ܒ ܩܘܪ̈ܢܬܝܐ 4 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܣܝܡܬ̈‌ܐ ܒܡܐܢ̈ܐ ܕܛܝܢܐ

¹ ܗܵܕܟ݂ܵܐ، ܟܲܕ ܐܝܼܬ ܠܲܢ ܐܵܗܵܐ ܚܸܠܡܲܬ ܒܪ̈ܲܚܡܹܐ ܕܐܲܠܵܗܵܐ، ܠܹܐ ܣܵܩܕܲܚ.

² ܡ̣ܢ ܓܹܒܘܼܗ̇، ܪܘܼܦܝܵܝ ܝܘܲܚ ܫܘܼܠܹ̈ܐ ܛܸܫܝܹ̈ܐ ܕܢܟܸܦܬܵ‌ܐ. ܠܹܐ ܝܘܲܚ ܒܸܚܕܵܪܵܐ ܒܦܸܠܡܵܐ، ܘܠܵܐ ܡܲܦܟ̰ܘܼܠܹܐ ܗܹܡܸܙܡܵܢ ܕܐܲܠܵܗܵܐ، ܐܸܠܵܐ ܒܫܲܪܝܼܪܘܼܬܵ‌ܐ ܦܫܝܼܛܬܵ‌ܐ ܡܲܚܫܘܼܚܹܐ ܝܘܲܚ ܓܵܢܲܢ ܠܐܸܢܝܲܬ ܕܟܠ ܐܢܵܫܵܐ ܩܲܕܡ ܐܲܠܵܗܵܐ.

³ ܘܐܘܼܦ ܐܸܢ ܡܘܼܟܣܵܐ ܝܠܹܗ ܐܹܘܲܢܓܲܠܝܼܘܿܢ ܕܝܼܲܢ، ܡܘܼܟܣܵܐ ܝܠܹܗ ܠܐܵܢܝܼ ܕܒܸܛܠܵܩܵܐ ܝܢܵܐ،

⁴ ܣܵܒܵܒ ܐܲܠܵܗܵܐ ܕܐܵܗܵܐ ܥܵܠܡܵܐ ܡܘܼܣܡܹܐ ܠܹܗ ܪܸ̈ܥܝܵܢܹܐ ܕܠܵܐ ܗܲܡܸܢܵܢܹ̈ܐ، ܕܠܵܐ ܚܵܙܝܼ ܒܲܗܪܵܐ ܕܐܹܘܲܢܓܲܠܝܼܘܿܢ ܕܚܸܩܪܵܐ ܕܡܫܝܼܚܵܐ، ܗ̇ܘ ܕܝܼܠܹܗ ܕܡܘܼܬܵ‌ܐ ܕܡܵܪܝܵܐ ܐܲܠܵܗܵܐ.

⁵ ܐܲܚܢܲܢ ܠܹܐ ܝܘܲܚ ܡܲܟܪܘܼܙܹܐ ܒܘܼܬ ܓܵܢܲܢ، ܐܸܠܵܐ ܡܲܟܪܘܼܙܹܐ ܝܘܲܚ ܕܝܼܫܘܿܥ ܡܫܝܼܚܵܐ ܝܼܠܹܗ ܡܵܪܝܵܐ، ܘܕܐܲܚܢܲܢ ܝܼܘܲܚ ܪܹ̈ܓܵܘܵܬܹ‌ܐ ܐܸܠܵܘܟ݂ܘܿܢ ܒܘܼܬ ܚܵܬܸܪ ܕܝܼܫܘܿܥ.

⁶ ܣܵܒܵܒ ܐܲܠܵܗܵܐ ܕܐܡܝܼܪܹܗ: ”ܡ̣ܢ ܚܸܫܟܵܐ ܒܲܗܪܵܐ ܙܵܪܹܩ،“ܥܒ݂ܝܼܕ ܠܹܗ ܒܲܗܪܵܐ ܕܙܵܪܹܩ ܓܵܘ ܠܸܒܲܢ ܕܝܵܗܒܹܠ ܒܲܗܪܵܐ ܕܝܕܵܥܬܵ‌ܐ ܕܬܸܫܒܘܿܚܬܵ‌ܐ ܕܐܲܠܵܗܵܐ ܒܦܵܬܵ‌ܐ ܕܡܫܝܼܚܵܐ.

