ܓܠܛܝ̈ܐ 6 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܛܥܘܢܘܢ ܝܘܩܪܐ ܕܚܕ ܕܗܘ ܐܚܪܢܐ

¹ ܝܵܐ ܐܲܚܘܿܢܘܵܬ‌ܝܼ̈، ܐܸܢ ܚܲܕ ܡܸܢܵܘܟ݂ܘܿܢ ܦܵܐܹܫ ܕܒ݂ܝܼܩܵܐ ܒܓܢܵܗܵܐ، ܐܲܚܬܘܿܢ ܕܝܼܬܘܿܢ ܪ̈ܘܼܚܵܢܵܝܹܐ ܡܲܕܸܪܘܼܢ ܠܹܗ ܒܪܘܼܚܵܐ ܡܲܟܝܼܟ݂ܬܵ‌ܐ. ܐܝܼܢܵܐ ܗܘܹܝܡܘܼܢ ܗܸܫܝܲܪ ܕܐܘܼܦ ܐܲܚܬܘܿܢ ܠܵܐ ܢܵܦܠܝܼܬܘܿܢ.

² ܛܥܘܿܢܘܼܢ ܝܘܼܩܪܵܐ ܕܚܲܕ ܕܗ̇ܘ ܐܚܹܪܢܵܐ، ܘܗܵܕܟ݂ܵܐ ܬܲܡܸܡܘܼܢ ܢܵܡܘܿܣܵܐ ܕܡܫܝܼܚܵܐ.

³ ܣܵܒܵܒ ܐܸܢ ܚܲܕ ܚܵܫܹܒ݂ ܕܝܼܠܹܗ ܡܸܢܕܝܼ ܘܟܲܕ ܗ̇ܘ ܠܹܐ ܝܠܹܗ ܗܸܟ̃ ܡܸܢܕܝܼ، ܥܲܠܕܘܼܝܹܐ ܝܠܹܗ ܓܵܢܹܗ.

⁴ ܐܝܼܢܵܐ ܟܠ ܐܢܵܫܵܐ ܨܲܚܨܹܐ ܦܘܼܠܚܵܢܵܐ ܕܓܵܢܹܗ، ܗ̇ܝܓܵܗ ܫܵܩܹܠ ܫܘܼܒ݂ܗܵܪܵܐ ܒܓܵܢܹܗ ܘܠܵܐ ܒܓܲܫܲܩܬܵ‌ܐ ܠܐܚܹܪ̈ܢܹܐ.

⁵ ܣܵܒܵܒ ܟܠ ܚܲܕ ܟܲܪܬܵ‌ܐ ܕܓܵܢܹܗ ܒܸܬ ܛܵܥܹܢ.

⁶ ܗ̇ܘ ܕܦܝܵܫܵܐ ܝܠܹܗ ܡܘܼܠܦܵܐ ܗܹܡܸܙܡܵܢ، ܒܟܠܵܝܗ‌ܝ ܛܵܒ݂ܵܬܹ̈‌ܐ ܫܲܪܸܟ ܥܲܡ ܡܲܠܦܵܢܹܗ.

⁷ ܣܵܒܵܒ ܠܵܐ ܚܵܠܛܝܼܬܘܿܢ، ܐܲܠܵܗܵܐ ܠܹܐ ܦܵܐܹܫ ܡܘܼܣܚܸܪܵܐ. ܐܢܵܫܵܐ ܒܸܬ ܚܵܨܹܕ ܡܸܢܕܝܼ ܕܙܵܪܹܥ.

⁸ ܗ̇ܘ ܕܙܵܪܹܥ ܩܵܐ ܒܘܼܣܵܡܵܐ ܕܟܝܵܢܵܐ ܚܲܛܵܝܵܐ، ܚܪܵܒ݂ܵܐ ܒܸܬ ܚܵܨܹܕ ܡܸܢܹܗ. ܐܝܼܢܵܐ ܗ̇ܘ ܕܙܵܪܹܥ ܩܵܐ ܒܘܼܣܵܡܵܐ ܕܪܘܼܚܵܐ، ܚܲܝܹ̈ܐ ܕܠܥܵܠܲܡ ܒܸܬ ܚܵܨܹܕ ܡ̣ܢ ܪܘܼܚܵܐ.

⁹ ܠܵܐ ܣܵܩܕܲܚ ܡ̣ܢ ܠܸܥܒ݂ܵܕܵܐ ܛܵܒ݂ܬܵ‌ܐ، ܣܵܒܵܒ ܒܥܕܵܢܵܐ ܠܵܚܘܿܡܬܵ‌ܐ ܒܸܬ ܚܵܨܕܲܚ ܐܸܢ ܠܵܐ ܢܵܦܠܲܚ.

