ܒ ܝܘܚܢܢ 1 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܫܠܡ̈ܐ

¹ ܚܘܵܪܕܸܩܢܵܐ، ܠܡܝܲܩܲܪܬܵ‌ܐ ܓܘܼܒܝܼܬܵ‌ܐ ܘܠܝܵܠܕ݇ܘܼ̈ܗ̇، ܐܵܢܝܼ ܕܐܵܢܵܐ ܟܹܐ ܡܲܚܸܒܸܢܗܘܿܢ ܒܫܲܪܝܼܪܘܼܬܵ‌ܐ، ܘܠܵܐ ܐܲܚܟ̰ܝܼ ܐܵܢܵܐ ܐܸܠܵܐ ܐܘܼܦ ܟܠܵܝܗ‌ܝ ܐܵܢܝܼ ܕܝܵܕܥܝܼ ܠܫܪܵܪܵܐ؛

² ܣܵܒܵܒ ܫܪܵܪܵܐ ܒܸܥܡܵܪܵܐ ܝܠܹܗ ܒܝܼܲܢ ܘܒܸܬ ܗܵܘܹܐ ܥܲܡܲܢ ܠܥܵܠܲܡ.

³ ܫܵܦܵܩܲܬ ܘܪ̈ܲܚܡܹܐ ܘܫܠܵܡܵܐ ܥܲܡܲܢ، ܡ̣ܢ ܐܲܠܵܗܵܐ ܒܵܒܵܐ ܘܡ̣ܢ ܝܼܫܘܿܥ ܡܫܝܼܚܵܐ، ܒܪܘܿܢܵܐ ܕܒܵܒܵܐ، ܒܫܪܵܪܵܐ ܘܒܚܘܼܒܵܐ.

ܫܪܪܐ ܘܚܘܒܐ

⁴ ܪܵܒܵܐ ܚܕܹܐ ܠܝܼ ܕܫܡܝܼܥ ܠܝܼ ܚܲܕܟܡܵܐ ܡ̣ܢ ܝܵܠܵܕ݇ܟ݂ܝ̈ ܒܸܚܕܵܪܵܐ ܝܢܵܐ ܒܫܪܵܪܵܐ، ܐܲܝܟ݂ ܕܩܘܼܒܸܠ ܠܲܢ ܦܘܼܩܕܵܢܵܐ ܡ̣ܢ ܒܵܒܵܐ.

⁵ ܘܐܵܕܝܼܵܐ، ܝܵܐ ܡܝܲܩܲܪܬܵ‌ܐ، ܡܸܢܕܝܼ ܕܒܸܟܬܵܒ݂ܵܐ ܝܘܸܢ ܐܸܠܵܟ݂ܝ ܠܹܐ ܝܠܹܗ ܐܲܝܟ݂ ܦܘܼܩܕܵܢܵܐ ܚܵܕܬܵ‌ܐ، ܐܸܠܵܐ ܗ̇ܘ ܕܐܝܼܬ ܗܘܵܐ ܠܲܢ ܡ̣ܢ ܫܘܼܪܵܝܵܐ. ܒܸܛܠܵܒܵܐ ܝܘܸܢ ܡܸܢܵܟ݂ܝ ܕܡܲܚܸܒܲܚ ܚܲܕ ܠܗ̇ܘ ܐܚܹܪܢܵܐ.

⁶ ܘܐܵܗܵܐ ܝܠܹܗ ܚܘܼܒܵܐ، ܕܚܵܕܪܲܚ ܐܲܝܟ݂ ܦܘܼܩܕܵܢܘܼ̈ܗ‌ܝ. ܐܲܝܟ݂ ܕܫܡܝܼܥ ܠܵܘܟ݂ܘܿܢ ܡ̣ܢ ܫܘܼܪܵܝܵܐ، ܦܘܼܩܕܵܢܹܗ ܝܼܠܹܗ ܕܚܵܕܪܲܚ ܒܚܘܼܒܵܐ.

