ܝܘܚܢܢ 14 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܝܫܘܥ ܒܝܗܒ݂ܐ ܠܒܐ ܠܬܠܡܝ̈ܕܐ

¹ ”ܠܵܐ ܦܵܐܹܫ ܫܓ݂ܝܼܫܵܐ ܠܸܒܵܘܟ݂ܘܿܢ، ܗܲܡܸܢܘܼܢ ܒܐܲܠܵܗܵܐ ܘܐܘܼܦ ܒܝܼܝܼ ܗܲܡܸܢܘܼܢ.

² ”ܓܵܘ ܒܲܝܬܵ‌ܐ ܕܒܵܒܝܼ ܐܝܼܬ ܪܵܒܵܐ ܡܲܥܡܪܹ̈ܐ. ܐܸܢ ܠܵܐ ܗܵܘܝܵܐ ܗܘܵܐ ܗܵܕܟ݂ܵܐ، ܒܸܬ ܐܵܡܪܹܢ ܗܘܵܐ ܐܸܠܵܘܟ݂ܘܿܢ، ܣܵܒܵܒ ܐܵܢܵܐ ܒܹܐܙܵܠܵܐ ܝܘܸܢ ܕܗܲܕܪܸܢ ܩܵܬܵܘܟ݂ܘܿܢ ܕܘܼܟܵܐ.

³ ”ܘܐܸܢ ܐܵܙܹܠ݇ܢ ܘܗܲܕܪܸܢ ܕܘܼܟܵܐ ܩܵܬܵܘܟ݂ܘܿܢ، ܒܸܬ ܕܵܝܪܹܢ ܘܠܲܒܠܸܢܵܘܟ݂ܘܿܢ ܠܟܸܣܠܝܼ، ܕܐܘܼܦ ܐܲܚܬܘܿܢ ܗܵܘܹܝܬܘܿܢ ܐܲܝܟܵܐ ܕܐܵܢܵܐ ܝܘܸܢ.

⁴ ”ܘܐܲܚܬܘܿܢ ܟܹܐ ܝܵܕܥܝܼܬܘܿܢ ܐܘܼܪܚܵܐ ܠܕܘܼܟܵܐ ܕܐܵܢܵܐ ܒܹܐܙܵܠܵܐ ܝܘܸܢ.“

⁵ ܐܡܝܼܪܹܗ ܬܐܘܿܡܵܐ: ”ܡܵܪܝܼ، ܠܹܐ ܝܘܲܚ ܒܝܼܕܵܥܵܐ ܠܐܲܝܟܵܐ ܒܹܐܙܵܠܵܐ ܝܘܸܬ، ܕܵܐܟ݂ܝܼ ܡܵܨܲܚ ܝܵܕܥܲܚ ܠܐܘܼܪܚܵܐ؟“

⁶ ܓ̰ܘܼܘܸܒ ܠܹܗ ܐܸܠܹܗ ܝܼܫܘܿܥ: ”ܐܵܢܵܐ ܝܘܸܢ ܐܘܼܪܚܵܐ ܘܫܪܵܪܵܐ ܘܚܲܝܹ̈ܐ. ܐܘܼܦ ܚܲܕ ܠܹܐ ܐܵܬܹ‌ܐ ܠܟܸܣ ܒܵܒܵܐ ܐܸܠܵܐ ܒܝܼܝܼ.

⁷ ”ܐܸܢ ܐܸܠܝܼ ܝܵܕܥܝܼܬܘܿܢ ܗܘܵܘ، ܐܘܼܦ ܠܒܵܒܝܼ ܒܸܬ ܝܵܕܥܝܼܬܘܿܢ ܗܘܵܘ. ܐܝܼܢܵܐ ܡ̣ܢ ܐܵܕܝܼܵܐ ܟܹܐ ܝܵܕܥܝܼܬܘܿܢ ܠܹܗ، ܘܚܙܹܐ ܠܵܘܟ݂ܘܿܢ ܐܸܠܹܗ.“

⁸ ܐܡܝܼܪܹܗ ܐܸܠܹܗ ܦܝܼܠܝܼܦܘܿܣ: ”ܡܵܪܝܼ، ܡܲܚܙܝܼ ܠܲܢ ܒܵܒܵܐ ܘܡܵܠܝܵܢܬܵ‌ܐ ܝܠܵܗ̇ ܐܸܠܲܢ.“

⁹ ܓ̰ܘܼܘܸܒ ܠܹܗ ܐܸܠܹܗ ܝܼܫܘܿܥ: ”ܝܵܐ ܦܝܼܠܝܼܦܘܿܣ، ܟܠܹܗ ܐܵܗܵܐ ܙܲܒ݂ܢܵܐ ܥܲܡܵܘܟ݂ܘܿܢ ܝܼܘܸܢ ܘܗܸܫ ܠܹܐ ܝܘܸܬ ܒܝܼܕܵܥܝܼ؟ ܡ̇ܢ ܕܐܸܠܝܼ ܚܵܙܹܐ ܚܸܙܝܵܐ ܝܠܹܗ ܠܒܵܒܵܐ. ܕܵܐܟ݂ܝܼ ܒܹܐܡܵܪܵܐ ܝܘܸܬ: ’ܡܲܚܙܝܼ ܠܲܢ ܒܵܒܵܐ‘؟

