܵܩܠܹܬ ܠܗܘܿܢ ܡ̣ܢ ܓܵܘ ܕܘܼܢܝܹܐ، ܐܝܼܢܵܐ ܕܢܵܛܪܹܬ ܠܗܘܿܢ ܡ̣ܢ ܒܝܼܫܵܐ.

¹⁶ ”ܐܵܢܝܼ ܠܹܐ ܝܢܵܐ ܡ̣ܢ ܐܵܗܵܐ ܥܵܠܡܵܐ ܕܵܐܟ݂ܝܼ ܕܐܵܢܵܐ ܠܹܐ ܝܘܸܢ ܡ̣ܢ ܐܵܗܵܐ ܥܵܠܡܵܐ.

¹⁷ ”ܩܲܕܸܫ ܠܗܘܿܢ ܒܫܪܵܪܵܐ. ܗܹܡܸܙܡܵܢܘܼܟ݂ ܫܪܵܪܵܐ ܝܠܵܗ̇.

¹⁸ ”ܕܵܐܟ݂ܝܼ ܕܐܲܢ݇ܬ ܫܘܼܕܸܪܘܼܟ݂ ܐܸܠܝܼ ܓܵܘ ܕܘܼܢܝܹܐ، ܗܵܕܟ݂ܵܐ ܐܘܼܦ ܐܵܢܵܐ ܫܘܼܕܪܵܝ ܠܝܼ ܓܵܘ ܕܘܼܢܝܹܐ.

¹⁹ ”ܒܘܼܬ ܕܝܼܵܝܗ‌ܝ ܐܵܢܵܐ ܡܩܲܕܘܼܫܹܐ ܝܘܸܢ ܓܵܢܝܼ، ܕܐܘܼܦ ܐܵܢܝܼ ܗܵܘܝܼ ܡܩܘܼܕܫܹܐ ܒܫܲܪܝܼܪܘܼܬܵ‌ܐ.

²⁰ ”ܠܹܐ ܝܘܸܢ ܨܲܠܘܼܝܹܐ ܒܘܼܬ ܐܲܢܹܐ ܐܲܚܟ̰ܝܼ، ܐܸܠܵܐ ܐܘܼܦ ܒܘܼܬ ܐܵܢܝܼ ܕܗܲܡܸܢܝܼ ܒܝܼܝܼ ܒܝܲܕ ܗܹܡܸܙܡܵܢܵܝܗ‌ܝ،

²¹ ”ܕܟܠܵܝܗ‌ܝ ܗܵܘܝܼ ܚܲܕ، ܕܵܐܟ݂ܝܼ ܕܐܲܢ݇ܬ، ܝܵܐ ܒܵܒܵܐ، ܒܝܼܝܼ ܝܘܸܬ، ܘܐܵܢܵܐ ܒܝܼܘܼܟ݂، ܕܐܘܼܦ ܐܵܢܝܼ ܗܵܘܝܼ ܚܲܕ ܒܝܼܲܢ، ܕܗܲܡܸܢ ܥܵܠܡܵܐ ܕܐܲܢ݇ܬ ܫܘܼܕܸܪܘܼܟ݂ ܐܸܠܝܼ.

²² ”ܝܘܼܗܒܹܠ ܠܝܼ ܐܸܠܵܝܗ‌ܝ ܚܸܩܪܵܐ ܕܝܘܼܗܒܹܠ ܠܘܼܟ݂ ܐܸܠܝܼ، ܕܗܵܘܝܼ ܚܲܕ ܕܵܐܟ݂ܝܼ ܕܐܲܚܢܲܢ ܚܲܕ ܝܼܘܲܚ،

²³ ”ܐܵܢܵܐ ܒܝܼܵܝܗ‌ܝ ܝܘܸܢ ܘܐܲܢ݇ܬ ܒܝܼܝܼ ܝܘܸܬ. ܗܵܕܟ݂ܵܐ ܒܸܬ ܦܵܐܹܫ ܡܘܼܟܡܸܠܵܐ ܚܘܼܝܵܕܵܐ، ܕܝܵܕܹܥ ܥܵܠܡܵܐ ܕܐܲܢ݇ܬ ܫܘܼܕܸܪܘܼܟ݂ ܐܸܠܝܼ، ܘܡܘܼܚܸܒܵܝ ܠܘܼܟ݂ ܕܵܐܟ݂ܝܼ ܕܡܘܼܚܸܒ ܠܘܼܟ݂ ܐܸܠܝܼ.

²⁴ ”ܝܵܐ ܒܵܒܵܐ، ܒܸܛܠܵܒܵܐ ܝܘܸܢ ܕܐܵܢܝܼ ܕܝܘܼܗܒ݂ܵܝ ܠܘܼܟ݂ ܐܸܠܝܼ ܗܵܘܝܼ ܥܲܡܝܼ ܒܗ̇ܝ ܕܘܼܟܵܐ ܕܐܵܢܵܐ ܝܘܸܢ، ܕܚܵܙܝܼ ܚܸܩܪܵܐ ܕܐܲܢ݇ܬ ܝܘܼܗܒܹܠ ܠܘܼܟ݂ ܐܸܠܝܼ، ܣܵܒܵܒ ܡܘܼܚܸܒ ܠܘܼܟ݂ ܐܸܠܝܼ ܡ̣ܢ ܩܲܕܡ ܫܘܼܪܵܝܵܐ ܕܒܪܝܼܬܵ‌ܐ.

²⁵ ”ܝܵܐ ܒܵܒܵܐ ܙܲܕܝܼܩܵܐ، ܐܵܦܸܢ ܕܥܵܠܡܵܐ ܠܹܐ ܝܵܕܥܝܼ ܠܘܼܟ݂، ܐܝܼܢܵܐ ܐܵܢܵܐ ܟܹܐ ܝܵܕܥܹܢܘܼܟ݂. ܘܐܘܼܦ ܐܲܢܹܐ ܟܹܐ ܝܵܕܥܝܼ ܕܐܲܢ݇ܬ ܫܘܼܕܸܪܘܼܟ݂ ܐܸܠܝܼ.

²⁶ ”ܡܘܼܕܸܥ ܠܝܼ ܫܸܡܘܼܟ݂ ܐܸܠܵܝܗ‌ܝ، ܘܒܘܼܫ ܙܵܘܕܵܐ ܒܸܬ ܡܲܕܥܸܢܹܗ، ܕܗܵܘܹܐ ܓܵܘܵܝܗ‌ܝ ܗ̇ܘ ܚܘܼܒܵܐ ܕܒܝܼܹܗ ܩܵܡ ܡܲܚܸܒܸܬ ܠܝܼ، ܘܕܐܵܢܵܐ ܗܵܘܹܝܢ ܒܝܼܵܝܗ‌ܝ.“