ܒ ܩܘܪ̈ܢܬܝܐ 8 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܕܒ݂ܚܬ‌ܐ

¹ ܒܵܥܲܚ ܕܝܵܕܥܝܼܬܘܿܢ، ܐܲܚܘܿܢܘܵܬܹ̈‌ܐ، ܒܘܼܬ ܫܵܦܵܩܲܬ ܕܐܲܠܵܗܵܐ ܕܦܝܼܫ ܠܵܗ̇ ܝܘܼܗܒܹܠܬܵ‌ܐ ܠܥܹܕܵܬܹ̈‌ܐ ܕܓܵܘ ܡܵܩܹܕܘܿܢܝܼܵܐ،

² ܕܵܐܟ݂ܝܼ ܓܵܘ ܓ̰ܲܪܲܒܬܵ‌ܐ ܕܐܘܼܠܨܵܢܹ̈ܐ ܪܵܒܵܐ ܘܒܥܘܼܡܩܵܐ ܕܡܸܣܟܹܢܘܼܬܵ‌ܐ، ܒܚܲܕܘܼܬܵ‌ܐ ܓܘܼܪܬܵ‌ܐ ܫܘܼܦܸܟ݂ ܠܗܘܿܢ ܕܒ݂ܵܚܝܵܬܵܝ̈ܗ‌ܝ ܒܐܝܼܕܵܐ ܦܬܘܼܚܬܵ‌ܐ.

³ ܒܸܣܗܵܕܵܐ ܝܘܸܢ ܕܝܘܼܗܒܹܠ ܠܗܘܿܢ ܐܲܝܟ݂ ܡܨܵܝܬܵܝܗ‌ܝ، ܗܹܐ، ܘܒܘܼܫ ܙܵܘܕܵܐ ܡ̣ܢ ܡܨܵܝܬܵܝܗ‌ܝ، ܒܨܸܒ݂ܝܵܢܵܐ ܕܓܵܢܵܝܗ‌ܝ.

⁴ ܒܥܹܐ ܠܗܘܿܢ ܡܸܢܲܢ ܘܦܘܼܪܦܸܠ ܠܗܘܿܢ ܪܵܒܵܐ ܕܗܵܘܹܐ ܠܗܘܿܢ ܛܲܝܒܘܼܬܵ‌ܐ ܕܫܲܪܲܟܬܵ‌ܐ ܒܐܵܗܵܐ ܚܸܠܡܲܬ ܠܩܲܕܝܼܫܹ̈ܐ.

⁵ ܥܒ݂ܝܼܕ ܠܗܘܿܢ ܡܸܢܕܝܼ ܕܠܹܐ ܝܘܲܚ ܗܘܵܘ ܒܸܣܦܵܪܵܐ، ܝܘܼܗܒܹܠ ܠܗܘܿܢ ܓܵܢܵܝܗ‌ܝ ܩܲܕܡܵܝܬܵ‌ܐ ܠܡܵܪܝܵܐ، ܘܗ̇ܝܓܵܗ ܐܸܠܲܢ ܐܲܝܟ݂ ܨܸܒ݂ܝܵܢܵܐ ܕܐܲܠܵܗܵܐ.

⁶ ܒܘܼܬ ܐܵܗܵܐ ܦܘܼܪܦܸܠ ܠܲܢ ܒܛܸܛܘܿܣ، ܕܵܐܟ݂ܝܼ ܕܫܘܼܪܹܐ ܠܹܗ ܡ̣ܢ ܩܲܕܡܵܝܬܵ‌ܐ، ܗܵܕܟ݂ܵܐ ܐܘܼܦ ܬܲܡܸܡ ܐܵܗܵܐ ܫܘܼܠܵܐ ܕܫܵܦܵܩܲܬ ܒܐܝܼܕܵܐ ܕܝܼܵܘܟ݂ܘܿܢ.

