ܒ ܩܘܪ̈ܢܬܝܐ 2 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܗܵܕܟ݂ܵܐ، ܩܛܝܼܥ ܠܝܼ ܒܠܸܒܝܼ ܕܠܵܐ ܐܵܬܹܝܢ ܠܟܸܣܠܵܘܟ݂ܘܿܢ ܚܕܵܐ ܓܵܗܵܐ ܐܚܹܪܬܵ‌ܐ ܒܦܵܫܲܡܬܵ‌ܐ،

² ܣܵܒܵܒ ܐܸܢ ܐܵܢܵܐ ܡܲܦܫܸܡܸܢܵܘܟ݂ܘܿܢ، ܡܵܢܝܼ ܒܸܬ ܡܲܚܕܹܐ ܠܝܼ ܫܒ݂ܘܿܩ ܡ̣ܢ ܗ̇ܘ ܕܡܘܼܦܫܸܡ ܠܝܼ؟

³ ܟܬܝܼܒ݂ ܠܝܼ ܐܵܗܵܐ ܡܸܢܕܝܼ ܣܵܒܵܒ ܐܝܼܡܲܢ ܕܐܵܬܹܝܢ ܕܠܵܐ ܦܵܝܫܹܢ ܡܘܼܦܫܸܡܵܐ ܒܐܵܢܝܼ ܕܘܵܠܹܐ ܝܠܵܗ̇ ܕܡܲܚܕܝܼ ܠܝܼ، ܣܵܒܵܒ ܚܵܬܸܪܓ̰ܲܡܥ ܝܼܘܸܢ ܕܟܠܵܘܟ݂ܘܿܢ ܒܸܬ ܫܲܪܸܟܝܼܬܘܿܢ ܒܚܲܕܘܼܬ‌ܝܼ.

⁴ ܟܬܝܼܒ݂ ܠܝܼ ܐܸܠܵܘܟ݂ܘܿܢ ܒܐܘܼܠܨܵܢܵܐ ܓܘܼܪܵܐ ܘܒܡܲܪܝܼܪܘܼܬܵ‌ܐ ܕܠܸܒܵܐ ܘܒܪܵܒܵܐ ܕܸܡ̈ܥܹܐ، ܠܵܐ ܕܡܲܦܫܸܡܸܢܵܘܟ݂ܘܿܢ ܐܸܠܵܐ ܕܡܲܕܥܸܢܵܘܟ݂ܘܿܢ ܟܡܵܐ ܚܘܼܒܝܼ ܪܵܒܵܐ ܝܠܹܗ ܐܸܠܵܘܟ݂ܘܿܢ.

ܦܘܚܠܐ ܕܚܛܝܐ

⁵ ܐܝܼܢܵܐ ܐܸܢ ܚܲܕ ܗܘܝܼܵܐ ܝܠܹܗ ܥܸܠܬܵ‌ܐ ܕܦܵܫܲܡܬܵ‌ܐ، ܠܹܐ ܝܠܹܗ ܐܸܠܝܼ ܡܘܼܦܫܸܡܵܐ، ܐܸܠܵܐ، ܕܠܵܐ ܓܲܪܘܸܣܸܢܹܗ ܚܲܒܪܵܐ، ܒܚܕܵܐ ܐܘܼܪܚܵܐ، ܡܘܼܦܫܸܡܵܐ ܝܠܹܗ ܠܟܠܵܘܟ݂ܘܿܢ.

⁶ ܒܲܣܵܐ ܝܠܵܗ̇ ܐܸܠܹܗ ܬܲܥܠܲܡܬܵ‌ܐ ܕܚܲܕ ܗܵܕܟ݂ܵܐ ܐܢܵܫܵܐ ܒܝܲܕ ܪܵܒܵܐ.

⁷ ܡ̣ܢ ܓܹܒܵܐ ܕܐܵܗܵܐ ܘܵܠܹܐ ܝܠܵܗ̇ ܕܦܲܚܠܝܼܬܘܿܢ ܘܝܵܗܒ݂ܝܼܬܘܿܢ ܠܸܒܵܐ ܠܚܲܕ ܗܵܕܟ݂ܵܐ ܐܢܵܫܵܐ، ܕܠܵܐ ܦܵܐܹܫ ܒܠܝܼܥܵܐ ܒܦܵܫܲܡܬܵ‌ܐ ܒܘܼܫ ܙܵܘܕܵܐ.

⁸ ܒܘܼܬ ܐܵܗܵܐ ܦܲܪܦܘܼܠܹܐ ܝܘܸܢ ܕܡܲܩܘܹܝܬܘܿܢ ܒܝܼܹܗ ܚܘܼܒܵܘܟ݂ܘܿܢ.

⁹ ܐܘܼܦ ܣܵܒܵܒ ܐܵܗܵܐ ܟܬܝܼܒ݂ ܠܝܼ ܐܸܠܵܘܟ݂ܘܿܢ، ܕܓ̰ܲܪܒܸܢܵܘܟ݂ܘܿܢ ܕܐܸܢ ܒܸܬ ܗܵܘܹܝܬܘܿܢ ܡܲܨܝܸܬܵܢܹ̈ܐ ܒܟܠ ܡܸܢܕܝܼ.