⁷ ܐܝܼܢܵܐ ܐܝܼܬ ܠܲܢ ܐܵܗܵܐ ܣܝܼܡܬܵ‌ܐ ܒܡܵܐܢܹ̈ܐ ܕܛܝܼܢܵܐ ܠܡܲܚܙܘܼܝܹܐ ܐܵܗܵܐ ܓܲܒܵܪܘܼܬܵ‌ܐ ܕܚܲܝܠܵܐ ܡ̣ܢ ܐܲܠܵܗܵܐ ܝܠܵܗ̇ ܘܠܵܐ ܡܸܢܲܢ.

⁸ ܦܝܼܫܹܐ ܝܘܲܚ ܡܘܼܠܝܸܨܹܐ ܡ̣ܢ ܟܠ ܓܹܒܵܐ، ܐܝܼܢܵܐ ܠܹܐ ܝܘܲܚ ܛܒ݂ܝܼܚܹܐ. ܦܝܼܫܹܐ ܝܘܲܚ ܚܒ݂ܝܼܛܹܐ ܒܚܘܼܫܵܒܲܢ̈، ܐܝܼܢܵܐ ܠܹܐ ܝܘܲܚ ܩܛܝܼܥܘܼܗ̇ ܗܹܒ݂ܝܼܲܢ،

⁹ ܦܝܼܫܹܐ ܝܘܲܚ ܟܘܼܡܪܹܐ، ܐܝܼܢܵܐ ܠܹܐ ܝܘܲܚ ܦܝܼܫܹܐ ܫܒ݂ܝܼܩܹܐ، ܦܝܼܫܹܐ ܝܘܲܚ ܡܘܼܢܦܸܠܹܐ، ܐܝܼܢܵܐ ܠܹܐ ܝܘܲܚ ܛܠܝܼܩܹܐ.

¹⁰ ܟܠ ܙܲܒ݂ܢܵܐ ܛܥܝܼܢܹܐ ܝܘܲܚ ܒܦܲܓ݂ܪܲܢ ܡܵܘܬܵ‌ܐ ܕܝܼܫܘܿܥ، ܕܐܘܼܦ ܚܲܝܹ̈ܐ ܕܝܼܫܘܿܥ ܦܵܝܫܝܼ ܚܸܙܝܹܐ ܒܦܲܓ݂ܪܲܢ.

¹¹ ܣܵܒܵܒ ܐܲܚܢܲܢ ܕܝܼܘܲܚ ܚܵܝܹ̈ܐ، ܒܟܠ ܥܕܵܢܵܐ ܦܝܵܫܵܐ ܝܘܲܚ ܣܘܼܦܝܹܐ ܠܡܵܘܬܵ‌ܐ ܒܘܼܬ ܚܵܬܸܪ ܕܝܼܫܘܿܥ، ܕܦܵܝܫܝܼ ܚܸܙܝܹܐ ܚܲܝܹ̈ܐ ܕܝܼܫܘܿܥ ܓܵܘ ܦܲܓ݂ܪܲܢ ܡܵܝܘܿܬܵ‌ܐ.

¹² ܗܵܕܟ݂ܵܐ ܡܵܘܬܵ‌ܐ ܒܸܦܠܵܚܵܐ ܝܠܹܗ ܒܝܼܲܢ، ܐܝܼܢܵܐ ܚܲܝܹ̈ܐ ܒܸܦܠܵܚܵܐ ܝܢܵܐ ܒܝܼܵܘܟ݂ܘܿܢ.