⁷ ܘܕܵܐܟ݂ܝܼ ܕܙܝܼܕ ܠܵܘܟ݂ܘܿܢ ܒܟܠ ܡܸܢܕܝܼ: ܒܗܲܝܡܵܢܘܼܬܵ‌ܐ، ܒܗܹܡܸܙܡܵܢ، ܒܝܕܵܥܬܵ‌ܐ، ܒܟܠ ܚܘܼܦܵܛܵܐ ܘܒܚܘܼܒܵܘܟ݂ܘܿܢ ܐܸܠܲܢ، ܚܙܹܝܡܘܼܢ ܕܙܵܝܕܝܼܬܘܿܢ ܐܘܼܦ ܒܐܵܗܵܐ ܫܵܦܵܩܲܬ ܕܕܒ݂ܵܚܬܵ‌ܐ.

⁸ ܠܹܐ ܝܘܸܢ ܦܩܵܕܵܐ ܒܸܦܩܵܕܵܘܟ݂ܘܿܢ، ܐܝܼܢܵܐ ܒܚܘܼܦܵܛܵܐ ܕܐܚܹܪ̈ܢܹܐ، ܓ̰ܲܪܘܼܒܹܐ ܝܘܸܢ ܠܫܲܪܝܼܪܘܼܬܵ‌ܐ ܕܚܘܼܒܵܘܟ݂ܘܿܢ.

⁹ ܣܵܒܵܒ ܟܹܐ ܝܵܕܥܝܼܬܘܿܢ ܫܵܦܵܩܲܬ ܕܡܵܪܲܢ ܝܼܫܘܿܥ ܡܫܝܼܚܵܐ، ܕܐܘܼܦ ܐܸܢ ܕܥܲܬܝܼܪܵܐ ܝܗܘܵܐ، ܒܘܼܬ ܕܝܼܵܘܟ݂ܘܿܢ ܗܘܹܐ ܠܹܗ ܡܸܣܟܹܢܵܐ، ܕܐܲܚܬܘܿܢ ܗܵܘܹܝܬܘܿܢ ܥܲܬܝܼܪܹ̈ܐ ܒܝܲܕ ܡܸܣܟܹܢܘܼܬܹܗ.

¹⁰ ܐܵܗܵܐ ܝܠܵܗ̇ ܣܲܦܲܝܬ‌ܝܼ ܒܘܼܬ ܡܘܼܕܝܼ ܝܠܹܗ ܨܦܵܝܝܼ ܐܸܠܵܘܟ݂ܘܿܢ ܒܐܵܗܵܐ ܡܸܢܕܝܼ: ܒܫܹܢ݇ܬܵ‌ܐ ܕܕܲܥܒܲܪ ܐܲܚܬܘܿܢ ܩܲܕܡܵܝܹ̈ܐ ܝܬܘܿܢ ܗܘܵܘ، ܠܵܐ ܐܲܚܟ̰ܝܼ ܒܕܒ݂ܵܚܬܵ‌ܐ ܐܝܼܢܵܐ ܐܘܼܦ ܒܚܘܼܒܵܐ ܠܸܥܒ݂ܵܕܵܐ ܗܵܕܟ݂ܵܐ.

¹¹ ܐܵܕܝܼܵܐ ܬܲܡܸܡܘܼܢ ܫܘܼܠܵܘܟ݂ܘܿܢ ܐܲܝܟ݂ ܕܒܵܥܹܝܬܘܿܢ ܠܸܥܒ݂ܵܕܹܗ ܡ̣ܢ ܨܸܒ݂ܝܵܢܵܘܟ݂ܘܿܢ، ܐܲܝܟ݂ ܡܨܵܝܬܵܘܟ݂ܘܿܢ ܒܡܸܢܕܝܼ ܕܐܝܼܬ ܠܵܘܟ݂ܘܿܢ.

¹² ܣܵܒܵܒ ܐܸܢ ܐܝܼܬ ܨܸܒ݂ܝܵܢܵܐ ܠܸܕܒ݂ܵܚܵܐ، ܕܒ݂ܝܼܚܬܵ‌ܐ ܒܸܬ ܦܵܝܫܵܐ ܩܘܼܒܸܠܬܵ‌ܐ ܐܲܝܟ݂ ܕܐܢܵܫܵܐ ܐܝܼܬ ܠܹܗ، ܠܵܐ ܐܲܝܟ݂ ܕܠܲܝܬ ܠܹܗ.