¹⁰ ܠܡ̇ܢ ܕܐܲܚܬܘܿܢ ܦܲܚܠܝܼܬܘܿܢ، ܐܘܼܦ ܐܵܢܵܐ ܦܲܚܘܼܠܹܐ ܝܘܸܢ. ܣܵܒܵܒ ܡܸܢܕܝܼ ܕܐܵܢܵܐ ܦܘܼܚܠܵܐ ܝܘܸܢ - ܐܸܢ ܐܝܼܬ ܗܘܵܐ ܡܸܢܕܝܼ ܠܦܲܚܘܼܠܹܐ - ܥܒ݂ܝܼܕܵܐ ܝܘܸܢ ܒܘܼܬ ܕܝܼܵܘܟ݂ܘܿܢ ܩܲܕܡ ܦܵܬܵ‌ܐ ܕܡܫܝܼܚܵܐ.

¹¹ ܕܠܵܐ ܥܵܒܹܕ ܠܹܐܒܹ̈ܐ ܐܸܠܲܢ ܣܵܛܵܢܵܐ، ܣܵܒܵܒ ܟܹܐ ܝܵܕܥܲܚ ܠܗܘܿܢ ܦܲܢܕܘܼ̈ܗ‌ܝ.

ܦܠܚ̈ܐ ܕܘܥܕܐ ܚܕܬ‌ܐ

¹² ܐܝܼܡܲܢ ܕܐܬܹ‌ܐ ܠܝܼ ܠܛܪܘܿܐܘܿܣ ܡܲܟܪܘܼܙܹܐ ܐܹܘܲܢܓܲܠܝܼܘܿܢ ܕܡܫܝܼܚܵܐ، ܡܵܪܝܵܐ ܦܬܝܼܚ ܠܹܗ ܐܸܠܝܼ ܬܲܪܥܵܐ،

¹³ ܐܝܼܢܵܐ ܪܸܥܝܵܢܝܼ ܠܹܐ ܝܗܘܵܐ ܫܸܠܝܵܐ، ܣܵܒܵܒ ܠܵܐ ܡܘܼܫ݇ܟ̰ܸܚ ܠܝܼ ܐܲܚܘܿܢܝܼ ܛܸܛܘܿܣ ܬܵܡܵܐ. ܗ̇ܝܓܵܗ ܐܡܝܼܪܝܼ ܐܸܠܵܝܗ‌ܝ: ”ܦܘܼܫܘܼܢ ܒܫܲܝܢܵܐ،“ ܘܐܙܝܼܠ ܠܝܼ ܠܡܵܩܹܕܘܿܢܝܼܵܐ.

¹⁴ ܫܲܟܘܼܪܹܐ ܝܘܸܢ ܠܐܲܠܵܗܵܐ ܕܟܹܐ ܝܵܗܒܹܠ ܠܲܢ ܓ݂ܵܠܹܒܘܼܬܵ‌ܐ ܒܡܫܝܼܚܵܐ ܒܟܠ ܥܕܵܢܵܐ، ܘܟܹܐ ܓܵܠܹܐ ܒܝܼܲܢ ܪܹܝܚܵܐ ܕܝܕܵܥܬܹܗ ܒܟܠ ܕܘܼܟܵܐ.

¹⁵ ܣܵܒܵܒ ܪܹܝܚܵܐ ܒܲܣܝܼܡܵܐ ܕܡܫܝܼܚܵܐ ܝܘܲܚ ܠܟܸܣ ܐܲܠܵܗܵܐ، ܠܐܵܢܝܼ ܕܦܪܝܼܩܹܐ ܝܢܵܐ ܘܠܐܵܢܝܼ ܕܒܸܛܠܵܩܵܐ ܝܢܵܐ.

¹⁶ ܠܚܲܕܟܡܵܐ ܪܹܝܚܵܐ ܕܡܵܘܬܵ‌ܐ ܝܘܲܚ ܠܡܵܘܬܵ‌ܐ، ܘܠܐܚܹܪ̈ܢܹܐ ܪܹܝܚܵܐ ܕܚܲܝܹ̈ܐ ܠܚܲܝܹ̈ܐ. ܘܡܵܢܝܼ ܝܠܹܗ ܚܫܝܼܚܵܐ ܠܐܵܗܵܐ ܫܘܼܠܵܐ؟

¹⁷ ܠܹܐ ܝܘܲܚ ܡܐܲܝܟ݂ ܪܵܒܵܐ ܐܚܹܪ̈ܢܹܐ ܕܚܵܒ݂ܛܝܼ ܠܵܗ̇ ܗܹܡܸܙܡܵܢ ܕܐܲܠܵܗܵܐ، ܐܸܠܵܐ ܒܡܫܝܼܚܵܐ ܟܹܐ ܗܲܡܙܸܡܲܚ ܩܲܕܡ ܐܲܠܵܗܵܐ ܒܡܗܘܼܡܢܘܼܬܵ‌ܐ، ܐܲܝܟ݂ ܐܢܵܫܹ̈ܐ ܫܘܼܕܪܹ̈ܐ ܡ̣ܢ ܐܲܠܵܗܵܐ.