¹⁰ ”ܠܹܐ ܝܘܸܬ ܗܲܡܘܼܢܹܐ ܕܐܵܢܵܐ ܒܒܵܒܵܐ ܝܘܸܢ ܘܒܵܒܵܐ ܒܝܼܝܼ ܝܠܹܗ؟ ܗܹܡܸܙܡܵܢܹ̈ܐ ܕܐܵܢܵܐ ܗܲܡܙܘܼܡܹܐ ܝܘܸܢ ܐܸܠܵܘܟ݂ܘܿܢ ܠܹܐ ܝܘܸܢ ܗܲܡܙܘܼܡܵܝ ܡ̣ܢ ܓܵܢܝܼ، ܐܸܠܵܐ ܒܵܒܵܐ ܕܒܸܥܡܵܪܵܐ ܝܠܹܗ ܒܝܼܝܼ، ܗ̇ܘ ܒܸܥܒ݂ܵܕܵܐ ܝܠܹܗ ܦܘܼܠܚܵܢܘܼ̈ܗ‌ܝ.

¹¹ ”ܗܲܡܸܢܘܼܢ ܕܐܵܢܵܐ ܒܒܵܒܵܐ ܝܘܸܢ ܘܒܵܒܵܐ ܒܝܼܝܼ ܝܠܹܗ. ܐܸܢ ܒܐܵܗܵܐ ܠܹܐ ܗܲܡܸܢܝܼܬܘܿܢ، ܗܲܡܸܢܘܼܢ ܒܘܼܬ ܦܘܼܠܚܵܢܹ̈ܐ.

¹² ”ܬܪܘܼܨܵܐ، ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܡ̇ܢ ܕܗܲܡܸܢ ܒܝܼܝܼ ܒܸܬ ܥܵܒܹܕ ܦܘܼܠܚܵܢܹ̈ܐ ܕܐܵܢܵܐ ܒܸܥܒ݂ܵܕܵܐ ܝܘܸܢ، ܘܒܘܼܫ ܓܘܼܪܹ̈ܐ ܡܸܢܵܝܗ‌ܝ ܒܸܬ ܥܵܒܹܕ، ܣܵܒܵܒ ܐܵܢܵܐ ܠܟܸܣ ܒܵܒܵܐ ܒܹܐܙܵܠܵܐ ܝܘܸܢ.

¹³ ”ܘܐܵܢܵܐ ܒܸܬ ܥܵܒ݂ܕܹܢ ܡܸܢܕܝܼ ܕܛܵܠܒܝܼܬܘܿܢ ܒܫܸܡܝܼ، ܕܦܵܐܹܫ ܚܩܝܼܪܵܐ ܒܵܒܵܐ ܒܒܪܘܿܢܵܐ.

¹⁴ ”ܐܸܢ ܛܵܠܒܝܼܬܘܿܢ ܡܸܢܕܝܼ ܒܫܸܡܝܼ، ܐܵܢܵܐ ܒܸܬ ܥܵܒ݂ܕܹܢܹܗ.“

ܩܘܠܐ ܕܪܘܚܐ ܕܩܘܕܫܐ

¹⁵ ”ܐܸܢ ܡܲܚܸܒܝܼܬܘܿܢ ܠܝܼ، ܢܛܘܿܪܘܼܢ ܦܘܼܩܕܵܢܝܼ̈،

¹⁶ ”ܘܐܵܢܵܐ ܒܸܬ ܛܵܠܒܹܢ ܡ̣ܢ ܒܵܒܵܐ ܘܗ̇ܘ ܒܸܬ ܝܵܗܒܹܠ ܠܵܘܟ݂ܘܿܢ ܚܲܕ ܗܲܝܸܪܵܢܵܐ ܐܚܹܪܢܵܐ ܕܗܵܘܹܐ ܥܲܡܵܘܟ݂ܘܿܢ ܗܲܠ ܥܵܠܲܡ،