¹⁰ ܒܵܣ ܟܡܵܐ ܕܐܝܼܬ ܠܲܢ ܦܸܪܣܲܬ ܥܵܒ݂ܕܲܚ ܛܵܒ݂ܬܵ‌ܐ ܠܟܠܵܝܗ‌ܝ، ܒܘܼܫ ܙܵܘܕܵܐ ܠܒܢܘܿܢܹ̈ܐ ܕܗܲܝܡܵܢܘܼܬܵ‌ܐ.

ܗܡܙܡܢ̈ܐ ܕܚܘܬܡܐ

¹¹ ܚܙܹܝܡܘܼܢ ܟܡܵܐ ܓܘܼܪܹ̈ܐ ܝܢܵܐ ܐܵܬܘܵܬܹ̈‌ܐ ܕܟܬܝܼܒ݂ ܠܝܼ ܒܐܝܼܕܵܬ‌ܝܼ̈ ܐܸܠܵܘܟ݂ܘܿܢ ܓܵܘ ܐܵܗܵܐ ܟܬܵܒ݂ܵܐ.

¹² ܐܵܢܝܼ ܕܒܵܥܝܼ ܕܡܲܚܙܝܼ ܓܵܢܵܝܗ‌ܝ ܒܲܪܵܐܝܼܬ، ܡܲܠܝܘܼܨܹܐ ܝܢܵܐ ܕܦܵܝܫܝܼܬܘܿܢ ܓܙܝܼܪܹܐ ܐܲܚܟ̰ܝܼ ܕܠܵܐ ܦܵܝܫܝܼ ܛܪܝܼܕܹܐ ܒܘܼܬ ܙܩܝܼܦܵܐ ܕܡܫܝܼܚܵܐ.

¹³ ܐܘܼܦ ܐܵܢܝܼ ܕܓܙܝܼܪܹܐ ܝܢܵܐ ܒܓܵܢܵܝܗ‌ܝ ܠܹܐ ܢܵܛܪܝܼ ܢܵܡܘܿܣܵܐ، ܐܝܼܢܵܐ ܒܵܥܝܼ ܕܦܵܝܫܝܼܬܘܿܢ ܓܙܝܼܪܹܐ ܕܥܵܒ݂ܕܝܼ ܫܘܼܒ݂ܗܵܪܵܐ ܒܡܸܢܕܝܼ ܕܥܒ݂ܝܼܕ ܠܗܘܿܢ ܠܦܲܓ݂ܪܵܘܟ݂ܘܿܢ.

¹⁴ ܐܝܼܢܵܐ ܐܵܢܵܐ ܚܵܣ ܠܝܼ ܕܥܵܒ݂ܕܹܢ ܫܘܼܒ݂ܗܵܪܵܐ ܫܒ݂ܘܿܩ ܡ̣ܢ ܒܙܩܝܼܦܵܐ ܕܡܵܪܲܢ ܝܼܫܘܿܥ ܡܫܝܼܚܵܐ، ܗ̇ܘ ܕܒܝܼܹܗ ܕܘܼܢܝܹܐ ܦܝܼܫ ܠܵܗ̇ ܙܩܝܼܦܬܵ‌ܐ ܐܸܠܝܼ ܘܐܵܢܵܐ ܠܕܘܼܢܝܹܐ.

¹⁵ ܣܵܒܵܒ ܠܵܐ ܓܙܘܼܪܬܵ‌ܐ ܡܸܢܕܝܼ ܝܠܵܗ̇ ܘܠܵܐ ܥܘܼܪܠܘܼܬܵ‌ܐ، ܐܸܠܵܐ ܒܪܝܼܬܵ‌ܐ ܚܲܕܬܵ‌ܐ.

¹⁶ ܐܵܢܝܼ ܕܚܵܕܪܝܼ ܒܐܵܗܵܐ ܩܵܢܘܿܢܵܐ، ܫܠܵܡܵܐ ܘܪ̈ܲܚܡܹܐ ܗܵܘܝܼ ܥܲܠܵܝܗ‌ܝ، ܘܐܘܼܦ ܥܲܠ ܐܝܼܣܪܵܐܹܝܠ ܕܐܲܠܵܗܵܐ.

¹⁷ ܡ̣ܢ ܐܵܕܝܼܵܐ ܐܢܵܫܵܐ ܠܵܐ ܓ̰ܲܢܓ̰ܸܪ ܐܸܠܝܼ، ܣܵܒܵܒ ܛܥܝܼܢܵܐ ܝܘܸܢ ܓܵܘ ܦܲܓ݂ܪܝܼ ܫܵܘܦܵܐ ܕܕܲܪ̈ܒܵܬܹ‌ܐ ܕܝܼܫܘܿܥ.

¹⁸ ܫܵܦܵܩܲܬ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܪܘܼܚܵܘܟ݂ܘܿܢ، ܐܲܚܘܿܢܘܵܬ‌ܝܼ̈. ܐܵܡܹܝܢ.