ܒ ܛܝܡܬܐܘܣ 3 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܒܪܢܫܐ ܒܝܘܡܢ̈ܐ ܐܚܪ̈ܝܐ

¹ ܐܝܼܢܵܐ ܝܕܹܥ ܐܵܗܵܐ، ܕܒܸܬ ܐܵܬ‌ܝܼ ܙܲܒ݂ܢܹ̈ܐ ܩܸܫܝܹ̈ܐ ܒܝܵܘܡܵܢܹ̈ܐ ܐܚܵܪ̈ܵܝܹܐ.

² ܣܵܒܵܒ ܐܢܵܫܹ̈ܐ ܒܸܬ ܗܵܘܝܼ ܐܵܢܵܝܹ̈ܐ، ܡܲܚܸܒܵܢܹ̈ܐ ܕܙܘܼܙܵܐ، ܫܲܒ݂ܗܸܪ̈ܵܢܹܐ، ܚܵܬܪ̈ܵܢܹܐ، ܓܵܕܦܵܢܹ̈ܐ، ܠܵܐ ܡܲܨܝܸܬܵܢܹ̈ܐ ܠܐܲܒ݂ܵܗܵܝ̈ܗ‌ܝ، ܠܵܐ ܛܵܥܢܵܢܹ̈ܐ ܕܡܸܢܬܵ‌ܐ، ܪ̈ܲܫܝܼܥܹܐ،

³ ܕܠܵܐ ܚܘܼܒܵܐ ܟܝܵܢܵܝܵܐ، ܠܵܐ ܦܲܚܠܵܢܹ̈ܐ، ܡܵܚܝܵܢܹ̈ܐ ܕܕܲܪܗܲܩ، ܠܵܐ ܙܲܒܛܸܢܵܢܹ̈ܐ ܕܓܵܢܵܝܗ‌ܝ، ܟܹܘܝܼܹ̈ܐ، ܣܵܢܝܵܢܹ̈ܐ ܕܛܵܒ݂ܵܬܹ̈‌ܐ،

⁴ ܣܲܦܝܵܢܹ̈ܐ، ܡܲܠܝܸܙܵܢܹ̈ܐ، ܚܵܬܪ̈ܵܢܹܐ، ܡܲܚܸܒܵܢܹ̈ܐ ܕܒܘܼܣܵܡܹ̈ܐ ܒܘܼܫ ܡ̣ܢ ܕܡܲܚܸܒܝܼ ܠܐܲܠܵܗܵܐ؛

⁵ ܐܝܼܬ ܠܗܘܿܢ ܐܸܣܟܝܼܡܵܐ ܕܙܕܘܼܥܬܵ‌ܐ ܕܐܲܠܵܗܵܐ ܐܝܼܢܵܐ ܒܸܣܪܵܒ݂ܵܐ ܝܢܵܐ ܚܲܝܠܵܐ ܕܝܼܘܼܗ̇. ܪܚܘܿܩ ܡ̣ܢ ܗܵܕܟ݂ܵܐ ܐܢܵܫܹ̈ܐ.

⁶ ܣܵܒܵܒ ܚܲܕܟܡܵܐ ܡܸܢܵܝܗ‌ܝ ܡܐܲܝܟ݂ ܓܹܢܵܒܹ̈ܐ ܟܹܐ ܥܵܒ݂ܪܝܼ ܓܵܘ ܒܵܬܹ̈‌ܐ ܘܣܵܠܒܝܼ ܒܲܟ݂ܬܵܬܹ̈‌ܐ ܣܲܟ݂ܠܹ̈ܐ، ܕܦܝܼܫܹܐ ܝܢܵܐ ܡܘܼܛܥܸܢܹܐ ܒܚܛܝܼܵܬܹ̈‌ܐ ܘܠܘܼܒܠܹܐ ܒܫܲܗܘܲܬܝܵܬܹ̈‌ܐ ܦܪ̈ܝܼܫܹܐ.

⁷ ܐܲܢܹܐ ܒܲܟ݂ܬܵܬܹ̈‌ܐ ܒܟܠ ܙܲܒ݂ܢܵܐ ܒܸܠܝܵܦܵܐ ܝܢܵܐ، ܐܝܼܢܵܐ ܠܹܐ ܡܵܨܝܼ ܡܵܛܝܼ ܠܝܕܵܥܬܵ‌ܐ ܕܫܪܵܪܵܐ.

⁸ ܕܵܐܟ݂ܝܼ ܕܝܲܢܹܣ ܘܝܲܡܒܪܹܣ ܩܝܼܡ ܠܗܘܿܢ ܕܲܠܩܘܼܒ݂ܠ ܕܡܘܼܫܹܐ، ܗܵܕܟ݂ܵܐ ܐܘܼܦ ܐܲܢܹܐ ܐܢܵܫܹ̈ܐ ܒܸܩܝܵܡܵܐ ܝܢܵܐ ܕܲܠܩܘܼܒ݂ܠ ܕܫܪܵܪܵܐ، ܐܢܵܫܹ̈ܐ ܚܪ̈ܝܼܒܹܐ ܒܪܸܥܝܵܢܵܐ، ܘܡܘܼܣܠܝܼܹ̈ܐ ܡ̣ܢ ܗܲܝܡܵܢܘܼܬܵ‌ܐ ܓܹܒܵܐ.