¹³ ܠܹܐ ܒܵܥܲܚ ܕܗܵܘܝܵܐ ܢܝܵܚܬܵ‌ܐ ܠܐܚܹܪ̈ܢܹܐ ܘܐܘܼܠܨܵܢܹ̈ܐ ܐܸܠܵܘܟ݂ܘܿܢ، ܐܝܼܢܵܐ ܕܗܵܘܝܵܐ ܫܵܘܝܘܼܬܵ‌ܐ.

¹⁴ ܩܵܐ ܐܵܕܝܼܵܐ ܙܵܘܕܘܼܢܝܘܼܬܵ‌ܐ ܕܝܼܵܘܟ݂ܘܿܢ ܒܸܬ ܡܵܠܝܵܐ ܠܒܵܨܘܿܪܘܼܬܵ‌ܐ ܕܐܵܢܝܼ، ܘܗܵܕܟ݂ܵܐ ܙܵܘܕܘܼܢܝܘܼܬܵ‌ܐ ܕܐܵܢܝܼ ܒܸܬ ܡܵܠܝܵܐ ܠܒܵܨܘܿܪܘܼܬܵ‌ܐ ܕܝܼܵܘܟ݂ܘܿܢ. ܒܐܵܗܵܐ ܒܸܬ ܗܵܘܝܵܐ ܫܵܘܝܘܼܬܵ‌ܐ.

¹⁵ ܐܲܝܟ݂ ܕܝܼܠܹܗ ܟܬܝܼܒ݂ܵܐ: ܗ̇ܘ ܕܪܵܒܵܐ ܓ̰ܘܼܡܸܥ ܠܹܗ ܠܵܐ ܡܘܼܙܝܸܕ ܠܹܗ ܡܸܢܕܝܼ، ܘܗ̇ܘ ܕܒܵܨܘܿܪܵܐ ܓ̰ܘܼܡܸܥ ܠܹܗ ܠܵܐ ܡܘܼܒܨܸܪܹܗ ܡܸܢܕܝܼ.

ܛܛܘܣ ܦܝܫܐ ܫܘܕܪܐ ܠܩܘܪܢܬܘܣ

¹⁶ ܫܲܟܘܼܪܹܐ ܝܘܸܢ ܠܐܲܠܵܗܵܐ ܕܡܘܼܬܸܒ݂ ܠܹܗ ܒܠܸܒܵܐ ܕܛܸܛܘܿܣ ܗܲܪ ܗ̇ܝ ܚܦܝܼܛܘܼܬܵ‌ܐ ܕܐܵܢܵܐ ܐܝܼܬ ܠܝܼ ܒܘܼܬ ܕܝܼܵܘܟ݂ܘܿܢ.

¹⁷ ܒܗ̇ܝ ܕܩܘܼܒܠܵܐ ܠܹܗ ܒܵܥܘܼܬܲܢ ܛܸܛܘܿܣ، ܒܹܐܬܵܝܵܐ ܝܠܹܗ ܠܟܸܣܠܵܘܟ݂ܘܿܢ ܒܛܢܵܢܵܐ ܘܒܨܸܒ݂ܝܵܢܵܐ ܕܓܵܢܹܗ.

¹⁸ ܘܫܲܕܘܼܪܹܐ ܝܘܲܚ ܥܲܡܹܗ ܐܲܚܘܿܢܵܐ ܕܦܝܼܫܵܐ ܝܠܹܗ ܚܩܝܼܪܵܐ ܓܵܘ ܟܠܵܝܗ‌ܝ ܥܹܕܵܬܹ̈‌ܐ ܒܘܼܬ ܚܸܠܡܲܬܹܗ ܩܵܐ ܐܹܘܲܢܓܲܠܝܼܘܿܢ.