¹⁷ ”ܕܝܼܠܹܗ ܪܘܼܚܵܐ ܕܫܪܵܪܵܐ، ܗ̇ܘ ܕܥܵܠܡܵܐ ܠܹܐ ܡܵܨܹܐ ܠܩܲܒܘܼܠܹܗ، ܣܵܒܵܒ ܠܹܐ ܝܠܹܗ ܒܸܚܙܵܝܹܗ، ܘܐܘܼܦ ܠܵܐ ܟܹܐ ܝܵܕܹܥ ܠܹܗ. ܐܝܼܢܵܐ ܐܲܚܬܘܿܢ ܟܹܐ ܝܵܕܥܝܼܬܘܿܢ ܠܹܗ، ܣܵܒܵܒ ܠܟܸܣܠܵܘܟ݂ܘܿܢ ܝܼܠܹܗ ܘܒܸܬ ܗܵܘܹܐ ܓܵܘܵܘܟ݂ܘܿܢ.

¹⁸ ”ܠܹܐ ܫܵܒ݂ܩܹܢܵܘܟ݂ܘܿܢ ܝܲܬܘܼܡܹ̈ܐ، ܒܸܬ ܕܵܝܪܹܢ ܠܟܸܣܠܵܘܟ݂ܘܿܢ.

¹⁹ ”ܡ̣ܢ ܒܵܬܪ ܚܲܕ ܙܲܒ݂ܢܵܐ ܟܸܪܝܵܐ ܥܵܠܡܵܐ ܠܹܐ ܚܵܙܹܐ ܠܝܼ، ܐܝܼܢܵܐ ܐܲܚܬܘܿܢ ܒܸܬ ܚܵܙܹܝܬܘܿܢ ܠܝܼ، ܣܵܒܵܒ ܐܵܢܵܐ ܚܵܝܵܐ ܝܘܸܢ ܐܘܼܦ ܐܲܚܬܘܿܢ ܒܸܬ ܚܵܝܹܝܬܘܿܢ.

²⁰ ”ܒܗ̇ܘ ܝܵܘܡܵܐ ܒܸܬ ܝܵܕܥܝܼܬܘܿܢ ܕܐܵܢܵܐ ܒܒܵܒܵܐ ܝܘܸܢ، ܘܐܲܚܬܘܿܢ ܒܝܼܝܼ، ܘܐܵܢܵܐ ܒܝܼܵܘܟ݂ܘܿܢ.

²¹ ”ܡ̇ܢ ܕܐܝܼܬ ܠܹܗ ܦܘܼܩܕܵܢܝܼ̈ ܘܢܵܛܹܪܗܘܿܢ، ܗ̇ܘ ܟܹܐ ܡܲܚܸܒ ܠܝܼ. ܘܗ̇ܘ ܕܡܲܚܸܒ ܠܝܼ ܒܸܬ ܦܵܐܹܫ ܡܘܼܚܸܒܵܐ ܡ̣ܢ ܒܵܒܝܼ، ܘܐܵܢܵܐ ܒܸܬ ܡܲܚܸܒܸܢܹܗ ܘܒܸܬ ܡܲܚܙܹܝܢ ܓܵܢܝܼ ܐܸܠܹܗ.“

²² ܐܡܝܼܪܹܗ ܐܸܠܹܗ ܝܼܗܘܼܕܵܐ (ܠܵܐ ܣܟܲܪܝܘܿܛܵܐ): ”ܡܵܪܝܼ، ܕܵܐܟ݂ܝܼ ܝܠܵܗ̇ ܕܒܸܬ ܡܲܚܙܹܝܬ ܓܵܢܘܼܟ݂ ܐܸܠܲܢ ܐܝܼܢܵܐ ܠܵܐ ܠܥܵܠܡܵܐ؟“

²³ ܓ̰ܘܼܘܸܒ ܠܹܗ ܝܼܫܘܿܥ ܘܐܡܝܼܪܹܗ ܐܸܠܹܗ: ”ܐܸܢ ܐܢܵܫܵܐ ܡܲܚܸܒ ܠܝܼ، ܒܸܬ ܢܵܛܹܪ ܗܹܡܸܙܡܵܢܝܼ̈، ܘܒܵܒܝܼ ܒܸܬ ܡܲܚܸܒ ܠܹܗ، ܘܒܸܬ ܐܵܬܲܚ ܘܡܲܬܒܲܚ ܡܲܥܡܪܵܐ ܠܟܸܣܠܹܗ.

²⁴ ”ܘܗ̇ܘ ܕܠܹܐ ܡܲܚܸܒ ܠܝܼ، ܠܹܐ ܢܵܛܹܪ ܗܹܡܸܙܡܵܢܝܼ̈. ܗܹܡܸܙܡܵܢ ܕܒܸܫܡܵܥܵܐ ܝܬܘܿܢ ܠܹܐ ܝܠܵܗ̇ ܕܝܼܝܼ، ܐܸܠܵܐ ܕܒܵܒܵܐ ܕܩܵܡ ܫܲܕܸܪܝܼ.