⁹ ܐܝܼܢܵܐ ܠܹܐ ܡܲܢܬ‌ܝܼ، ܣܵܒܵܒ ܣܲܟ݂ܠܘܼܬܵܝܗ‌ܝ ܒܸܬ ܦܵܝܫܵܐ ܓܠܝܼܬܵ‌ܐ ܠܟܠܵܝܗ‌ܝ ܐܢܵܫܹ̈ܐ، ܐܲܝܟ݂ ܕܦܝܼܫ ܠܵܗ̇ ܓܠܝܼܬܵ‌ܐ ܣܲܟ݂ܠܘܼܬܵ‌ܐ ܕܐܵܢܝܼ ܬܪܹܝ.

ܡܪܬܝܢܘܬ‌ܐ ܕܦܘܠܘܣ ܫܠܝܚܐ ܠܛܝܡܬܐܘܣ

¹⁰ ܐܝܼܢܵܐ ܐܲܢ݇ܬ ܐܬܹ‌ܐ ܠܘܼܟ݂ ܒܵܬܪ ܝܘܼܠܦܵܢܝܼ، ܘܕܘܼܒܵܪ̈ܝܼ، ܘܢܝܼܫܝܼ، ܘܗܲܝܡܵܢܘܼܬ‌ܝܼ، ܘܡܲܪܝܲܟ݂ܬܵ‌ܐ ܕܒܹܐܢܝܼ، ܘܚܘܼܒܝܼ، ܘܚܡܵܠܬ‌ܝܼ،

¹¹ ܘܟܲܡܲܪ̈ܝܵܬ‌ܝܼ، ܘܓ̰ܘܼܢܓ̰ܵܪ̈ܝܼ، ܐܵܢܝܼ ܕܩܘܼܘܸܡ ܠܗܘܿܢ ܐܸܠܝܼ ܒܐܵܢܛܝܘܿܟ݂ܝ ܘܒܐܝܼܩܵܢܘܿܢ ܘܒܠܘܼܣܛܪܵܐ، ܟܡܵܐ ܪ̈ܕܘܼܦܝܹܐ ܛܥܝܼܢܝܼ، ܐܝܼܢܵܐ ܡܵܪܲܢ ܩܵܡ ܦܲܨܹܐ ܠܝܼ ܡ̣ܢ ܟܠܵܝܗ‌ܝ.

¹² ܗܹܐ، ܟܠܵܝܗ‌ܝ ܐܵܢܝܼ ܕܒܵܥܝܼ ܕܚܵܝܝܼ ܒܙܕܘܼܥܬܵ‌ܐ ܕܐܲܠܵܗܵܐ ܒܝܼܫܘܿܥ ܡܫܝܼܚܵܐ ܒܸܬ ܦܵܝܫܝܼ ܟܘܼܡܪܹܐ.

¹³ ܐܝܼܢܵܐ ܐܢܵܫܹ̈ܐ ܒܝܼܫܹ̈ܐ ܘܡܲܚܠܸܛܵܢܹ̈ܐ ܒܸܬ ܗܵܘܝܼ ܒܘܼܫ ܚܸܪܒܵܐ، ܥܲܠܕܘܼܝܹܐ ܘܦܝܼܫܹܐ ܥܘܼܠܕܝܼܹܐ.

¹⁴ ܐܝܼܢܵܐ ܐܲܢ݇ܬ، ܥܲܪܩܸܠ ܒܡܸܢܕܝܼ ܕܝܠܝܼܦ ܠܘܼܟ݂ ܘܕܦܝܼܫ ܠܹܗ ܡܫܘܼܪܸܪܵܐ ܐܸܠܘܼܟ݂، ܟܲܕ ܒܝܼܕܵܥܵܐ ܡ̣ܢ ܡܵܢܝܼ ܝܠܝܼܦ ܠܘܼܟ݂،

¹⁵ ܘܕܵܐܟ݂ܝܼ ܡ̣ܢ ܝܵܠܕ݇ܘܼܬܘܼܟ݂ ܝܕܝܼܥܵܐ ܝܘܸܬ ܟܬܵܒܹ̈ܐ ܩܲܕܝܼܫܹ̈ܐ، ܐܵܢܝܼ ܕܡܵܨܝܼ ܥܵܒ݂ܕܝܼ ܠܘܼܟ݂ ܚܲܟܝܼܡܵܐ ܠܦܘܼܪܩܵܢܵܐ ܒܝܲܕ ܗܲܝܡܵܢܘܼܬܵ‌ܐ ܒܝܼܫܘܿܥ ܡܫܝܼܚܵܐ.

¹⁶ ܟܠܹܗ ܟܬܵܒ݂ܵܐ ܩܲܕܝܼܫܵܐ ܢܦܝܼܚܵܐ ܝܠܹܗ ܒܪܘܼܚܵܐ ܕܐܲܠܵܗܵܐ، ܘܡܵܪܹܐ ܝܘܼܬܪܵܢܵܐ ܝܠܹܗ ܠܝܘܼܠܦܵܢܵܐ، ܘܠܡܲܢܟܲܣܬܵ‌ܐ، ܘܠܬܘܼܪܵܨܵܐ، ܘܠܡܗܲܕܲܝܬܵ‌ܐ ܠܙܲܕܝܼܩܘܼܬܵ‌ܐ،

¹⁷ ܕܗܵܘܹܐ ܐܢܵܫܵܐ ܕܐܲܠܵܗܵܐ ܚܫܝܼܚܵܐ ܘܓܡܝܼܪܵܐ ܠܸܥܒ݂ܵܕܵܐ ܟܠ ܦܘܼܠܚܵܢܵܐ ܛܵܒ݂ܵܐ.