⁷ ܣܵܒܵܒ ܪܵܒܵܐ ܡܲܚܠܸܛܵܢܹ̈ܐ ܦܪܝܼܣ ܠܗܘܿܢ ܓܵܘ ܥܵܠܡܵܐ، ܐܵܢܝܼ ܕܠܹܐ ܡܵܘܕܝܼ ܕܝܼܫܘܿܥ ܡܫܝܼܚܵܐ ܗܘܹܐ ܠܹܗ ܒܲܪܢܵܫܵܐ. ܐܵܗܵܐ ܝܠܹܗ ܡܲܚܠܸܛܵܢܵܐ ܘܡܫܝܼܚܵܐ ܕܲܓܵܠܵܐ.

⁸ ܗܘܹܝܡܘܼܢ ܗܸܫܝܲܪ ܠܓܵܢܵܘܟ݂ܘܿܢ ܕܠܵܐ ܛܲܠܩܝܼܬܘܿܢ ܠܡܸܢܕܝܼ ܕܦܠܝܼܚ ܠܵܘܟ݂ܘܿܢ، ܐܸܠܵܐ ܕܩܲܒܠܝܼܬܘܿܢ ܦܘܼܪܥܵܢܵܐ ܡܸܠܝܵܐ.

⁹ ܟܠ ܡ̇ܢ ܕܐܵܙܹܠ ܠܩܲܕܡܵܐ ܘܠܵܐ ܥܲܪܩܸܠ ܒܝܘܼܠܦܵܢܵܐ ܕܡܫܝܼܚܵܐ، ܠܲܝܬ ܠܹܗ ܐܲܠܵܗܵܐ؛ ܗ̇ܘ ܕܥܲܪܩܸܠ ܒܐܵܗܵܐ ܝܘܼܠܦܵܢܵܐ ܐܝܼܬ ܠܹܗ ܬܸܪܘܵܝ: ܒܵܒܵܐ ܘܒܪܘܿܢܵܐ.

¹⁰ ܐܸܢ ܚܲܕ ܐܵܬܹ‌ܐ ܠܟܸܣܠܵܘܟ݂ܘܿܢ ܘܠܵܐ ܡܲܝܬܹ‌ܐ ܐܵܗܵܐ ܝܘܼܠܦܵܢܵܐ، ܠܵܐ ܩܲܒܠܝܼܬܘܿܢ ܠܹܗ ܓܵܘ ܒܲܝܬܵܘܟ݂ܘܿܢ ܘܠܵܐ ܕܵܪܹܝܬܘܿܢ ܫܠܵܡܵܐ ܐܸܠܹܗ،

¹¹ ܣܵܒܵܒ ܗ̇ܘ ܕܕܵܪܹܐ ܫܠܵܡܵܐ ܐܸܠܹܗ ܫܲܪܘܼܟܹܐ ܝܠܹܗ ܒܦܘܼܠܚܵܢܘܼ̈ܗ‌ܝ ܒܝܼܫܹ̈ܐ.

ܫܠܡ̈ܐ ܕܚܘܬܡܐ

¹² ܐܝܼܬ ܠܝܼ ܪܵܒܵܐ ܠܹܐܡܵܪܵܐ ܐܸܠܵܘܟ݂ܘܿܢ، ܐܝܼܢܵܐ ܠܹܐ ܒܵܥܹܝܢ ܕܡܲܦܠܸܚܸܢ ܘܵܪܵܩܵܐ ܘܒܸܕܝܘܼܬܵ‌ܐ. ܐܝܼܢܵܐ ܐܝܼܬ ܠܝܼ ܗܹܒ݂ܝܼ ܕܒܸܬ ܗܵܘܹܝܢ ܥܲܡܵܘܟ݂ܘܿܢ ܘܗܲܡܙܸܡܲܚ ܦܵܬܵ‌ܐ ܓܵܘ ܦܵܬܵ‌ܐ، ܕܦܵܝܫܵܐ ܡܘܼܓܡܸܪܬܵ‌ܐ ܚܲܕܘܼܬܲܢ.

¹³ ܒܝܼܵܗܒ݂ܵܐ ܝܢܵܐ ܫܠܵܡܵܐ ܐܸܠܵܟ݂ܝ ܝܵܠܹ̈ܕ݇ܐ ܕܚܵܬܵܟ݂ܝ ܓܘܼܒܝܼܬܵ‌ܐ.