¹³ ܐܲܝܟ݂ ܕܝܼܠܹܗ ܟܬܝܼܒ݂ܵܐ: ܗܘܼܡܸܢܝܼ، ܘܒܘܼܬ ܐܵܗܵܐ ܗܘܼܡܙܸܡ ܠܝܼ، ܐܘܼܦ ܐܲܚܢܲܢ ܗܲܪ ܒܗ̇ܘ ܪܘܼܚܵܐ ܕܗܲܝܡܵܢܘܼܬܵ‌ܐ ܗܘܼܡܸܢܲܢ، ܘܒܘܼܬ ܐܵܗܵܐ ܗܘܼܡܙܸܡ ܠܲܢ.

¹⁴ ܣܵܒܵܒ ܒܝܼܕܵܥܵܐ ܝܘܲܚ، ܕܗ̇ܘ ܕܡܘܼܩܸܡ ܠܹܗ ܠܡܵܪܲܢ ܝܼܫܘܿܥ ܡ̣ܢ ܓܵܘ ܡܝܼ̈ܬܹ‌ܐ ܒܸܬ ܡܲܩܸܡ ܐܘܼܦ ܐܸܠܲܢ ܥܲܡ ܝܼܫܘܿܥ، ܘܒܸܬ ܡܲܩܪܸܒ݂ ܠܲܢ ܥܲܡܵܘܟ݂ܘܿܢ ܠܟܸܣܠܹܗ.

¹⁵ ܟܠܵܗ̇ ܐܵܗܵܐ ܠܝܘܼܬܪܵܢܵܐ ܕܝܼܵܘܟ݂ܘܿܢ ܝܼܠܵܗ̇، ܕܫܵܦܵܩܲܬ ܕܝܼܠܵܗ̇ ܒܸܙܝܵܕܵܐ ܓܵܘ ܐܢܵܫܹ̈ܐ ܪܵܒܵܐ، ܡܲܙܝܸܕܵܐ ܫܲܟܲܪܬܵ‌ܐ ܠܚܸܩܪܵܐ ܕܐܲܠܵܗܵܐ.

¹⁶ ܒܘܼܬ ܐܵܗܵܐ ܠܵܐ ܣܵܩܕܲܚ، ܐܘܼܦ ܐܸܢ ܕܒܲܪܢܵܫܲܢ ܒܲܪܵܝܵܐ ܒܸܚܪܵܒ݂ܵܐ ܝܠܹܗ، ܐܝܼܢܵܐ ܒܲܪܢܵܫܲܢ ܓܵܘܵܝܵܐ ܦܝܵܫܵܐ ܝܠܹܗ ܚܘܼܕܸܬܵ‌ܐ ܝܵܘܡܵܐ ܒܝܵܘܡܵܐ،

¹⁷ ܣܵܒܵܒ ܐܘܼܠܨܵܢܲܢ ܩܲܠܘܼܠܵܐ ܘܥܵܒ݂ܘܿܪܵܐ ܗܲܕܘܼܪܹܐ ܝܠܹܗ ܐܸܠܲܢ ܚܸܩܪܵܐ ܥܵܠܡܝܼܢܵܝܵܐ ܕܙܵܐܹܕ ܒܪܲܒܘܼܬܵ‌ܐ.

¹⁸ ܒܘܼܬ ܐܵܗܵܐ ܠܹܐ ܝܘܲܚ ܓܲܫܘܼܩܹܐ ܠܡܸܢܕܝܼܵܢܹ̈ܐ ܕܦܝܵܫܵܐ ܝܢܵܐ ܚܸܙܝܹܐ ܐܸܠܵܐ ܠܐܵܢܝܼ ܕܠܹܐ ܝܢܵܐ ܦܝܵܫܵܐ ܚܸܙܝܹܐ، ܣܵܒܵܒ ܡܸܢܕܝܼܵܢܹ̈ܐ ܕܟܹܐ ܦܵܝܫܝܼ ܚܸܙܝܹܐ ܙܲܒ݂ܢܵܢܵܝܹ̈ܐ ܝܢܵܐ، ܐܝܼܢܵܐ ܐܵܢܝܼ ܕܠܹܐ ܦܵܝܫܝܼ ܚܸܙܝܹܐ ܥܵܠܡܝܼܢܵܝܹ̈ܐ ܝܢܵܐ.