²⁵ ”ܐܲܢܹܐ ܗܘܼܡܙܸܡ ܠܝܼ ܐܸܠܵܘܟ݂ܘܿܢ ܗܸܫ ܐܵܢܵܐ ܥܲܡܵܘܟ݂ܘܿܢ ܝܼܘܸܢ.

²⁶ ”ܐܝܼܢܵܐ ܐܝܼܡܲܢ ܕܒܵܒܵܐ ܫܲܕܸܪܵܘܟ݂ܘܿܢ ܗܲܝܸܪܵܢܵܐ ܒܫܸܡܝܼ، ܕܝܼܠܹܗ ܪܘܼܚܵܐ ܕܩܘܼܕܫܵܐ، ܗ̇ܘ ܒܸܬ ܡܲܠܸܦ ܠܵܘܟ݂ܘܿܢ ܟܠ ܡܸܢܕܝܼ، ܘܒܸܬ ܡܲܕܟܸܪܵܘܟ݂ܘܿܢ ܟܠ ܡܸܢܕܝܼ ܕܐܡܝܼܪܝܼ ܐܸܠܵܘܟ݂ܘܿܢ.

²⁷ ”ܫܠܵܡܵܐ ܒܸܫܒ݂ܵܩܵܐ ܝܘܸܢ ܠܟܸܣܠܵܘܟ݂ܘܿܢ، ܫܠܵܡܝܼ ܒܝܼܵܗܒ݂ܵܐ ܝܘܸܢ ܐܸܠܵܘܟ݂ܘܿܢ. ܠܵܐ ܕܵܐܟ݂ܝܼ ܕܥܵܠܡܵܐ ܟܹܐ ܝܵܗܒܹܠ ܒܝܼܵܗܒ݂ܵܐ ܝܘܸܢ ܐܸܠܵܘܟ݂ܘܿܢ. ܠܵܐ ܦܵܐܹܫ ܫܓ݂ܝܼܫܵܐ ܠܸܒܵܘܟ݂ܘܿܢ ܘܠܵܐ ܙܵܕܹܥ.

²⁸ ”ܫܡܝܼܥ ܠܵܘܟ݂ܘܿܢ ܕܐܡܝܼܪܝܼ ܐܸܠܵܘܟ݂ܘܿܢ: ’ܒܹܐܙܵܠܵܐ ܝܘܸܢ، ܐܝܼܢܵܐ ܒܸܬ ܕܵܝܪܹܢ ܠܟܸܣܠܵܘܟ݂ܘܿܢ.‘ ܐܸܢ ܗܵܘܹܝܬܘܿܢ ܗܘܵܘ ܡܲܚܘܼܒܝܼ ܒܸܬ ܚܵܕܹܝܬܘܿܢ ܗܘܵܘ ܕܐܵܢܵܐ ܒܹܐܙܵܠܵܐ ܝܘܸܢ ܠܟܸܣ ܒܵܒܵܐ، ܣܵܒܵܒ ܒܵܒܵܐ ܒܘܼܫ ܓܘܼܪܵܐ ܝܠܹܗ ܡܸܢܝܼ.

²⁹ ”ܐܡܝܼܪܝܼ ܐܸܠܵܘܟ݂ܘܿܢ ܡ̣ܢ ܩܲܕܡ ܕܗܵܘܹܐ، ܕܗܲܡܸܢܝܼܬܘܿܢ ܐܝܼܡܲܢ ܕܗܵܘܹܐ.

³⁰ ”ܐܵܕܝܼܵܐ ܠܹܐ ܗܲܡܙܸܡܸܢ ܥܲܡܵܘܟ݂ܘܿܢ ܪܵܒܵܐ، ܣܵܒܵܒ ܓܘܼܪܵܐ ܕܐܵܗܵܐ ܕܘܼܢܝܹܐ ܒܹܐܬܵܝܵܐ ܝܠܹܗ، ܐܝܼܢܵܐ ܠܲܝܬ ܠܹܗ ܚܲܝܠܵܐ ܥܲܠܝܼ.

³¹ ”ܐܝܼܢܵܐ ܕܝܵܕܹܥ ܥܵܠܡܵܐ ܕܟܹܐ ܡܲܚܸܒܸܢ ܠܒܵܒܵܐ، ܐܲܝܟ݂ ܕܦܩܝܼܕ ܠܹܗ ܐܸܠܝܼ ܗܵܕܟ݂ܵܐ ܟܹܐ ܥܵܒ݂ܕܹܢ. ܩܘܼܡܘܼܢ ܐܵܙܲܠ݇ܚ ܡܐܲܟ݂ܵܐ.