ܒ ܬܣܠܘܢܝܩܝ̈ܐ 2 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܐܢܫܐ ܕܚܛܝܬ‌ܐ

¹ ܒܘܼܬ ܐܬܵܝܬܵ‌ܐ ܕܡܵܪܲܢ ܝܼܫܘܿܥ ܡܫܝܼܚܵܐ ܘܓ̰ܡܵܥܬܲܢ ܡܥܘܼܕܵܠܹܐ ܠܟܸܣܠܹܗ، ܒܸܛܠܵܒܵܐ ܝܘܲܚ ܡܸܢܵܘܟ݂ܘܿܢ ܐܲܚܘܿܢܘܵܬܹ̈‌ܐ،

² ܠܵܐ ܓ̰ܲܠܕܹܐ ܦܵܝܫܝܼܬܘܿܢ ܫܥܝܼܫܹܐ ܒܪܸܥܝܵܢܵܘܟ݂ܘܿܢ، ܘܠܵܐ ܡܘܼܫܓܸܫܹܐ ܒܝܲܕ ܪܘܼܚܵܐ ܝܲܢ ܒܗܹܡܸܙܡܵܢ ܝܲܢ ܒܐܸܓܲܪܬܵ‌ܐ، ܐܲܝܟ݂ ܕܐܸܢ ܦܝܼܫܬܵ‌ܐ ܝܠܵܗ̇ ܟܬܝܼܒ݂ܬܵ‌ܐ ܒܝܼܲܢ ܒܹܐܡܵܪܵܐ: ”ܝܵܘܡܵܐ ܕܡܵܪܲܢ ܡܸܛܝܵܐ ܝܠܹܗ.“

³ ܐܘܼܦ ܚܲܕ ܠܵܐ ܡܲܚܠܸܛ ܠܵܘܟ݂ܘܿܢ ܒܗܸܟ̃ ܐܘܼܪܚܵܐ، ܣܵܒܵܒ ܗ̇ܘ ܝܵܘܡܵܐ ܠܹܐ ܐܵܬܹ‌ܐ ܐܸܢ ܩܲܕܡܵܝܬܵ‌ܐ ܠܵܐ ܐܵܬܝܵܐ ܡܵܪܘܿܕܘܼܬܵ‌ܐ ܘܦܵܐܹܫ ܓܸܠܝܵܐ ܒܲܪܢܵܫܵܐ ܕܚܛܝܼܬܵ‌ܐ، ܒܪܘܿܢܵܐ ܕܐܲܒ݂ܕܵܢܵܐ،

⁴ ܗ̇ܘ ܕܝܼܠܹܗ ܕܲܠܩܘܼܒ݂ܠܵܝܵܐ ܘܡܲܪܘܼܡܘܼܗ̇ ܝܠܹܗ ܓܵܢܹܗ ܥܲܠ ܟܠ ܡܸܢܕܝܼ ܕܝܼܠܹܗ ܦܝܼܫܵܐ ܩܸܪܝܵܐ ܐܲܠܵܗܵܐ ܘܕܝܼܠܹܗ ܣܓ݂ܝܼܕܵܐ، ܗܵܕܟ݂ܵܐ ܕܡܲܬܘܼܒ݂ܘܼܗ̇ ܝܠܹܗ ܓܵܢܹܗ ܓܵܘ ܗܲܝܟܠܵܐ ܕܐܲܠܵܗܵܐ، ܘܡܲܚܙܘܼܝܘܼܗ̇ ܓܵܢܹܗ ܐܲܝܟ݂ ܕܐܸܢ ܐܲܠܵܗܵܐ ܝܠܹܗ.

⁵ ܠܹܐ ܝܬܘܿܢ ܒܸܕܟ݂ܵܪܵܐ ܕܐܡܝܼܪܝܼ ܐܲܢܹܐ ܐܸܠܵܘܟ݂ܘܿܢ ܐܝܼܡܲܢ ܕܝܼܘܸܢ ܗܘܵܐ ܥܲܡܵܘܟ݂ܘܿܢ؟

⁶ ܘܐܵܕܝܼܵܐ ܒܝܼܕܵܥܵܐ ܝܬܘܿܢ ܕܡܘܼܕܝܼ ܝܠܹܗ ܡܲܟܠܘܼܝܹܐ ܗܲܠ ܕܦܵܐܹܫ ܓܸܠܝܵܐ ܒܙܲܒ݂ܢܹܗ.

⁷ ܣܵܒܵܒ ܐܪܵܙܵܐ ܕܥܵܘܠܵܐ ܡ̣ܢ ܓ̰ܲܠܕܹܐ ܒܸܦܠܵܚܵܐ ܝܠܹܗ، ܐܝܼܢܵܐ ܗ̇ܘ ܕܡܲܟܠܘܼܝܹܗ ܝܠܹܗ ܗܲܠ ܐܵܕܝܼܵܐ ܒܸܬ ܥܵܒܹܕ ܗܵܕܟ݂ܵܐ ܗܲܠ ܕܦܵܐܹܫ ܫܩܝܼܠܵܐ ܡ̣ܢ ܐܘܼܪܚܵܐ.

⁸ ܗ̇ܝܓܵܗ ܒܸܬ ܦܵܐܹܫ ܓܸܠܝܵܐ ܗ̇ܘ ܕܝܼܠܹܗ ܥܵܘܵܠܵܐ، ܗ̇ܘ ܕܡܵܪܲܢ ܝܼܫܘܿܥ ܒܸܬ ܛܲܠܸܩ ܠܹܗ ܒܢܦܵܚܬܵ‌ܐ ܕܦܘܼܡܹܗ، ܘܒܸܬ ܒܲܛܸܠ ܠܹܗ ܒܫܲܦ̮ܩܵܐ ܕܐܬܵܝܬܹܗ.