¹⁹ ܘܙܵܘܕܵܐ ܡ̣ܢ ܐܵܗܵܐ، ܦܝܼܫܵܐ ܝܗܘܵܐ ܓܘܼܒܝܵܐ ܒܝܲܕ ܥܹܕܵܬܹ̈‌ܐ ܕܐܵܙܹܠ ܥܲܡܲܢ ܘܠܲܒܠܲܚ ܠܐܵܗܵܐ ܕܒ݂ܵܚܬܵ‌ܐ ܕܒܸܥܒ݂ܵܕܵܐ ܝܘܲܚ ܚܸܠܡܲܬ ܒܝܼܘܼܗ̇، ܘܡܝܲܩܘܼܪܹܐ ܠܡܵܪܲܢ ܒܓܵܢܹܗ، ܘܡܲܚܙܲܚ ܚܦܝܼܛܘܼܬܲܢ ܠܗܲܝܘܼܪܹܐ.

²⁰ ܠܹܐ ܒܵܥܲܚ ܕܐܢܵܫܵܐ ܡܲܬܸܒ݂ ܠܵܘܡܵܐ ܥܲܠܲܢ ܒܘܼܬ ܕܵܐܟ݂ܝܼ ܡܕܲܒܘܼܪܘܼܗ̇ ܝܘܲܚ ܐܵܗܵܐ ܕܒ݂ܵܚܬܵ‌ܐ ܓܘܼܪܬܵ‌ܐ ܕܒܸܥܒ݂ܵܕܘܼܗ̇ ܝܘܲܚ.

²¹ ܩܸܫܝܵܐܝܼܬ ܓ̰ܲܪܘܼܒܹܐ ܝܘܲܚ ܕܥܵܒ݂ܕܲܚ ܛܵܒ݂ܵܬܹ̈‌ܐ ܠܵܐ ܐܲܚܟ̰ܝܼ ܒܥܲܝ̈ܢܹܐ ܕܡܵܪܝܵܐ ܐܸܠܵܐ ܐܘܼܦ ܒܥܲܝ̈ܢܹܐ ܕܐܢܵܫܹ̈ܐ.

²² ܫܲܕܘܼܪܹܐ ܝܘܲܚ ܥܲܡܵܝܗ‌ܝ ܐܲܚܘܿܢܲܢ، ܗ̇ܘ ܕܩܵܡ ܡܲܚܙܹܐ ܠܲܢ ܪܵܒܵܐ ܓܵܗܹ̈ܐ ܘܒܪܵܒܵܐ ܐܘܼܪ̈ܚܵܬܹ‌ܐ ܕܚܲܦܛܵܢܵܐ ܝܠܹܗ. ܘܐܵܕܝܼܵܐ ܒܘܼܫ ܚܲܦܛܵܢܵܐ ܝܠܹܗ ܣܵܒܵܒ ܐܝܼܬ ܠܹܗ ܗܹܒ݂ܝܼ ܓܘܼܪܬܵ‌ܐ ܒܝܼܵܘܟ݂ܘܿܢ.

²³ ܒܘܼܬ ܛܸܛܘܿܣ، ܗ̇ܘ ܫܲܪܝܼܟܝܼ ܝܠܹܗ ܘܗܲܝܸܪܵܢܝܼ ܐܸܠܵܘܟ݂ܘܿܢ. ܘܒܘܼܬ ܐܲܚܘܿܢܘܵܬܲܢ̈، ܐܵܢܝܼ ܫܠܝܼܚܹ̈ܐ ܕܥܹܕܵܬܹ̈‌ܐ ܝܢܵܐ ܠܚܸܩܪܵܐ ܕܡܫܝܼܚܵܐ.

²⁴ ܒܘܼܬ ܐܵܗܵܐ، ܡܲܚܙܹܝܡܘܼܢ ܠܐܲܢܹܐ ܐܢܵܫܹ̈ܐ ܩܲܕܡ ܥܹܕܵܬܹ̈‌ܐ ܫܲܪܲܪܬܵ‌ܐ ܕܚܘܼܒܵܘܟ݂ܘܿܢ ܘܫܘܼܒ݂ܗܵܪܲܢ ܒܝܼܵܘܟ݂ܘܿܢ.