⁹ ܗ̇ܘ ܥܵܘܵܠܵܐ ܐܬܵܝܬܹܗ ܐܲܝܟ݂ ܦܘܼܠܚܵܢܵܐ ܕܣܵܛܵܢܵܐ ܝܠܵܗ̇، ܒܟܠܹܗ ܚܲܝܠܵܐ ܘܢܝܼܫܲܢܩܹ̈ܐ ܘܕܘܼܡܵܪܹ̈ܐ ܕܕܘܼܓܠܵܐ،

¹⁰ ܘܒܟܠܵܗ̇ ܥܲܠܕܲܝܬܵ‌ܐ ܕܥܵܘܠܵܐ ܠܐܵܢܝܼ ܕܒܸܛܠܵܩܵܐ ܝܢܵܐ، ܣܵܒܵܒ ܠܵܐ ܩܘܼܒܸܠ ܠܗܘܿܢ ܚܘܼܒܵܐ ܕܫܪܵܪܵܐ ܕܦܵܪܩܝܼ ܗܘܵܘ.

¹¹ ܒܘܼܬ ܐܵܗܵܐ ܐܲܠܵܗܵܐ ܒܸܬ ܫܲܕܸܪ ܐܸܠܵܝܗ‌ܝ ܚܸܠܛܸܢܝܘܼܬܵ‌ܐ ܓܘܼܪܬܵ‌ܐ ܕܗܲܡܸܢܝܼ ܠܕܘܼܓܠܵܐ،

¹² ܕܦܵܝܫܝܼ ܕܝܼܢܹܐ ܟܠܵܝܗ‌ܝ ܐܵܢܝܼ ܕܠܵܐ ܗܘܼܡܸܢܗܘܿܢ ܠܫܪܵܪܵܐ، ܐܸܠܵܐ ܒܣܝܼܡ ܠܵܗ̇ ܠܗܘܿܢ ܒܥܵܘܠܵܐ.

ܓܘܒܝܐ ܠܦܘܪܩܢܐ

¹³ ܐܝܼܢܵܐ ܐܲܚܢܲܢ ܐܲܚܘܿܢܘܵܬܹ̈‌ܐ، ܘܵܠܹܐ ܝܠܵܗ̇ ܕܫܲܟܪܲܚ ܠܐܲܠܵܗܵܐ ܒܟܠ ܙܲܒ݂ܢܵܐ ܒܘܼܬ ܕܝܼܵܘܟ݂ܘܿܢ، ܡܘܼܚܸܒܹ̈ܐ ܒܡܵܪܲܢ، ܣܵܒܵܒ ܡ̣ܢ ܩܲܕܡܵܝܬܵ‌ܐ ܐܲܠܵܗܵܐ ܩܵܡ ܓܲܒܹܐ ܠܵܘܟ݂ܘܿܢ ܠܦܘܼܪܩܵܢܵܐ ܒܡܩܲܕܲܫܬܵ‌ܐ ܕܪܘܼܚܵܐ ܘܗܲܝܡܵܢܘܼܬܵ‌ܐ ܒܫܪܵܪܵܐ.

¹⁴ ܠܕܐܵܗܵܐ ܩܪܹܐ ܠܹܗ ܐܸܠܵܘܟ݂ܘܿܢ ܒܐܹܘܲܢܓܲܠܝܼܘܿܢ ܕܝܼܲܢ، ܕܗܵܘܹܝܬܘܿܢ ܫܲܪ̈ܝܼܟܹܐ ܒܚܸܩܪܵܐ ܕܡܵܪܲܢ ܝܼܫܘܿܥ ܡܫܝܼܚܵܐ.

¹⁵ ܗܵܕܟ݂ܵܐ ܐܲܚܘܿܢܘܵܬܹ̈‌ܐ، ܟܠܹܝܡܘܼܢ ܩܸܘܝܹܐ، ܘܕܒ݂ܘܿܩܘܼܢ ܒܣܲܦܝܵܢܘܼܝܵܬܹ̈‌ܐ ܕܝܠܝܼܦ ܠܵܘܟ݂ܘܿܢ ܡܸܢܲܢ، ܝܲܢ ܒܗܹܡܸܙܡܵܢ ܕܦܘܼܡܵܐ ܝܲܢ ܒܐܸܓܲܪܬܵ‌ܐ.

¹⁶ ܡܵܪܲܢ ܝܼܫܘܿܥ ܡܫܝܼܚܵܐ ܒܓܵܢܹܗ ܘܐܲܠܵܗܵܐ ܒܵܒܲܢ، ܗ̇ܘ ܕܡܘܼܚܸܒ ܠܹܗ ܐܸܠܲܢ ܘܒܫܵܦܵܩܲܬ ܝܘܼܗܒܹܠ ܠܹܗ ܐܸܠܲܢ ܒܘܼܝܵܐܵܐ ܥܵܠܡܝܼܢܵܝܵܐ ܘܣܲܒ݂ܪܵܐ ܛܵܒ݂ܵܐ،

¹⁷ ܚܲܠܸܢ ܠܸܒܵܘܟ݂ܘܿܢ ܘܣܵܢܹܕ ܠܵܘܟ݂ܘܿܢ ܒܟܠ ܗܹܡܸܙܡܵܢ ܘܒܟܠ ܦܘܼܠܚܵܢܵܐ ܛܵܒ݂ܵܐ.